Kapampangan Folk Songs

Kapampangan Folksongs

CONTENTS


Atin Cu Pung Singsing
(Ibat ya king 'Ing Susi', Bilang 1, Banua IV, Oktubre 1995)

1.
 

 

Atin cu pung singsing, metung yang timpucan,
Amana que iti, qng indung ibatan,
Cacu yang sininup qng metung a caban,
Mebating ya iti ecu camalayan.
2.
 

 

Qng sucal ning lub cung susucdul qng banwa 
Picurus cong gamat babo ning lamesa 
Ninu mang manaquit qng singsing cung mana 
Calulung pusu cu manginu ya caya.


Doredo
(Contributed by Marc Nepomuceno:
Taken from "The Philippines in Song and Ballad"
compiled by Felixberto C. Sta. Maria.
Here are first two stanzas:)


Doredo redo paten da cu man pung batbat doredo 
Doredo redo kang Kulas ecu tanggap doredo; 
Doredo redo uling tutu yang matamad doredo 
Doredo redo saka eya biasang sumulat doredo.
Doredo redo paten da cu man pung tampi doredo 
Doredo redo y Kulasa eke buri doredo; 
Doredo redo uling eya biasang mangadi doredo 
Doredo redo ampong macapal ya labi doredo.

(To be continued)


O Caca, O Caca

Nung buri mung akit lunto ing terac ampong basultu,
Palto casang batal bako, maman ampong sigarilyu.


1.
 

 

O caca, O caca, cabalat capaya, 
Sabian mu nang patas nung enaca bisa; 
Mukiat cu king bunduc manintun aliwa, 
Malagu la keka biasa lang mamana.
2.
 

 

O caca, O caca, dinan dacang onor 
King aguiang maragul emu pagmalati; 
Sidsad ca king puti, matilus ca arung 
Ing pipintas cu mu tadtad cang bulutung.
3.
 

 

O caca, O caca, cacang bulatictic, 
Cabitis cang tikling, cabalat apulid; 
Lon dacang marayu, lon dacang malapit, 
King kekang itsura tutu kung mebuisit.
4.
 

 

O caca, O caca, dinan dacang uri 
King aguiang maragul emu pagmalati; 
Malagu ca tabas, malare ca puti, 
Ing pipintas cu mu matuling ca labi.
5.
 

 

O caca, O caca, panatulan daca, 
Pabusbus cang puenta saka ca papurga; 
Nung lugud ya ing Diyos, micacatawan ca, 
Manganac cang doctor magpari ya Roma.
6.
 

 

O cacang manintun king kekang ministil 
Tutu cang milisia king dalan miningsil; 
Acung atupan mu mapurul a gunting, 
Ginu ecu mibas caniang kekang santing.

O Caca, O Caca
(version submitted by Nancy Lagman Tremblay)


1. 

 

O cacang donsilya maniaman a nasi 
Nanu ing ulam mu paksi lang kabasi 
Sumubo yang wanan kandut ya ing kaili 
Langut la ring ipan malating malati.
2. 

 

O cacang maputla pamatulan daca 
Pabusbus cang puente saca ca papurga 
Lugud na ning Dios mica-catawan ca 
Manganac cang doctor lacuas cang micualta.
3. 

 

O ca liro liro bigang cayit-cayit 
Panas a gagapang manierang matulid 
Ikit ne y Buldabis dederang yang dagis 
Piningdang ne Wawa pisali ne Betis.
4. 

 

O caca o caca cabalat papaya 
Sabyan mu nang patas nung ina ca bisa 
Keta man kekami dacal lang baluga 
Mayap la pa keka biasa lang mamana.
5. 

 

Carin pu kekami emi sadyang gawi 
Lulub king pisamban mangurus mangadi 
Ing pegaralan mi manibat king malati 
Tatalan carayum manulsi keng gisi.
6. 

 

Ecasa mangari king tau Menila 
Tatali yang bacud mesaclit ya dila 
O bulaclac ning Malaysia O Indu ning Poesia 
Icapin pagdiwata na nining pusu cu't caladua .


Ing Bulung Lara
(submitted by Nancy Lagman Tremblay)
 

1.  
 
 
 
Cucua cung bulung lara
Abante nacung Kalara
Iquit cu ring miyasawa
Mamangan lang butol baka
3.  
 
 
 
Inatsa ra cung awang
Sepu nacu nitang aswang
Tiniti nacung maniaman
Kirut kirut cu pitaclan
2.  
 
 
 
Meniad cung caquinisan
Pilpuk dacu qng tiupan
Sinuklab cu lalam dulang
Mengabalbal la ring pinggan


  Y Rizal
(submitted by Nancy Lagman Tremblay)


 
1.  
 
 
 
Ating atlung dalan sundalus Cavite
Cabud abalu da y Rizal pateng de
Migalsa la deti adang minialese
Sansaman ya Rizal, bayang e mabikte
2.  
 
 
 
Y Ernestu naman tutung yang matapang
Miqui bale guintu qng gulut pisamban
Magtindang kutsinta carin ya mengutang
Nucarin ya'y Rizal, baneyang pin cuanan


Tinanam Kung Kamantigui

1.
 

 

Tinanam kung kamantigui,
Libutad na ning paligui
Memunga ya't minyalapi,
Uli ning sintang malati.
2.
 

 

Tinanam kung pakayungkong
Libutad na nitang payong,
Mamunga ya't manyalapung
Uli ning sintang maragul.
3.
 

 

Ing baril kung e mamakbung
Susuklab ya lalam danum,
Manikwa yang susong dagol
Bulung lara ampong kangkong.


Misan A Cayaldawan


1.
 

 

Misan a cayaldawan,
Ilog kakung dalakitan,
Adungdungan ko ring asan,
Mipagbotu lang kapitan.
2.
 

 

Ing botu rang pikayari,
Tinyente ya ing balulungi
Presidente ya ing bundaki
Uling maragul yang dili.
3.
 

 

Kusineru ya ing itu
Uling mingatba ya tibu;
Sundalus naman ding tuyu
Balang tindahan atilu pu.
4.
 

 

Gobernador ya ing bangus
Uling dakal ya ganadus;
Kunyerus naman ding paro
Uling makapal lang tutu.
5.
 
Impiyernus ya ing kalang
Ligaya ya itang kuran
Uilng karin la bukal-bukal
Deta pung ikua kung asan.


Keta Pu Kekami
(version sung by Totoy Batu submitted by Armando Regala)
1.
 
 

 

Keta pu kekami misnang datun,
Lalu't lalu na neng gatpanapun,
Ala kang apansin, nung e ring sasarul Ay!
A tuki-tukian da detang mangamaru
Ampon maglipaktung.
2.
 
 

 

Katakap ning silim matahimik,
Ala kang damdaman nung e sunis,
Gaga retang ayup, ampong retang kuliglig Ay!
Makabage keka lalu't nung kapuluan
Lawiswis ding batis.
3.
 
 
 
 

 

Bandang galing-aldo makayama,
Karetang magpastul king kaingye ra,
Atin nang kakakling atin nang magkanta Ay!
Babo ring damulag karin da linimba
Ing malukang bie ra
Babo ring damulag karin da linimba
Ing malukang bie ra.


Eca Mamaco
(provided by Mang Fely Tinio)

 
 
Eca mamaco emu cu lalacuan
Eca tatangis mibalik cu naman
Pangaras ku quetang ayan cu
Sulatanan da ca o bandi cu.


Basulto
(Reported by Rhoda Manansala)


1.
 

 

E ca sa mangare qng tao Candaba,
Miglutu yang pindang, mibalicucu ya
Linub ya qng silid quinua yang espada,
Salbahe cang pindang, O ba't lalaban ca.
2.
 

 

E ca sa mangare qng tao Baculud,
Miglutu yang manuc e ne man mo pitput,
Saca ne linulan qng metung a mangcuc,
Iniang candutan ne gulping migpalpatuc.
3.
 

 

E ca sa mangare qng tao Paroba,
Manali yang lubid mesaclit ya dila,
Milai yang menic quinua yang candila
Iniang misindi ya balag-balag ya lua.


Minucyat cu qng Saresa
(Reported by Rhoda Manansala)


1.
 

 

Minukyat cu qng saresa,
Sangcan, sangcan papainawa
Nung ating ayup a dugpa,
Barilan que qng pistola.
2.
 

 

E mu ne sa babarilan
Ing ayup cung pacamalan
Seli que pang liman dalan,
Cang Marianong baritaclan.
3.
 

 

O baquit e que barilan
Macasira lang tanaman,
Pilan no ring asira na?
Adua na lang pulu't lima.
4. 
 

 

Ing baril cung e mamacbung,
Sinungab ya lalam danum
Carin ya pin pacbung-pacbung
Paintunan ne i Apung Gundang.


O Baco O Baco
(Reported by Rhoda Manansala)


1.
 
 

 

O baco o baco, e ca gasul gasul,
Balu mu na baco lipit ing panaun,
Inta retang paro carin la maratun,
Qng sanap sanapan, qng sanap sanapan
A malino danum.
2.
 
 

 

Sasabian da apu detang mamalita, 
Nung lumbug neng aldo ala nang masala, 
Inta detang batuin ampo detang tala, 
E no wari sunlag, e no wari sunlag 
Queti qng masala


O Patag a Bundoc
(Reported by Rhoda Manansala)


O patag a bundoc, cuculate dutung,
Masetas ning sagin, balag ning balatung.
Tinanam cung mangga, memunga yang santul,
Ing gaindu cung sisi, tandang yang mangebun.


Nung Acu ing Cucutnan
(Reported by Rhoda Manansala)


Nung acu mu ing cucutnan, Buri cu neng bulutungan,
Nung wari sa qng imalan, kalibu yang pemaltacan,
Balican cu ing taguri, bulutungan e que buri,
Mandilu ya mu saguli, paruminggu eya langi.



 

Ing Magsasamais
(Contributed by Abel Dizon and Marc Nepomuceno)


1. 

 

O, cacang maputla, Bisang lare ditac
Matul cung panulu, queca macacayap
Sagu ning cabayu, quiling ning damulag
'Saca me aruban qng ebun ning tarat.
2. 

 

At nung sacaling eca pa cumayap
Manintun na caman mayumung dalayap
Atdung e mapait, larang e maparas
Qng asung apagquit carin me iparaldac.
3. 

 

Ilutu mu neman Qng curan a dutung
Layun me pang tamban Qng marimlang danum
Pangadalise na, agad mung ipainum
Camandag ning saquit antimong melasun
4. 

 

At nung sacali eca pa cumayap
Manintun na caman balbas da ring tugac
Atdung e mapait, larang e maparas
Qng asung apagquit carin me iparaldac.
5. 

 

Cabud calaco na Nitang quecang lagnat
Manintun na camang Balbas ning salusad
Lua daring tulang Bulbul daring tugac
Bituca ning linta Ia ing quecang ipamabat.
6. 

 

Iduian mu neman Quing bale babagua
Laiun meng ulasan Quing bulung ning lupa
Asapan meng dapug Baiang mipanigla
Saca me pagdalit Quing matning cumpana.


Y Mariang Malagu
(Reported by Rhoda Manansala)


1. 

 

Y caca cong Maria, mamuli yang tapis,
Purung purung sutla habing Camarines,
Ninu ing tatalan, ninung talabitbit,
Y Caca cung Peping a anac ng Don Pelis.
2. 

 

Y Don Pelis naman tutu yang mayaman,
Maqui bale batu arap ning pisamban,
Quinanwa yang silyon saca menandawan,
Bala ng Don Pelis masala yang bulan.
3. 

 

Ita namang bulan ampon itang tala,
Ela bisang sunlag, quete qng masala.
Itang papalacul, at ing lalagari,
Pilit lang susucad e micacawani.


O MATAS A BANUA
(submitted by Marc Nepomuceno)
(As sung by, and lyrics according to, Armando L. Nepomuceno)


1.
 
 

 

O matas a banua paintungulan daca 
Tungi co ring batuin pacuintas co queca 
Bangalan que ing bulan gawan queng corona 
Iputung que queca, iputung que queca 
Lalam ding bioleta.
2.
 
 

 

Gawa ra cang duyan qng bigang maputi 
Cacung ipanali asul pinanari 
Ipabante raca caretang bayani 
Doctor Jose Rizal, Andres Bonifacio 
Lahing cayumangui.


Keta Pu Kekami
(contributed by Nancy Tremblay)
1.
 
 

 

Keta pu kekami, balen ning San Roque 
Ating Macatula apat lang pulubi 
Teterac ya ing lumpo, babage ya ing pipi 
Manalbe ya ing bulag, 
Makiramdam ya ing maklak.


CAPILAS BULAN
(submitted by Marc Nepomuceno)
(As sung by, and lyrics according to, Armando L. Nepomuceno)

 
1. 

 

Malagung capilas bulan 
Sulu ning bie cu, sintang hirang 
Batuin ca ngening caorasan 
Ing pusu cu paslagan me.
2. 

 

Sampagang misnang cabanglu 
Binang maningning yang cule mu 
Queca ya ing caladua cu 
Bandi meng lubus susumpa cu.
3. 

 

Matang mapundat cacu memihag 
Ica ing reina na ning caladua 
E me sa pabustan 
Queca yang saguipan.
4. 

 

Malunus naca quening bili na 
Ning malsinta. 
Malunus naca quening bili na 
Ning malsinta.


BALITAW NING BALEN CU
(submitted by Marc Nepomuceno - As sung by
and lyrics according to Armando L. Nepomuceno)
1. 

 

Balitaw ning balen cu 
Masdan yu, lumigaya tamu 
Maglundag la't magsaya 
Bandi cu, oren deng anac yu.
2. 

 

Mamindac la't matula 
Balitaw, yang terac yu 
Yang dapat i-indac yu 
Para qng balen yu.
3. 

 

Dening cayanacan 
Purus caligayaan 
Anting mariposa 
Qng jardin cung rosal.
4. 

 

Babo ring sampaga 
Sulasulapo la 
Arap ning balen cu 
Salamat qng balitaw yu.


Return to Kapampangan Home Page
Return to Kapampangan Music Page
Return to Armando's Home Page


Date created: July 8, 1997
Date last Updated: May 21, 2001


1