Safari in Tanzania

Plattdueuetsch is un blifft mien Mudderspraak

Uk in Afrika ward Plattdueuetsch snackt.

Geschichten vun een Safari mit mannig een Bild,

beleevt un vertellt vun Johnny Meyer, Nov. 2004

Beho-Beho-Camp, Selous Game Reserve

Dat weer all midden in de Nacht, at wi in Dar es Salamm, de Hauptstadt vun Tanzenia ankemen. Us Taxi fahrde us na de Hollyday Inn. Wi weern wirklich froh unner de Deek krupen to koennen, um to slapen, denn wi weern eenfach veel to moed um us noch um wat anners to kuemmern.

Dit Hotel weer ganz sauber un modern inricht. Wi harrn dat arrangiert all um kort na Fief to froehstuecken, denn um sess Uhr wurrn wi all afholt. Dat weer jo noch duster to de Tiet, sehn kunnen wi nich all to veel. Wat wi aver woll sehn hefft, weer dat disse Stadt nich all to sauber weer. De Gestank vun brennenden Affall stung us inne Naes. Use Fahrer leeg mit eene Hand up de Hupe un fahrde mit de anner. De Verkehr weer um disse Tiet noch nich all to slim.

De Personenbefoerderung weer een beten anners at wi dat woll kennt, aver hier speelde dat kiene groode Rull of een up’t Dack vun een Auto seet, up’t Trittbrett or mit een Foot up de Anhaengerkupplung stund, de Pries weer de glieke, um mit to fahrn.

At wi up’n Flugplatz ankeemen, harrn wi noch kiene Tickets um wieter to fleegen, aver lang durrde dat nich un een fruendlicher junger Mann kem up us to un frogt of wi woll de rechte Party weern, hier sind de Tickets, blieft hier, ik kam glieks woller un bring jo an Fleeger. De junge Mann hett uk dar vor sorgt dat ik neben denn Pilot sitten kunn. Somit harr ik ne wunnerbore Utsicht un kunn goot Biller maken.

Um in Africa, midden in Busch up eene Sandrullbahn to landen, weer vor usen Pilot kien Problem, he maakte een niedrigen Pass oever de Rullbahn, um irgent welcke Deerten weg to jogen un denn landeten wi, nadem wi noch mal woller een grooten Kreis flogen harrn. Us Taxi toevte all an’ne Siet vun de Rullbahn, anners weer hier nix to sehn. Nur Busch in alle Richtungen. Mit groode, verdroegte un verbleekene Elephanten Knocken harrns se denn Nam Beho-Beho in Sand utschreben, so dat man dat vun boben ut een Fleeger goot lessen kunn. Disse Camp weer total oeverholt wurrn un eers siet een paar Monate woller in Bedreef.

Na een korte, 1 KM lange Fahrt doern Busch, leeg de Empfangshalle vor us. Mit een warmed natted Handdook, un een Glass Fruchtsaft, wurrn wi in Empfang nahmen, so dat wi us eers maal een beten erfrischen kunnen.

Vun de nee’n Inhabers wurrn wi informeert, wie dat hier to Land all lopen de. Na een Tass Tee, wurrn wi na us Banda (Kabine) brocht.

use Banda

Wenn ji duschen willt, un warmed Water bruukt, denn moet ji us dat eers weten laten, denn boet wi denn Heetwater Tank an un denn hefft ji soveel heet Water at ji bruukt. Wi wulln um 5 Uhr morgens duschen, wi harrn heet Water. “De Seep de liggt in dissen Kassen, denn anners kamt de Katekers un freet de up”, seggt Rita noch at se ut de Doer rut gung un us alleen leet.

Nu is dat an’ne Tiet um ut de Koje to rulln, seggt use Fahrer um fiddel vor fief morgens. Wi weern aver all upstahn,. Den heeten Tee harr he all vor de Doer afstellt. Um half sess wull use Fahrer us woller vun use Banda afholn, aver dar stund nu een grooten Elephant midden oevern Footpadd, dicht bi use Doer un roegte sik nich. Mit Steenen smieten um em weg to jogen dat gung uk nich. Dar hett de Fahrer denn Gelaendewagen herfahrt, um dar mit een beten Krach to maken, so dat de Elephant vun suelms weg gung.

Na us Froestueck, gung dat glieks los, use Fotosafari fung goot an. Na een ganz paar Minuten seggt use Fahrer all: ”dar sind Giraffen un dar noch welke un noch mehr”, dat hoerde garnich up.

immer mehr un mehr kemen ut'n Busch

Uemmer mehr un mehr keemen ut denn Busch, woll 15 - 20 Giraffen, groode un littje, leepen nu oever de Rullbahn. Dar is uk noch een Hyaene. Lang duurde dat nich un een paar annere Elephanten weern in Busch an’t rumrieten. Een paar Zebra’s hefft jede Bewegung de wi maakt hefft beobachted, sobold wi to dicht rankeemen, sind se gau ut neit.

De Elephanten hefft ruhig wieter freten

Dat gung ne ganze Tiet doer’n Busch un Savana, hier een paar Gemsen, dar en Elan. denn ne littje Herde vun Elephanten or Gnu’s. Upmaal seeg use Fahrer een Loewin, dar is noch een un dar uk noch een, sess in ganzen leegen dar. De Loewen wulln sik grad wat infangen, aver at dat Gnu dat wahr wurd un gau weglopen is, hefft de Loewen dat gau upgeben. Wi fahrden wieter, dwass oevert Land, um de Loewen denn Weg af to snien, eer se in Busch verswinnen deen. De Loewen leeten sik garnich ut de Ruhe bringen, glieks vor usen Wagen, bleeven se in Schatten leegen . Af un to hefft se us mal ankeeken, over denn leegen se woller dar un hefft alle veer Beenen vun sik streckt. De een or anner vun de Loewen keek mal hoch, aver se wussen woll nich recht wat se mit us anfangen schulln.

Ruhig un gelaaten gung se an us vorbi

dat hett seeker een gooden Kampf af geben, at de Steert verlorn gahn is

Na een korte Tiet leepen se all an usen Safariwagen vorbi, uk de eene de kien Steert mehr harr. Een Wildswien, wat jo nich all to goot sehn kann, keem uk an usen Wagen vorbi. At wi nu wieter jukeln deen, kreegen wi mehr Elephanten, Giraffen, Apen, Baboons, Impala,

Buffalo’s, Gnu’s un wat immer dit ruuge Land up to wiesen harr, to sehn. De Wege weern sehr primitive, dar weern veele utwuschen Staen, de wi umfahren mossen. An besten gung dat man so dwass oevert Land to fahrn. Grenzen geev dat hier nich, dit weer een Gamereserve. Wi bruukten us um wieter nix to kuemmern at de Deerten to bekieken.

De Geier toevt up een goode Gelegenheit

Dar, hess dat mit kreegen, dar sind de Aasgeier an kreisen, dar liggt seeker een Aas. Dwass oevert Land sind wi fahrt, de Acatienboem un Strueker schrammden an usen Wagen langs, at wi de Miegemkenhopen un dat Gebuesch um fahrn deen. Did weer een ruuge Fahrt, wi flogen up use Sitze hen un her. Een Schakal leep mit een halvet Impalababy sinnig up denn Busch to. Nich all to wiet weg dreepen wi up een ganzen Hoopen vun Aasgeier, de sik um de letzten reste vun dat Impalababy targen deen. De Marabustorch stund dar midden twueschen, at wenn he soon Polizist weer. He moss up Affall toeven, denn sien langer Schnabel is nich dar vor dar, um dat Fleesch vun een Aas to rieten.

Hess dat sehn? een Aasgeier keem in siene unbeholpene Art to landen up de annern Geier to un keem boben up de annern Geier to sitten. De Kaempferee fung sofort an.

De Mudder vun dat Impalababy stund nich wiet af un weer an soeken um er Baby woller to finnen, dat weer aver all lange ut een annern reten. So geiht dat ruuge Leben sien Gang in Busch vun Africa

groode Herden kemen af un to

Na us Middageten keem een korte Pause, nu leeg allns in Schatten, dat weer heet, so an de Veertig Grad, aver ganz droeg, sweeten deen wi nich, uk nich in mien Hemd mit lange Aermel un lange Buex un Weste an. Ik harr dat extra antrucken wegen de Moskitos, aver so lange wi fahrn deen, weern uk de Moskitos kien Problem. Kien Luut weer to vernehmen, nur een Vagel hier un dar mal leet wat vun sik geben.

Klock veer geev dat Tee un Koken un denn gung dat woller los.. Ditmal aver to Foot. De Verwalter harr sien Gewehr un Patronen bi sik. To Foot gung dat nu los, een korten Rundgang to maken. Mit jeden Schritt mossen wi dar mit reeken, dat een wild Deert neben us stund. Ne ganze Tiet leepen wi all doert Gelaende, use Verwalter weer grad woller dar bi, us wat to verklarrn, at up maal een Hippo in een utdroegten Fluss um de Ecke plierde. De Hippo weer aver just so verjagt at wi uk, un leep sinnig in de anner Richtung wieter, at wi gau denn Barg hoch leepen.

Kort darup seggt de Verwalter, Speike heete he,. “ Hol dien Kamera praat” he harr’d noch nich ganz seggt, at dar unner us in dat Waterlock up eenmaal een Stampede losgung. Dar weern woll so an de 60- 80 Hippos in denn Fluss, de weern us wahr wurrn un wulln nu int deepe Water. At de Hippo’s nu denn Fluss entlang leepen, hefft de allto hoop ne Wand mit Water vor sik herschoben, dat weer so luut, dar kunns dien Eegen Wurt nich verstahn. At de Hippos denn na een korte Tiet in dat deepe Water sik beruhigt harrn, kunnen wi se goot beobachten. Sinnig gung de Sunn unner, at wi us woller up’n Padd maakten. Use Rundgang gung wieter doer Busch un Savana..

'ne Wand mit Water hefft se vor sik her schoven

To use Oeverraschung harr use Fahrer aver an een mojen Utsichtspunkt een Disch un Stoehle upstellt. Een kolet Beer un Glass Wien un uk de Erdnoeten fehlden nich.

een beten versnuuven, de us goot

Nich mal de Dischdeek harr he vergeten. Dar hefft wi us utruht un to keeken at de Sunn sinnig unnergung. De Eenhemischen seggt dar to een “Sundowner” to hebben. In dustern gung de Fahrt woller na us Camp Beho- Beho. At de Wagen holn de, weer sofort de Bedeenung dar un harr vor jeden een natt Handdook um us to erfrischen.

vun dit Etzimmer kunnen wi de Elephanten sehn

Dat Abendeten wurd up een Dackgoorn reserviert. De Kerossienlampen hungen vun de Boem, um de Mosquitos af to holn. Dar weern aver een ganzen Barg annere Insecten de vun de sneewitten Dischdeeken antrucken wurrn. Dar hefft wi us aver gau an gewoehnt un de vun’n Disch runner flickt, just so at use Verwalters un Bedeenung dat uk deen.

Af un to kunnen wie de Elephanten un uk de Buffalos hoern, at se neben us doern Busch stoebern deen. Up denn Weg na us Banda kunnen wi in Mondschien de Buffalos sehn de nich ganz wiet vun Padd af an grasen weern.

Nu fung dat Nachtkonzert an, dat chirpen vun de Grashoppers, dat knurren vun de Hippos, un dat Geschrei vun de Baboon’s un Aapen, leet nich af. Dartwueschen kunn man de Buffalos un Elephanten hoern. Na een moje warme Dusche unner de Sterne un een kolet Beer up de Veranda, hefft wi us dat Konzert noch ne ganze Tiet mit anhoert. Sinnig sind wi denn aver inslapen.

De Ngorongoro Crater

Intwueschen sind wi umsiedelt, mit een Fleeger oever Zanzibar- Arusha gung dat wieter. Denn hett us use nee’e Fahrer afholt un mit em sind wi na denn Ngorongoro Crater fahrt. Hier bleeven wi in een groote Lodge. Uk hier weer allns up dat Beste bestellt. Dat Eten weer eeniger maten goot, weer aver nich na usen Geschmack. To’n Utsoeken geev dat nich all to veel. Satt sind wi aver wurrn un dat Kilimanjaro Beer smeckte goot.

Aver de tokamen Dag weer goot anfungen, um sess Uhr morgens gung dat all los, dat weer noch balken duster. De Wagen stund all vor de Doer, us Froestueck weer in packt, wi mossen nur noch eben up dat heete Water toeven, um later hen usen Koffee maken to koennen. At wi um de Ecke schieln deen, kreegen wi denn dicken Nebel to sehn, de oevern Crater hung. Aver so eenfach leeten wi us nich denn Dag versaun. Sinnig gung de Fahrt in denn Crater Ngorongoro oever de holperige Straat an de steepe Craterwand entlang. At wi unnen in Crater ankeemen, weer dat all een beten heller wurrn, nur de Nebel hung noch in dicke Wulken oever us. Unnen up denn Bodden vun Crater kunnen wi aver goot sehn. Een paar Strausse maakten all eeren Hochtietsdanz un nu keem uk noch eene enorm groode Herde vun Gnu’s an Horizont in Sicht . Aver hier wo wi us upstunns befunnen, dar weer anners aver uk nich een Deert to erblicken. De Grund darvor leeg neben de Straat. Kiene 20 Meter vun de Straat af, leegen twee ganz groote utwussene Loewen, beide harrn se een groote swarte Maehne.

Een ganz groote Narbe weer up sien Huefte

Achtern up sien Huefte harr de een ne groote Narbe, de he woll vun een Buffalohorn kreegen harr.

Nu keemen uk noch een paar Hyaenen in Sicht, disse beiden Predatoren sind meiss tohoop , de een de verlett sik up denn annern.

Nu wulln wi denn jo uk noch geern een Rhino sehn. At wi denn Parkranger darum frogten, de us grad begegen de, hefft se us up’n rechten Padd schickt. Use Fahrer, de wuss sofort wo dat weer. Intwischen weern de Rhino’s aver veel to wiet vun de Straat afkamen um goode Upnahmen dar vun to maken. Hier druffen wi nich dwass oevert Land fahrn. Kort na dem wi de Idee denn upgeben harrn, keemen wi an eene Hyaenenhoehle or “Den” vorbi, wo so allerhand junge Hyaenen sik in de froehe morgen Sunn, de nu sinnig dor de Wulken schienen de, up warmen deen.

De Hyanen keeken us nur so an

Nu wulln wi us denn noch eben na een paar Geparde umkieken, de sik hier up holn schulln, aver de weern seeker to goot versteckt in’t hohe Grass or woanners henlopen. At wi nu denn littjen Huegel hochfahrn deen, leegen dar allerhand komplette Buffalo scellete rum. At ik deswegen usen Fahrer frogen de, meende he dat vor een paar Jahren de Buffalos eene Antracksvergiftung kreegen harrn. Nich mal de Aasgeiers, wulln sik an de Vergifteten Buffalo Cadaver ranwagen. Boben vun denn Huegel kunnen wi unnen dat Rhino mit eer Baby erblicken, nix at hen. At wi dar denn naeher ran keemen, weern dar all mehr at een Duzend Safari wagens, de sik dat uk ankieken wulln.

Jedt een wull gern de Rhino's sehn

An soon ganz littjen Frischwatersee hefft wi denn anholn um to froehstuecken. In usen Picnic korf weer allns inpackt wurrn, uk de Decke harrn se nich vergeten. De Korf weer noch garnich ganz utpackt at all ne ganze Horde vun alle sorten Vogels direct neben us seeten um wat to ergaunern.

een groode Herde vun Gnu's un Zebra's kem up us to

Eer ik mi verseeg, weer een vun de Vagels all mit mien Schinken afhaut, denn he vun mien Botterbrot klaut harr. All de annern Vagels, achter em an. Nu keem een groote Herde vun Gnu’s achter een Huegel weg, um an denn See to drinken. De Zebra’s de leepen vorne an un uk an de Sieten vun de groote Herde. Wenn de Zebras still stunnen, stund glieks de ganze Herde still. De Gnu’s de koennt nich goot sehn, un de Zebra’s nich goot hoern, so verlaat de beiden sik up een annern.

Veele annere Deerten hefft wi dar unnen in Crater noch to Ogen kreegen. At wi us denn later hen up’n Weg na us Hotel maken deen, keemen wi up een paar groote Elephanten to. “Kiekt jo mal de langen Taen vun denn Grooten an”, seggt use Fahrer, jo de Taen weern bold twee Meter lang. De Elephant kem direct up us to, bleev aver unner een hohen Boom stahn un langte mit sien Ruessel na een groenen Tacken oever sien Kopp. Man goot dat ik miene Kamera praat harr, dat hett een mojet Bild afgeben.

dissen Tacken will ik noch eben mit nehmen

De eenzigste Asphalt straat de na Norden geiht, gung noch een ganz beten wieter, vun dar an weer nix anners at een Sandweg. Wi mossen aver all eer afbegen. Oh Schiet, weern wi doch man up de Straat bleven. Nich mal de Minschen kunnen up dissen Weg mit er Fahrrad fahrn, dat mossen se schuven, so schlecht weer de Straat. Aver dat is hier to Landen de Norm, de meisten Wege sind ganz swor to befahrn.

De Camp Kikoti, leeg soon beten wieter in Busch rin. De Bedeenung keem uk glieks um use Reisetaschen us af to nehmen. In de Empfangshalle stunnen twee Angestellte de een Tablett mit een natted Dook un wat to drinken us anbeen deen. Wi hefft de denn uk mit “Jambo” glieks begroet, so at sik gehoert, wenn man irgent wo to Besoek kamen deit.

Wi hefft uk "JAMBO" seggt, dat heet good'n Dag

Na dem wi us indragen harrn, wurrn wi denn na use Banda begleited. mit dree Mann. Twee weern dar, de Taschen to dreegen, de anner harr een Flitzebogen un een handful mit ganz scharpe Pfeile bi sik.

Een ganz eleganted Telt hett up us toevt

Us Banda weer een ganz groot un eleganted Telt, wat up een holten Plattform upstellt wurrn weer. Uk hier mossen wi eers Bescheed seggen, wenn wi heet Water hebben wulln, aver hier wurd dat Water eers in eene Schuvkar herbrocht, denn in groote Tonnen goten, un denn leep dat all vun suelms, sogar de Toiletten weern so inricht.

hier wurd dat Water in eene Schuvkar herbrocht

Wi leten us Tiet use Saken ut to packen. Dar harrn wi jo nich mit reekend, dat de dree Mann up us toevt hefft, um us woller truech to begleiten. Aver dar stunnen se een beten wieter denn Padd endahl un toevten up us. At ik denn een Kerl frogen de, of se uk to denn Maasai Tribe tohoern den, dar meende he ”oh, noooooo, wi sind Buschmann, dat is ganz wat anners, wi sind veel, veel beter at de Maasai”. Kunn ik dat weten? Mi kem dat all glieks soon beten gediegen vor, denn de weern nich so groot un uk nich so schlank at de Maasai. Denn weer dar noch de Saak mit denn Flitzebogen, dat wull mi uk nich inluchten. De Maasai de dreegt jo nur een Speer un de Buschmann, de dreegt nur een Flitzebogen, mit scharpe Pfeile. De Buschmann eere Naes is ganz platt un ganz breed, dat Gesicht een beten runder, at in Gegensatz to de Maasai er langet Gesicht.

Uk harrn disse Jungs soon Art Uniform an un nich nur een Wulldeek um sik um to wickelt, at de Maasai. Nur vun de Billermakeree, dar wulln se nix vun weten, weern woll soon beten Abergloeoevsch. Weer man goot dat ik eers frogt heff. Ik heff mi reinweg schutert bi denn Gedanken, mi soon scharpen Pfeil ut mien Achterdeel to trecken

Bi de Empfangshalle, weern buten de Stoehl um een Lagerfuer, wat lichterloh brennde, upstellt, un wi wurrn glieks inladen us dal to setten.

Dit weer use Sundowner vunabend

De Bedeenung brocht us wat to drinken un nu kunnen wi us mit de annern Gaeste unnerholn. Dat weern vundagen uk welke ut USA, ut San Diego keemen se. Dit weer us “Sundowner”.

Us Fahrer hett us glieks seggt dat dit dat letzte maal is, wo he bi us an Disch mit eten kann, in all de annern Camps, wo wi vun nu an blieft, is dat nich erlaubt. Wi harrn dat aver ganz gern, dat he bi us weer, denn up de Art kunnen wi us all moi wat vertelln.

hier kunnen wi us moi wat vertelln

Dat Eten wurd in dat Etzimmer upfahrt, wo wi us daal sett harrn, at sowiet weer to eten.

Uk hier weern sneewitte Dischdeeken up’n Disch.

Vun de veelen Mosquitos hefft wi hier nix markt, uk annere Insecten weern hier nich.

Nu kunnen wi uk erkennen dat de beiden Figuren in de Empfangshalle ut Holt weern, de dar mit er Tablett stunnen, kien Wunner dat de us an Abend vordem nich uk mit “Jambo” (gooden Dag) begroet hefft

An tokamen Dag sind wi denn um een grooten See fahrt, wo een annern Fahrer us seggt hett, dat dar Loewen weern de grad een Buffalo erledigt harrn. At wi dar up to kemen, gung de maennliche Loewe grade weg, he is jo de eerste, de wat to eten kriegt, denn kamt de Weiblichen, een na’n annern un denn eers de Babys, wenn dar denn noch wat oever is, anners starvt de littjen un kriegt nix, kien Wunner dat nur een Prozent vun de Babys groot weert, aver dat is de Natur.

De Loewin de nu ran gung to freten, is bold half in denn open Buuk vun denn Buffalo rinkropen um sik de betern Saaken dar rut to holn. All de annern Loewen leegen in Schatten nich wiet af un toevten up eere Gelegenheit sik denn Buuk vull to schlingen.

De Loewin is bold half in den Buuk vun dat Aas rinkropen

Um veer Uhr namiddags geev dat uk hier Tee un Koken, denn keem een korten Gamedrive, uk hier kreegen wi all de normalen Deerten, de wi nu all veele male to Ogen kregen harrn, to sehn. Denn so kort vor sess Uhr schulln wi woller dar wesen um een Sundowner up een besunnern Platz mit to maken. Mit een Gelaendewagen sind wi denn mit alle nee’n Gaeste de sik denn Dag oever in funnen harrn, na dissen heiligen Platz fahrt.

De Masaaikrieger harr een goodet Og vor de wilden Deerten

Hier weer midden in Busch een riesen grooten Backsteen, woll so an de 100 Meters hoch, dar mossen wi denn jo rup. Man kunn furrns erkennen dat wi nich de eersten weern de hier hoch klattert sind. De Utsicht weer ganz moi, gung oevern Busch weg un de Sunnunnergang weer uk ganz moi. Up’n Weg na usen Camp, mossen wi jo woller beschuetzt weern. De Maassaikrieger hett deswegen sien Sitz up’n linken Kotfluegel in nahmen.

He weer ganz stolt up siene Herkunft

Dat Abendeten weer vun Abend in een “Festung” upset wurrn. Een groot Lagerfuer brennde in de Midde un all de Dische un Stoehl weern darum upstellt wurrn. Vun buten weern wi doer een Stickfence, or Poltun gegen de wilden Tiere geschuetzt. Grade at se us de Soppen uploeppeln deen, keemen 5 Maassaikrieger in fulle Tracht, mit Gesang doern Ingang, um us eere Daenze un Leeder vor to dreegen. Lange duurde dat nich un uk wi mossen mit danzen. De fulle Mond in Achtergrund, geev de ganze Upfoehrung een extra Flair.

Dit weer een moje Unnerhaltung

Glieks na dat Abendeten, keem de Nightdrive, or een Nachtfahrt doern Busch. Ik harr mi dar woll to veel vun versproken, aver so slim weer dat nich, mit de wilden Deerten to sehn. Dat eenzigste wat Sposs maakt hett, weer dat mit Hurrah doern Busch to flitzen, um de Deerten to finnen. Dat gung glieks boben oever de Buesche weg, doer dat lange Grass doer, um de grooten Boem umto. Mit een grooten Schienwerfer hefft wi de wenigen Deerten ut eern Slap reten. Wi kunnen glieks erkennen an eere Ogen of dat gefaehrliche Deerten weern or nich. De Predatorers de hefft alle rote Ogen, de annern all gele Ogen, wenn dar dat Licht rin schienen deit.. Na een paar Stunnen gung uk disse Fahrt to Ende. Moed sind wi in us Teltwohnung in’t Bett fulln, dit weer een langen Dag.

Migration Camp, Serengeti

So sinnig weert wi verwoehnt, nadem wi gustern 17 Loewen sehn hefft un vundagen man blots wenige. At Utgliek hefft wi aver 3 Loeppelkoeters, ( Batear fox), 4 Gepards (Cheetahs), un een

Wi hefft jo nix utfreten

Serval Katt (Servalkatze) sehn. denn weern dar 3 Loewen (Lion), un dusende vun Gnu’s, ( Wildebeast).

immer mit de Ruhe

Giraffen, Wildswien, ( Warthog), Kuhantilope (Red Hartebeast), Impala, (Schwarzgesicht- Impala), Springbok, (Springbock) Strauss, (Ostrich),

De Waterbuck stund dar at wenn he anfroren weer, hett sik nich roegt

Wasserbock,(Defassa Waterbuk), Buffalo, Jackal,(Scharbrakenschakal),

De Hyane wull de Aasgeiers nich an't Aas ran laten

Geier, (Vultures) Topi, (Pferdeantilope mit een baby), wat nich mehr at een paar Stunnen old weer, 3 Fleckenhyaene (Hyena), 2 Kliffspringer, 1 Adler, (Eagle) un 3 Reidbocks,( Steenbok)

Hippos, (Hippopotimus)

Hippos sind sehr scheu, sobold Gefahr droht, gaht se int Water

un een Krokodiel,

De Krokodiele sind uk ganz scheu

Littje Mangos, Hyrax, Apen,

Baboons, Lizards,, Weaverbirds, Malibustorch, Gelen Snabel Storch um nur dat up to telln wat so een Dag allns to’n Vorschien bringen deit. De Serengeti hett so een Schatz an Lebewesen, at woll anners selten up de Welt to sehn geben deit.

Baboons sind sehr gefaehrlich un unbereekenbar

Vun wieten kunnen wi all sehn, dat de groote Loewe midden up de Straat leeg. Glieks neben de Straat weer een erlegted Gnu.

Een luut grauln kunn wi hoern at dree Loewen togliek an dat selbe Stueck Fleesch trecken deen. Negen Hyaenen leepen in een grooten Kreis um denn Kadaver um to, wo de Loewen upstunns bi weern.

Midden up de Straat harr he sik henleggt

De Aasgeiers weern noch nich to sehn. Use Kameras leepen up Hochtouren at wi neger keemen. At de Motor afstellt weer, kunnen wi uk dat knacken vun de Knocken hoern, at de Loewen sik dat smecken leeten un dat erlegte Gnu ut een annern reeten. Eene Hyaene harr een slecht Been un slorde dat Been achter sik an. Wi mossen wieter fahrn, us Fleeger toevt nich up us.

dat freten geiht genau na Ordnung, eers de Loewe, denn de Loewin un denn eers kriegt de Loewen Kinner wat to freten

Dat weer goot dat wi bi Tieten all up’n Fluplatz weern, denn de Fleeger keem een beten froeher at anseggt weer. At de Fleeger woller full weer, is de Fleeger uk glieks losflogen, of glieks dat noch een halve Stunn weer bit de afmaakte Tiet keem, de up’n Flugschien stund.

Trüch nah: Mien Heimaat Siet

Plattsnackerjohn@aol.com

My Guestbook