Dy Lun 18/11/02: Omguntellyans Selreth rag Kernow re dhynnerghas yn servadow 'Dornskrif Senedhow Ranndirek' neb a veu dyllys wosa Areth an Vyghternes Sowsnek. An kynsa dadhel war an destenn a hwervydh 26ves mis Du. Bert Biscoe, Kaderyer an Omguntellyans a leveris dhe skoedhoryon hedhyw: “An kommendyans a-varr ma a dhiskwa bos mal dhe'n Governans pesya gans an projekt digresennans ranndirek. Kernow yw parys. Ni a'gan beus skoedhyans krev, ha'n Governans a'n goer drefenn gorthyb Kernow dhe'n paper-gwynn a-gynsow veu brassa es ol a Vreten Veur gorrys warbarth. Kyn nag yw Kernow menegys y'n Dornskrif, ha kyn hevel pur anystoeth (anheblyth), dell hevel, ottomma an chons dhe waynya kowetha ha chanjya brysyow a'gan eseli senedh Westminster. Edrek yw gans an Omguntellyans bos 'rann eskelmi' (rann 26) y'n dornskrif neb a wra finwedh dhe niver ha braster an ranndiryow war-lergh an 'Gwrians 1988 rag Ajentethow Displegyans Ranndirek. Y fydhyn owth oberi gans eseli an senedh Westminster yn Kernow yn unn weles fatell yllyn ni chanjya an Dornskrif ma. Kuntellyans Blydhenyek an Omguntellyans a vydh synsys 23ves mis Du dhe Hel an Pow Bosvenegh (10.30 myttinweyth).
Dy Sul 17/11/02: Kernow a wra degemmeres £1 milvil rag kommendya menoyl digerra. Menyster Nerth, Brian Wilson, a leveris bos an arghans ma ow tos dhe Gernow drefenn bos prisyow menoyl ughella y'n Ducheth es y'n leow erell. Amkan an projekt ma yw kommendya treylya kerri dhe LPG neb yw moy glan ha diger. Negysyow a wra degemmeres dynynansow dhe dreylya kerri yn luyow.
Dy Gwener 15/11/02: Francisco Arces Montez, an den neb yw kablys rag ravna ha moldra mowes-skol Gernewek, Caroline Dickinson, re leveris y vos y'n ostell dhe Blen-Fougeres dhe'n kethsem nos ha hi ledhys. Gwythysi Kres a lever y DNA yw haval poran orth an DNA kevys dhe'n tyller moldrans. Caroline, 13 bloedh hy oes, veu ledhys ha hi ow koska yn chambour gweli ena mis Gortheren 1996. Hi eth dhe Vreten Vyghan gans Skol Lannstefan. Hwithroryon an kas ma a dheuth ha bos stegys heb kedhlow nowydh bys pan veu Montez (gwel skeusenn a-barth deghow) kevys yn Miami warlyna.
Dy Gwener 15/11/02: Glaw poes a goedhas yn Porthia de hag a wrug dhe Dhowr Stennek liva. Yn nebes tylleryow an dowr o pymp troeshes y dhownder. War-lergh niverow soedhek, dew tressa-rann an glaw rag mis Du a goedhas a-ji 24 our. Mil chi ha kans veu gesys heb gas wosa dowr dhe dhos a-berth pibennow. An kethsem hager awel a lettyas trenow ow tos dhe Gernow a-wos studh an hyns. An liv a dheuth y'n kettermyn ha'n eshwel lu-tan. Byttegyns gwythysi tan a weresas yn unn selwel tus ha negys y'n dre.
Dy Yow 7/11/02: Wosa lies blydhen a beyntya arwoedhyow fordh yn Kernow drefenn i dhe synsi warnedha an rosenn rudh Tewdarek (sin Pow Sows), kesstriv veu synsys gans Konsel Kernow dhe gavoes sin nowydh rag Kernow. Orth unn boynt, y hevelis kepar dell esa delatyans bras y'n kesstriv ma drefenn nag esa sewen. Ena an kaskyrgh peyntya arwoedhyow a dhastallathas... hedhyw an konsel re leveris i dhe usya baner Sen Pyran a-vel an sin soedhogyl Kernow. Lemmyn, yth yw res dhe gresennow tornysi leverel bos hwans dhedha a dhevnydhya an baner war aga arwoedhyow aga honan. Kamm vras war-rag yw hemma yn kaskyrgh aswonnvos agan pow a-vel bro Geltek. Meur ras dhe Andrew Climo-Thompson neb re leveris bos res hwath dhe'n Asrann Karryans (DOT) ri kummyas dhe'n profyans ma.
Dy Meurth 5/11/02: An taves Kernewek a vydh aswonnys gans an Governans yn-dann an Chartour Europek rag Yethow Byghan ha Ranndirek, herwydh derivas hedhyw gans Nick Raynsford (menyster rag Governans ranndirek). Yn-medh ev yn unn worthybi dhe wovynn yn Senedh Westminster: "Wosa prederyansow pur war, ha gans gweres an sywyansow dhiworth hwithrans akademek omsevyek war studh an yeth, erghys gans an Governans, ni re erviras dhe ri aswonnvos dhe Gernewek yn-dann Rann II a'n Chartour rag Yethow Byghan ha Ranndirek. Kernewek a sav ryb Kembrek, Gwydhalek Albanek, Iwerdhonek, Scots hag Ulster Scots a-vel yethow difresys hag aswonnys yn-dann an Chartour, neb a syns an Governans yn unn aswonn ha ri revrons dhe'n tavosow na. Soedhogyon a vydh ow talleth keskows gans Konsel Kernow ha kowethasow Kernewek yn Kernow rag bos sur tybyansow an Gernewegoryon ha'n re a vynn dyski an yeth yw aswonnys ha ni ow restra Rann II a'n Chartour." Lemmyn res yw dhyn gortos ha gweles mar pydh dyffrans yn studh an taves.  
Dy Meurth 5/11/02: Y'n termyn yw passys, Colliseum Kernow o an brassa gwariva rag bandow yn Kernow. Henwyn bras a wre seni ena kepar ha Paul McCartney ha Gary Barlow. Byttegyns, lemmyn nyns eus marnas bar ha klub-nos. Y'n gwella prys, yma nowodhow hedhyw bos an kompleks gwerthys. Yma towlennow lemmyn dhe spena £100 milvil yn unn dhrehevel rannjiow havysi, gwestiow, gwerthjiow, ha kresenn geskusulyansow. An kowethas displegya a re ambos dhe dus leel bos an treth gwithys yn igor rag an bobell.
Dy Sadorn 2/11/02: Yma Kernowyon a-hys an bys ow kovhe Richard Jenkin neb re verwis orth 77 bloedh y oes. Ev o an den unnsel dhe vos Bardh Meur diwweyth. Ev a as gwedhwes, Ann Trevenen-Jenkin, ha peswar flogh, Conan, Morwenna, Loveday ha Gawen. Richard o esel fondya Mebyon Kernow. Medhygyon a gavas bos kleves kolonn warnodho wosa shor kolonn y'n mis yw passys. Kynth esa y wreydhyow yn Porthynys, Mr Jenkin veu gennys yn Derbyshire. Y soedh o dyskador, ha wosa y dhemmedhyans dhe Anne, ev a gemmeras ober dhe Skol Hellys. Ev o skoedhyer krev a bubtra Kernewek ha ny via na agan gonisogeth na agan yeth yn fyw kepar dell yw hedhyw hebdho.
Dy Gwener 1/11/02: Kowethas Kowbal Lannvoweseth re wovynnas rag £350 mil peuns dhiworth Amkan Onan dhe wul kowbal nowydh dhe gevrenna Aberfal ha Lannvoweseth. An projekt leun a vydh orth kost £750 mil peuns, hag a wrussa drehevel kowbal flamm-nowydh dhe synsi ynno 10 dhe 12 karr. Tretha Dowr Karrek a gemmersa ugens mynysenn ha bos orth kost dhe lywysi £5. Profyoryon an tybyans a grys bos hemma prys da mar brederir a-dro dhe'n kost menoyl mar mynnir kavoes an fordh.
Dy Yow 31/10/02: Y'n Statys Unys, fleghes a dhiworth an eyl chi dh'y gila yn unn hwilas pratt-po-ro, hag yn Pow Sows, gelwys Halloween yw. Byttegyns, yn hwir, hedhyw yw an vlydhen nowydh rag an Geltyon. I a solempnyas an jydh y'n oesow yw passys awos bos Kalann Gwav... kynsa dydh an seson yeynder. I a brederi bos hanternos war an nos ma an termyn pan vo an bys ma an moyha ogas dhe vys an spyrysyon. Ytho, ottomma an skila rag Nowodhow Kernow dhe ri dhywgh bolonjethow a'n gwella rag haneth. 
Dy Mergher 30/10/02: An kowethas neb yw perghennyas an soedhvaow an post yn Kernow a vynn degea peswarthek anedha. Consignia a vynn gwitha le a'n soedhvaow yn trevow, ytho ymons i ow tewlel kelli diw yn Sen Ostell ha nebes yn Truru. Yma Matthew Taylor (esel an senedh Westminster rag Truru ha Sen Ostell) yn unn assaya kavoes gorthybow dhiworth an kowethas a-dro dhe'n gonisow leel y'n termyn a dheu. 
Dy Mergher 30/10/02: Yma towlenn dhe usya rann an tyller Hwel Jayn a-vel tredanva, megys gans soev enyvallys. Tus y'n kyrghynn a's teves own bos an soev na dhe vos devedhys dhiworth gwarthek gans kleves karn ha min. An kowethas neb usi ow profya an dowlenn a lever na vydh henna kudynn vydh hag y fydh an jynnweyth pur lan. Mars yw drehevys, y fia an kynsa tredanva a'y far yn Kernow, kynth eus nebes erell a-hys Breten Veur. 
Dy Sul 27/10/02: Yma Fentenwynn ow mires orth towlenn dhe wul kresenn wonisogethek dhe Fordh Ponsmeur gans skol goth y'n dreveglos. Ordenor an kowethas, Pol hodge, a vynn strivya rag arghans Europek dhiworth Amkan Onan rag an projekt. Yma ev ow kemmeres y gynsa kammow gans an projekt mes ow holya warlergh tus erell neb re assyas hemma kyns. Loveday Jenkin a wre usya hy chi hy honan a-vel 'An Gresenn Gernewek'. Byttegyns, an prys ma, Fentenwynn a garsa sevel neppyth moy igor dhe bub Kernewegor.
Nowodhow Koth 18