Cumha Mhic Criomain


[Fonn / Tune]


Dh'iadh ceò nan stùc mu eudann Chuilinn,
Us sheinn 'bhean-shìth a torman mulaid,
Gorm shùilean ciùin 'san Dùn a sileadh,
O'n thriall thu uainn 's nach till thu tuille.


[Séisd:]
Cha till, cha till, cha till Mac Criomain,
An cogadh no sìth cha till e tuille;
Le airgiod no nì cha till Mac Criomain,
Cha till e gu bràth gu là na cruinne.


Tha osag nam beann gu fann ag imeachd,
Gach sruthan 's gach allt gu mall le bruthach;
Tha ealtainn nan speur feadh gheugan dubhach,
A' caoidh gu'n dh'fhalbh 's nach till thu tuille.

Tha 'n fhairge fa-dheòidh làn bròin 'us mulaid,
Tha 'm bàta fo sheòl, ach dhiùlt i siubhal;
Tha gàirich nan tonn le fuaim neo-shubhach,
Ag ràdh gun dh'fhalbh 's nach till thu tuille.

Cha chluinnear do cheòl 'san Dùn mu fheasgar,
'S mac-talla nam mùr le mùirn 'ga fhreagairt;
Gach fleasgach 'us òigh gun cheòl, gun bheadradh,
O'n thriall thu uainn 's nach till thu tuille.