Kovskrifenn 12
Dy Gwener 5/4/02: Rag diw vlydhen warbarth, Kernow re gemmeras nessa le dhe Gembra y'n kesstriv kan PanKeltek. Treys Noeth eth ena gans aga han 'Tus an kastell' yn unn waytya fetha an Gembroyon kepar dell wrug an Ducheth yn 1991, 1996 ha 2000. Soweth nyns o an kas. Alban a gemmeras tressa le, mes nyns esa saw unn poynt ynter 1a, 2a ha 3a. An kannasow a dhehwel dhe Gernow dy Sul ha res vydh dhe'n ordenoryon dalleth pareusyansow rag 2003 kyns es pell. 
Dy Yow 4/4/02: Dhe'n kesstriv PanKeltek yn Iwerdhon an seythun ma band Kernewek Treys Noeth, re waynyas kynsa le rag kan nowydh skrifys yn gis hengovek ha'n Band Troyll Melinji a gemmeras nessa le y'n kesstriv rag kana yn gis hengovek. Y fydh moy derivadow ha derivas leunna kyns es pell. Yth eson ni hwath ow kortos an nyhewer ma an kesstriv 'Keltovision'. Yma an Goel PanKeltek yn Kilkenny hevlyna. Dhe'gan kannasow ena: hwi re wrug yn ta a-barth Kernow. Meur ras dhywgh.
Dy Yow 4/4/02: An hwarvos hevlyna a vydh synsys 3a mis Metheven. An vlydhen ma yma chons dhe weles band rokk Kernewek Skwardya ena. Y fydhons i ow seni dhe 1:30.
Dy Mergher 10/4/02: Ordenoryon Lowender Pyran re dhellos derivadow rag an goel hevlyna. Yn mysk an re usi ow tos, y fydh: Ar Vro Meleniked dhiworth Breten Vyghan, Parti Dawns Llangollen ha Lleisau'r Frogwy dhiworth Kembra, ha Strathspey Fiddlers dhiworth Alban. Tokynyow: 01872 553 413
<<<delergh<<<
Dy Sul 14/4/02: Y fydh menystrouthi ha dons synsys an mis ma yn-dann an dor yn Kernow Est. Yn mysk an re neb a vydh ow seni dhe Vogow Karnglas yw: 'Dalla' ha 'Tan ha Dowr'. Mar mynnir prena tokynyow, pellgows orth 01579 320251 poken dannvon e-bost. Kost anedha yw £5.   
Dy Yow 11/4/02: Yma sorr unnweyth arta bos Pons Albert Ryal ow tegea rag gweythyow war an hyns horn. Nans yw diw seythun, yth esa degeans dres pennseythun vysi Pask. Negysyow tornysi a's teva own an vysytoryon dhe vos neb le arall awos an kaleteryow. Byttegyns, an bennseythun ma, y fydh degeans moy hag yma esel senedh Westminster rag Truru ha Sen Ostell, Matthew Taylor yn unn erghi Railtrack dhe leverel prag nag yllons gul gweythyow y'n nos kepar dell wre British Rail.
Dy Sul 14/4/02: Dell hevel, An Edenva a ylli dos ha bos keskanva a-vri yn Breten Veur gans gwariva ayr-igor parys rag darvosow lemmyn. 23a mis Me, y fydh an kowethas ordena keskanow ‘Womad’ ow tos dhedhi. Y fydh menystrouthi dhiworth ‘Blind Boys of Alabama’, Yungchen Lhamo dhiworth Tibet ha Midge Ure a Ultravox.
Dy Sul 14/4/02: Dew wari nowydh re beu kevys yn mysk lyvrow res dhe’n Lyverva Kenedhlek Kembra. Y teu an nowodhow marthus dres eghenn ma dhe’gan attendyans an seythun ma yn notenn dyllys gans an lyverva ma. An dhew wari yw ‘Bywnans Ke’ ha ‘Bywnans Myghtern Arthur’. I a veu skrifys y’n 16ves kansblydhen a-dro dhe’n keth termyn a-vel ‘Bywnans Meriasek’, ha nebes den a grys aga bos dhiworth Kollji Glasnedh. An lyver hag ynno an dhew wari a’n jeves dew ugens folenn mes nyns yw an gwariow ena yn tien. Kellys veu nebes folennow orth an dalleth, y’n kres, hag orth diwedh an lyver. Tus skentyl y’n taves a vynn mires orth an dornskrifow skaffa gallens mes krysys bos an lyverva dhe dhyllo neppyth y’ga hever kyns neppell. Dr Ken George re leveris bos an brassa ha gwella nowodhow dhe hwarvos y’n yeth a-ban dhallathas ev y dhyski ha bos govenek dhodho diskudha geryow nowydh ha taklow nowydh gramasek ynna. Dell hevel, meur a ober re beu gwrys gans an gwariow gans gweres Dr Nicholas Williams. Y fydh moy dyllys yn kever an dhew wari ma yn skon der an wiasva ma. An hwedhel ma o an brassa studh a gesgows dhe’n Bennseythun Gernewek neb a dheuth dh’y fenn hedhyw dhe Dreth Pennsywyn.
           MARTHUS AN DEGBLYDHEN
                               GWARI DISKUDHYS YN KERNEWEK KRES!
                                                        Dr Ken George a skrif...
Dy Meurth 16/4/02: Dy’ Gwener an 12ves mis-Ebrel yth ith dhe’m soedhva yn Pennskol Aberplymm rag gorfenna areth rag an Bennseythun Gernewek, synsys hevlyna yn Bensewynn.  Ow mires orth an e-bost devedhys, y hwelis an titel ma diworth Andrew Hawke yn Aberystwyth:  An Amazing Discovery.  An pyth a redis yn y lyther a’m movyas meur, hag a’m gorras dhe janjya testenn ow areth yn tien.  Tekst yn Kernewek Kres re beu diskudhys y’n Lyverva Genedhlek Kembra, le may ma Andrew owth oberi.  An gwari yw kelmys yn unn lyver a 20 lyvenn, mes seulabrys yth esa 34 lyvenn;  ytho nyns yw an tekst dien. Andrew Hawke re welas an dornskrif;  ev a lever bos a-dro dhe 90 linenn war bup folenn (ytho moy es 3300 linenn yn oll), aga hys yw po seyth po peder syllabenn, kepar hag yn Bywnans Meryasek.  Dell hevel, an dornskrif yw diworth an hwetegves kansblydhen. Kyn na wodhya Andrew yn kever an dornskrif ma kyns dy’ Yow eus passys, y feu res dhe’n Lyverva yn 2000.  Yma Graham Thomas, lemmyn omdennys a’n Lyverva, ow pareusi dyllans an tekst, ha’y ober yw “well advanced”.  Dell hevel y’n jeves gweres gans tus, yntredha Nicholas Williams.  Yw ewn gwitha diskudhans a’n par ma yndann gel dre voy es blydhen?  Prag ny wrussons y argemmynna kyns dhe’n bys? An gwari yw Bywnans Ke, neb o koweth Meryasek, hag yma skrifow yn y gever yn Bretonek.  Rann an gwari yw yn kever Myghetrn Arthur, hag a worras Graham Thomas dhe grysi bos dew wari yn le onan.  Mes Oliver Padel a diskwedhas desempis bos rann yn kever Arthur yn mysk hwedhel bywnans Ke;  ytho nyns yw marnas unn gwari. Pup-prys y leveryn vy y fedha unn jydh diskudhys tekst bras yn Kernewek Kres.  Da yw genev y feu gwrys pan ov hwath yn fyw.
Dy Mergher 24/4/02: An Ajenteth Keskomunyansow Radyo re worras spas a-denewen rag kanel Gernewek. Yma govenek dhe Mick Catmull a Fylmow A38 sevel an gorsav. Soweth, lies konygyon negys a lever nag yw possybyl gul gorsav pellwolok rag Kernow yn unnik awos res a gavoes avisyansow lowr ha kaletter bras gans kudha Kernow gans sinel krev lowr. TV Kernow a vynn dalleth tavethli erbynn 2004. 
Dy Meurth 23/4/02: Gwiasva veu lanchys hedhyw rag ri derivadow pella yn kever assayans Kernow gwaynya Savla Ertaj Bysyek rag istori an hwelyow ha stennoryon. Pur dhe les yw ha drehevys yn ta. Awos bos a vri meur, Nowodhow Kernow re ros piwas mis Ebryl rag gwiasva Gernewek dhe www.cornish-mining.org.uk.   
Dy Meurth 23/4/02: Athelstan o myghtern neb yw kasys yn feur drefenn ev dhe ladha kemmys a dus yn Kernow nans yw mil blydhen. Lemmyn an band rokk Skwardya re rekordyas kan henwys Athelstan.
Dy Mergher 24/4/02: Despit a wasoniethow gwell dhe Gernow lemmyn gans Ryanair, kamm war-dhe-lergh veu gwrys hedhyw gans BA. An kowethas re worras warbarth nijennow dhiworth Tewynn Pleustri hag Aberplymm dhe Loundres. Lemmyn y fydh peswar nij dydhyek wosa 14ves mis Metheven. Gwasoniethow dhiworth Aberplymm dhe Vristow a vydh treghys dhe unn nijenn dydhyek erbynn kres mis Est, ha'n hynsow dhe Gorcai ha Baile Atha Cliath yn Iwerthon a vydh kellys yn tien. An nowodhow ma a holl warlergh a goll meur a soedhow dhe BA. Res yw dhyn gwaytya na vydh kaletter re vras rag agan ayrborthow leel.
Dy Meurth 23/4/02: (Skrifys gans Dan Ryan) Asran Phonographyk Universita a Vienna a presentyas aga dyllans dewetha gans esel academyk an asran ma, Ulla Remmer. Yth yw nyver a PG (plattennow compact) a sonscrefathow an tavosow Keltek a vue gwres gans an ethnologyth Austrian, Mr Trebitsch henwys o ef, ynter an blethynyow 1907 ha 1911. An defnyth ma yw a vry byan yn yethythek drefen Trebitsch na the recordya cows dygonstryn, mes canow, barthonegow ha pesadow avel an Pader. Bytethewetha, yth yns y muer aga les, yn arbennek del esons y ow sensy recordyans a Vanawek mayth esa whath cowsoryon deythyak anotha y`n uer na. An sonscrefathow ma a vue dasvaystrys yn ryvennek, bytegens glan hewel stella ywa del o technycow recordyans y`ga floholeth yn tor` na.  Yn mesk cuntellyans an ensomplys Baskek ha Grenlondek yma glan nyver a samplysa`n tavosow Keltek o yn few oll y`n uer na: Worthonek (yn pub sort a ranyeth), Albanek, Bretonek (yn dew ranyeth), Kembrek (yn dew ranyeth) ha Manawek. Yth o kepar del usy ow pos godregys gans sperys a`n termyn ues passys yn un gola orth Manawek, kynth o an sonscrefa dreynek. Awartha anotha, ef a lenow an Kernowegor tanek y golon gans kescolonnecter ha bohes gorvyn rag Kernowek teythyak a verwys yn kerth kens desmyk an technycow recordyans.