越嚟越多人嘞�I
近排大家仲有冇玩哩個《STREET
FIGHTER EX 2》呀？玩成點先？話時話，相信有部分機友都試過遇見過隱藏人「SHADOW」㗎啦？點樣先至可以見到佢？確實嘅條件小弟到家陣都仲未係咁清楚，只係知道如果有幾個PERFECT、一個ROUND都未輸過、兼且有一ROUND係三LEVEL
SUPER FINISH（即係打死電腦時見到「九星連環」嘅奇境），咁喺打最後大佬GARUDA之前，哩個SHADOW就會出嚟挑你機㗎嘞。至於點先可以用到佢？係咪要等時間？要等幾耐？對唔住，暫時唔知，但係日本嗰邊已經有得用，而且仲有埋第二個隱藏人KAIRI用添（連招表都有嘞）。相信分分鐘大家見到哩版稿嘅時候，各大小機鋪都已經有佢哋嘅影踪㗎嘞。不過講開又講，都唔知點解個KAIRI會走返出
嚟，上集咪話佢已經俾個「解除血之封印嘅HOKUDO」，即係佢個妹推冲落山㗎明明，乜解救今集又會出返嚟？又死唔去？個SHADOW就話係SKULLOMANIA嘅死對頭，所以就有得出場啫……雖然話個SHADOW啲招同SKULLOMANIA有啲似，但係就有少少唔同，尤其是招甚麼DARK
TOCHEFU，雖然似SKULLOMANIA招SKULLO TOKACHEFU，但係對手中招後係唔會DOWN嘅，而且仲可以即刻駁招玩連招㗎，都咪話唔惡；仲有佢招SUPER
COMBO DARK WAVE，對手中緊招嘅時候佢就已經可以郁，你一路中招佢就一路郁你，實在太過分嘞！未講完呀，佢另一招SUPER
COMBO DARK ENERGY，話就話同SKULLO ENERGY好似，但係出招嘅時候如果係打唔中對手，個「光球」係會吸對手過嚟嘅，有冇搞錯先？不過小弟相信，如果有得用哩隻嘢嘅話都應該幾過癮，而且應該幾屈添。希望快啲有得用啦！咁另外嗰兩個隱藏人NANASE（七瀨）同埋GARUDA幾時先有得用呢吓？但係又有傳聞話，當GARUDA都有得用嘅時候，下一個會出現嘅人物就係豪鬼！都唔知信佢唔信好？不過又係例牌嗰句，小弟一有新料就即刻報俾大家聽
㗎嘞，OK？
未話幾時出就話要DELAY？
講咗好耐都仲未出到嘅《STREET
FIGHTER ZERO 3》究竟有啲乜嘢新料到？除著監犯衫嘅CODY同埋另一個「大山少女」R.MIKA哩兩個新人物之外，都好似冇乜新料到喎。嗱，其實喺5月5號，CAPCOM喺日本搞咗個SHOW，咁佢哋就公布咗會出哩隻GAME啦。然之後，佢哋就將隻GAME擺咗去大坂某機鋪做試版，所以我哋有好多「傳聞」都係我哋啲有去過玩嘅日本線人們話俾我哋知嘅（現代通訊真係方便，足不出戶能知天下事呀真係）。咁有幾真就見仁見智嘞。但係早排，嗰部試版忽然唔見咗！點解呢？據小弟喺CAPCOM入面嘅線人透露，隻GAME攞咗去改啲嘢。咁改乜呢又？佢話係改系統，所以隻GAME會比原定發售時間遲3個星期至一個月先至出得，即係要DELAY啦（但係仲未話幾時出喎）！不過照小弟嘅理解，線人所謂嘅「改系統」，應該係指「調較系統」先啱。點解？大佬，我叫你改咗個系統佢，仲要你喺3個星期至一個月內搞掂，你話掂唔掂先？所以小弟覺得應該係調較個系統先啱。大家都應該留意到，最近公布之畫面，能源棒下邊嗰條「神秘棒」上面家陣已經加咗一個叫做「GUARD」嘅字樣啦？哩幾隻字以前喺冇㗎！唔信你可以睇返早兩期《街機皇》。相信哩隻GAME嘅系統呀，招式呀、人物等等都唔會有乜大變，同我哋之前收到嘅「傳聞」內容差唔多。如果閣下唔信，可以等隻GAME出咗之後睇吓係唔係？（你唔信小弟又為乜睇哩版？）
SNK又有新搞作
話時話，SNK嗰邊一路都唔公布啲《拳皇98》料，但係近排就係咁公布其他料。好似話遲吓會有隻64
bit鎗GAME《BEAST BUSTER》，同埋佢哋最新推出嘅硬件《NEO GEO POCKET》。哩部嘢可以話係SNK嘅GAMEBOY。當然就勁好多啦！例如部機係16
bit
嘅，而且畫面又大過GAMEBOY，相信應該會睇得幾舒服。仲有一樣喎，就係話哩部機可以接駁到「細加」遲啲出嗰部「夢幻巴士」度，你都咪話唔邪。而且SNK公布咗，喺頭5隻遊戲入面一定會《拳皇》，而另一方面，佢哋又話「……兩位玩者可以將各自培養嘅《拳皇》人物接駁到《夢幻巴士》入面嚟對戰……」，咁即係乜嘢意思？唔通《NEO
GEO POCKET》版嘅《拳皇》係育成遊戲？要自己養草薙京？要自己養TERRY？要迫佢哋練功？要俾嘢佢哋食？《拳皇》人物全部變晒「TAMAGOTCH」？係咪咁FIT先？咁就真係要等吓嘞（不過要到今年秋天先出）。
BY：ZAC
﹙1998年6月6日﹚