嘩！咁多隱藏人都得？！
唔知大家仲有冇玩哩個《MARVEL
SUPER HEROES VS STREET FIGHTER》呢？小弟耐唔時都有玩吓。雖然海外版冇得玩用呀憲磨呂先生，但小弟就收到風，話原來哩隻GAME有其他隱藏人物㗎。哩班隱藏人物，分別有哩個「影子CHARLIE（《少年街霸》入面個軍佬）」、「暗黑三姑奶（SAKURA）」（佢個真空波動拳變咗做「真空波動砲」）、「MEGA蘇聯佬」（佢係冇擋格，個旋轉倒頭樁攻擊力大咗好多，而且會噴火）、MEPHISTO（同呀BLACKHEART差唔多，不過對手中咗佢啲拳腳會著火）同U.S.AGENT（即係「冒牌美國隊長」）㗎。至於使用方法，就請睇返今期嘅秘技欄啦。咁如果用哩啲隱藏人物爆咗機又會點呢？小弟就試過用哩個「影子CHARLIE」爆機（即係用佢打死咗個「機械豪鬼」），之後就出咗「影子CHARLIE」嘅半身相，然後就會有一句英文出現，意思係話：「恭喜，你用一個隱藏人物打爆機」，冇話有乜ENDING，又或者會交待一下點解會有哩個隱藏人物，真真令人頭痕……除此之外，仲有隱藏嘢，
好似話喺每ROUND開始之前，只要撳住三個拳掣或三個腳掣，就可以換咗你個LEADER，俾你個PARTNER出嚟；而另一單就仲未肯定，不過即管話埋俾大家知啦。哩個隱藏嘢就係話會有幾隊隱藏隊伍出嚟挑你機。咁至於會係邊隊出嚟，就要閣下滿足以下嘅條件先：（1）冇CONTINUE；（2）你個PARTNER唔死得；（3）計你頭5局用咗幾多個VCF（VARIABLE
COMBO FINISH）同HCF（HYPER COMBO FINISH），咁D隱藏隊就會喺第6局出現嚟挑你機㗎嘞。如果你有5個VCF同0個HCF，就會同「暗黑三姑奶&豪鬼隊」打；如果你有2個VFC同3個HCF或者3個VCF同2個HCF，就會同「MEGA蘇聯佬&
M.BISON隊」打；如果你有6個VCF同0個HCF（？6個？唔係呀嘛？），就會同「影子CHARLIE
& M.BISON隊」打。至於哩單料係堅定流，小弟都唔係咁清楚，因為小弟仲未試到。家陣話俾大家聽，等大家試吓堅唔堅。不過據供料俾小弟嘅線人講，佢話哩個「打隱藏隊伍秘技」只限喺日本版至用得；但係，佢之前話俾小弟知嘅隱藏人物秘技都係話剩係日本版至可以用，但係家陣喺海外版都用到，咁即係話哩個「打隱藏隊伍秘技」都應該喺海外版用得啦（如果係堅嘅話）。雖然哩隻GAME近排冇企得咁硬，但相信如果遲吓移植落家用機度，都應該會加返哩啲隱藏嘢啩。
點玩都得
拳王九十七（PART IV）
今期小弟都會講哩隻GAME，不過就係講啲隱藏嘢。到家陣為止，我哋所知嘅隱藏人物包括：「94版草薙京」、「腸胃不適嘅八神庵」、「患上白內障兼染上肺結核嘅LEONA」，仲有哩個「真•NEW
FACE TEAM（又稱：奇怪日本隊）」（使用方法請睇返上期秘技嗰欄）。而據小弟班線人們所透露，家陣出面傳緊嘅隱藏人物就有呀草薙柴舟叔、RUGAL爺、瘋狂矢吹真吾、今期「大佬」同上期「大佬」咁㗎。之但係，據小弟照線人們手上所得嘅「瘋狂矢吹真吾同草薙柴舟使用法」嚟試，都召喚唔到佢哋出嚟……唔通哩單嘢係流嘅？不過唔緊要，只要小弟証實咗哩單嘢係堅定流之後，就會同大家公布㗎嘞（歡迎各位知道箇中玄機嘅讀友們來信相告，感激感激）。除咗隱藏人物之外，哩隻GAME仲有啲隱藏嘢。咁係乜呢？相信大家都係玩開TEAM
EDIT，即係「自（己組）隊」㗎啦。如果大家用「自隊」又爆到機嘅話，就會出現哩個OROCHI「飛走」嘅ENDING，之後仲會出現一大揪字幕咁㗎啦。之但係，如果用下列嘅隊伍，就會喺出完字幕之後出佢哋嘅隱藏ENDING。哩幾隊就係「三神器隊」（草薙京、八神庵同神樂姐姐）：爆機後佢哋會喺你面前將OROCHI封印！「元•女性格鬥家隊」（不知火舞、KING同YURI）：爆機後佢哋會著泳衣俾你睇，仲有一隊叫「超級英雄隊」（草薙京、坂崎獠同TERRY。唔好問小弟，小弟都唔知點解佢哋三個係超級英雄）：爆機後佢哋會閒話家常……傳聞中仲有一隊「放火狂徙隊」，但小弟用佢哋爆咗機之後就冇隱藏ENDING，咁即係流隊啦。至於哩個阿雪（草薙京女友），就會喺三神器隊爆機之後出嚟講咗一句「別哭啊，京！」（因為京哥封印完OROCHI之後喺度發愁）。而喺哩隻GAME入面，就算玩SINGLE
PLAY（即係一隻打一隻，每隊打一隻，每隻打三ROUND）用八神庵、矢吹真吾、患上白內障兼染上肺結核嘅LEONA同腸胃不適嘅八神庵其中一個爆機，都唔會有特別ENDING，個ENDING同「自隊」嘅ENDING一樣；咁哩個「真•NEW
FACE TEAM」個ENDING又點呢？佢哋個ENDING竟然同原本個NEW FACE TEAM嘅ENDING一樣，即係話呀七枷社會將自己隊人（連埋佢自己）嘅「拔甩」獻俾OROCHI，令佢復活。不過話時話，哩隻GAME仲有乜隱藏嘢呢？大家可以放心，如果小弟收到料嘅話，一定會第一時間通知大家嘅，OK？
BY：ZAC
﹙1997年8月28日﹚