Nowodhow koth 19
Dy Sul 15/12/02: Bardh a-vri Kernewek, Pol Hodge, re dhellos lyver nowydh a vardhonieth y'gan taves ni ha Sowsnek keffrys. 'Otter than a bitch mackerel' a guntell warbarth lies bardhonek yn unn gudha testennow efan. An lyver ma a with yn salow le Pol Hodge a-vel an kynsa bardh y'n yeth yn oes arnowydh. Bardhonieth yn Kernewek, y'n brassa rann kyns, ny wrug tochya war destennow a-vri yn town dhe dus y'ga bywnansow kemmyn. Pol Hodge yw bardh gwir drefenn ev dhe gewsel a-dro dhyn ni y'gan bywnansow pub-dydhyek.
Dy Sadorn 14/12/02: Korf baban nowydh-genys veu diskudhys dy Yow dhe Woenwynn ogas dhe Sen Ostell. Pan veu kevys, hwath yn fyw ova ha gesys ryb fordh yn sagh heblyth. Merwel a wrug hag yma'n hedhlu owth assaya kavoes an vamm lemmyn. Dell grysons, res yw dhedhi digemmeres gweres dhiworth po medhyk po konsler. An diskudhans a ynnias an wythysi gres dhe hwilas rygdhi gans eskelli-dro ha war an tir. I a grys hy bos mowes skol ha dhiworth an kethsem ranndir na. 
Dy Sadorn 14/12/02: Treys Noeth o an bagas Kernewek ow performya a-barth Kernow yn Iwerdhon warlyna dhe'n Goel Pan-Keltek. Sewen o aga han 'Tus an Kastell', hag i a dheuth tre gans an piwas. Lemmyn, yma skorenn Gernewek an Pan-Keltek ow hwilas kan nowydh ha band dhe assaya previ bos Kernow fenten dha a ilow arnowydh yn taves Keltek. Res yw bos an gan andhyllys, yn Kernewek, ha kenwerthek. Kernow re waynyas kyns, gans Philip Knight ha Frutys Difennys (an gan o "Deus yn rag Dolli" ha West (gans kan skrifys gans Pawl Dunbar henwys "An Arvor").
Dy Mergher 11/12/02: An gonis Nadelik hengovek dhe Sen Iv a vydh synsys hevlyna Dy Sul 22ves a vis Kevardhu dhe 3 eur. Herwydh usadow, y fydh karollyow Nadelik ha lennansow... oll yn Kernewek. Y fydh hwarvosow erell a-hys Kernow a'n par ma keffrys, byttegyns an huni ma yw an kottha. Yma galow dhe beub dos ha gordhya Dyw y'gan yeth ni. Da yw omlowenhe an rann Nadelik ma y'n fordh ma.
Dy Mergher 11/12/02: A-vorow y fydh kuntelles dhe Hel Konsel Kernow le may fydh konselloryon ow koslowes orth towlenn Kyttrinow 'First' rag gwellhe gonisyow a-hys Kernow. Pobell Kernow a wra dyski an pyth a vynnons dh'y wul dy Lun. Dell glywav, y fydh moy gonisyow dhe lies le ha gwellheans nebes gorsavow bus yn tylleryow kepar ha Tewynn Pleustri ha Sen Ostell.  
Dy Sul 8/12/02: Goel an Yeth, po An Bennseythun Gernewek 2003 a vydh synsys arta dhe Bennsywyn 11ves dhe 13ves a vis Ebryll. An jydh veu kampoellys yn mysk materyow erell dhe'n Kuntelles Kemmyn Blydhenyek Kowethas an Yeth Kernewek, synsys de yn Truru. Jane Ninnis a wra pesya a-vel Kaderyor, ha Polin Prys a bes a-vel Skrifenyades. Rag derivas leun an Kuntelles, mir orth an erthygel der WARLINENN.
Dy Sadorn 7/12/02: An Omguntellyans Selteth Kernow re skrifas dhe'n is-pennmenyster, John Prescott, yn unn dhynnerghi an dowlenn dhe apposya an dowr ha gweles mars eus hwans yn Kernow rag niverans war an destenn a dhigresennans. Prescott a garsa gweles senedh 'Soth West' y'n le rag Kernow.
Dy Mergher 4/12/02: Wortiwedh! Wosa lies delatyans, yma an mirji igerys hedhyw. Ynno y hwelir skathow a-vri ha hwedhel a neuvya war an mor. Mis Me y teuth an Vyghternes Sowsnek dh'y weles kyn nag esa moy es nebes skaothow yn drehevyans nag o kowlwrys. An mirji a vydh igerys y'n seythun heb kost bys y'n 19ves mis Hwevrer a-vel y 'apposyansow mor'. Yma govenek bras bos meur a dornysi ow tos 2003 dh'y weles ha dri meur a arghans dhe'n dre ha ranndir. Byttegyns, nebes tus re leveris na vydh meur y les dhe dornysi. I a garsa gweles gorholyon brassa kepar ha'n Cutty Sark po HMS Belfast po SS Great Britain. Ni a wra gweles mars yw po olyfans gwynn po sewen.
Dy Lun 2/12/02: Nos Sul an gorhel 'Scot Ranger' a dheuth ha bos yn kaletter wosa y garg a brenn dhe vovya yn mor hager. Eseli an kriw veu selwys dre askell-dro, byttegyns tri esel a wortas warnodho ha'n gorhel tennys dhe Bennsans rag ewnansow.    
Dy Lun 2/12/02: Yma govenek dhe'n Governans bos tybyansow dannvenys dhodho erbynn 3a mis Meurth 2003 a-dro dh'y dowlennow rag senedhow ranndirek. Y talvia dhywgh dannvon lytherow dhe Soedhva an Is-Pennmenyster.   
Dy Gwener 29/11/02: Oyl re beu kevys war drethow a-hys an arvor deghowbarth Kernewek. Dell hevel y'n gwella prys, nyns yw devedhys dhiworth an tanker-oyl Prestiege neb a veu kellys y'n mor ryb Galythi. Nyns yw sertan hwath a-dhiworth py le y teuth an defolans ma. Konsel Kernow re dhallathas oberans glanhe. Yma tybyans bos oyl dhiworth skath neb a waghas y arghow y'n mor garow. An skeusenn a dhiskwa euthekter an defolans war arvor Galythiek. 
Dy Mergher 27/11/02: Yth esa glaw poes a-hys Kernow hedhyw ha lies liv ynwedh. An gwettha tyller o Lannergh ogas dhe Rysrudh. Byttegyns, dhe Hwel Ros, tri den a dheuth ha bos stegys yn karavan yn kres an livow. Res o dhe'n lu-tan dos ha'ga selwel kynth ens yn kres a astel ober. Res o dhe Skol Gynsa Treworge yn Rysrudh dannvon tre an fleghes awos dowrow y'n skol.
Dy Meurth 26/11/02: Bardhonieth nebes tewl, ogas ha mires orth an gwettha tu, hag a wra omdhispresya hogen. Mes pyth yw an gwiryonedh? An bardhonek ma a dhyskwedh y glorder genesik, awos y rol a gowlwriansow yw hir dres eghenn. An wask a allsa gul ober gwell agesov a dherivas an soedhow synsys ganso ha’n kowethasow mayth ova esel es dell allsen vy. Ytho, fatell dhegoedh dhyn perthi kov a Vap Dyvroeth, Richard Garfield Jenkin?
Dy Sul 24/11/02: Towlennow re beu disputys yn konsel Truru a-dro dhe dhisplegya rann nowydh rag brashe an sita. Res yw dhe dowloryon Kernowkavoes spas rag 3500 chi nowydh, ha rann an niver na a allsa bos drehevys ogas dhe Gollji Truru ha'n Klub Golf. Yma'n konsel ow kovynn orth tus a'n kyrghynn dhe brofya aga thybyansow war an mater erbynn 10ves mis Kevardhu. An dowlenn leel a re an tir orth tu ma a'n sita rag displegyans bras, byttegyns, nyns usi an towlennow dyllys hwath. A-gynsow, ni a welas park prenassa nowydh drehevys yn ogas gans gwerthjiow kepar ha Matalan ha JJB Sports. Rann veur an chiow nowydh a vydh gorrys war barkow glas drefenn nag eus lowr a dir gell yn Kernow.  
Dy Meurth 26/11/02: Bardhonieth nebes tewl, ogas ha mires orth an gwettha tu, hag a wra omdhispresya hogen. Mes pyth yw an gwiryonedh? An bardhonek ma a dhyskwedh y glorder genesik, awos y rol a gowlwriansow yw hir dres eghenn. An wask a allsa gul ober gwell agesov a dherivas an soedhow synsys ganso ha’n kowethasow mayth ova esel es dell allsen vy. Ytho, fatell dhegoedh dhyn perthi kov a Vap Dyvroeth, Richard Garfield Jenkin?
Dy Sul 24/11/02: Towlennow re beu disputys yn konsel Truru a-dro dhe dhisplegya rann nowydh rag brashe an sita. Res yw dhe dowloryon Kernowkavoes spas rag 3500 chi nowydh, ha rann an niver na a allsa bos drehevys ogas dhe Gollji Truru ha'n Klub Golf. Yma'n konsel ow kovynn orth tus a'n kyrghynn dhe brofya aga thybyansow war an mater erbynn 10ves mis Kevardhu. An dowlenn leel a re an tir orth tu ma a'n sita rag displegyans bras, byttegyns, nyns usi an towlennow dyllys hwath. A-gynsow, ni a welas park prenassa nowydh drehevys yn ogas gans gwerthjiow kepar ha Matalan ha JJB Sports. Rann veur an chiow nowydh a vydh gorrys war barkow glas drefenn nag eus lowr a dir gell yn Kernow.
Dy Sul 24/11/02: Yma mordardhores yn Klavji Trelysk wosa bos skwattys gans lughesenn ha hi ow mordardha gans hy thri koweth dhe Borthrepta ogas dhe Borthia. Nyns eus na hanow, nag oes na meur a gedhlow a-dro dhe'n droglamm, byttegyns yma hi gwithys y'n ward rag gwitha lagas glew warnedhi. An droglamm naturek a hwarveu wosa prys li de ha'n awel hager.
Dy Yow 21/11/02: Breusyas re ros dhe 'Verther' Kernewek ober y'n gemmynieth rag peyntya dhe-ves 'hansel-leun Sowsnek' gans 'hansel-leun Kernewek'. Paddy McDonough, 29, dhiworth Iwerdhon yw skoedhyer krev a bolitigieth Kernewek hag a ros skoedhyans meur rag chanjya arwoedhyow fordh Rosenn Tewdarek dhe'n Baner Kernewek. Lemmyn yma Konsel Kernow ow skoedhya Baner Sen Pyran war arwoedhyow gell, ha Mr McDonough a lever bos hemma prevyans y gaskyrgh.
Dy Meuth 19/11/02: An Governans re erviras ri dewis dhe gonselyow leel a-dro dhe settya diskont toll konsel rag chiow nessa. Y'n eur ma, yma diskont a 50% ha nebes tus a grys bos henna ow ladha trevow, negysyow ha kressya kost a jiow. Lemmyn, galloes vydh res dhe gonselyow leel ervira mar mynnons ris diskont ynter 10% ha 50%. An kaskyrgh erbynn an diskont ma veu ledys gans eseli and senedh Westminster dhiworth Kernow, kepar ha Matthew Taylor ha Paul Tyler.