問答題問答題
日期: 10 月中
摘錄: 東 Touch
記者: Denise
題目:亞龍大擺王菲上神木台拜
當與亞龍大 (ANODIZE) 排排坐好準備訪問時, 突然覺得對家------主音亞華右眼閃閃生輝, 經陽光底下測試, 簡直不敢相信事實。o下, 點解會貼上雙眼皮膠紙?
「人地話貼夠一晚, 真係會變雙眼皮架!」當事人解釋, 其他人已忙不迭伸手企圖撕膠紙, 非常搞笑也非常人不可以貌相。
其實夾 BAND 都係人, 兩隻眼一個口一個鼻, 可以醜樣更加可以靚仔, 當然有時仲會好天真, 就係咁簡單。
想搞大隊Band?
預o左窮啦
流行音樂節年年有, 還有蒲窩等機構推波助爛, 樂隊蒲頭機會理應比以前更多, 但 Band 壇來去仍是一班人, 就如亞龍大所形容, 始終係小氣候。
「夾 Band 真係只o岩一o的悶o既人, 係要o徙o的時間去練、去學, 要好投入好鍾意音樂, 先會走去夾 Band, 時下年輕人一味要即食, 鍾意咪去唱卡拉 OK 囉! 做乜咁辛苦要學結他? 學完仲要慢慢執首歌先彈到, 為乜? 以前睇戲, 仲會有o的彈結他追女仔場面, 家陣連呢樣o野都冇埋添。」
亞龍大強調, 夾 Band 係要擺時間擺心機的作業, 要犧牲跟朋友去癲o既時間才會成事。
「(樂迷)買隻 CD 返o黎聽, 可能只係為o左個歌星, 歌星背後o既作詞作曲編曲呀統統唔會理, Skip 晒呢部分, 仲點講到夾 Band o番!」
作為一隊全職但冇收入樂隊, 亞龍大不諱言想以夾 Band 去搵錢, 可惜時勢非自我控制, 又要玩音樂又要食飯, 你估咁容易?
「我o地o既生活o係一般眼中好冇保障, 完全今日唔知『聽』日事, 三更窮四更富咁囉, 唔做 Promotion o個排仲好o的, 可以教結他、做 Session 賺下錢, 但賺落都唔夠使o架。」
阿華話, 個人最後一份工7月8日結業, 捱到10月中今時今日, 真係唔知再點捱落去!
出碟改變樂壇?
傻啦
好奇怪, 生存在香港樂壇的樂隊, 無論玩的音樂幾大路, 總之樂隊就係另類、唔正常, 不單先天受樂迷「歧視」, 連傳媒往往不知所措。
「(記者)問我o地o既問題, 同自己o係雜誌睇o個o的好唔同, 有時好政治、好深奧, 好似『覺得依家中國o既政治環境點樣呀? 點睇香港政府o既民主步伐呀?』, 其他歌星好少會有呢種問題, 可能我o地o的歌有提過下政治啦。又係o既,我o地o既私人生活點會有人有興趣呀, 哈哈!」
亞龍大說, 不是外界對他們不夠了解, 係外界對音樂不夠了解。
「唔單止係我o地問題, 始終香港人音樂文化唔夠強, 大家冇咁好心情買隻碟返o黎, 認認真真咁去聽, 音樂唔一定要好認真對待, 但一定要投入去聽, (樂迷)仍然o係聽歌o既年代------淨係聽歌星唱歌。」
看得出癥結所在, 但亞龍大好坦白, 出碟無非想賺多個錢暖下肚。
「已經出第3隻碟, 梗係想銷路似樓梯, 逐級逐級上, 多一個人買碟代表多o左一個人去聽我o地o既音樂, 又可以賺錢, 好好呀。」
「我o地冇咁偉大, 諗住出碟去改變樂壇, 傻啦。」
俾人吼實冇自由? o徙氣啦 亞龍大夾了10年 Band, 仍然未化。 「最主要我o地份人冇乜點變, 大家o既思想仲係當年搞 Band 房咁: 要做我o地自己o既音樂; 所以我o地做o野冇乜計劃, 淨係一心一意做好張碟, 要每次有成績俾人睇到, 唔使突然間好爆, 咁樣好易死o架。」因為要做自己愛做的碟, 亞龍大說, 一定要自己話事。
「一般唱片公司都會要求隊 Band: o拿, 作首呢o的 Feel, 再加支咁o既 Feel, 全部幫你安排好, 可能會搵個 Producer 睇實你添。咁樣搞樂隊仲有乜o野意義?「已經冇錢啦, 仲唔俾我o地話事!」
王菲係神!拜佢啦
以3張唱片涉足主流樂壇的一段日子, 亞龍大說樂壇畢竟也有進步。「好似香港o既民主步伐咁o羅, 慢就慢o的, 都有轉變, 睇番主流歌手o既音樂係豐富o左, 作曲同編曲有多類型嘗試, 雖然外界未必受, 但聽到張惠妹、陳奕迅o既歌就好開心, 真係好鬼正!」
「王菲簡直係神喇, 可以擺得o係神木台上面拜, 佢o既歌零舍 Band o的, 就算第二個歌手唱番張亞東寫o既歌, 相信都冇王菲咁好 Feel。」 個獎等於煙灰盅 對亞龍大來說, 他們渴求的成就好原始, 5個人賺到「三五七萬」落袋, 無須再憂柴憂米, 買o野唔憂價。 「唔敢講獎項係虛名, 但個獎擺到返 Band 房, 咪當煙灰盅咁用! 我o地唔會好計較獎項, 好多o野都傾番o黎o既, 做乜o者! 假如好似庾澄慶咁就真係好光榮o羅, 一個中國人可以o係 MTV 搞一場Unplugged﹝音樂會﹞, 呢一場表演時間, 比贏一個獎更加光榮喇。「咁有獎金就另外計喇, 哈哈!」
後記: 學下Aqua啦! 錢呀! 問亞龍大: 有冇想過放棄玩音樂? 他們說: 有呀, 上個禮拜才想過! 「因為聽到 Aqua (丹麥 Dance Group ) 都賣5萬!」真係俾佢o地吹脹!
