唔聲唔聲話出GAME
世嘉唔聲唔聲突然話出哩個《FIGHTING
VIPERS 2》，雖然家陣只係公布咗好少嘢，但係都有唔少料流咗出嚟。例如話今集個系統改良咗啦（一定要㗎啦），開發者自稱會令大家可以善用「牆嘅特性」啦，「反技」性質嘅改變咁啦，但係實情係點就仲唔知。今集又加咗一個叫「SUPER
KO」嘅系統，性質相信有啲似《龍虎之拳3》嘅「ULTIMATE KO」。而且聽講話今集一開始就可以用上集「大佬」，又加咗兩個人物……大家都係留意小弟及《業務機戰隊EX》以後嘅報導啦（也是廣告）。
唔係剩係日本先至有GAME出㗎！（PART
II）
上期先同大家講過話有啲美國同台灣GAME出咗，點知今期仲多台灣GAME，真係「出之不盡」呀（今期《業務機戰隊EX》都有講，仍是廣告）。先睇哩個《LETHAL
CRYSTAL》，初時小弟一見到都唔信台灣可以出到啲咁嘅質素嘅街機GAME，跟住就梗係即玩啦，玩完仲要立即返總部話俾黑戰士阿基聽添呀。而哩個《傲劍狂刀》，雖然話
啲公仔就唔係咁靚，而且啲對白又十分難頂，但係總好過台灣上次出嘅格鬥GAME《黃飛鴻》吖（話實，台灣都好似剩係出過兩隻街機格鬥GAME之嘛）。小弟見到台灣啲同胞嘅作品有咁大進步，真係老懷安慰……相信只要嗰邊啲生產商再加把勁，過幾年就可以追到日本嗰邊啲街機GAME質素嘞。實在太感人嘞！
乜得咁多隱藏人？
大家有冇玩SNK隻《月華之劍士》呀？個曉武藏已經有秘技用，實在強得可以呀佢！詳情睇今期秘技欄（仲係廣告）啦！而CAPCOM隻《私立JUSTICE學園》，家陣大部分機鋪都裝咗超過三星期，即係話可以自由組隊同用到隱藏人物呀校長先生同埋幕後黑手，而且如果大家喺揀人嘅時候撳住個START嚟決定，就可以用嗰人物嘅隱藏顏色，仲有
嘅就係，而家除咗可以自由組隊，仲可以揀埋相同人物嚟用，都咪話唔邪門釘。仲有呀，如果大家用晒兩個隱藏人物嚟組隊，就會有佢哋自己嘅故事㗎（基本上自由組隊係冇故事㗎）。不過最緊要嘅就係，據講如果部機裝咗超過28日，就會有得用《STREET
FIGHTER ZERO 2》入面嘅春日野櫻（SAKURA）……唔係咁邪門釘呀嘛……
又有得斬人……
不經不覺，我哋等咗好耐嘅《侍魂SAMURAI
SPIRIT》終於到咗。今次係SNK第一隻立體格鬥GAME，玩上手嘅感覺唔錯，加上小弟同呀天草四郎當日喺日本玩過未改系統
嘅版本，一玩之下真係唔到我哋唔服SNK，系統改咗，招式改埋，連畫面都有改動，真係冇嘢好講。話時話，哩隻GAME當然保持住SNK嘅傳統，唔會冇隱藏嘢嘅……
BY：ZAC
鳴謝：遊戲機城／夏日城／GAME
ZONE
﹙1998年1月2日﹚