Nowodhow koth 17
Dy Mergher 23/10/02: Nessa dy Meurth y fydh astell-ober gans an tanlu neb a dhur rag 48 our. Res vydh dhe soudoryon ri kudhans rag an termyn na. I a wra devnydh a hwegh Dywes Wyrdh rag Kernow oll. Govenek yma bos Gwithysi tan 'gwithys' po 'servadow' yn unn ri gweres ynwedh.  
Dy Mergher 23/10/02: Yma meur a dus ow krodhvolas erbynn an kevres nowydh 'Wild West' gans Dawn French. Lies huni a lever bos an komedi ow kul ges anguv erbynn an Gernowyon. Byttegyns, tus erell a grys an kynsa rann a hwegh rann a settyas an studh politek a-dherag Breten Veur yn fordh dhidhanus. Wild West a dhiskwedhas bywnans yn porth kosel henwys Lannwip (St Gweep) le mayth esa bagas a dus leel ow krodhvolas erbynn perghennoryon dew ji. O hemma ges po erbynn kenedhlegoryon po a-barth an re a omladh rag taklow Kernewek?
Dy Gwener 18/10/02: Prescott re ros y worthyb war an govynn yn kever Senedh Kernow. Ev a leveris an seythun ma bos konsel 'nebes moy ughel' a via da lowr, ha diskwedhes na vynn an governans kildenna dhiworth y savla yn kever nagha senedh leun rag Kernow. Prescott a leveris dhe jornalysi an seythun ma bos an ervirans gwrys gans an governans. Byttegyns, ev a gynnygas bos tybyans da ri dhyn 'opt-out' dhiworth senedh an 'soth-west'. Bert Biscoe a'n kaskyrgh rag SK a warnyas orto na via da ragvreusi war an mater yn arbennik wosa hanter kans mil den a skoedhyas towlenn rag Senedh Kernow dre sinya aga hanow. An governans a leveris an seythun ma bos moy les rag digresennans yn Kernow es pub rann arall a Vreten Veur gorrys warbarth. Heb mar, an Ducheth yw kudynn vras rag Prescott. Y'n blydhynyow hwath dhe dhos, a vydh hemma aswonnys a-vel an Govynn Kernewek rag Lavur?
Dy Yow 17/10/02: An goel Keltek Lowender Pyran re dhallathas yn Porth Pyran yn-dann an titel 'Prowt dhe vos Keltek'. Ordenoryon an goel re besyas hevlyna kynth esa difyk a arghans wosa Konsel Karrek dhe gildenna y skoedhyans. Martesen nebes a'n vysytoryon a wra merkya bos le a vagasow ha bandow. Keffrys ha henna, ymons i ow synsi Fest Noz Bretonek yn-mes kost an tokyn. Ni a'gan beus govenek bos an goel pur dha hevlyna spit dhe'n kudynnow ma.  
Dy Lun 14/10/02: Yn mysk an 188 den ledhys y'n tardh tanbelenn yn Bali yma Kernow. Ev yw Marc Gajardo, 30. Y deylu a drig dhe Woen Karnon. Ev o mordardher hag awos henna, an Blue Bar dhe Borthtewynn a dhegeas hedhyw yn unn govhe anodho. Yma'n Governans Breten Veurek yn unn gusulya dhe dornysi diank ha dehweles tre skaffa gallens. An roesweyth Al-Quaida yw kuhudhys rag an tanbelenn. An skeusenn a dhiskwa Marc Gajardo.
Dy Mergher 9/10/02: Pennskol Loundres UCL re dhellos studhyans hedhyw yn unn leverel bos kas krev rag senedh ranndirek rag Kernow. Asrann korf-lagha an pennskol a dhiskudhas bos towlenn a ylli oberi yn ta. An derivas ma yw sherewynsek dhe'n Governans drefenn na worras travydh yn y gever yn paper gwynn rag an ranndiryow. An kaskyrgh rag Senedh Kernow yw kevarwoedhys gans Bert Biscoe. Dy Mergher 9/10/02: Yma gorvarghas ASDA ow lanchya hy arwoedhyow diwyethek hedhyw orth an gwerthji dhe Sen Ostell. An kowethas re dreylyas aga arwoedhyow rag gonisow prener dhe'n taves dre weres Kesva an Taves Kernewek. Y hyllir aga gweles dhe Sen Ostell, Pennrynn ha Bosvenegh.Dy Meurth 8/10/02: Dy Sadorn 25ves mis Hedra dhe dhiw eur y'n wariva dhe'n Gresenn Artow Aberfal, yma sedhek rag fylmow Kernewek. Rann a Woel Fylmow Kernow. Ottomma rol an fylmow dhe vos diskwedhys: Dehwelans The Homecoming; Ramble; Naw Kans Baner; Breaking the Chains. Y fydh an askorroryon fylmow ena. Pol Hodge a gemmer an gador rag disputyans. Yn mysk an askorroryon y fydh Antal Kovacs neb a wrug 'Hwerow Hweg'. An drama yn Kernewek ma a vydh diskwedhys a-wosa. 
Dy Meurth 1/10/02: Towlennow re beu dyllys hedhyw rag brasheans an Edenva ogas dhe Sen Ostell. Y fydh drehevys biom nowydh rag plansow neb a yll bywa heb meur a dhowr. Biom an Krindir a gost £90 milvil hag a vydh skoedhys gans arghans Europek ha'n lottri arta. Keffrys ha'n tressa biom, y fydh kresenn adhyskans rag fleghes ha tevysogyon neb a garsa dyski moy yn kever plansow a'n bys ha fatell yllyn aga gwitha yn-mes a wodros mernans. Hy rewloryon a leveris hedhyw bos 1.3 milvil vysyter dhe'n Edenva an hav ma. Gans an tressa biom y fydh moy ow tos.     
Dy Lun 30/9/02: Messaj gwydheo veu dannvenys hedhyw dhiworth Tony Blair dhe'n Skol Vedhygel nowydh hedhyw. An skol a wra dyski konnykter medhygel dhe vilyow a studhyoryon yn unn waytya kavoes moy medhygyon yn Kernow ha Dewnans. Kynth usi an kresennow yn Aberplymm ha Karesk, y fydh drehevyansow kyns es pell yn Truru. An igerans a dheuth war an jydh may feu dyllys derivadow ow leverel bos kales rag benynes kavoes medhygyon benow yn Kernow.
Dy Lun 30/9/02: An kynsa derivadow dhiworth niveryans 2001 veu dyllys hedhyw hag y tiskwa bos poblans Kernow 501 mil den. Yma y'n 'ranndir soedhogyl' a'n 'Sothwest' (sic) kressyans tromm yn poblans. Dell hevel yma moy tus ow movya omma. Heb mar, hemma a worr poester war dowloryon drehevel lies moy chi war barkow glas. Derivadow moy kewar a vydh dyllys nessa blydhen.  
Dy Meurth 24/9/02: Yth esa own hedhyw bos kleves karn ha min owth omdhiskwedhes arta, an prys ma yth esa skruth yn Kernow. Tiek dhiworth Sen Kler a elwis an medhyk enyvales dy Sadorn drefenn ev dhe brederi bos neppyth kamm gans neb unn tarow. Byttegyns, an sinyow a dhiskwedhas bos chons dell veu an kleves karn ha min. A-dhistowgh, kordon veu tewlys a-dro dhe'n bargen tir ogas dhe Lyskerys. Hwithransow veu gwrys hedhyw dhe laboratori yn Surrey ha gwynn agan bys, ny hevel bos an kleves karn ha min.  
Dy Meurth 24/9/02: Yth esa govenek gweles assayans hevlyna yn Kernow rag terri rekord treusvysek. An para Qinetiq a vynna nija yn pelenn-ayr gorvras bys y'n or efander. An belenn-ayr hy honan a via mar vras a-vel an drehevyans Stat an Empoureth. Yn gwettha prys, nyns esa fenester awel teg hir lowr rag assaya an rekord. Yma govenek lemmyn gul an assayans nessa blydhen yn Porthia. 
Dy Sadorn 21/9/02: Nyhewer, y feu synsys an kynsa kynyow blydhennyek rag Omguntellyans Selreth rag Kernow dhe'n Ostell Glasennow Glas yn Aberfal. An bagas a vynn selya Senedh Kernow. An pregoth veu res gans skrifores a-vri Ruth Rendell. Hi re skoedhyas an kaskyrgh yn Chi an Arloedhi dhe Westminster. Lemmyn hi re dheuth dhe Gernow dhe dhasleverel hy thybyansow a-dro dhe Senedh Kernow. Hi a leveris bos gwel romansek dhedhi yn kever Kernow hag awos an skila na, hi a garsa gweles an pow gans galloes omwovernans. Keffrys ha henna, hi a wrug ambos dhe worra govynn a-dherag an Chi yn kever an studh arta ha ken govynn yn kever aswonnvos an taves Kernewek. Kynth esa nowodhow a-gynsow war an mater ma, hwath nyns eus lavar vydh dhiworth an menyster, Nick Raynsford.
Dy Yow 19/9/02: Hwithrans laghyl yn Truru hedhyw a rekordyas mernans dre dhroglamm rag maw, hwegh bloedh y oes, neb a verwis war Logh Fal 6ves mis Gortheren. Yth esa Ross Morgan yn skath gans y vroder, tas ha tas-gwynn. Y das a lywyas an skath dhe avoydya ken skath mes y vab a goedhas y'n dowr ha knoukya y benn erbynn an rakherdhell. A-dhesempis, y das, Andrew Morgan dhiworth Lannfiek, a lammas y'n dowr rag y selwel. Byttegyns, yth esa pystigow meur dhe benn Ross ha kynth esa karr-klavji-ayr dh'y gemmeres dhe'n klavji, y ferwis. An koronner a leveris bos droglamm euthek trist ha ny goedh dhe Andrew Morgan omguhudha. 
Dy Yow 19/9/02: An Kowethas Awenek Kernow (Creative Partnerships) veu lanchys hedhyw yn Truru dhe'n Hel Rag Kernow. Towlenn an governans yw dhe ynnia skolyow dhe wul devnydh a artweythyon, donsoryon hag ilewydhyon leel yn unn dhyski gonisogeth. 150 stalla a dhiskwedhas bagasow kepar ha Lowender Peran, Gwasoniethow Gonisogethek Fentenwynn ha Tan Ha Dowr. An skeusenn a dhiskwa Lindsey Hall neb usi ow restra an projekt yn Kernow. 
Dy Mergher 18/9/02: An hav re dheuth ha gyllys yw lemmyn. byttegyns nyns eus sin vydh a'n pyth a wra hwarvos gans an arwoedhyow gell. Konsel Kernow a synsas kesstriv rag kavoes logo nowydh y'n le a'n rosenn rudh Sowsnek drefenn bos lies arwoedh peyntys gans baneryow Kernewek. Dell hevel, yma an konsel owth hokkya awos y dhe wortos kusul a 'Cornwall Enterprise'.