vun Johnny Meyer

De Pingelkassen harr sik jo meld un dor geevt jo kien entschülligen, dor moss een jo hen un antwurten, dat hört dor jo so mit to, to'n Leven. Vor allen wenn een up disse Siet vun de Eer wohnen deiht.

"Moin, Moin mien Jung wi geiht di dat? Dien Fro uk?, Jo ,jo is jo goot, wi wullen jo woll maal even besöken. Dat is jo goot dat jo dat passen deiht, denn kaamt wi in August, un wat ik noch seggen wull, de halve Naverschup kummt mit. Wi willt nu nich all to lang snacken, anners ward dat to düür, so, denn Tchüüß." Klick, un se harrn uk all woller uphungen.

Ik harr jo nix seggt, harr kien Wurt dor mit twüschen flicken kunnt, dor weer kien Gelegenheit to wen. De ganze snackeree keem vun annern End.

Nu moss ik eers maal överleggen wat sik dor all begeben harr.

Jo, dat weer't, "dat gifft Besöök."

Dat moss ik denn jo woll eers maal mien Fro verklookfiedeln. Moss er vertelln dat er dat uk passen de, dat de halve ole Naverschup kaamen deiht. Ik wuss nu jo Bescheed, dat harrn se mi jo just vun de anner Siet vertellt.

Ik fattde mi nu sülven an't Kinn, at wenn ik soon Zeegenbort harr, un weer nu fix an't överleegen. Och wat, denk ik so, wat wull't dor noch eers veel besnacken, dor töv man noch mit, sowat dat ielt nich. Swieg man still, kummt Tiet, kummt Rat.

Wenn een dor so över na denken deiht, dat weer jo ne moje Bestellung, de halve Naverschup. Wi hefft doch kien Hotel un anboon könnt wi uk nich eers, dor to is kien Tiet. De Lüüd mossen doch tominnst een eegen Slaapstä hebben. Unner Ümstand kunnen wi jo de Naverschup in half deelen, denk ik so, de een Koppel de kann ja vorut kamen un de annern, de kamt tokamen Jahr. Dor weern denn jo so allerhand Saaken de noch ut to knobeln weern. Blots kien Upreegung, all'ns sinnig angahn laten.

At ik dat nu mien Süster anvertrohn de, dor meen se blots "dor hess dien Muul all woller maal to wiet up reeten, wat? Harrs man vertell'n schullt da't hier veel reegen deiht un nich so moje is, nu seeg man to, wor dor mit klar kumms." Dat hullp mi uk nix, ik stunn nu dor, at soon Oss vor'n Barg, un wuus nich wor dat wieter gung.

Over na'n paar Daag keem denn jo een Breef ut de ole Heimaat. Weer all fien mit Schrievmaschien schreeven un so fiene Utdrüche, at se bruuken deen, dat weer all meis Vornehm. Se wull'n denn doch ut Vörsicht, schriftlich noch maal even anfroogen of dat denn woll all up de Reeg weer, dat se kamen deen, un dat se mit dree Personen kamen wuuln.

Dat weern denn jo miene olen Kumpels ut de Kinnertiet. Uk de Schooltiet harrn wi tohoop dör maakt. De Lehrtiet, wat weer dat ne moije Tiet wesen, at wi all tohoop Stifte weern. De een de gung in't Iesen, de anner in't Holt, een annern de Strippentrekker weern wull un de anner, dat weer de Bookwurm, he arbeit vör'n groot Verkoophuus. All tohoop weern wi na'n Danzen gahn un uk in de Dorpfüürwehr weern wi wesen, so manch eenen Brand harrn wi löscht, uk usen eegen.

Dree Mann, dat gung jo noch, dat weer jo man half so slimm. Denn harrn wi genoog Betten un se all kunnen eer eegen Slaapstuuv hebben. Uk mit Auto funktoneerde dat denn beter, wenn wi maal wor hen föhren wulln, denn bruukt wi uk kienen Bus anhürn, to'n rumjückeln.

Dat seeg jo ganz anners ut, sowat dat kunn Spoß maaken, maal woller över de olen Tieten snacken, ole Biller bekieken, dat hörde sik rein weg goot an.

"Wat steiht dor denn in denn Breef in, nu lees mi dat doch vör" seggt mien Fro "nu översett dat man even, so dat ik dat uk verstahn kann." Jo, denn moss ik jo rut mit de Spraak.

Dat weer jo moje, dat de kamen willt, denn könt wi jo hier henn, un dor hen un dit maaken un dor tokieken un wat se nich all harr. Se freide sik dor all meiß mehr to at ik, dat wi nu Besöök kreegen ut de ole Heimaat.

Jo, un so is't denn uk wesen, wi hefft de beste Tiet harrt, na so veele Jahr. Fiefundartig Jahr weernt denn jo all, harrn wi utreeken't. Na de Snackeree to telln, over weer dat meiß at wenn dor nix twüschen fehlt harr. Wi keemen all fein mit' n anner'n trecht, just so at fröher, un so schull't denn jo uk wesen.

Trüch na: 

Mien Tohuus Siet

E-mail:

Plattsnackerjohn@aol.com