Kovskrifenn 13
Dy Mergher 1/5/02: Milyow a dus a dheuth dhe weles an vyghternes Sowsnek pan dheuth hi dhe Aberfal, Treleysek ha Truru hedhyw avel kynsa hedh war hy thro Breten Veur rag hy fennbloedh owrek a vos myghternes a Bow Sows. Hi eth dhe weles an Mirji Morek Kenedhlek dhe Aberfal, hi a henwis skath sawya nowydh ha mires a-dro dhe'n Lowarthow Treleysek. Prins Philip eth dhe igeri Kresenn Vedia nowydh dhe Dremogh. Ena i a vetyas warbarth arta rag li dhe Benneglos Truru. 
Dy Lun 29/4/02: Kreslu Dewnans ha Kernow re lanchyas helgh moldrans hedhyw diw seythun wosa korf a dhen dhe vos kevys gans y vab dhe Dregylder ogas dhe Fordh Lanndogho (ogas dhe Ponsrys). Leslie Bate, 71 bloedh y oes veu kevys marow yn y ji 12/4/02 mes wosa an kynsa postmortem nyns esa prov lowr dhe dhalleth helgh. An nessa postmortem re ros an prov. Dell grys an kreslu, Leslie a verwis an dy Gwener kyns wosa eva yn tavern yn Chapel Ambel. Herwydh tus dhe'n 'Maltsman's Arms' yth esa meur a arghans yn y yalgh. An kreslu a lever nag esa an yalgh na kevys gans y gorf. 
Dy Gwener 26/4/02: Wosa keskerdh yn Pennsans nans yw diw seythun le mayth esa a-dro ugens mil person ow protestya erbynn towlow dhe dreghi gwasoniethow dhe Glavji Kernow West, kuntellyans veu synsys nyhewer yn Kammbronn gans esel an senedh Westminster rag Porth Ia Andrew George. Soweth, kynth esa pub parti gans les ena, nyns esa unnverheans yn kever kynnigow rag ammytyansow tromm. A-varra y'n seythun ma, an termyn govynnek a veu ystynnys der seyth seythun.
<<tre<<
Dy Gwener 3/5/02: Pennseythun hir a hwarvosow yma rag Kernowyon re dheuth dhiworth pub kornel an bys rag an kynsa 'Dehwelans'. An darvos ma yw synsys dhe Gastell Penndinas gans ilow hengovek, dons rokk ha chons da rag an dus usi devedhys alemma dhe gavoes aswonnvos a Gernow a hedhyw. Herwydh ordenoryon an goel ma, 270 den re erghis tokynyow kyns, ha govenek yma a weles lies moy dhiworth sornow erell Breten Veur ha Kernow keffrys.
Dy Meurth 7/5/02: Y fydh dydh splann a ilow Kernewek an dy Sul (12ves)ow tos dhe'n Wariva Meynek. An keskan synsys orth penn an alsyow dhiworth 14:00 dhe 18:00 yw henwys 'Tir ha Mor'. An warioryon a vydh: Ahanan; Bagas Crowd, Cymaz Junior Bandwagon; Dalla; Frances Webb; Kur Konteth Karrek; hag Otta Nye Moaz. Restrys yw gans CUMPAS (Projektys Ilow Kernewek). Tokynyow yw: £5 rag tevysogyon ha £2.50 rag fleghes. Fleghes yn-dann 12 bloedh a yll mos heb kost. Mar mynnir godhvos moy, kestav: 01736 810181.
Dy Meuth 7/5/02: First Great Western re leveris hedhyw bos rol a brisyow nowydh rag tokynyow tren yn Kernow. An re ma a dhalleth mis Metheven hag a vydh skwatt dhe'n negys tornysi a vynn kavoes roesweyth a garryans splann yn Kernow rag dynya tornysi. Kost an tokynyow a wra ughelhe dres peswar kansrann.
Dy Yow 9/05/02: Yma is-pennmenyster John Prescott ow lanchya an paper gwynn rag digresennans an ranndiryow 'Sowsnek' hedhyw. Ynno, yma govenek dhe dus a garsa gweles Kernow digresennys. Byttegyns, ha skoedhoryon Senedh Kernow ow strivya rag furv a wovernans yn Truru, keskusulyans gwask yw synsys yn Karesk hedhyw rag herdhya tybyansow a senedh 'soth-west'. An senedh ma a gudhsa ranndir ow lesa dhiworth Syllan dhe Wiltshire. Nebes an wask re dherivas an dhew tu, soweth nebes an re erell ny dherivas marnas an tu 'Soth-west'. Gokki yw henna ha'n peswar esel senedh Westminster LibDem yn Kernow ow skoedhya Senedh Kernow, ha wosa hanter kans mil den dhe sinya form govynnek yn y gever. Lemmyn y fydh chons gweles mars yw an wask, ha py rannow an wask, yw tuek. Mar ny grysowgh hwi bos an vater kudhys yn ta, krodhvolewgh hwi orth po an paper, po gorsav pellwolok, po gorsav radyo yn y gever. Lemmyn yw an prys dhe sevel ha bos amontys.
Dy Mergher 8/05/02: Kaderyer an kaskyrgh rag Senedh Kernow digresennys, Bert Biscoe, a gewsis dhe guntellyans an Konvenshon Korf Lagha Kernewek ha dynnerghas movyansow a Gonsel Kernow ha konselyow ranndirek dhe gesoberi ha displegya fordh war-rag rag Kernow. An movyans ma a hwarveu ha'n governans ow tri war-rag treylyansow rag governans ranndirek ha kyrghynnek. An dy Yow ma, John Prescott a wra profya an Paper Gwynn yn Chi an Gemmynyon. An dy Meurth nessa (14ves), y fydh kommendyans dhe weythresek Kernow gans Konsel Kernow bos tybyans da unnverhe sel an kesoberans rag an proses a gonsidra governans ranndirek ha kyrghynnek.
Dy Meurth 14/5/02: Dy Sadorn a dheu, y fydh Kernow ow kwari y'n hanter-finel dhe Rysrudh erbynn Gloucestershire. Dell grys arbennigoryon rygbi, an park a vydh lenwys gans deg mil miror yn unn waytya gweles Kernow kavoes le y'n finel dhe Twickenham. 
Dy Sadorn 11/5/02: Kernow yw kamm moy nes dhe'n finel dhe Twickenham wosa fedha Dewnans hedhyw. Agan para a ledyas yn feur dres an fit gans an skor Kernow 12, Dewnans 9. An tryghans dhe Bark Beacon yn Aberplymm a styr bos Kernow y'n hanter finel lemmyn. Mar kallen gwaynya nessa pennseythun, y fia dydh bras rag Lu Trelawni dhe Gala Metheven drefenn bos agan para yn-dann ugensow y'n finel hwath.
Dy Sadorn 11/5/02: Rag an kynsa prys y'n istori Kernow, yma skol gans an taves Kernewek a-berth yn rol dyskansow. A-gynsow, y teuth ha bos Skol Gemmyniethek Heyl, skol tavesek. Awos henna, res yw dhe'n dhyskyblon dyski, ynter yethow erell, Kernewek. Studhoryon y'n seythves blydhen (11 - 12 bloedh) a dhysk an yeth rag unn trymis, henn yw 12 dyskans. An skol a lever y vos kepar ha klas rag blasa an yeth. Mars yw da gansa, y hyllons pesya y'n nessa blydhen, mes yn-mes dhe'n rol-gemmyn a dhyskansow. Dell leveris pennyethow an skol dhyn (Tony Wilde), yma an projekt ow mos war-rag yn ta. Dyskadoryon an yeth dhe'n skol yw Craig Weatherill ha Mary Jones. Yma towl dhe'n skol synsi dydh a wonisogeth Kernewek rag an dhysklon ynwedh.
Dy Yow 16/5/02: Yma Konsel Rostorrmoel ow kortos ervirans Arloedh Falconer wosa metya ganso de yn Loundres. Yma ev ow preusi warnedha wosa towloryon an konsel dhe ri kummyas drehevel dhe'n park gwertha Victoria nans yw peder blydhen ha derivas an ombudsman governans leel neb a leveris bos gwasionethow tewlel towlow ena pur dhrog heb chons a dhos ha bos gwell. Eseli an senedh Westminster, Matthew Taylor ha Paul Tyler a wovynnas orth Arloedh Falconer dhe wul neppyth yn kever an konsel. Lemmyn, res yw dhodho ri y vreus war an vater. Ev a allsa kemmeres dhe-ves nerthow tewlel towlow yn-tien ha'ga ri dhe'n governans yn Loundres. Byttegyns y'n le a henna ev a allsa dewis po gwesyon sivil dhe ewnhe an kudynnow, po gul daswel an konsel, po saw ri dhedha pystigans. Mes dres henna, kevarwoedhyas an konsel, Kslr John Weller, a vydh yn-dann vreus a gonsloryon a-vorow rag torva an kod a omdhoen. Awos an vater diberthys ma, Kslr Weller a ylli bos govynnys kildenna a-vel kevarwoedhyas.
Dy Lun 20/05/02: An bagas neb a ober warbarth dhe wul pennskol yn Kernow re dhellos aga thowl hedhyw rag drehevyans nowydh dhe Dremogh yn Pennrynn. Y fydh to a werwels ha 20 mil troeshys pedregys y vraster. Kost a dhehevel an rann ma a vydh £15 milvil. An pennskol a vydh yn-dann lawlenn an Skol Art Aberfal ha Pennskol Karesk. 
Dy Lun 20/05/02: An fylm arbennik ma yw gwrys der Gernewek gans is-titlow yn Sowsnek. Diskwedhys a vydh dhe'n Gresenn Art Aberfal dhe 8 eur gorthugherweyth an nos Yow ma. Hwerow Hweg veu diskwedhys a-varra an vlydhen ma dhe Westminster ha Penntewynn. 
Dy Sul 19/05/02: Y'n kesstriv 'Kontethek' rygbi, Kernow a gollas erbynn Gloucestershire y'n hanter-finel dhe Rysrudh (Skor: 10-22). Kynth esa eth mil a dus ena yn unn skoedhya agan para, an vysytoryon o re grev. Kernow a gavas marnas unn 'assay' y'n diwettha mynysennow.
Dy Yow 30/5/02: Y'n seythun yw tremennys, konsler John Weller a gildennas avel kevarwoedhyas Rostorrmoel. An konsel a votyas dhe ynnia dhodho kildenna drefenn na wrug ev disklerya neb unn negys. Ev a leveris nag o an negys na yn fyw na hwath. Byttegyns, ev a erviras bos prys dhe asa wosa konsloryon dhe wul bagas er y bynn. Yma Rostorrmoel hwath ow kortos breus an governans war rewl y wasonieth tewlel.
Dy Mergher 22/05/02: Para pelldroes Plymouth Argyle re gavas skoedhyans arghansek nowydh, ha kynth yw para Dewnansek, an skoedhyer yw Kernewek: Ginsters. Awos hemma, y fydh an baner Kernewek war grysyow an para. Hemm re wrug dadhel veur yn mysk nebes an klub. Nyns eus marnas baner ena, mes yma an lavar "made in Cornwall" (gwrys yn Kernow) ynwedh. Yma meur a skoedhoryon an klub yn Kernow hag y fydh an para ow kwari yn Rann Dew nessa blydhen wosa gwaynya an hanav.
Dy Meurth 21/05/02: Rag an kynsa prys yn hanter kans blydhen yma diw balores ow maga yn neyth war an arvor Kernow. Yma an RSPB ow kwitha lagas war an neyth... heb leverel py le poran yma. An edhen yw esel teylu bryni mes gans diwwar ha gelvin rudh. Yma govenek gweles moy koplow and balores ow neythi a-dro dhe'n alsyow y'n termyn a dheu ha kyns nep-pell y fydh hi gwelys yn fenowgh drefenn hy bos an edhen a-vri dhe Gernow.