頂你粒磚
話說某日小弟去咗「巡場」，咁啱撞到「舊相好」呀LEMON。大家傾咗一陣，都發覺近排冇乜機打。鬼咩！喺大作最快都要暑假或之後先至出，哩排唯有忍吓先啦！不過話時話，小弟「發現」咗一隻幾好玩嘅GAME，就係KANEKO隻《VS
BLOCK BREAKER》嘞。哩隻GAME都出咗一排，開頭只係見喺姐姐玩，心諗哩喺係正常現像。之但係，近排見到有好多哥哥都玩，於是小弟又走去學人玩，點知一玩之下就上咗癮。雖然話玩撞磚冇乜特別，最多咪係玩者塊「彈磚板」可以彈吓彈吓？點知哩隻GAME有喺唔同，就係一路玩，畫面右邊會一直迫過嚟，迫到咁上下就會GAME
OVER，咁咪會好刺激囉？而粒「小丸子」每次反彈嘅角度都會唔同囉？於是乎，小弟就好落力咁將哩隻GAME介紹俾阿三、ARES、丁丁（包埋J.J）同赤目黑龍等人，大家玩過之後都好開心，丁丁君玩完之後仲話隻GAME夠「地下」添！
炸死你個死人頭（PART
II）
哩個《BOMBER MAN》最新VERSION《NEO
BOMBER MAN》終於到咗，小弟都有玩過吓。開頭以為《BOMBER MAN》出咗咁多集，今次都應該冇乜新嘢啦啩？點知，今次有得玩故事模式，又可以同電腦玩對戰。對戰嗰陣，電腦仲會好落力咁用佢喺炸彈
嚟封你後路，令你慘被炸死，真陰毒！而且喺故事模式入面，都有好多好好玩嘅道具，例如「飛行艇」，玩者可以搭哩架嘢喺版圖入面周圍走，都幾過癮㗎！橫豎近排冇乜新GAME到，大家不妨玩吓啦。
《鐵拳3》出舊人物？
有讀友來電問，《鐵拳3》入面啲隱人物點出？咁小弟就長氣啲講多次：當機鋪裝哩塊板而又一直唔拆佢，到咗某個時候，隻GAME就會自動加多一個人物，再過一段時間，又會自動出多一個……情況就同《鐵拳2》嗰時一樣。通常家陣啲機鋪嘅《鐵拳3》已經有得用KUMA同JULIA。喺個電腦對戰DEMO嗰陣時仲會有洋文顯示：NOW
12 CHARACTERS ARE SELECTABLE！同埋會喺右下有最新嗰位人物嘅玉照。而喺出完《鐵拳3》LOGO之後，畫面會出現一個「人物預告」，會出現下一位「隱藏人物」張玉照同埋名字，小弟拍輯當日預告會有GUN
JACK。話時話，嗰個JULIA啲招同當年MICHELLE嘅好鬼似，加上就嚟有得用GUN JACK……咁啲「隱藏人物」咪即係變相舊人物？
一路斬人，一路打飛機
近排叫做新GAME嘅，就有哩隻原本話要7月出，點知近排無聲無息咁見咗街嘅《SOL
DIVIDE》。今次彩京冇令大家失望，橫向射擊加「立體」畫面，仲有鬼死咁多種「大彈」（魔法）俾大家揀，而且又有得玩埋身勁斬，都咪話唔過癮。今期本誌有介紹（赤目黑龍先生執筆），有冇睇？正唔正（此乃廣告）？仲有嘅就係，如果你冇CONTINUE而打爆機，就可以進入彩京為大家而設嘅「二周目（第二循環）」。好可惜，小弟冇可能去到「二周目」。但係小弟就好享受一路打飛機，一路斬人嘅快感（←變態）……
夜魔（終於）出動
上次咪同大家講過話哩個《VAMPIRE
SAVIOR》應該周街都係嘅？點知當上期截咗稿之後，小弟走咗去搵某機鋪老細，佢同我講，哩隻GAME喺試版時發現咗兩隻BUG，要立即攪返掂佢，咁就要DELAY到5月28至29號先至到港。就係因為咁，搞到啲機鋪老細失咗預算，又令到小「老點」咗大家，做咗一個POOR
GUY。都係學某機鋪老細話齋：「DELAY NO MORE啦！」咁家陣就真係周街都係嘞，小弟冇「老點」大家㗎！
BY：ZAC
﹙1997年6月5日﹚