Chel di lâ a parâ lis lenghis al è un fat di umanitât prin di dut, no di culture: che la lenghe che un al sielç al è un alc che al forme part de sô personalitât e, sun chel, la libertât, par nature, e je un dirit di ducj cuancj, che no si tocje. Cun di plui, cui che ai fevele la sô lenghe nol è dome une persone par so cont, ma al è dentri ancje tal grop di ducj chei altris che a fevelin ancje lôr chê stesse lenghe. E chel grop dispès si cjate, dopo, dentri ancje cun altris che a fevelin altris lenghis in congreghis che a an des lôr tradizions vieris di Stât o ben di Aministrazion. Par fâ in mût che ducj a puedin lâ indevant cu la lôr lenghe, dentri di ogni teritori ducj bisugne che a capissin dutis lis fevelis storichis di chê int che e je dal puest, che cussì ducj cuancj a puedin là pardut cun chê che a an sielt. Cheste libertât di lenghe dentri di ogni teritori si pues vêle nome obleant ducj, a scuele, a imparâ - in grâts diferents - dutis lis lenghis des gjernaziis li dal puest (i dialets si à di difindiju, ma ognidun a cjase sô). E cussì lis lenghis storichis che e à la int di une regjon, come chei che lis fevelin, si concuistin une place li che ducj a an di capîsi: che al è il spazi che ur covente come minime par vivi. Ve mo alore che i problemis des gjernaziis no si ju suie cul segnâ ancjemò confins di gnûfs Stâts o di distrets li che e je parone une, ma batint che a sein paronis dutis cuantis li che a son: che l'"Europe dai popui" sigûr e à ben di jessi, ma nome che dentri di chê "des regjons"! E il Friûl, regjon storiche dai Langobarts, al è chel nome il puest indulà che si tocjin lis plui grandis cjasis di lenghis de Europe, che a'nd è di Romanics, di Slâfs e Gjermanics. Sì che, la maniere che e à di compuartâsi la int che e je a stâ tal Friûl e pues jessi ancje un spieli - tal ben e tal mâl - par ches altris regjons li che a son plui gjernaziis come tradizion. Cheste tiere indulà che a son cuatri lis lenghis - il furlan, il talian, il sloven e il todesc - e je juste impuartant come farie d'Europe sul front de politiche e in chel de culture dal stâ ben insiemit fra popui diferents. Nol è un impegn di pôc, ma e je sodisfazion. Cheste e je une "mission"!

ALBERT TRAVAIN DI UDIN