問答題

摘錄:香港電視

日期:28/12/1995

記者:鬼僕

題目:玩得就預o左捱

「你問我亞龍大係乜o野樣, 我話俾你知唔係點好樣! 五條大悶棍, 但又有o的理想, 認為呢個世界唔應該.......咁樣!」(摘自「亞龍大」歌詞)

就因為上面的話, 令筆者興起訪問他們的意圖。訪問在一間丁方數百呎既 Band 房進行, 平日好少o係傳媒出現 (或者係傳媒唔想佢o地出現) o既 Anodize(亞龍大), 好現實咁為演唱會作宣傳性曝光!

甫一坐下, 劈頭第一句當然係問問於今晚在新伊館舉行的演唱會之備戰狀況!

「每日都係不停練習, 與上年演唱會o既分別就係冇 Guest, 自己玩晒, 同埋今年演唱會音響轉o左給另一間做, 希望會好o的啦！」

提起音響, 去年筆者位處半山, 可以說是有畫冇聲之餘, 台下又沒有企位, 一時懷疑自己是否錯看天王演唱會?

「冇法啦, 香港好難做到咁(企位), 不過上次擺鐵馬又真係同o個台遠o左o的!」

冇企位, 仲要離台十呎, 唉! 香港搞 Rock Show 真係飲奶階段!

「不過今次會擺(鐵馬)近些, 同樂迷親近番o的......」

真懷念高山劇場的日子!

唔妥協,做自己

Anodize 最近簽了大公司, 筆者深怕他們為了飯碗(公司壓力)而改變歌路, 走回 Beyond 昔日窮途。

「我諗呢條路係唔會行o架啦! 點都想做自己做得舒服o的o既o野! 如果像 Beyond 那樣有可能會紅, 但係都係可能o者! 咁我o地就會同自己講:『我o地而家咁樣夠可能會紅啦!』」

好! 希望將來不會見到五條怒漢依起棚牙 lum 靚妹啦! 不隨波逐流, 會寫政治歌做大事嗎?

「不是說不寫, 不過首先自己清楚想寫甚麼, 更要對事件有自己的一套睇法, 如果胡亂去作, 唔到肉不得止, 連自己o個關都過唔到, 又點會有說服力呢!」

那麼態度方面會否稍為軟化, 易為大家接受, 不用玩「自閉」?

「軟化少少唔出奇, 不過都係好自然咁去做我o地o的音樂, 不過就一定唔會妥協, 妥協就實死, 唔可以o架!」

咦! 咁香港樂壇真係死唔少人喎!

傳媒跟紅頂白,樂迷無主見

對於傳媒, Anodize 又有一套睇法:「雜誌只剩下『殖民地』啦, 以前『音樂一週 (唔係『壹週』) 都冇埋, 不過成日都講o個o的(紅歌手), 又成日話亞邊o個o的風格似邊o個, 其實好聽咪得囉! 有乜似唔似, 不過冇辦法, 香港來來去去都係o個幾個樂評(總好過冇)!」

講起來, 筆者亦有感而發:「不過近年好些, 起碼不會見 Band(香港)都同 Beyond 相提並論啦!」

「冇法啦! 因為佢o地可能連 Band 係乜都唔知, 而加上香港又冇 Band(紅o個o的), 咪焗住要同佢o地比較囉! 不過如果話我o地似, 最盡都只可以話大家都係玩『中文搖擺』囉!」

電台方面, 可算是最有影響力的傳媒之一, 但肯去推動樂壇者又寥寥可數......

「其實『納稅人』電台可以特別去闢一條頻道專播英文歌o架! 古典音樂都有, 點解英文歌唔得, 橫掂都唔使人贊助o既! 不過平心而論, 就算肯播, 都係播流行音樂, 想聽 pop 以外o既選擇都非常難!」

世上無難事,只怕......

「其實要做這些事, 好多人都可以做到, 不過很多人都唔會做。好似早前聽到一個節目咁, 好像在播 Blur, 播o左半首, 就話嘈, 要cut。仲有次係 T2(Terminator 2), 可能佢以為係 Soundtrack, 正啦! 點知係 Gun n'Roses 唱歌o既! 又即停! 你想想, DJ 連播之前都唔知係乜, 可想而知水準有幾『高』。」

不可能全部 DJ 都這樣吧?

「『牟利』電台就好o的啦! 起碼都有o的真係聽歌o既人響到!」

不過除了電台不爭氣, 連聽眾都一樣! 有次筆者聽電台播「Pulp Friction」的 Soundtrack, 播完後竟有聽眾 fax 質問為何不播完整隻「危情追蹤」就停o左?......

「有次某電台 DJ 都同我o地訴苦, 話有晚(凌晨)淨播英文歌都俾人 fax o黎鬧佢唔播中文歌!」

「.......」

至於電視台方面, 都係一間玩晒, 一間摺埋。有否想過簽大電視台呢？

「簽就應該唔會簽o架啦! 費事大家無癮啦！佢叫我o地做o既o野通常都唔會做, 上去 Jam 歌唔係問題, 玩遊戲, 賀大壽, MMO就無謂啦! 不過都有好處o既, 就係上一間電視台就夠宣傳, 慳唔少力!」

「唔怪得咁多人鍾意食蟲啦!」筆者不禁想。

中港一家親

九七將近, 驚唔驚中國樂勢力入侵?

「仲好啦, 等大家知道有人仲另類過我o地! 可以搞大佢啦! 你咪話呀, 張楚在上面只係北京城都賣六十萬張, 香港o個o的算得係乜! 不過上面翻版跱太厲害, 搞唔掂!」

咁覺得上面o的 Band 點樣?

「好 Heavy 呀! 我們上次在北京錄音時接觸的都係好 Heavy Metal o既! 不過佢o地又真係 Heavy 得起! 好好火o架! 人o地上面可以目訓晒身去玩, 飯唔食, 工唔返都得!」

會唔會香港太舒服, 點都玩唔到搖擺應有o既味道?

「都有關係o架! 話晒在香港你o的人點嬉皮法都要有份工做啦! 我睇你 (此時正指著筆者) 都係o的唔鍾意做o野o既人啦, 咪又係要做! 好難可以全心去做一樣 (同錢銀冇關) o野! 除非屋企大把啦! 不過由一玩結他開始都預o左啦!」

預o左捱?

「唔係捱o既, 自己鍾意, 開心嘛, 一路有得玩已經好幸福啦!」

講開祖國, 對於港人較熟悉o既何勇、張楚, 竇唯有啥看法?

「何勇就好好睇 (Live), 佢好識煽動人群, 現場睇好正好 High。張楚就人台合一, 淨係坐o向度, 不過o的歌就幾好聽。竇唯見過佢幾次, 次次坐埋一邊, 都冇乜兩句......」

至於天王沒落, 華健上台o既形勢, Anodize 則有此看法:

「佢早就應該返o黎啦! 起碼佢識音樂, 識作曲同彈o下結他嘛!」

「眼袋天王夠識彈結他啦!」筆者失驚無神, 有意冇意地道。

「......x x x x !!!」

有沒有想過將來?

「冇得諗啦! 亦都唔到我o地諗, 望就望o下發行搞好o的, 去到東南亞。至好 Asia Tour 啦! 最好第時o向台灣, 中國甚至全亞洲紅, 淨係香港唔紅, 到時就好玩啦!」

玩? 不錯, 在這個有實力冇飯食, 有靚樣冇悲傷o既香港「樂壇」裡, 只好「認真地鬧著玩吧!」