Nowodhow Koth 16
Dy Gwener 13/9/02: Pennrewler an Arghannti Pow Sows, Eddie George, a dheuth dhe Gernow hedhyw rag mora 'Arghansereth Kernow (Finance Cornwall). An dowlenn ma a re arghans es dhe gowethasow ha negysyow. Yma dhodho ugens milvil peuns dhe spena, byttegyns yma govenek bos deg milvil peuns warn ugens a vydh dres omma dhiworth fentynnyow erell. Herwydh an niverow, 400 negys a wra gwaynya skoedhyans ha 2000 soedh a vydh gwrys. Negysyow a yll govynn rag grontow ynter pymp mil peuns bys yn tri kwarter milvil peuns. Eddie George a usyas an morans dhe leverel ev dhe driga yn Kernow wosa ev dhe gildenna dhiworth an arghannti.
Dy Yow 12/9/02: Yma an worvarghas ASDA ow pareusi arwoedhyow rag gwasoniethow prennoryon yn tiwyethek. Yma ow kovynn orth Kesva an Taves Kernewek dhe dreylya lavarow rag ASDA Bosvenegh, Sen Ostell, hag Aberfal. Y fydh an arwoedhyow nowydh parys dalleth mis Hedra. An projekt ma a dheu warlergh polisi usya Urdu gans Sowsnek yn Bradford.  
Dy Meurth 10/9/02: Ha'n bys ow perthi kov kynsa pennbloedh an omsettyans broweghysi war Gresenn Genwerthek an Bys, yma Kernow ow selya kovmen dhe Gernow bras y golonn neb a verwis y'n touryow dewbleg nans yw unn vlydhen. Rick Rescorla o gwithyas diogoledh y'n drehevyans. Ev a ganas kanow Kernewek dhe oberysi hag i ow tiank an touryow. Milyow a dus veu selwys ganso. A-vorow, an kovmen a vydh angudhys dhe Derras Pennpoll yn Heyl gans y genderow, John Daniels. 
Dy Sul 8/9/02: Konsel Kernow re ros dhe Baseresult hwegh mis dhe dhalleth gwaynya sten dhe Grofti Dheghow. An kowethas a lever i dhe nesa an jydh pan dhastalleth gonisyow yn-dann an dor dhe'n bal yn Poll. Krofti a dhegeas mis Ebryll 1998 hag yth esa lies assayans dh'y dhasigeri. An ajenteth SWRDA a garsa usya an hwelva rag displegyans negys ha prenassa. Baseresult a grys i dhe seweni y'ga assayans i dhe selwel an diwettha bal sten yn Kernow.
Dy Sul 8/9/02: An dowlenn dhe dhrehevel studhyo fylm dhe Vreannek yw byghanna es kyns. Y fydh gorrys a-dherag konseloryon Konsel Kernow an seythun ma... mes ny vydh an kompleks an keth braster dell veu diskwedhys y'n towlennow kynsa. South West Film Studios a wra spena gront Amkan Onan ha kost an projekt a vydh a-dro dhe bymp milvil peuns. 
Dy Sadorn 31/8/02: Unn seythun yw bys pan vydh an Orsedh synsys dhe Bennsylva yn Kernow Est. Yn mysk an henwyn a-vri, y fydh skrifer E.V Thompson. Ev a dheu ha bos bardh awos y oberow lyennek. Yma moy derivadow omma. Keffrys ha'n hwarvos y honan, y fydh morans soedhogyl rag gwiasva Kowethas an Yeth Kernewek. Y hyllir mires orth an wiasva lemmyn. An Kowethas a wayt eseli dhe gavoes hag usya aga geryow-dremenn ha dos ha bos rann an kemmynieth tredanek Warlinenn.  Dy Yow 29/8/02: Nans yw 30 bledhen pub Kernoweger o aswonys an eyl dhe y gela ogasty. Awos lyes skyla nyns yw hemma na moy an cas. Ynwedh yma whans dhe encressya an myns a Gernowek clowes yn stret. Specyly pan vydh Kernowek aswonys yn sodhagyl gans an Governans. Re bue an gowethas dyllansow Spyrys a Gernow ow predery yn kever gul arwedhyk may hyl Kernowegoryon aga gwysca ha godhvos Kernowegoryon erel yn stret po yn shoppys po yn tavern h.e.. Mes py syn maglys gans Kernowek dhe usya? hen o an govyn. Worteweth an tybyans dhe usya "Cronek Hager Du" (po Cronek Du) a dhedh. Syn Kernowek dewedhes yw awos bos an despyt Dolly Pentreath hag ynwedh Cronek Du yu campollys yn gwary merkyl Kernowek cres. Ytho yma'n arwedhyk lemmyn dhe dhorn hag y fydh an morans sodhagyl dhe stalla Agan Tavas dhe'n Orseth. Gwres yw an arwedhyk a emayl gans pyn usyes po pyn tycky-Dew. An prys yw £2.20. Yma Spyrys a Gernow ow quaytyas pub Kernoweger/Kernowegores dhe brena ha gwysca onen ny vern py sort Kernowek esons y ow usya. Nyns yw purpos an arwedhyk dhe leverel bos an re usy orth aga gwysca freth yn Kernowek saw parys yns y dhe usya pypynag Kernowek ues dhedhans. (gans Ray Chubb) 
Dy Yow 29/8/02: Yma hendhyskysi ow tigudha an istori a-varr an kampus Pennskol Kernow, y'n le may fydh drehevyans £40 milvil. Hwel war an le kyns gans an asrann hendhyskyans re dhiskudhas seulabrys istori hir a dus trigys dhe Dremogh. Hwithrans doroniethek re gavas treven kynsistorek dhe'n est. Yth esa system parkow ha keow ena. An taklow diskudhys a les a-hys hwegh mil blydhen. Y'ga mysk yma toulys meyn flynt ha priweyth. An skeusenn a dhiskwa an ober ow mos war-rag. I re gavas chiow rond ha tollow post, 3000 bloedh aga oes.
Dy Sadorn 24/8/02: Y fydh klub nowydh rag ilow gwerinek hag ilow 'gwreythyek' yn Truru. Restrys vydh gans Kerensa Newman a'n band Kernewek Ahanan, neb a wra gyg dhe'n kynsa nos (nos Mergher 4a mis Gwynngala) dhe'n Klub Tori yn Stret Limaval. Dalleth a wra dhe 8eur ha kost an entrans yw tri feuns.  
Dy Yow 22/8/02: Dreheveloryon ow pareusi drehevelva an pennskol dhe Bennrynn re gavas chiow rond, teyr mil bloedh aga oes. Yma hendhyskadoryon ow hwithra an le kyns ober dhe'n pennskol dhe besya. A-varra y'n seythun brocha Keltek veu diskudhys yn leys an Avon Fal. Herwydh tus skentyll, gwrys veu y'n kynsa kansblydhen wosa dineythyans Krist. Yma govenek bos gorrys y'n Gwithti Kernow.  
Dy Yow 22/8/02: Goer ha gwreg dhiworth Aberfal re beu diskudhys yn farow y'ga stevell-ostel. An dhew o medhygyon ha dell grys an kreslu, i a omladhas. Korfow Adele ha Michael Griffin, 42 ha 43 bloedh aga oes, veu kevys dhe'n Waterloo Cross Inn, ogas dhe Willand yn Dewnans. 
Dy Yow 22/8/02: An bennseythun ow tos yw dy Goel Arghannti hag yma ro arbennik dhe Gernewegoryon. Gwenno a dheu dhe Gernow. Hi yw myrgh an bardh Kernewek a vri, Tim Saunders. Yma hi ow lanchya hy bywnans oberi a-vel kanores popp... mes an dyffrans yw... hi a gan der Gembrek ha Kernewek. Ottomma hy hynsa gyg y'n Ducheth. Dy Sadorn 24ves a vis Est: Yma hy hynsa gyg dhe'n‘The Hope and Anchor’, Hope Cove, Dewnans @ 4eur. Ena hi a gan yn Kernow dhe'n‘The White Hart’ yn Ma'hunyes (9eur). Dy Sul 25ves a vis Est: Yma hi dhe Borthpyra dhe'n ‘The Blue Peter,’ (3eur). Dy Lun 26ves a vis Est: Yma hi dhe Velindreth yn ‘B17’ dhe 9eur. Yma hy diwettha gyg dy Meurth 27ves a vis Est dhe 9eur yn Logh dhe'n ‘The Bullers Arms’.
Dy Sadorn 17/8/02: An kowethas gans govenek selya Senedh Kernow a guntell dhe Chacewater hedhyw rag gorra war-rag aga diwettha towlennow dhe'n governans yn Westminster. Pymp a'n hwegh konsel ranndirek Kernow a skoedh an dowlenn ha herwydh niverans a-gynsow, 46% a dus leel a wra aga skoedhya keffrys. Ny vynn 34% kavoes senedh vydh;12% a garsa gweles senedh rag an 'Pow West'; ha ny woer 8%. 
Dy Sadorn 17/8/02: Unn den re verwis yn droglamm war an A30 ogas dhe Lannstefan. Ev o leel ha 26 bloedh. Skwattys veu gans karr ha karavan ha merwel war an fordh 3:40 hedhyw-vyttin.  
Dy Gwener 16/8/02: Jeremy Joslin a dhiskwedhas towlennow rag Porth Heyl dhe dus leel.
Dy Gwener 16/8/02: Derivadow nowydh an projekt dhe lanchya pelenn ayr kawrek bys dhe'n dalleth efander veu res hedhyw. Lanchys a vydh war an arvor Kernow ogas dhe Borthia. Yma an kriw ow kortos rag awel splann, byttegyns moy dhe les yw dhedha an awel gwartha y'n ayrgylgh. Res yw dhe Qinetiq Onan kavoes 'fenester' a 72 our. I a vynn terri an rekord settys yn 1961 ha nija 25 mildir a-wartha fas an Norvys. An skeusenn a dhiskwa pennskrifer an wiasva ma, Matthew Clarke, gans unn lywyas, Colin Prescott.  
Dy Yow 15/8/02: Ladhji ha gweythva gig Sen Merryn dhe Lannbroboes ogas dhe Druru a wra degea. Deg den ha seyth ugens a ober ena y'n eur ma hag yma govenek dhe'n kowethas ri meur anedha ober dhe weythva arall. Byttegyns, heb mar, hwath y fydh nebes den kellys. Herwydh Sen Merryn, kablys yw an kleves Karn ha Min. Wosa an kleves, nyns esa lowr a warthek dhe vegi an weythva. Y tege po hwegh po seyth seythun alemma.  
Dy Mergher 14/8/02: Y fydh 21 bardh nowydh gwrys dhe'n Orsedh hevlyna dhe Bennsylva. Y'ga mysk y fydh tri bardh an yeth ha skrifer a-vri, E.V.Thompson. Tri bardh a dramor a vydh gelwys ynwedh. Lillian Dell ha Joy Menhennet dhiworth Awstrali ha John Caddy dhiworth Minnesota, S.U.A. An bys sport yw enorys keffrys gans krykketer Michael Trenwith a Woelsythni. Yma moy derivadow omma.  
Dy Mergher 14/8/02: An kynsa fylm-leun gwrys yn Kernewek a vydh diskwedhys dhe'n Goel Fylm Montreal. 'Hwerow Hweg' veu diskwedhys y'n kynsa dhe Ji Kemmynyon dhe Westminster, hag ena yn nebes tylleryow a-hys Kernow. Lemmyn, an fylm gans Anton Kovacs a a-hys an keynvor Atlantek. Hwedhel yw a gewargh ha kerensa ha gwrys a-dro ranndir Pennwydh. Mar mynnir godhvos moy yn kever an fylm, yma gwiasva dha.