koth20

Koth 20

Dy Lun 27/1/03: De, kevys veu korf orth troes an alsyow Penn an Wlas ogas dhe Sennen. Dell hevel, yth esa an den ow tiwrosa a-dro dhe'n hyns arvorek pan goedhas. Lemmyn, yma'n kreslu owth assaya diskudha y hanow. Dell grysons, ev o ynter 20 ha 25 bloedh, ev o moen, 5' 8" y hirder, gans blew kott ha gel. Hwithroryon a breder ev dhe dhiwrosa war dhiwros-menydh 'Kona', brons y liw. An diwettha nowodhow war an hwedhel ma (28/1/03): An kreslu re dhellos hanow an den. David Christopher Denham (22) dhiworth Sawbridgeworth yn Staffordshire, Pow Sows.
Dy Gwener 24/1/03: Hedhyw yw lanchyans a sidi-rom nowydh gans an kowethas EuroTalk. I re wrug an dowlenn jynn-amontya ma rag dyski Kernewek yn skolyow, chiow ha pella. Eurotalk yw lywys gans Richard Howeson neb a veu genys yn Kernow. Lanchys vydh dhe hanterdydh yn Skol Heyl. Dyskyblon re assayas an dowlenn kyns bos dyllys. Kans dyskybel ha peswar ugens a vydh dhe'n lanchyans rag previ braster aga gerva Gernewek. Yma dew lev devnydhys y'n sidi-rom: Pol Hodge ha Frances Bennett. Keffrys ha henna y tiskwa dew furv an yeth: Kernewek Kemmyn ha Kernewek Unys Daswelys. Herwydh kows, an sidi ma yw gwell es sidi-rom neb a veu dyllys warlyna gans Sain yn Kembra.
Dy Yow 23/1/03: Nick Raynsford, menyster rag an ranndiryow, re skrifas dhe Matthew Taylor, esel an senedh Westminster rag Truru ha Sen Ostell, yn unn nagha gwiryow a gavoes senedh rag Kernow. Yn medh Mr Raynsford yn y lyther: "My a woer bos korf a dus yn Kernow gans hwans a gavoes senedh Kernow. Mar kwrellen ri an nerthow dhe Gernow neb a vydh res dhe ranndiryow erell, ni a gollsa an lesow a gesjunya polisiow neb a via dhe-les dhe ranndir efanna... kepar ha displegyans erbysyek ha karryans."
Dy Meurth 21/1/03: Towlennow rag bargen tir gwyns ogas dhe Brasdowrgi re beu tewlys a-ves gans konseloryon Kernow Kledh. Teyr gwynsell veu towlys byttegyns an konsel a erviras bos godros meur dhe'n kyrghynnedh. Yma towlennow keffrys rag bargen tir nowydh ogas dhe Drerewl yn Karadon. Res yw dhe'n governans ri aga breus war an dowlenn ma kyns bos gorrys a-dherag an konsel. Rag termyn, yth esa herdhyans bras war tu ha nerth an gwyns, mes lemmyn, dell hevel, yma konseloryon ow prederi yn town a-dro dhe'n kyrghynnedh yn fenowgh. Tredan glas yw dhe-les hwath yn Kernow. De, an brassa to 'nerth an howl' veu skwitchys yn fyw dhe'n Gresenn Gaia ogas dhe Dhelyowboll.
Dy Sadorn 18/1/03: Towlysi Rostorrmoel re ros aga hummyas dhe brojekt yn Sen Ostell neb a vynn drehevel tre nowydh y'n kres a'n dre, byttegyns y fia drehevys yn gis koth kepar ha Poundbury yn Dorset. Poundbury yw drehevys war dir Ducheth Kernow ha gans skoedhyans Duk Charlys. Herwydh towlow a-varr, y fydh 140 chi. Yma towl keffrys dhe wul tre haval yn Kammbronn.
Dy Sadorn 18/1/03: Yma an tressa skwadron RNAS Kilros ow tibertha Kernow hedhyw hag omjunya an lu neb usi ow mos war tu ha'n Gulf. Y fydh peswar askell-dro Merlin HM Mk 1 ow mos di war an RFA Fort Victoria. An seythun yw passys a welas lies souder Kernewek ow kasa Kernow rag an ranndir troblys na. I eth war HMS Ocean, an brassa gorhel y'n Lu Ryal Breten Veurek. An skeusenn a dhiskwa HMS Ocean ow tibertha Porth Dewnans an seythun ma.
Dy Mergher 15/1/03: An Fondyans Studhyansow Kernewek re waynyas Ł154 mil peuns dhiworth an Lottri rag projekt nowydh a-dro istori koll Kernow. An studhyans a vydh yn-dann asrann a Bennskol Karesk. Hanow an projekt yw "Plethennow Kernewek" hag y fydh kevarwoedhys gans Dr Garry Tregidga (gwel an skeusenn). An arghans a wra tylli rag hwithra: krysyansow; politegieth; keskowethyansow; ha bywnans yn Kernow y'n gansvlydhen dremenys. Kost an projekt yn tien yw Ł172 mil. An arghans na yw kevys dhiworth grontys erell. Wosa an projekt dhe vos kowlwrys, diskwedhys a vydh dhe Gresenn Kernow.
Dy Sul 12/1/03: An gorhel ayrennow HMS Ark Royal a asas Portsmouth de yn unn woelya dhe'n Gulf ha martesen rag gwerrya erbynn Saddam Hussein. Ynni hi yma soudoryon dhiworth Kernow hag Aberplymm. Keffrys ha 3 Commando, dell grysyn, yma soudoryon dhiworth RNAS Kilros ogas dhe Hellys. Kyns neppell, y fydh HMS Ocean dhiworth Porth Dewnans ow mos di ynwedh.
Dy Sul 12/1/03: Sterenn-rokk, ha triger Kernewek, Pete Townshend a lever nyns yw ev pidofayl. Yma an den, neb yw trigys yn fenowgh ogas dhe Hellys, yn-dann hwithrans an kreslu dhe Arth Alban wosa is-karga skeusennow a fleghes yowynk. Ev re leveris hedhyw aga bos rag y hwithrans y honan a-dro dhe'n mater. Townshend a wre seni rag an band 'The Who'. Yma ev ow korra poester war y eryow yn unn leverel nag yw ev Garry Glitter nowydh.
Dy Gwener 10/1/03: An Withva Dowr Toemm Molas dhe Gavyow Karnglas yw tyller entertaynment nowydh yn Kernow. Ymons i ow synsi nosweyth Sen Pyran 7ves mis Meurth, gans Dalla ha hembrenkys gans Matthew Clarke. Unn seythun a-wosa, y fydh nosweyth Sen Padrig synsys ena gans 'Scatter the Mud' ha hembrenkys gans Anne Kennedy-Truscott. Dell glywyn, yma kows a'n Band Troyllya Melinji ow seni rag nosweyth Sen Padrig keffrys. www.carnglaze.com
Dy Mergher 8/1/03: An tanlu veu gelwys dhe'n Dokkyow Aberfal dhe 5 eur an myttin ma wosa derivas a dan dhe Gay an Vyghternes. Res o dhedha omladha erbynn an flammow dhiworth skathow drefenn bos an kay pur ansalow. Garan veu distruys ha koedha y'n mor. An droglamm euthek ma a dheu nebes seythunyow kyns an Ajenteth Displegyans (SWERDA) dhe leverel a-dro dhe Ł80 milvil rag daswul rannow an dokkyow.
Dy Lun 6/1/03: Paul Tyler re leveris hedhyw na vynn ev sevel arta rag Kernow Gogledh. Ev a bes gans y ober bys y'n nessa dewisyans. Herwydh kows, y fydh an nessa dewisyans po 2005 po 2006. Ev a vydh 65 bloedh y'n termyn na, ha 70 bloedh a pe ev dhe besya a-vel senedher. Yma ev ow leverel an nowodhow ma lemmyn may fo chons dh'y barti dewisi ombrofyer nowydh rag an parti LybDem. Dell grys tus konnyk a'n bys polytek, y fydh soedh ragdho po yn Chi an Arloedhi po Europ.
Dy Sul 5/1/03: Philip Knight re oberis yn feur yn unn bareusi tresenn neb usi ow tiskwedhes an sonyow Kernewek yn form a skrisell. Gwrys yn fest fethus yw gans delinyansow ha skeusennow. Y hyllir prena an skrisell der Kowethas an Yeth Kernewek.
Dy Sul 5/1/03: Yma an Kuntellyans Selreth Kernewek yn unn wovynn orth tus dhe worra aga hanow war form kesroesweyth yn unn skoedhya a senedh Kernow.
Dy Mergher 1/1/03: Glaw poes re goedhas a-hys Kernow ha gul dowrow dhe liva. Gweth o y'n howlsedhes gans Hellys an gwettha. Byttegyns, yma an glaw ow koedha hwath ha kales yw rag an tanlu pompya dhe-ves an dowr awos bos nivel an dowr y'n dor mar ughel. Yma nebes huni ow leverel bos hemma prov a doemmheans an Norvys. Lies fordh a-hys Kernow yw andremenadow hag yma gwarnyans rag lywysi dhe vos war a livow y'n fordhow.
Dy Lun 30/12/02: An hwarvosva nowydh Kernow, Kavyow Karnglas re dhellos hy roll hwarvosow rag 2003. Yma y'ga mysk, an band a-vri ilow gwerinek 'Lindisfarne'. Martesen moy dhe-les dhyn ni es henna a vydh Nos Sen Pyran, nos Wener 7ves mis Meurth dhe 8gw. Ena, dy Sadorn 15ves mis Meurth, y fydh Nosweyth Sen Padrig. Nos Sadorn 12ves mis Ebryll yma Maddy Prior ow kana, ha 7ves mis Metheven yw keskan gans Kur Loveni. Pub keskan a vydh synsys yn gogo meur yn-dann an dor neb yw treylys dhe wariva vras gans ekusteks marthys. Mar mynnir godhvos moy, mirewgh orth gwiasva Karnglas omma.
Dy Sul 22/12/02: Gonis Nadelik veu synsys hedhyw dhe Sen Iv. An naw dyskas ha karol veu kevarwoedhys gans Wella Brown. Goslow orth rannow an gonis omma.
Dy Gwener 20/12/02: Nans yw unnek blydhen degea a wrug Hwel Menydh Wellington. Nans yw diw vlydhen, assaya wrug kowethas konkrit usya an hwelva, byttegyns yth esa krodhvolansow erbynn re a dros gwrys gans an jynnweyth. Lemmyn yma kowethas henwys 'Metacool' orth hy frena rag gul park teknolojieth neb a re 150 soedh. Res yw dhe'n kowethas kavoes kummyas tewlel hwath dhiworth Konsel Kernow, mes dell lever kowsyas Metacool, yma govenek dhedha bos an projekt ow movya war rag kyns es pell. Hwel Menydh Wellington a wre askorra sten a-vel rann Hwel Jane. Yma ena hwath an pennframm ha drehevyansow. I a vydh gwithys awos aga bos rann an ertaj leel ha merk a-vri war an tir. An skeusenn a dhiskwa an pennframm kepar dell yw lemmyn.
Dy Lun 16/12/02: Yma Imerys ow movya yn-mes a Ji John Keay yn Sen Ostell, byttegyns y'n gwella prys, ny vydh gwag an drehevyans meur ma. Y fydh Kollji Sen Ostell owth usya an chi y'n le an drehevyansow koth yn ogas dhe'n gorsav. An projekt a gost Ł13.5 milvil. An derivas ma a syw warlergh nowodhow a dhisplegyans bras a jiow y'n dre ynwedh. Esel an senedh Westminster rag an dre, Matthew Taylor, re henwis an hwarvosow ma 'treylva veur'. Nyns yw sertan hwath pandra hwer dhe'n kollji koth. An gresenn nowydh a iger yn hav 2004.