問答題問答題
摘錄:東TOUCH
記者:飛影藏馬
日期:95年
題目:Anodize 坦白從寬
東:<東TOUCH> R:Ronnie孫國華(主音) G:Gary(鄭華勝)(結他手) J:Jimmy(麥文威)(低音結他手) KK:黃貫其 D:Davy陳匡榮(鼓手)
面對 Anodize 4子, 根本不可能扮正經客氣的搞掂一個江湖式「訪問」。
因為他們即使是「紅」了﹝大碟銷售已接近金唱片數字﹞, 仍然這樣毫無修飾 : 牛記笠記的衣著, 一邊奏音樂一邊抽煙暍汽水, 天南地北想講就講。就像他們形容自己音樂─歇斯底里搖滾, 原始直率, 容不得一絲奸狡虛偽。
就這麼在一個幾百呎, 月租約6000元的平靚正閣樓 Band 房, Andoize 清爽放肆地傾了一回閒偈, 談談他們的「成名」感受。
「大碟好賣? 關我乜事!」
東: 《大車店》銷量非常理想, 有人「宣布」你們終於走上地面﹝流行音樂市場﹞了, 歌曲路線會否作出調整? 有大規模唱片公司「照住」, 會否更有「安全感」?
R: 坦白說, 唔~關~我o地~事! 以前鍾意玩什麼便玩什麼, 現在和以後, 這個原則也不會動搖。我們不會讓音樂的本質, 遷就外來環境。
G: 其實我o地都幾好彩, 就算這間大唱片公司, 都由我們自由創作、自由衣著, 唔使為o左玩俾面派對, 搞到連作歌都變質。如果真搞到咁田地, 寧願做番以前咁﹝自主、地下﹞, 起碼都係真心同開心。
「整色整水? 真係可憐!」
東: 你們如此想做就去做, 不怕到頭來樂迷忽略你們的音樂, 搞到曲高和寡冇人識嗎?
KK:我相信自然流露, 先至會出到「正」o既音樂。 好o野自然有人識所賞。
G: 我不理其他樂隊怎樣做, 但我o地玩音樂就係要玩得從心所欲。
如果又驚自己唔夠型, 又驚歌曲 Hit 唔起,
船頭驚賊船尾驚鬼, 點做到好音樂先?
除非諗住做明星啦! 我o地絕對唔係呢種型號。
J: 我o地夾 Band 時得到o既滿足感已經大於一切! 諗起有o的 Band 綁手綁腳, 為o左應酬連創作都冇時間,
睇見都覺得可憐。
「捱得辛苦? 好彩至真!」
東: 你們飽經辛苦, 甚至放棄一切去追尋音樂,
比較其他順風順水的同道人, 會否覺得唔抵?
J: 我反而覺得我o地不知幾咁好運! 一直以來我們創作音樂,
基本經濟可以維持, 又唔使求人「收留」, 順利贏o左嘉士伯音樂節
(91) 年, 又有人替我o地簽約及出碟, 但我o地本質依然冇變,
都算難得。
G: 其實一個人只要狠下心腸, 專心去做音樂,
都可以好似我o地咁自由! 所謂 「犧牲」 o左o既東西在我們都是次要,
所以絕對值得。
KK: 最怕半途而廢, 或者被迫放棄最鍾意o既目標,
至係最慘。
東: 對新一輩的樂隊, 有甚麼忠告?
D: 堅持到底 (好似我o地咁樣)。最初組員之間少不免有拗撬,
但一定要俾o的耐性, 培養默契。 否則一旦有隔膜, 一定散 Band 收場。另外, 最重要就係想清楚自己點解要夾 Band 然後一直照做。就算係為 lum
妹妹仔都冇所謂, 從一而終就 OK。
刻下的 Anodize 表面上與其他歌星一般,
上電視出席大小宣傳場合,
但骨子裏仍是寧願拿成副身家用來買碟買樂器, 也不肯為了取悅別人,
委屈花錢穿得身光頸靚。
對於他們, 成名的最大收獲, 就是: 見識多了, 卻更加堅持。
