大家好！因為SNK將會舉行個KOF'96嘅比賽，而我哋又有去睇其中一個初賽，所以今期就為大家報導吓當日嘅情況。
日期：1996年10月27日
時間：13：00∼17：30
地點：遊戲機城（HONG KONG
GAME CITY）
參賽人數：約40人
出線人數：2人
賽制：先在參賽者中挑選16名強者，再從中挑選2名出線者
強者雲集
殺聲四起
話說初賽嗰日，小弟同米奇&天草四郎時貞一齊去遊戲機城。一去到，就見到一大班機友，而個比賽就啱啱開始咗，咁我哋就梗係企定定睇嘢啦。
嗰日，遊戲機城 嘅老細 馬先生親自落場，做其「初賽」主持人&頒獎嘉賓。佢一見到我哋，就叫我哋玩吓。我哋就梗係落埸同班機友切磋吓，順便可以測試吓佢哋嘅力量去到乜嘢境界。佢哋嘅力量，係絕對唔使懷疑嘅（其實係自己慘死），總之就睇到大家十分興奮。
據老細馬先生透露，比賽方法，係先打淘汰賽（行「台主制」），呀馬生話咁可以篩咁啲弱者（好似小弟哩啲弱雞人），並歡迎任何人仕喺哩個時候參加。之後，佢會選出16名勁人入「決賽」，到時會打單循環，贏咗嘅兩人就出線。
喂，你唔手軟嘅咩
首先，第一埸嘅勝利者就做咗台主。哩位人兄，係去開附近埸嘅。為咗比賽，佢已經過咗嚟哩邊操咗幾日（因為要操熟哩邊啲掣），之前小弟都同佢玩過吓，佢好勁㗎。咁之後，佢就要不停接受大家嘅挑戰。基本上，全埸冇人夠佢打。所以，嗰日經常見到一隻打三隻呀，PERFECT呀嘅埸面。佢一直贏咗29鋪，仲未落埸嘅朋友就諗住贏面大啲（大佬，打咗幾個鐘，手軟啦都應該）。點知，到最後，佢足足贏咗39鋪先至有人贏到佢。但根據小弟收返嚟嘅風，哩位人兄最高紀錄，係連贏40幾鋪，而另一位勁人（嗰日過
咗對面海參賽），就試過連贏60幾鋪。所以，要佢哋手軟係件好難嘅事。咁喺哩位人兄俾人「做低咗」之後，老細已經大約挑選咗16位機友出嚟（之後再經一輪賽事作準），準備下一輪賽事嘞。
有客到！
喺當日下晝4點鐘左右，SNK方面嘅特派員到達會埸。佢先睇咗16強嘅名單，然後落埸主持比賽。當時個埸已經有好多機友喺度等開埸，並且圍住部機，搞到好熱鬧，但係又好迫。因為喺哩16人之中，只有兩個人可以出線，所以大家都出盡全力，睇到班觀眾目定口呆，冇嘢好講。喺嗰個時候，最多人用嘅係八神庵、MATURE、CLARK同LEONA。
點收科？
經過一輪高水準嘅比賽（至少小弟見唔到有人用屈招，又或者有人只係盲目咁用超重擊同對手鬥轟），最後終於選出咗兩名出線者（一個係剛才所講嘅台主，另一個係去開
嗰個埸嘅機友，綽號「GO∼LOW」。佢哋都係用MATURE、八神庵同CLARK）。順帶一提，嗰日凡參加比賽嘅朋友，都會得到一張SNK送出嘅POSTER，入到16強嘅朋友就會得到另一張由SNK送出嘅POSTER，兩名出線者，各得到由SNK送出嘅POSTER一張、NEO
GEO手錶一隻& KOF'96 T恤一件。兩位出線者，將會代表遊戲機城，喺1996年11月30日去位於灣仔嘅香港會議展覽中心，參加由SNK主辦，KOF'96比賽嘅決賽。小弟喺
度祝佢哋好運！
BY：ZAC
鳴謝：COMPUTER PLAZA／HONG
KONG GAME CITY
SPECIAL THANX TO：米奇
﹙1996年11月8日﹚