TTT-Himnaro Cigneta (al la titolpagxo)

REVENO DE KRISTO

Ja eble aŭrore, dum tago sin vekas

It may be at morn, when the day is awaking
"Christ Returneth"

Kaj ... vi vidos la Filon de homo ... venantan kun la nuboj de la ĉielo : el Marko 14.62

Verkis (angle) : H. L. TURNER, 1878
Esperantigis : ROS' Haruo, 1999

Fonto : RH

  1. Ja eble aŭrore, dum tago sin vekas
    Kaj lumo la ombrojn de l' nokto trastrekas,
    Revenos Jesu' en pleneco de gloro
    Por akcepti la proprajn de l' mond'.
         Kiom longe? Jesu', Sinjor',
         Ĝis ni kantos en ĥor',
         "Li revenas! Haleluja!
         Haleluja, amen! Haleluja, amen!"

  2. Aŭ eble tagmeze, aŭ eble krepuske,
    Aŭ eĉ en noktmeza mallumo embuske
    Signalos ekbril' ke revenas Jesuo
    Por akcepti la proprajn de l' mond'.
         Kiom longe? Jesu', Sinjor',
         Ĝis ni kantos en ĥor',
         "Li revenas! Haleluja!
         Haleluja, amen! Haleluja, amen!"

  3. Kriante "Hosana!" descendos anĝeloj
    Kun gloraj sanktuloj el altaj ĉieloj;
    Kun graco kronanta la brovon, Jesuo
    Ekakceptos la proprajn de l' mond'.
         Kiom longe? Jesu', Sinjor',
         Ĝis ni kantos en ĥor',
         "Li revenas! Haleluja!
         Haleluja, amen! Haleluja, amen!"

  4. Ho ĝojo, ho ravo! forpasi sen morto,
    Sen morbo — tuj savo! plej inda fin-sorto:
    Ascendi tra l' nuboj dum Kristo en gloro
    Akceptas la proprajn de l' mond'.
         Kiom longe? Jesu', Sinjor',
         Ĝis ni kantos en ĥor',
         "Li revenas! Haleluja!
         Haleluja, amen! Haleluja, amen!"

Melodio : CHRIST RETURNETH
Komponis : James McGRANAHAN, 1878
MIDI TCH*

TTT-Himnaro Cigneta
estas filia TTTejo de
Eldonejo Cigneto