喂，狼D添
吖
小弟早輪睇新聞紙，見到一單關於機鋪嘅新聞。哩單嘢就堅囉，話有班友仔自認係衙差，走去灣仔某機鋪話要搜查啲毒販留低嘅毒品，跟住就乘機爆竊，有冇搞錯呀？不過好彩，嗰間機鋪嘅「細路電視」就已經攝低咗嗰班友仔嘅魂魄，警方家陣就已經跟進緊，希望好快就可以捉到哩班友仔啦！另外，嗰日小弟就哩件事同啲機鋪老細們傾過，佢哋話原來哩排有一條友仔仲狼，竟然喺佢哋啲場公然咁撬開啲機殼，攞走入面塊底板。唔係吓嘛？咁仲成世界嘅？好彩哩條友仔又已經俾人攝低咗個魂魄，老細們好快就可以捉到佢嘞。不過話時話，點解哩條友仔可以公然咁撬走塊底版而又會冇人發覺？照小弟睇，好可能唔係冇人見到，應該係有人見到，不過冇人理佢。好可能哩條友仔扮到好似啲機鋪工作人員換板，然後就攞走塊底板，咁啲客人就唔會起咁大疑心。據估計，哩條友仔應該好熟底板嘅安裝，如果唔係佢冇可能可以咁快手就攞得走塊板嘅。不過點都好，小弟都好希望老細們可以好快好順利咁捉到哩條友仔，將佢繩之於法，為民除害！
《STREET
FIGHTER EX PLUS》又有新 嘢
哩個《STREET FIGHTER EX PLUS》就已經到咗，唔知大家有冇玩過？好唔好玩呀？有冇睇我哋今期嘅介紹先（此乃廣告）？嗱，小弟就喺個介紹度提到有一個好似「殺意隆」嘅謎之人物啦，但係，近日得好友四眼文嘅介紹及帶埋小弟去睇，原來哩隻嘢仲會有多一個「殺意北斗」（暫名）嘅人物，佢個額頭多咗一條紅色嘅疤痕，十分奇怪。究竟哩個係乜人物？點樣先至有得用？點先有得用「殺意隆」？小弟幾時先會發達？就哩啲一連串嘅問題，小弟就好努力咁去收料。原來哩個叫做「解除血之封印之北斗」。使用方法係：先搵一部喺RANKING畫面中多咗一個北斗嘅《STREET
FIGHTER EX PLUS》，然後喺揀人時將個游標移去豪鬼度撳3吓START掣，然後將個游標移去KAIRI度撳2吓START掣，最後將個游標移返北斗度撳中拳或中腳，咁就會OK。佢個招表如下：
必殺技
肘激崩 ↓↘→＋拳掣
振腳擊 ↓↙←＋腳掣
掌燐擊 肘激崩或振腳擊後↓↙←＋拳掣
SUPER COMBO
氣連射 ↓↙←↓↙←＋拳掣
擊鳳技 ↓↙←↓↙←＋腳掣
連舞 輕拳、輕拳、→、輕腳、重拳
連昇激 ↓↘→↓↘→＋拳掣
嗚呼！要你至死方休！
唔知大家仲有冇玩哩個《STREET
FIGHTER III》呢？練成點呀？今次小弟就想同大家講吓啲一招死但又極難出嘅連續技。好似話呀伊吹，只要你用蹲下重腳→近距離站立重腳擊中對手之後，然後立即行前少少，再出近距離站立重腳，之後再行前少少，又出近距離站立重，再行……咁樣，你就可以吊住對手嚟打，吊到佢暈咗都仲吊，吊到佢至死方休，如果唔鐘意吊死佢，就可以吊到佢暈咗之後放番佢落地，跟住你可以再吊過又得，用超必狠狠地修理佢又得，實在十二分之快感！另外，據呀天草四郎時貞及各方友好
嘅透露，除咗伊吹之外，其它人物都有類似嘅嘢。至於係啲乜招？咁就留番俾各位自己去發現啦！
唔係吓嘛，韓國會出
D咁嘅嘢
近排行開場，見到一部新嘅格鬥GAME，畫面一般，但係絕對唔叫肉酸。隻嘢叫《SD
FIGHTERS》，係韓國間「卓任」出嘅（對上嗰隻叫《POCKET GALS》嘅桌球GAME）。基本上，隻GAME係一班Q版人物互抽，系統方面就有前滾、後滾、閃避、迴避攻擊、儲氣同超必殺技，操作性唔錯，唔會窒吓窒吓。嗰幾日小弟就見到有一班機友喺度煲機。唯一要彈哩隻嘢嘅就係，因為係Q版，所以啲攻擊判定同被攻擊判定會有啲怪。不過點都好，哩個係一個好大嘅進步，希望以後我哋可以見到多啲韓國
GAME啦，努力呀！
打多D飛機啦
哩排啲飛機GAME多咗，好似我哋今期都有介紹嘅《怒•首領蜂》（哩個都係廣告）。哩隻GAME睇落好似好難玩，但係玩落又唔差，而差難度又適中，所以絕對值得一玩。起碼好過同廠（ATLUS）嘅《GROOVE
ON FIGHT》話出話出，出到家陣話會出SS版，但係街機版都唔知幾時先至出，都唔知佢哋喺度搞乜。另外，有一部叫《RED
HAWK》嘅飛機GAME到咗，又係韓國嘢，係一間叫「AFEGA」嘅廠開發嘅。睇畫面似乎唔算係太吸引，但係啲系統呀咁就係啲大路嘢，睇個勢都唔會太衰。
《鐵拳》真係好似鐵咁堅？
大家有冇玩《鐵拳3》？聽啲機鋪老細透露，近排哩隻GAME有上昇嘅趨勢。可能因為近來啲新招指令開始見街啦！老細們都話哩排啲機友都不停咁喺度試招。不過話時話，有啲爆咗機嘅機友同小弟講，話今期嘅「大佬」會喺你贏咗佢一個ROUND之後捉住呀三島平八，然後同佢合體，跟住就會變咗一條西方龍嚟同你打。唔係咁神化吓嘛？不過如果係咁，小弟就一定會努力苦練，等小弟都可以見吓哩條「西方龍」喺乜傢伙都好！加油呀ZAC！
《VIRTUA
FIGHTER3》出改版！
收到可靠消息，哩個《VIRTUA
FIGHTER3》將會喺近期推出一個改版，但係並未有進一步資料。照估計，哩個改版會好似上次個《VF2.1》咁，改咗各人物嘅攻擊判定咁，但係唔知有冇新招。不過點都好，一有新料，小弟一定第一時間同大家報導嘅。
BY：ZAC
鳴謝：遊戲機城
﹙1997年4月25日﹚