SNK新作展覽會
今次俾大家玩嘅，計有新作《ROUND
TRIP RV》同《SHOCK TROOPERS》；而哩個《侍魂》，就因為要改系統，所以冇得玩住。另外，SNK仲特地為大家準備咗一啲經典嘅GAME俾大家玩，好似《拳皇94》、《拳皇95》、《拳皇96》、《METAL
SLUG》等，實在令各賓客有賓至如歸嘅感覺呀。
拳皇97即場挑戰賽
當各位賓客玩到下午5點左右，SNK就開咗兩部29吋機，俾各位賓客玩拳皇97即場挑戰賽。主辦單位喺哩個挑戰賽入面選咗兩名出線者，佢哋可以直入稍後舉行嘅《真•拳皇97大賽》（「八傑集」之一陽三星都係咁入圍嘅）。指令××都有玩，但係最後佢就……
SNK人物扮演大賽
今次SNK同場搞咗哩個比賽，又引起咗另一番哄動。皆因到場扮演SNK
GAME嘅人物
嘅朋友們都扮得好似，我哋就對哩個「BLUE
MARY」同「LEONA」都好「欣賞」（←醉翁之意……），心諗佢哋兩個入面總會有一個贏出嘅。怎料，到最後竟然有個蔡寶奇嚟咗（參賽者嚟啫），佢嘅「扮爪仔哲學」（小弟覺得）就係：「扮矮仔，就要搵細路仔（註：押韻）」所以佢只得12歲（有人話佢似8歲多啲）。最後，佢攞埋個冠軍走……
《真•拳皇97大賽》&《真•拳皇97特別賽》
當各位賓客等到頸都長哂之際，《真•拳皇97大賽》終於開始。首先舉行嘅就係由「十六人眾」爭奪「八傑集」嘅賽事。開始冇耐就出現咗「TERRY
POWER CHARGE（×5）→POWER GEYSER」同「山崎龍二踢沙（×5）」等等嘅驚異現像。可惜嘅就係，上年冠軍誠仔同上年亞軍寶狄喺哩個時候輸咗，今年只可以做返「十六人眾」。然後，「八傑集」嘅各人就要角逐「四天王」嘅席位。當「四天王」出現咗之後，所有賓客都顯得十分興奮。「四天王」於是就喺大家嘅歡呼聲中鬥出最後兩名，而落選咗嘅兩位就立即進行季軍爭奪戰。到李萬成做咗「天下第三」之後，主辦單位就舉行咗一場《真•拳皇97特別賽》，等呀翁武良同呀高偉倫可以休息一下。特別賽有乜特別？就係由友刊《GAME
WEEKLY》嘅CHRONO、《遊戲誌》天草四郎時貞、代表《遊樂誌》嘅
ZAC（原本係霸王丸，但佢好不幸咁「炒咗車」，嚟唔到，所以由小弟頂上）同SNK嘅
鈴木圭二郎先生玩友誼賽嘞。最後勝出嘅係天草四郎時貞（佢近排好似去開××灣附近打機……）。之後，最緊張嘅時刻到嘞。翁武良同高偉倫經過連番激鬥，終於翁武良技壓群雄，成為「大蛇族族主」（冠軍）。不過話時話，今年嘅熱門人物係蔡寶奇同八神庵，反而冇乜人用BLUE
MARY。另外，「波波」（陳國嘆）同草薙京都幾多人用，似乎哩幾個人物今年比較好用啲咁噃……
當日日程表
10：00-SET UP機器
15：00-SNK新作展覽會正式開始
17：00-《拳皇97即場挑戰賽》開始
18：30-《SNK人物扮演大賽》開始
19：30-《真•拳皇97大賽》開始
20：50-《真•拳皇97特別賽》開始
21：00-《真•拳皇97大賽》冠軍戰開始
21：15-頒獎禮開始
21：30-SNK新作展覽會及《真•拳皇97大賽》完滿結束
《真•拳皇97大賽》「八傑集」
冠軍：翁武良（「武功」：八神庵、LEONA、蔡寶奇）
亞軍：高偉倫（「武功」：金隊成隊）
季軍：李萬成
另外5名強者（「五強者」）：
戴志康／楊三星／盧達明／羅家駒／黎智聰
SNK人物扮演大賽「三巨頭」
冠軍：蔡寶奇（「演員」：楊子傑）
亞軍：霸王丸（「演員」：CHRIS）
季軍：山崎龍二（「演員」：許天賜）
街霸第二震
《STREET FIGHTER III 2nd
IMPACT》就到咗啦，大家有冇玩過？覺得如何？有機友同小弟講，話啲出招時間唔同咗，搞到佢哋要再練過BLOCKING；而佢哋又讚哩個「BLOCKING
BONUS GAME」好玩咁話。今次返貨，據某機鋪老細透露，佢話全部都係連埋CD-ROM嘅CPS-III底板，要成1××××個大洋左右，但既然有埋CD-ROM，咁都算係咁啦。不過而家就有個「秘技」傳緊，就係話只要閣下一ROUND都冇輸過咁打死埋大佬（佢今期有招新超必），而閣下又有3個PERFECT或以上嘅話，就會有個豪鬼（又係佢？）出嚟同你打；若果閣下用超必打死豪鬼而又冇輸過一個ROUND嘅話，真豪鬼就會出嚟同你打咁話。小弟就未試過，但係有一樣嘢可以肯定嘅，就係如果一個ROUND都冇輸過咁打贏咗三個對手，每個人物都會有一個特定嘅人物出嚟同你打（例：用呀SEAN就會同呀YANG打），情況同《ZERO
2》一樣， 大家可以試吓。至於哩個《VAMPIRE HUNTER 2》同《VAMPIRE SAVIOR
2》，據好可靠消息透露，佢哋兩個都會喺近日推出。嘩，乜出得咁密呀又？之但係，雖然話就出啫，但係唔知點解，近日小弟已經收到哩兩隻嘢嘅秘技……唔知堅定流嘅呢？唔係嘞，等佢哋到咗就即刻試試佢哋先。
今次就上白車
下次就上黑……
唔知大家記唔記得早排小弟講過哩個「偷底板大盜」呢？原來哩條友仔叫陳×財（41歲），喺9月15號俾人喺觀塘捉咗嘞。事發嗰陣時，哩位「大盜」正喺觀塘康寧道某機鋪入面對哩個《VIRTUA
STRIKER 2》（新聞紙話值成45000個大洋）「有所作為」之後俾店主發現，店主於是追住佢啦，點知條友仔走咗去附近一間燒味鋪，諗住走後門。哩個時候，有位見義勇為
嘅 食客李先生（32歲），同機鋪店主合力捉咗哩位「大盜」，仲搞到佢「爆晒缸」。9月16號嘅新聞紙係咁賣：「……當竊匪從後門奪門而逃時，被醒目店主何×開發現，啣尾窮追，疑匪逃至附近一間商場內燒味鋪，企圖再從該店後門離去時，一名李姓食客（三十二歲）見義勇為，與店主合力將賊人制服，混亂中疑匪受傷，鼻血狂流，警員聞聲趕至，將疑匪拘捕送院救治，被偷電路板及變壓器當場起回……（東方日報／97年9月16日）」今次條友仔連火牛都偷埋，唔怪得最後要上白車啦。嘩，偷底板就要上白車，如果大家喺機鋪做其他非法勾當，咪分分鐘黑車都有得你上？大家都係乖仔乖女，唔好做啲犯法嘅事呀！
BY：ZAC
鳴謝：SNK ASIA
感激：SNK ASIA胡先生／TAZ／米奇
﹙1997年11月7日﹚