koth2

Dy Meurth 28/8/01: 12:00: Towl dhe dhisplegya nerth an gwyns a-hys Breten Veur oll yw lanchys hedhyw dhe Dewynn Pleustri. Yma Menyster Nerth Brian Wilson dhe Vargen Tir Gwyns Bearsdown... an dredanva gwyns an moyha nowydh yn Kernow.

Dy Meurth 28/8/01: 12:00: An diwysogneth tornyaseth Kernow a lever bos an goel arghannti mis Est sewen bras. Lemmyn, ymons i ow kwaytya kavoes negys orth nivel ughella rag an misyow ow tos.

Dy Yow 23/8/01: 12:00: An maw (4) neb a goedhas yn kreun kawgh dhe Woenhavar yn seythun yw passys re verwis. Yth esa yn-dann with dhe Glavji Great Ormond Street yn Loundres.

Dy Mergher 22/8/01: 20:00: Korf Ellie James re beu disgudhys war Venydh Kinabalu yn Borneo. An vowes dhiworth Kernow Est veu kelys ha hi ow kerdhes gans hy theylu.

Dy Lun 20/8/01: 20:00: Bagas selwel yn Borneo re bowesas an hwilans rag mowes Kernewek kellys nans yw pymp dydh. Ellie James (17) eth dhe goll ha hi owth yskynna menydh dy Yow. Kellys yw hi war Menydh Kinabalu wosa hager awel.

Dy Lun 3/9/01: 10:00: Lywydhyon klavji Treliske a lever bos res kavoes arghans bras mar mynnons holya towlenn settys gans an governans. Yma pennlywydh Brian Milstead ow kovynn rag towlennow hirra rag an termyn a dheu.

Dy Lun 3/9/01: 10:00: Yma RNAS Kilros ow kul y rann yn kannas-lu an brassa wosa bresel an Falklands. Y fydh tro-eskelli Sea King ow mos dhe’n Gulf rag 4 mis rag Oberyans Argonaut 01. Y fydh 24 gorhel-lu, y’ga mysk HMS Illustrious hag HMS Cornwall.

Dy Sul 2/9/01: 14:00: 43 den yn ayrenn yw salow wosa tirans tromm dhe ayrborth Bristol. Yth esens i ow nija dhiworth Kernow dhe Loundres pan hedhas unn jynn. British Airways a lever nag esa danjer vydh drefenn bos an ayrenn na a yll oberi gans unn jynn yn unnik, kyn fo dew.

Dy Sadorn 1/9/01: 12:00: Yma soedhogyon Konsel Pennwydh ow klannhe an arvor dhe Vay Porthia wosa droglamm defolans. Unn tonnas a oyl veu skoelys war Treth Heyl de. Lies edhenn an mor re beu ledhys hag yma gwarnyans dhe'n poblek dhe vos war.

Dy Sadorn 1/9/01: 8:00: Yma synsys hedhyw an Orsedh dhe Sen Kolomm. Y fydh ena moy es 200 bardh. Bardh Meur John Bolitho a wra wolkomm dhe 19 bardh nowydh y'n solempnyta.

Dy Yow 30/8/01: 14:00: Naw morhoghes a wrug diskwedhyans rag tornysi de
dhe Borth Trevornans yn ogas dhe Vreanek.

Dy Yow 30/8/01: 14:00: Keskerdh yw towlys erbynn towlennow rag gwerthji-reyth yn Kammbronn. Yma Konsel Kerrier ow mires orth an dowlenn 18ves mis Gwynngala dhe 10 eur myttinweyth.

Dy Mergher 29/8/01: 21:00: Yth esa is-pennmenyster John Prescott yn Truru de, mes ny leveris ev travydh yn-kever skila rag an tro. Ev a vysytyas soedhva rag Amkan Onan ha'n RDA... hag ena eth a-dro dhe'n gwerthjiow yn unn brenassa.

Dy Mergher 29/8/01: 20:00: Yma den negys ow marghasya an taves Kernewek dre wul arwoedhyow rag diwottiow yn Kernewek. Richard Ford re werthas lies hwath hag ymava ow tegemmeres po dew po tri gorhemmynn pub dydh oll.

Dy Meurth 4/9/01: 12:00: Kummyas gwaynya sten res dhe Grofti! Hwithroryon Balyow an Governans re ros dhe Grofti Dheghow kummyas dhe dhalleth gwaynya sten. Res veu de. Yma 13 den owth oberi ena lemmyn, kyns es pell y fydh dew moy... hag erbynn 2003, braster an para a vydh 40. Pennrewlor Krofti, Kevin Williams, a lever y vos kamm vras war-rag. Krofti a dhegeas 1998 hag yth esa unn assay dh'y igeri.

Dy Meurth 4/9/01: 12:00: Towlennow yw dyllys hedhyw rag gwellhe studh gwasoniethow yeghes yn Kernow. Ł7 milvil a vydh spenys war Skol Vedhygel an Pennynys. Igeri a wra yn Truru 2004. Y fydh kresennow erell dhe Aberplymm ha Karesk.

Dy Lun 10/9/01: Unnweyth arta, an omladh ynter furvow an yeth a lett neb rann an wask neb a garsa skoedhya an taves Kernewek. Yth esa an Sunday Independent orth poynt a dhyllo erthyglow y’n taves kyns nebonan dhe veneges yn kever an batell ynter an tri sort.

Dy Sul 9/9/01: Yma an paper nowodhow neb a a-hys Kernow Sulweyth ow talleth kolovenn y'n yeth Kernewek dhiworth an dy Sul ma. Skrifys yw an rann ma gans pennskrifer an wiasva ma, ha'ga jornalyas i nowydh. Matthew Clarke a wra ledya aga assayans dhe wul an paper moy Kernewek yn le a heveli kepar ha paper Aberplymm/Kernow Est/ Dewnans West.

Dy Gwener 7/9/01: 9:00: Dew dhen re verwis Dhe Vay Holywell dhe Dewynn Pleustri. Yth esens i ow mordardha wosa gwythysi mordhardha dhe vos tre. I eth ha bos kachys yn fros-frega (riptide). Tro-askell veu gelwys dhe'ga hemmeres dhe Glavji Trelysk. Soweth, i a verwis.

Dy Mergher 5/9/01: 19:00: Yma an Ajenteth Kyrghynneth ow previ loub dhiworth Dowr Karnon wosa 5 mildir veu defolys gans kymygow trenk dhiworth Hwel Jeyn. Dafar dyghtya eth dhe wall wosa bos igerys nans yw tri mis. Peswarthek mil peuns veu spenys war An dhyghtva.

Dy Yow 13/9/01: An Displetyans Kernow Ryal a dhallathas hedhyw gans spas res dhe’n taves Kernewek. Yma stalla dhe’n Orsedh an vlydhen ma ow ri derivadow yn kever an yeth ha’n gonisogeth. Konsel Kernow re ros aswa ynwedh rag dyski an taves dhe fleghes. Yma Cadwur James ha Tamsin Carter ow synsi klasow ha dyski lavarow sempel ha niverow. Soweth, an skila meur rag an displetyans yw kellys hevlyna. Awos kaletterow karn ha min, nyns esa enyvales bargen tir ena.

Dy Meurth 11/9/01: Kernow a sav gans an bys yn unn bysi rag an re stag yn-dann an World Trade Centre neb a veu distruys gans tus neb a vynn dri mernans hag euth dhe vilyow a bobell.