Kovskrifenn 15
Dy Yow 18/7/02: An Kernow neb a dhesinyas tartan kenedhlek Kernow re beu ynkleudhys hedhyw dhe solempnyta arbennik dhe Drevoen ogas dhe Lannwedhennek. Dew kans kyner eth dhe'n chapel rag ri aga bennathow diweddha dhe Tony Morton-Nance, noy Robert. Tony a verwis orth an oes a 92 bloedh, wosa bywnans a-barth y vro. Ev a dhyskas kewsel Kernewek kepar ha'y ewnter a-vri. Hedhyw, kovhes veu gans pibow sagh Merv Davey, Bardh Meur Yowann a'n Kledh, kowetha ha teylu.  
Dy Mergher 17/7/02: A-varra hevlyna y feu diskudhys tekst nowydh ha hir yn Kernewek, hag yth esen ni ow leverel bos nowodhow an brassa a-dro dhe'n taves. Byttegyns, dalleth nessa seythun y fydh an brassa ha gwella nowodhow yn kever Kernewek nevra y'n bys. Bedhewgh hwi parys ha gwitha lagas glew war an wiasva ma rag an derivas. Wosa dy Lun, ni a wra gweles mis Gortheren 2002 a-vel poynt-treylya y'n istori agan yeth ni. Nebes ahanowgh heb mar a yll dysmygi pandr'yw an nowodhow ma, mes yn-dann dhifennans-dyllo yw y'n eur ma. Nowodhow Kernow a vynn leverel dhywgh an kas skaffa gyllyn.
Dy Meurth 16/7/02:Yma galow rag bos treusi an Pons Tamer a-vorow heb kost a-wos bos astel-ober gans oberysi rann-boblek. An dus neb a ober war an pons yma yn-mysk an re ow kul an astel, ha keffrys ny vydh an kowbalyow Penntorr ow resek.na hwath. Dell grys Mer Penntorr, Stan Martin, y fydh terroes war an pons awos difyk a dus dhe'n kystyow toll, byttegyns rewloryon an pons a lever i dhe wodhevel yn ta a-vorow. An skeusenn a dhiskwa an pons pan esa gweythow-ledanhe. Y'n termyn na yth esa terroes. Kyns es pell y fydh ober dhe wellhe kowfordh Essa. A ny vydh diwedh dhe'n kudynnow ma nevra y'n bys? Eus tus hwath a garsa gweles nessa pons hwath? 
Dy Gwener 12/7/02: Meur dhe'n sowdhan gwithysi bywnans dhe Borth Pyran, gwelys veu dew kans morvleydh 'Cetorhinus Maximus' hedhyw. Herwydh an RNLI, yth esens i owth holya plankton gans lies morvil. An gwel ma yw moy kemmyn y'n dydhyow ma, byttegyns, anusadow yw gyki 200 anedha. Derivasow erell a lever bos lies teylu a vorhoghes ena keffrys. Kynth esa bush mar vras a vorvleydhes, kales o aga gweles dhiworth an treth heb binoculars. Nebes eth dhedha yn skathow rag neuvya gansa.
Dy Yow 12/7/02: Nans o dew ugens blydhen hedhyw dhe Woenhelghi yn Kernow, degemmerys veu an kynsa skeusennow pellwolok dre loerell vydh y'n bys. Tavethlys ens dhiworth an S.U.A, dannvenys dhe 'Telstar' y'n efander, ha kachys gans skala yn Kernow. An hwarvos ma a dreylyas fas a deknolojieth keskommunyansow ha nyns o marnas nebes mildiryow a-hys an fordh dhiworth an tyller may feu degemmerys an kynsa messaj treusatlantek der radyo gans Marconi.
<<<tre<<<
Dy Lun 22/7/02: An gwella dydh y'n istori Kernewek 
An seythun ma, agan taves a vydh aswonnys gans an Governans Breten Veur rag an kynsa prys ha gorrys yn-dann Jartour Europek. Kernewegoryon re wortas termyn hir rag hedhyw wosa kaskyrgh hir. Ni a vynna orth an Governans aswonn Kernewek yn-dann an Chartour Europek a Yethow Byghan ha lyha Kewsys. Po hedhyw, po a-vorow, y fydh derivas dhiworth Menyster an Ranndiryow, Nick Raynsford MP (gwel a-dheghowbarth) bos agan yeth gorrys y'n chartour na yn-dann rann dhiw. An nowodhow a dorras a-varra y'n seythun yw passys pan wrug Andrew George MP y dhiskudha. Rann dhiw an Chartour a re aswonnvos soedhek dhe'n taves heb gul res dhe'n Governans po awtoritys leel spena arghans rag dyski an yeth. Byttegyns, na yll an Governans stankya war avisyans Kernewek na fella ha na yll denvydh leverel nag yw Kernewek taves gwir. Hemm yw an poynt. Yma Kernewek gorrys y'n kethsem Chartour a-vel Kembrek, Iwerdhonek, Albanek ha Scots. An gwella nowodhow bydh yw hemma, ha martesen kamm vras war-rag.
Dy Gwener 19/7/02: Ober a dhallathas hedhyw dhe dhrehevel an kynsa studhyo fylm yn Kernow. A-gynsow, ni re welas lies fylm ow tos omma awos an arvor, powyow a-dro, chiow teg ha lowarthow. An projekt ma, £6 milvil peuns an kost, a vynn tenna moy. Rann an arghans a dheu dhiworth Amkan Onan. Esel an senedh Loundres rag Truru ha Sen Ostell, Matthew Taylor a dhevnydhyas jynn-palas JCB rag skwattya dhe ves an kynsa magor koth war an dhrehevelva.
Dy Yow 25/7/02: Klavji Trelysk yn Truru ha Derriford yn Aberplymm re gollas unn sterenn y'n rivow nowydhow neb a dhiskwa studh a'gan gwasonieth yeghes. An dhew glavji a's teves unn sterenn lemmyn dhiworth an teyr sterenn neb a ylli bos gwaynys. Unn poynt menegys y'n derivas a leveris bos drog an rewlyans erbysek dhe Drelysk. An klavjiow a lever bos moy ha moy kales ri gwasoniethow dhe'n havysi oll heb moy arghans dhiworth an governans. 
Dy Meurth 23/7/02: An para, neb a vynn assaya mos ughella y'n ebrenn yn pellenn ayr es nevra kyns y'n bys, a lever i dhe vos parys lemmyn. Qinetiq Onan a vydh pellenn-ayr a'n brassa y'n istori. Pan yw hwythys, sevel a wra moy ughel es an drehevyans Stat an Empoureth. Lanchys a vydh dhiworth gorhel nebes mildiryow dhiworth an arvor Porthia. Dew dhen, Andy Elson ha Colin Prescot, a wra gwyska dillasow efander ha nija bys dhe'n or efander, 25 mildir a-wartha an Norvys. Lemmyn yth leverons i dhe vos parys ha gortos rag awel teg. Pan vo henna, y fydh notyans a 72 our ha rekord treusvysek nowydh a vydh settys dhiworth Kernow.
Dy Mergher 31/7/02: Dalleth a wrug an argyans awos bos hwans dhe Stephen Spielberg gul fylm-pellwolok nowydh yn kever myghtern Arthur. Y fia dhe'n askorrans kost a £50 milvil peuns. Drefenn bos meur a arghans yn y argh, David Heath (MP rag Somerton ha Frome yn Gwlas an Hav) a elwis orth pennskrifores gonisogeth, Tessa Jowell, dhe wul pub tra yn hy nerth dhe dhri an fylm dhe Vreten Veur. Mes lemmyn yma kas ynter Gwlas an Hav ha Kernow drefenn bos nebes tus ow kovynn rag an fylm dhe vos gwrys a-dro dhe Glastonbury ha Cadbury y'n le a Dindagell. Byttegyns, ena Paul Flynn (MP rag Newport West yn Kembra) a leveris bos tir Arthur Caerleon. Paul Tyler (MP rag Kernow Kledh) re worras paper a-dherag Chi an Gemmynyon yn unn leverel bos Kernow y dir ewn. Yma dhe Gernow Men Drystan, Men Arthur, Kammlann, Dindagell rag an dalleth!!!
Dy Yow 25/7/02: An seythun ma re glywsyn bos agan taves aswonnys gans an governans Westminster a-ver yeth Europek byw. Byttegyns, ny yllyn ni powesa y'gan ober hwath awos bos res kavoes fordhow nowydh a dhyski an yeth. Mar ny wren ni, na wren ni movya war-rag. Lowen ov ytho leverel bos kowethas sidiow Kembrek 'Sain' ow tyllo sidi rag dyski an taves. Fordh dha yw seni hemma yn karr ha lywya dhe'n soedhva pub myttin. Yma projekt arall dhe wul sidi-rom rag jynnow-amontya. An dowlenn ma a wrussa diskwedhes skeusennow-movya ha seni son keffrys. An tybyans yw dh'y usya yn skol.
Dy Yow 8/8/02: Gwir yw leverel bos delatyans wosa delatyans yn unn wul an wiasva Kowethas An Yeth. Byttegyns, unn mis alemma, y fydh lanchys. Dres an mis na, ny vydh kemmys nowyddhansow war an wiasva ma drefenn bos meur a ober gans "Warlinenn". Mes na borth own, y fydhav vy ow pesya gans "Nowodhow Kernow", ytho mir orti yn fenowgh hwath. 
Dy Sadorn 3/8/02: Esel an Senedh Westminster rag Porthia, Andrew George, re jalenjyas an Governans dhe dhos dhe neb gorfenn yn uskis herwydh aswonnvos an taves Kernewek. Hwath nyns eus lavar soedhek dhiworth menyster rag an ranndiryow, Nick Raynsford MP. Ev a leveris dhe Vr George bos derivas yn kever an Chartour Europek a Yethow Lyha Kewsys kyns diwedh mis Gortheren. Byttegyns, Mr George yw sur hwath bos an taves aswonnys kyns es pell yn-dann rann dhiw an Chartour. An delatyans ma a dheu warlergh an nowodhow derivys a-bell bos an yeth kemmerys yn-dann an Chartour.
Dy Sul 11/8/02: Hevlyna re welas lies kesstriv mordardha yn Kernow. An seythun yw passys, synsi a wrug Tewynn Pleustri an goel Rip Curl. Byttegyns, lemmyn yma govynnow y'n dre mars eus re a werthjiow mordardha ha mars usi an sport ow kevarwoedhya polysi an konsel Rostorrmoel. Dhe-wir, y'n seythun yw passys yth esa ensampel da fatell wra an sport gedya pub tra. Kowethas pellgommunyansow Orange a worras gwern pellgowser servadow dhe Benntir. Tus an kyrghynn a brotestyas erbynn an gwern yn unn leverel bos drog rag aga yeghes. Orange a worras an tavethlel ena rag an kesstriv Rip Curl. Yn gwella prys, an leogyon a waynyas. Gwir yw leverel bos meur a arghans dres dhe'n dre gans mordardhoryon, mes pyth yw an kost?
Dy Sul 4/8/02: Mordardher Kernewek, Russell Winter re waynyas an kesstriv Rip Curl synsys yn Tewynn Pleustri. Milyow a dus eth dhe'n dre dhe weles an goel.