Mir orth lyver gwester
An omladh erbynn browaghysi re dheuth dhe Gernow.
Den neb a veu kemmerys gans an kreslu yn Karesk wosa tardhans yn boesti, veu dyghtyes yn klavji Trelysk yn Truru yn seythun yw passyes.
Nicky Reilly a wre triga yn Aberplymm... le may feu y gryjyans treylyes dhe Islam.
Hwithoryon a lever bos an tanbellen esa ganso, a allsa ladha meur a dus... yn gwella prys ny wrug tardha yn tien.
An kreslu a lever bos hemma sin dhyn ni... ha dell vo edhomm dhyn a vos hewel pupprys.
****
Den re verwis war Dhowr Tamer wosa y dhinghy dhe dreylya penn a wartha dhe woeles.
An droglamm a hwarveu dy Sadorn yn nos ogas hag Essa.
Selwys veu y wreg gans peswar den yowynk ...i a dewlis dhedhi buoy bywnans.
****
Kuruner re ros y vreus yn seythun yw passyes war an peswarthek person neb a verwis pan dardhas jynn-ebrenn aspia Nimrod a-wartha Afghanistan.
Yth esa y'ga mysk Nij-leftenans Gareth Nicholas neb a wre triga yn Tewynn Pleustri.
An kuruner a lever bos res dhe'n MOD kildenna an Nimrods.
****
Sport...
Hag yma Kernow owth ombareusi rag fit rygbi bras nessa seythun.
Y fydhons ow mos war hyns dhe Twickenham ogas dhe Loundres.
Heb mar y fydh orth aga skoedhya, milyow a Gernowyon dhiworth Lu Trelawney.
Ymons i ow kwari y'n finel a'n Skoes Konetethek... mes dell wodhon ni lemmyn, y fydh Kernow avonsys dhe'n Hanaf Beaumont nessa seson, pynag a vo an bennseythun ma.
Res yw dhyn aswonn an ober gwrys gans oll an warioryon hevlyna... brassa rann anedha a dheuth a'n klubys Kernewek yn kenedhlek dew.
****
Hag yma Breten Veur owth aswonn donsoryon a Gernow.
Bagas Kernewek re sewenyas ha kavoes le yn finel a Britain's Got Talent, der an bellwolok.
An bagas yw gelwys Flava... ha'n eseli yw kemmerys dhiworth Skol Dhons Fiona Richardson yn Pensans.
Re bo dhedha chons an gwella.
