亞洲AM
SHOW 搞得好成功
唔知大家有冇去亞洲AM SHOW？小弟去足三日，頭兩日都係下晝先多人，尤其是有好多考緊試（？）嘅學生哥一考完試就嚟睇嘢。第三日就直情多人都好似早排「輸展」咁。未開場，條人龍就已經排到差唔多到天橋。不過講真，哩個SHOW又真係有好多
嘢睇嘅，除咗各生產商擺出自己嘅GAME出嚟「晒冷」之外，仲有好多比較少見嘅
機種好似跑馬機（成個「馬場」擺喺度嗰部）呀、海報機咁。不過講開海報機，嗰日（11月29日）就真係慘。嗰日小弟走咗去排海報機，都差唔多輪到小弟嘅時候，部海報機突然壞咗。我哋成條人龍足足企咗幾粒字，有關嘅工作人員先至嚟修理，搞到大家大呼「吔咩爹」（日文的「不要呀」）。不過好彩最後小弟都抽到張海報，唔係就真係死咗佢好過。而小弟亦去咗TECMO個鋪位玩「的阿奶（《DEAD
OR ALIVE》）」(玩足三日），仲發現嗰度有位「的阿奶姐姐」（假名，佢係職員嚟）；佢會喺收鋪前走埋嚟同你講（小弟分唔出佢係用把口講定用對眼講……）：「對唔住呀，我哋就嚟收工嘞，你唔好玩咁耐呀。」到收鋪時，佢又埋嚟話（用把口？用對眼？）：「唔好意思，我哋收工嘞，你聽日再嚟過吖！」喺哩個時候，小弟竟然講錯嘢：「咁你哋聽日幾點開呀？」，唉……之但係，第二日，佢竟然坐咗喺JALECO個鋪位，真係唔明……最失敗嘅就係，採訪部去足三日都竟然攝唔到佢個「魂魄」返嚟……另外，小弟喺會場度識到讀友呀樂，大家傾咗一陣，但最後我哋竟然失散咗，下次有緣再見嘅話，小弟一定唔俾你走，一於同你「嗲」個夠。仲有一單小道消息：自從嗰日（11月28日）呀天草佢去
咗某鋪位攞完贈品返嚟之後，佢攞住件贈品自稱「飛機仔」，令到我哋要追封派贈品
嗰位姐姐做「飛機姐姐」。究竟發生咗乜嘢事（小弟唔知，總之唔關小弟事）？但係有件事令小弟唔係咁鐘意嘅，就係喺最後一日（11月30日）個SHOW完嘅時候，有啲朋友竟然走咗去搶啲製造商嘅海報（連框攞），有啲仲叻到強奪啲用嚟宣傳用嘅海報，哩個行為就叫做「偷」（即係「撻」），係刑事罪，捉到就可以「叉廚」你。已知嘅「受害者」有TECMO同SNK，好心啦，想要啲海報就去買啦，有啲仲有得派添，做乜要犯法？講返個SHOW，有幾隻（種）GAME特別「標青」：《GTI
CLUB》、踢波機、海報機、影相機、夾公仔機等等。而CAPCOM個「真人青色小春」就最搶鏡（梗係，全場係得CAPCOM搵人扮GAME人物咋），佢仲會派鎖匙扣俾你。之但係，小春派俾大家嘅，竟然係CAMMY鎖匙扣……
雷氏兄弟又多一名
上期同大家講過哩個《雷電FIGHTERS》啦，大家有冇玩過？小弟就喺「嗰日」（唔好理邊日，總之係「嗰日」）同朋友DAVID（又名32843）一齊去咗「同羅環甘☆」玩。玩後感係：唔錯。老實講，玩開「雷氏兄弟系列（尤其是《雷電》）」嘅機友，都會覺得「改良咗，但係仍然有以前嘅感覺」；而唔玩開嗰班機友又會覺得「幾好，有齊近排射擊GAME好玩嘅元素」。咁又係，哩隻《雷電FIGHTERS》，的確係改良咗唔少：有七部飛機俾你揀，而且架架都有明顯嘅能力分別（慢嘅可以慢到似隻王八，「焗」你要唔好俾敵機出現；快嘅可以快到似導彈，搞到你以為架機失控）。不過今次製造商都算係咁，起碼啲位易走咗、啲「大彈」終於可以用嚟救命、某些敵機嘅飛彈可以射爆，好過以前好多。
「賒粉」吧！機友們
近排好似冇乜新GAME，SNK最近隻「嘩咕嘩咕賒粉（WAKUWAKU
SEVEN）」到咗無耐。啲機友們話唔係太喜歡，話啲公仔太過「卡窿（卡通）」咁話。小弟就玩過吓，發覺幾易上手，動作暢順，出招易，難度又唔高。小弟第一鋪就打咗5粒人，打埋嗰個BONUS先生【即係以前隻「搞乸笑FIGHT（GALAXY
FIGHT）」入面BONUS STAGE嘅人物，「人棍沙包」一個】。橫掂隻《STREET FIGHTER
EX》、《STREET FIGHTER 3》同「SNK新作」（咩新作？睇埋今期哩個專欄就知㗎嘞）都未出街，玩嚟頂吓癮都唔錯。
祝一帆風順
KONAMI喺香港開「分壇」，於是乎就喺11月29號開咗個酒會。小弟有幸得「某機鋪老細」之邀，就同佢去咗酒會，見吓大場面。咁嗰日呀老細仲介紹嗰幾位佢嘅好朋友俾小弟識，好似呀陳先生同翁先生咁。至於KONAMI以後有乜大計？咁就要睇返今期內文
嘞（哩個仲係廣告，如果小弟每個廣告都收返錢，年中都會賺唔少）！不過點都好，小弟都喺度祝KONAMI一帆風順。
有冇的過「的阿奶」
哈哈，小弟終於玩過「的阿奶（DEAD
OR ALIVE）」嘞！感覺實在太美妙嘞（尤其是當用女角嘅時候）！哩隻GAME做得算唔錯，可以發揮到MODEL
2底版嘅機能，關節技嘅表現十分之好，再加上易用嘅反技，實在令小弟一玩再玩，玩完再玩，玩玩玩玩玩！至於如果有機友唔係咁清楚哩隻GAME，可以睇返本誌第33期，嗰期有介紹（赤目黑龍先生執筆。點解哩個又係廣告？）。
拳拳到肉
仲講96
首先又要回答麥菲讀友嘅信件……其實小弟都好想「聲返個依貓」俾你，奈何小弟個腦無此功能，所以對唔住。如果你想收料，咁你就要留意我哋嚟緊嘅介紹，包括有用／冇用嘅連招（例如一擊必殺嘅八稚女），同埋KOF96大賽中班高手所用過嘅戰法。到時你就會知㗎嘞。仲有呀，你話如果將你啲勁招揚出嚟，好容易俾啲後起之秀做低，但你又話自己無敵都好鬼寂寞，咁你即係想點？第一，如果你真係無敵，又點會擔心俾人做低呢？第二，如果啲後起之秀唔識你啲招，都有可能做低你：只要佢喺任何情況下（無論跳前或行過嚟）都只係用超重擊同你鬥轟，你想贏都唔易（小弟就遇過哩啲咁嘅人，佢仲要贏嗰之後喺度也文也武，真真俾佢激死）。其實，打機嘅嘢，梗係大家一齊交流先過癮㗎啦，況且我哋兩個人加埋嘅能力有限，點都唔夠大家一齊研究咁好，你話係唔係？另外，哩個KOF96，喺日本又有嘢搞：先係家用版SURVIVAL
MODE鬥高分比賽，再嚟一個「希望能在KOF97中登場的人物」嘅投票活動。真係唔知97會係點。至於KOF96比賽嘅情況，就請大家睇睇今期嘅介紹啦（哩個明係廣告）。
唔係呀嘛，餓狼又復活？！
上次SNK出嗰隻《REAL BOUT餓狼傳說》，話明係「餓狼最終回」，但係嗰陣時，我哋就諗會唔會出「NEW
BOUT餓狼傳說」（假名）或者「真•餓狼傳說」（都係假名）。終於，SNK公佈嗰會出《REAL
BOUT SPECIAL》。哩集冇咗傑斯大人，多咗光頭伯伯唐褔祿、鬥牛勇士LAURENCE、肥佬「陳先生」同WOLFGANG合共19人。故事未公佈，唔通今集呀WOLFGANG要為細佬報仇？（據SNK方面嘅設定，WOLFGANG係傑斯大人同父異母嘅哥哥……）。照資料顯示，今集只有兩條戰線；體力條BAR同REAL
BOUT嘅一樣；某些必殺技有改動；某些人物有新招，應該有潛在能力。至於實情係點？小弟都想知。只要一有料，小弟一定第一時間向大家報導，請放心。
終於打鑊甘！
拳皇96大賽實錄
日期：1996年11月30日
時間：10：00∼15：00
地點：香港會議展覽中心
參賽人數：64，代表32間遊戲機中心
獎品：（冠軍）SNK 29吋街機一部、獎杯一座
（亞軍）NEO GEO CD主機一部、獎杯一座 （季軍）獎杯一座
超短簡介
就喺比賽當日，各參賽者都已經一早到場，準傋當日嘅賽事。比賽就喺上午10點開始，先打初賽，選出32名出線者。之後，就由哩32名高手順序比賽，揀出16強。然後就由16強中篩剩8強。跟住就休息30分鐘，AND
THEN就選出4強。選完最後兩名出線者（未來拳皇！）之後，就由4強中兩名落選者嚟一場季軍爭奪戰。然後，大會休息30分鐘，等兩位選手&各位觀眾休息休息。最後，萬眾期待，拳皇96之王終於誕生！
超壯烈場面
超感動情景
當日嘅比賽，一大早就有成班機友&觀眾企定定咁喺度圍觀；再加上SNK個鋪又有好多人排隊（排隊攞海報，排隊打機&排隊夾公仔），所以搞到有好多好多人喺度（小弟就覺得個情況有啲似「輸展」嘅�u馬形繩簽名會」），中途仲要暫停一陣，等啲人散咁
啲先。而當日有好多「候選拳皇」嘅朋友、「老死」同「FAN屎」都嚟咗捧場，所以佢哋啲反應最為激烈，而且最為投入。再加上佢哋實在太熱情，其中有啲仲坐咗上比賽台上。不過，佢哋都幾守秩序，並冇影響到啲選手同賽事嘅進行。另外，仲有啲行家（漫畫）同電視台都有派人到場，相信本文出街之時已經有其他報導見咗街㗎嘞。
戰火燎原
最初嘅兩輪比賽（即打32強同打16強嘅48場賽事），選手們嘅質數比較參差，而且佢哋對打嘅方式都比較保守同小心，多數都係打中距離戰，戰況都未算激烈。而嗰陣係一次過開兩部50吋機，兩場兩場咁打，啲機友&觀眾都睇得幾辛苦（一個人有兩隻眼，但唔能夠一隻眼睇一部機，但因時間關係，所以冇計）。到嗰第三輪比賽（打8強嘅16場賽事），機友&觀眾仲睇得幾辛苦，但因為而經篩咁啲「弱嘅高手」，所以賽事較為激烈。
8強出現
經過16場賽事之後，8強順利產生，名單如下：葉彥誠（GAME
CITY）、蘇錦基（輝煌）、鐘君亮（得利）、楊健殷（幸運）、彭志雄（GAME
WORLD）、李慶權（阿波蘿）、盧達明（長江）&羅寶狄（威龍）。之後，大會就休息一陣，將兩部機LINK埋，仲順便「同場加演」一場「姐姐大戰小朋友」。個姐姐就係嚟打氣嘅，而個小朋友，佢嗰日一早10點就到咗，原本佢諗住有得試玩96，但因要比賽，所以失望而回。不過就因為有哩個「同場加演」，所以佢終於得償所願。結果係點就要容後再表。
4強短評（另加ZAC無責任馬後砲的超短個人評價）
最後嘅四強係葉彥誠（用CLARK、MATURE&八神庵，小弟同佢打過，佢隻CLARK最熟）、
彭志雄（用阿金、CLARK&八神庵，小弟覺得佢隻阿金用得好熟，可以「撳住人嚟打」）、
羅寶狄（用八神庵、CLARK同爪仔，佢隻爪仔好熟，令到對手無所適從）同楊健殷（用阿伯、爪仔&MATURE，佢隻阿伯最熟）。經過比賽之後，就由彭志雄
對楊健殷（季軍戰），
葉彥誠對羅寶狄（冠軍戰）。呀楊健殷隻阿伯一隻打
咗呀彭志雄兩隻（阿金同八神庵）。志雄急起直追，先搞掂隻阿伯，然後打到對手隻MATURE死吓死吓。最後一時失手，中咗MATURE嘅超必慘變梗頸四。楊健殷成為季軍。到咗冠軍戰，羅寶狄先用隻八神庵做低對手隻八神，之後呀誠仔就用隻MATURE同自己隻八神報仇；點知呀寶狄一出隻爪仔（主將），就打咗 誠仔隻幾。原本寶狄都諗住有機，但佢班FAN屎太熱情，搞到佢分咗心，令到佢好難集中精神對付誠仔隻CLARK（主將），於是乎……
拳皇96之王結果：
冠軍：葉彥誠
亞軍：羅寶狄
季軍：楊健殷
後記：
喺冠軍賽開始之前，據悉呀誠仔同寶狄私下約定：無論賽果係點，一陣我哋一齊落機鋪再打多鋪，喺冇人騷擾嘅情況下，真真正正較量一下。小弟就冇去到觀戰，至於戰果係點，相信只有佢哋兩個同埋某幾個「知情人仕」先知㗎嘞。
BY：ZAC
鳴謝：COMPUTER PLAZA
協力：ARES／XICO／喬丹
SPECIAL THANKS：ERIC
& THOMAS
感激：基斯
﹙1996年12月6日﹚