JUNE PRIDE MONTH 2002
Manila, Philippines

Halo-halo, Pare-pareho, Pantay-pantay


The following is an informal rationale for this year's Pride Month Theme -- Halo-halo, Pare-pareho, Pantay-pantay.


HALO-HALO:
Iba-iba ang ating mga pinanggalingan: mayrong mayaman, mahirap, nakapag-aral, nag-aaral, nakatapos o hindi man lang nakatuntong sa 'skwela. Mayrong bakla, lesbiana, bisexual, transgendered, bading, bianing, tomboy, tunggril, tivoli, vaklush, badinggerzi, operada, babaeng bakla, lalaking mukhang tomboy at kung ano-ano pa. Mayroon sa ating Bisaya, Ilocano, Bicolano, Tagalog, anak ng 'kano, anak ng negro, anak ng bakla, anak ng tomboy. Mayroong payat, mataba, matabang-mataba, sobrang taba, patpatin, walang balakang, walang suso, may lawit, nagkakabit ng lawit, nagpakabit ng lawit, nagpalaglag ng lawit. At kung ano-ano pa.

Hindi maaaring ipagkaila natin na sa iisang maliit na grupo ay magkakaiba at may pagkakaiba tayo. Ang tawag kasi diyan ay ang ating pagiging indibidwal. Ito ang ating pagkakakilanlan sa ating sarili. Marami ka mang ka-pangalan, wala kang kasing-ugali. May kasabihan nga tayo na kambal man silang pinganak, malayo ang ugali nila sa isa't-isa. Kung titignan natin sa mas malaking perspektibo, ganyan din ang ating bansa -- HALO-HALO.

PARE-PAREHO:
Iisa ang ating lahi -- Pilipino. Pare-pareho tayong naghihirap, umiibig, umiiyak, tumatawa. Pare-pareho kasi tayong tao. Ikaw, ako, tayong lahat tao. Kahit na yung mga sinasabing asal-hayop, tao pa rin sila -- hayup nga lang.

Maipapakita natin na kahit na tayo ay mga indibidwal at kahit na mayrong bakla, lesbiana, bisexual o transgender sa ating hanay, pare-pareho pa rin tayo sa ating mga karanasan. Maaaring iba ang dating natin ngunit yun at iyun din ang ating mga kagustuhan. Pare-pareho tayong tinatalikuran ng mga taong sarado ang isipa't mata sa katotohanan na mayroong bakla, lesbiana, bisexual at transgender. Pare-pareho tayong naghahangad ng isang magandang hinaharap.

Pare-pareho. Isang pagpapakita na tayong LGBT ay hindi higit o kulang ang ating pagkatao.

PANTAY-PANTAY:
"Pantay na karapatan!" yan ang ating sigaw. Sa diskriminasyon sa tahanan, pamayanan, simbahan at pamahalaan, laganap pa rin ito. Datapwat ito ay naiibsan na, kailangan pa ring ipakita, iparamdam at ipaglaban ang pantay-pantay na pagtingin sa atin bilang mamamayan...bilang isang tao.

Pantay-pantay. Isang panawagan sa pagkilala sa ating pantay na karapatan.

Kaya kung tatanungin ka ng pang beau-con na tanong: Paano mo mailalarawan ang komunidad na LGBT? (How would you describe the LGBT community?)

SAGOT: "HALO-HALO. PARE-PAREHO. PANTAY-PANTAY. I THANK YOU!"

1