Dy Meurth 31/7/01 20:00: Yma govynnow yn kever salowder a als yn ogas dhe Lannwethenek wosa kerdhor a goedhas 100 troeshys dhe'n mor. Yma'n den dhiworth Sen Austell yn-dann with-tynn yn klavji Trelysk. Y blit yw kompoes mes sad. Dy Meurth 31/7/01 20:00: Breusyas re ros breus gortos dhe gernowes neb a skwattyas hy mamm gans morthol kig wosa bos skwattys hy honan gans yar rewys. Marcia Collins, 55 bloedh hy oes dhiworth Porthrepta a'n gwrug wosa argya gans Eliza Grose (84). Yth esa war hy mamm klopenn ha challa terrys.  Dy Lun 30/7/01 21:00: Protest veu synsys hedhyw erbynn towlenn dhe gildenna an asrann droglammow dhe Glavji Pennsans. Protestoryon a worras aga haskyrgh a-rag soedhogyon yeghes dhe seminar yn kever yeghes yn Kernow y'n termyn a dheu. Dy Lun 30/7/01 21:00: An Samaritans a vynn kavoes moy diogoledh der an kesroesweyth wosa maw, 18 bloedh y oes dhiworth Ponsrys, a omladhas. Simon Kelly a leveris bos hwans dhodho y wul war y wiasva y honan. Dy Lun 30/7/01 21:00: Drog yw genev nag esa nowodhow der an bennseythun mes yth esen vy yn-mes a Gernow rag an pols ma. Dy Yow 26/7/01 18:15: Eus lottri kod-post rag kavoes dyghtyans yn klavji? Henn yw an govynn wosa derivas gans an governans a dhiskwedhas bos tressa rann a wodhevysi ow kortos rag hwegh mis po moy yn Kernow (29.9%). Dy Mergher 25/7/01 19:00: Nyhewer, maw, 6 bloedh y oes,  a veu skattys warnans gans jynn glesin. Yth esa an droglamm dhe Galstok. An maw a veu kemmerys dhe Glavji Derriford der karr klavji ayr. Dy Mergher 25/7/01 19:00: Nyhewer, kanores hevelep Madonna, Lisa McCheyne, meur hy bri ha'y hevelep, a brofyas gwaryans unnik a-rag tus an Eglos Katholik dhe Bennsans.a-barth drehevyans arghasow a'n keur may hyllens gul tour dhe Benneglos Pollifer (Liverpool) kyns pell. Lisa a vydh gwelys y'n fylm nowydh 'South Kensington' ha gwaytyans yma hi dhe waynya towlenn a gesstriv hevelebow tus a vri rag LWT. Sur yw hy bos yn kynsa peswar. Dres oll, hi a gan tramor hag yn Pow Sows Kledh.Yth yw hy mamm esel an eglos dhe Bennsans. Kyn na ve saw tus an blyw a wrug hy gweles yn hel St Mary's Haven nyhewer, Lisa a ganas a-rag mil den dy' Sadorn yw passys ha hi yn Munich, Almayn. Degemmerys yn toemm a veu hi yn kehaval y'n dew le! (Meur ras dhe Phil Knight) Dy Meurth 24/7/01 20:00: Yma Dug Karlo ow skoedhya an pow a-dro yn kaskyrgh nowydh. Ev a vynn dynya negys dhe'n trevow wosa kleves karn ha min. Ymava ow kul hemma dre wul bri a gowethasow kepar ha Pastiow Ginster. Ev a wormoelas Ginster rag ri ober ha bywnans dhe'n ranndir a-dro Kelliwik. Lemmyn, Dug Karlo a garsa gweles moy tus negys yn unn skoedhya an pow a-dro y'n kethsem maner. Dy Lun 23/7/01 18:00: Yma Konsel Kernow ow sevel erbynn towlenn nowydh gans kowethas tren First Great Western. FGW a vynn ystynna hy franchis rag diw vlydhen. KK yw pur anlowen gans obereth an gowethas ha konsloryon a vynn gweles gwellheans an gwasonieth. Dy Sul 22/7/01 19:00: Den re verwis dhe hwarvos alusennek dhe Gresenn Sport Karnbre. Krysys yw bos shorr kolonn warnodho ha medhyk a leveris ev dhe verwel hag ev drehedhys orth Klavji Trelysk yn Truru. Yeth esa an den ow kemmeres rann yn "Relay for Life" rag Hwithrans Kanker.

Nowodhow koth - folenn 1

Dy Mergher 15/8/01: An teylu Blair re dheuth dhe Gernow rag aga dy'goelyow hav Breten Veur. I a dhallathas gans galow gwask dhe Charlestown. Lemmyn, i a vynn bos gesys dhe'ga honan heb bos troblys gans an wask. Dy Sadorn 11/8/01: Yma maw yn klavji Great Ormond Street yn Loundres was koedha yn kreun kawgh dhe Bark Havysi Piran Nowydh dhe Woenhavar. Ev yw marnas 4 bloedh. Dy Meurth 7/8/01 19:00: Konsel Kernow re ros dhe Gowethas an Yeth Kernewek arghans rag gwiasva nowydh. Kyns pell, y fydh an ober gwrys dhe ri lies gwasonieth der an kesroesweyth yn Kernewek ha Sowsnek. Dy Sadorn 4/8/01 15:00: Yma'n kreslu ow synsi benyn (33) wosa tan yn Sen Austell nyhewer. Unn den ha dew ki veu selwys mes an chi yn Klos Par an Fenten o distruys. Dy Sadorn 4/8/01 15:00: An kesstrif mordardha Rip Curl a worfenn yn Tewynn Pleustri an bennseythun ma. An hwarvos keskowethek meur yw haneth. Y fydh DJow meur aga bri dhe'n Extreme Tube Party. Dy Gwener 3/8/01 22:00: Medhyk dhiworth klavji Trelysk re leveris y vos kablus rag denladh a-rag lys an gurun Karesk. Kenneth Woodburn yw kablys rag mernans godhevyades Kelly Marie Dent (16). An vowes dhiworth Rysruth a vervis mis Gwynngala 1998. Mewgh veu res hag y tehwel dhe'n lys mis Kevardhu. Dy Yow 2/8/01 23:00: Gwikoryon yn Aberfal yw serrys awos ken liv y'n dre. Rannow veu beudhys gans meur a dhowr wosa hager awel ha glaw poes. Dy Yow 2/8/01 23:00: Gorfennys yw gwellheans Porth Mylor. Perghennogyon a spenas £4 milvil war an dowlenn ha gul lies soedh nowydh. Dy Mergher 1/8/01 19:00: Yma den dhiworth Rysteusi ow talleth bywnans yn pryson hedhyw. Ev a voldras y vyrgh mis Gwynngala yw passys. Stanley Matthews (45) a leveris y vos kablus y honan rag ladha Patricia Berriman (17). Dy Mergher 1/8/01 19:00: Korf havyas (16) re beu kevys orth troes alsyow yn ogas dhe Benn Trefos. Yma gwarnyans yn kever salowder kerdhes a hys an alsyow wosa pymp droglamm yn pymp dydh