又有脾菜、俾塞、比……
啱啱收到呀丁丁君嘅料，喺嚟緊嘅2月中，哩個「孖叉鬆」會有一個比賽，詳情已經貼咗喺「孖叉鬆」入面。各位機友，無論你哋想參加或到時場參觀，都好快啲落去睇睇啦！睇返近來所搞嘅街機比賽嘅反應，到時應該又會人頭湧湧，空前熱烈㗎嘞……
合體，代表乜？
早前收到料，哩個世嘉（SEGA）同萬代（BANDAI，即係出高達嗰間模型廠）將會喺1997年10月合併。哩件事代表咗乜？有乜影響？佢哋兩間嘢合併咗之後，咁以後世嘉啲GAME入面啲嘢好可能會模型化（例如《VIRTUAL
ON》入面啲機械人）。而BANDAI旗下有間叫BANPRESTO嘅廠（出GAME嘅），佢哋合併咗之後，哩個世嘉好可能會同BANPRESTO一齊合作出GAME，哩樣嘢好可能會對業界造成極大嘅衝擊。到時就真係「有戲睇」嘞。至於實情係點？咁就要走著瞧嘞。
今次
嚟真啦！
哩個《REAL BOUT餓狼傳說SPECIAL》就到咗啦，唔知大家有冇玩過？小弟就梗係有操吓啦。今集做得幾好，保持返上集嗰種爽快嘅感覺，畫面又做得幾靚，出招又唔難。今集呀舞小姐又……呀BLUE
MARY佢仲……至於個電腦先生，打頭幾隻嘅時候又唔係咁難，之後就梗係……不過唔緊要，到大家習慣咗之後就唔同講法㗎嘞。之但係，今集有個幾嚴重嘅問題，就係用啲「大粒佬」（好似WOLFGANG）會玩得好辛苦，電腦先生會好老實（兼且唔客氣）咁撳住你嚟打，搞到你想死咗佢算數。依小弟所見，暫時最多人用嘅係TERRY，之後就係呀舞小姐，再落就係阿金同秦崇秀，其它人物就少啲人用。公價四個大洋，有玩趁手呀喂！
仲有得格
講開格鬥GAME，哩個ATLUS嘅《HEAVEN'
GATE》就到咗幾耐，有冇玩過先？小弟
喺嗰日（冇錯，係嗰日）就同友好32843（又名DAVID）一齊玩過，發覺就算冇出招表都唔係咁難玩，只不過啲畫面唔算太正（可能係嗰間機鋪個MON累事），值得一玩。話時話，唔知家用版啲秘技用唔用得返？小弟就好想用吓KURARA。之但係，哩個ATLUS嘅《GROOVE
ON FIGHT》幾時先有得玩先？另外，哩個《FIGHTERS' IMPACT》將會出一個《FIGHTERS'
IMPACT EX》（暫名），隻《FIGHTERS' IMPACT》就做得唔差，但係啲動作就慢咗啲，希望今次哩隻《FIGHTERS'
IMPACT EX》會有所改善啦。除此之外，仲有隻《鐵拳3》同埋《PF 573 PROJECT》，加埋隻《STREET
FIGHTER III》& SNK話會出嘅3D立體格鬥GAME……睇嚟哩個97年真係好難悶。
超級比西把希冠軍賽賽賽賽賽賽賽……
上期小弟咪話有隻趣味版叫《超級比西把希冠軍賽》嘅？上期發咗稿之後，小弟就急急腳咁同32843（冇錯，又係佢）一齊去咗玩（日版）。玩完之後發覺好正。全隻嘢只係用三粒好大粒嘅「掣」嚟玩，啲GAME又唔算難玩，但係啲過版條件就幾麻煩。好彩，我哋都唔使好多個大洋（每人廿個以內）就爆咗機。之係，日版同中文版有啲唔同。除咗語言唔同之外，連啲GAME都唔同咗。而最大嘅分別，就係日版只係得15個GAME，而中文版就有20個GAME。另外，喺某日（係某日，唔係嗰日），小弟就同32843（家陣係唔係唔可以同佢一齊先？）&
X•I•C•O一齊去咗玩哩個《魔法之約會》。入面啲GAME就真係幾難玩，但係到咗「映相時間」，我哋就會情不自禁咁將枝控桿拉↓，然後再撳住個START掣（用嚟ZOOM近鏡）嚟映相，搞到個畫面出現咗一啲好奇異嘅影象。至於哩啲影象係乜？嗯……這個嘛……小弟唔係咁好意思講嘅……大家自己去睇吓啦……
BY：ZAC
﹙1997年1月31日﹚