koth21

Dy' Sul 6/4/03: Band rokk nowydh Kernewek a wrug aga hynsa gyg nyhewer dhe Bark Golf Tredhorn yn Kernow Kledh. Gyg privedh o, byttegyns an kynsa chons dhe glywes an band yn poblek a vydh dhe'n Jydh Ilow Porth Pyran, Goel Arghanti mis Me (26ves) a-dro dhe 3 eur. An band yw henwys 'Krenna' hag a syw warlergh tybyansow 'Skwardya'. Selys veu gans Matthew Clarke wosa ev dhe asa Kernow West, ha movya dhe Lyskerrys le mayth yw trigys lemmyn (gwel skeusenn). An rol-kanow y'n eur ma yw pur haval orth an rol-kanow 'Skwardya'. Yma govenek dhe'n band seni dhe Lowender Pyran hevlyna keffrys. Kedhlow yn kever Skwardya.
Dy Sadorn 5/4/03: Kuntelles istorek re beu synsys y'n seythun yw passys rag dalleth towlenn rag tenkys a'n taves Kernewek. Pennow gonisogethek ha politek re dhos warbarth dhe Hel Kernow rag disputya an fordh war-rag gans soedhogyon a'n governans. An kuntelles ma veu synsys drefenn bos Kernewek yn-dann nessa rann an Chartour Europek rag Yethow Lyha Kewsys. An kuntellyans veu kaderys gans Knslr John Lobb, byttegyns, yn-mysk an re ena, yth esa bardh meur Yowann Bolitho, Jori Ansell dhiworth an Buro Europek, ha soedhogyon a Gowethas an Yeth, Kesva an Taves, Agan Tavas ha Cossel an Tavas. I a erviras selya bagas byghan rag kavoes tybyansow dhiworth kernewegoryon ha partiow erell.
Dy Gwener 28/3/03: An goel 'Urdd' re dhifennas unn bagas a dhonsoryon dhiworth Skol Penglais yn Kembra awos i dhe dhevnydhya kan gans Gwenno Saunders neb yw rekordys gans geryow Kembrek ha Kernewek ynni. 'Mor Hud' veu usys gans an fleghes yn kesstriv, mes breusysi re'ga thewlel yn-mes. I a erviras nag ylli bagasow donsya usya kanow mar nyns eus geryow Kembrek ynna hebken. Gwenno re brofyas dasrekordya an gan ragdha ha'y gul dre Gembrek yn unnik. Byttegyns, ordenoryon an goel re leveris bos hemma re dhiwedhes. 'Mor Hud' (Mor Hudel) re dheuth ha bos pur a-vri yn mysk tus yowynk yn Kembra, awos bos pur arnowydh yn hy gis, ha pur a-vri yn mysk Kernowegoryon ynwedh yw awos bos geryow Kernewek ynni. Dell hevel, an ervirans ma yw pur wokki. Y koedh bos an hwoer-daves degemmerys yn kesstrivow a'n par ma. Hemm yw an pyth a waytir dhiworth kowethasow Sowsnek. Euthek yw yn hwir mars usi neb kowethas Kembrek ow pystiga agan yeth lemmyn.
Dy Meurth 25/3/03: Hedhyw y feu dyllys henwyn a dri den hag esa abervedh dew askell-dro neb a skwattyas an eyl erbynn y gila y'n Gulf. Seyth den a verwis y'n droglamm dy Sadorn yn ogas dhe HMS Ark Royal. Lt Anthony King, 35; Lt Philip West, 32; ha Lt James Williams, 28 a nijas y'n askell-dro 'Mark 7 Sea King' a-vel rann a 849 Skwadron. Ny vynnas teyluyow an peswar den erell dyllo kedhlow a-dro dhe'ga thus kerys kellys. Dy Sul, gonisow eglos veu synsys ragdha dhe Gilros, yn Hellys, ha war an gorhel HMS Ark Royal. Teyluyow, kowetha ha tus leel re asas bleujennow ragdha orth yettow Kilros yn unn berthi kov anedha.
Dy Meurth 25/3/03: De, y ferwis Steven Roberts, 33 bloedh y oes, wosa bos shyndys hag ev owth assaya hebaskhe bush a Irakyon. Ev o an kynsa souder Breten Veurek dhe vos ledhys y'n kas ha heb droglamm. Y vammdre o Ponsrys yn Kernow Kledh. An myttin ma, yth esa an media ow leverel y vos dhiworth Pow Evrog drefenn y wreg dhe driga ena y'n termyn yw passys. Byttegyns, y vamm a bellgewsis orth GMTV hag i ow kewsel yn y gever, hag ewnhe an kedhlow.
Dy Lun 24/3/03: Bagas a dheg den warn ugens a drethas an Tamer war an Pons Tamer yn unn brotestya erbynn an kas erbynn Irak. Res o dhe'n kreslu hedhi an kerri rag termyn verr. Protest brassa veu synsys dy Sadorn yn Truru. Moy es kans person a omguntellyas y'n sita rag diskwedhes aga bos erbynn gwerrya. An bagas 'Hedh an kas' re leveris bos hwans dhedha ordena lies moy protest y'n Ducheth.
Dy Lun 24/3/03: Dell hevel, y fydh re gales selwel an gorhel kargow 'RMS Mulheim'. Y teuth ha bos stegys war garrek Penn Men Du myttin Sadorn. Kargys yw gans rannow kerri plastek. Nebes oyl-disel yma ow sygeri yn-mes an gorhel, mes awos bos oyl 'skav', nyns eus own a dhifolans. Yth esa assayans nos Sadorn dasneuvya an Mulheim. Byttegyns, kepar ha'n assayans dy Sul, heb sewen o. Hwegh esel an kriw veu selwys dy Sadorn gans askell-dro Kilros. Lemmyn, res yw dhe selwyoryon a goedh tybi a-dro dhe byth dhe wul gans an gorhel kellys.
Dy Sadorn 22/3/03: Seyth den yw marow wosa dew askell-dro 'Sea King' dhiworth RNAS Kilros a skwattyas an eyl erbynn y gila y'n Gulf an myttin ma. Herwydh pennfentynnyow, nag esens i skwattyas yn-dann tennans Irakiek. Tus dhiworth Hellys re dhallathas dri bleujennow dhe'n ayrva hag yma'n MOD yn unn dherivas an kas dhe'n teyluyow. Dell hevel, hemm o droglamm, hag yth o unn jydh wosa askell-dro S.U.A a goedhas dhe'n dor ha ladha eth kommando dhiworth Aberplymm.
Dy Mergher 19/3/03: Tewlys veu synsi Pennseythun Gernewek Kowethas an Yeth Kernewek dhe Benntywynn arta, byttegyns, yma kudynnow a-dro dhe ordena hemma. Awos hemma, res o dhe'n ordenoryon defendya an hwarvos bys yn nepprys arall hevlyna. Herwydh kows, an kaletter o bos an hel dhe'n kamp havysi yn-dann dhaspeyntyans, ha nag o possybyl restra an le ma kepar dell veu warlyna. Dell waytyn, y fydh an skila poran apert dhyn yn skon.
Dy Gwener 14/3/03: Kyn feu darasow an Mirji Morek Gwlasek Aberfal igerys mis Kevardhu, igerans soedhek o hedhyw gans Prins Andrew, Dug Evrog. Ev a dheuth dhe Aberfal rag gul tro an mirji. A-ban veu igerys, moy es kans mil person res eth dres darasow an mirji. Awos an sewen ma, an pennsevik a leveris yn y gever y vos golowva Gernewek. Ynno, yma skathow byghan a-vri yn istori a woelya yn ynysow Breten Veurek. Yth esa marner a-vri ena, Robin Knox-Johnson. Ev a warias gans an skathow radyo-rewlys gans Prins Andrew.
Dy Gwener 14/3/03: Dell veu derivys kyns, Nowodhow Kernow re beu gorrys yn-dann an Buro Europek rag Yethow Lyha Kewsys. Skila rag hemma o dhe gavoes gront rag displegya an wiasva. Hanter an gront re beu res lemmyn, ytho ober a yll dalleth. Awos henna, an hanow 'Nowodhow Kernow' re beu kemmerys dhe-ves a'n wiasva ma, ha na vydh gwelys kyns es an wiasva nowydh gorfennys. An wiasva ma yw henwys NK2 lemmyn, hag a vydh omsevyek hwath. Drefenn bos Nowodhow Kernow rag pub eghenn a Gernewek, an wiasva ma a vydh rag Kernewek Kemmyn yn unnik, hag a wra pesya.
Dy Yow 13/3/03: Yma godros a brenans Kroftdi Dheghow ow kregi a-wartha Baseresult. Nans yw 20 mis, i a brenas an bal rag y dhasigeri. Mes lemmyn, an Kowethas Dastrehevel Kammbronn, Poll, Rysrudh a vynn prena an tyller rag projekt Amkan Onan. Byttegyns, Baseresult re leveris i dhe vos kommyttys dhe'ga thowlenn dasigeri. An hwarvosow ma a dheu pymp blydhen poran wosa an bal dhe dhegea. Unn vlydhen a-wosa, y teuth assayans dhiwoth Kembra dhe selwel Kroftdi. Nyns o an assayans na sewen, kynth esa meur a wormeulans ha hwedhlow y'n nowodhow yn y gever. Baseresult a lever i dhe wul meur a ober yn unn bareusi an bal, hag yma aga thowlenn ow mos yn-rag yn ta.
Dy Sul 9/3/03: Herwyth hengov nowydh, eth kans person eth dhe Borth Pyran hedhyw rag gweles gwari a-dro dhe vywnans Sen Pyran. Bush bras a dus gwyskys yn du, gwynn, hag owr, a gerdhas dres an tewynnow. Yth esa gwari a Byran tewlys yn-mes a Iwerdhon dhe'n kynsa hedh. Dhe'n nessa, Pyran a woelyas a-hys an mor dhe Gernow ha drehevel y oratri. An tressa hedh o an grows Geltek. Ena, Pyran a verwis. Kynth o an awel gwynsek gans nebes glaw, marthys o gweles kemmys a dus. Keffrys ha henna, splann o an gwari ha'n kanow. Fordh dha yw rag gorfenna seythun a hwarvosow Goel Sen Pyran. Meur a fleghes a wrug rannow an gwari orth penn a seythun mayth esa Blue Peter der BBC 1 ow kewsel yn kever bywnans an sans, diskwedhes baner Kernow, leverel tamm an yeth, ha kewsel a-dro dhe voes hengovek Kernewek. Rag gweles moy skeusennow an gwari hedhyw, klykkyewgh omma.
Dy Sul 9/3/03: Nessa blydhen yw an pymp kansves pennbloedh a Vywnans Meryasek. An gwari y'gan taves Kernewek ma veu skrifys yn Egloshal ogas dhe Gammbronn. Yma tybyansow ow tevi a dhaswul an gwari yn Talvann. Dell glyw Nowodhow Kernow hedhyw, Konsel an Dre Kammbronn a garsa skoedhya an dowlenn a-varr ma.
Dy Mergher 5/03/03: Rag an nessa blydhen yn unn rew, yma band Kernow West, 'Treys Noeth' ow mos dhe Iwerdhon rag kana a-barth Kernow y'n PanKeltek. Warlyna, i a waynyas an kesstriv gans aga han 'Tus an kastell'. Hevlyna, y fydhons ow kana 'Mar mynn'ta sywya'. Herwydh agan govenek, martesen i a vydh sewenek ena arta. Y hyllir goslowes orth tamm a'n gan dre glykkya omma. Band Troyllya Melinji a dhe Iwerdhon ynwedh rag an rannow ilow hengovek ha donsya.
Dy Mergher 5/03/03: Warlyna, synsys veu kesstriv rag dewisi arwoedh gell nowydh. Y'n termyn eus passys, yth esa rosenn rudh devnydhys rag diskwedhes bos neppyth a-vri dhe dornysi. Byttegyns, peyntys dhe-ves ens yn fenowgh gans tus a grysi a'ga bos desin Sowsnek. Mar vras o an kudynn, an konsel a lanchyas an kesstriv ma, ha gwaynyores yw Leanne Howarth. Mowes unnek bloedh hy oes yw, ha dyskybel Skol Marghas Yow. An konsel a dhegemmeras lies desin dannvenys dhedha. Y'ga mysk yth esa pastiow, banerow gans besantow, paloresow hag erell. Mes dell grysas an vreusysi, an desin ma o sempel hag es dhe gonvedhes. Lemmyn, res yw dhe'n konsel kavoes kummyas dh'y usya dhiworth an Menystri Karryans. Wosa henna, profys vydh an arwoedh gell nowydh ma dhe gowethasow y'n le an rosenn rudh. An skeusenn a dhiskwa Leanne gans arwoedh gell gwrys gans hy hanow skrifys warnodho.
Dy Mergher 5/3/03: Dell hevel, yma moy ha moy hwarvosow rag Goel Sen Pyran pub blydhen. Hedhyw yma peswar darvos meur ha lies hwarvosygyow erell a-hys Kernow ha'n bys. Nos Wener, yma keskan dhe'n Kavyow Karnglas ogas dhe Lyskerrys, ha dy Sadorn yma'n keskerdh a-dreus an tewynnow Porthpyran. Yn arbennik, Goel Sen Pyran 2003 yw arbennik wosa Kernewek dhe vos degemmerys a-vel yeth skwir ha wosa an niverans MORI dhe dhiskwedhes bos skoedhyans Kernow ow tevi.
Dy Gwener 28/2/03: Kuntelles arbennik Konsel Kernow veu synsys hedhyw rag breusi war dowlenn an Governans a-dro dhe dhigresennans y'n ranndiryow 'Sowsnek'. Wosa konseloryon dhe weles hwithrans MORI, i a votyas 47-2 rag dannvon lyther yn unn dhervynn niverans war dhigresennans yn Kernow. Kopi an hwithrans re beu dannvenys dhe John Prescott ynwedh. Gorthybow a goedh drehedhes orth desk an is-pennmenyster erbynn dy Lun. Kaderyer an Omguntellyans Senedh Kernow, Bert Biscoe, a leveris: "Ni a dhynnargh yn feur bos an konsel ow korthybi dhe'n mater ma yn poesedhek wosa kaskyrgh krev." Prescott re leveris kyns nag eus chons a Gernow ow mos yn-mes a'n senedh Soth West... martesen yma'n prys ow tos ragdho dhe dhasprederi.
Dy Yow 27/2/03: An hwithrans MORI yw dyllys lemmyn. 85% an bobell a lever i dhe omglywes moy Kernewek es po Sowsnek, po Breten Veurek, po Soth Westek. Yn ken govynn, 55% a lever i dhe skoedhya senedh Kernow, ha 51% an dus y'n hwithrans a leveris i dhe skoedhya Senedh Soth West. Apert yw bos skoedhyans rag an tybyans brassa lemmyn es nevra kyns. An hwithrans veu res may hallo ri kedhlow dhe gonseloryon hag i ow preusya an Paper Gwynn Digresennans dy Gwener. Res yw dhedha ri aga husul dhe John Prescott war y dybyansow rag senedhow a-hys 'Pow Sows (sic)'. Yn hwir, challenj bras a vydh dhe brofya Senedh Kernow drefenn bos Prescott hwath ow krysi bos gwell rag Kernow ha hi yn-dann Senedh Soth West.
Dy Mergher 26/2/03: Yma fleghes skol Kernewek ow kowlwul formow rag diskwedhes aga devedhyansow ethnek. Byttegyns, kepar ha'n niverans 2001, nyns eus spas ragdha dhe leverel aga bos Kernowyon. Yma chons dhedha a skrifa aga bos Iwerdhonek hag erell, mes lemmyn, yma unn maw orth y sav yn unn grodhvolas. Joss Trathen yw 12 oes y vloedh ha dyskybel Skol Deknolojieth Rysrudh. Ev re dhannvonas lyther dhe Dhuk Charlys yn unn wovynn rag gweres. Ev a grys bos Charlys den da dh'y weres wosa ev dhe redya an rag-skrif y'n lyver 'Kernow Bys Vykken'. Ynno, Charlys a gews a-barth an gonisogeth, ha gwiryow fleghes neb a garsa y skoedhya. Tas Joss yw esel Senedh Stenoryon Kernewek.
Dy Lun 24/2/03: An kowethas neb a lyw Ayrborth Tewynn Pleustri re gollas y gummyas dh'y rewlya. An kevambos yw res lemmyn dhe Serco Group Ltd. Sutton Holdings yw perghennor an kevambos rag Ayrborth Aberplymm ynwedh mes yma kaletter bras drefenn nag yw an ayrva bras lowr rag ayrennow jett. Sutton Holdings a garsa drehevel ayrborth nowydh dhe'n est a Aberplymm. Serco a dheu dhe'n negys yn termyn mayth eus challenj bras drefenn bos RAF Sen Mawgan ow prederi yn kever gwertha rannow an ayrva. Y'n eur ma, Ryanair yw an brassa kowethas ow ri gonisyow ayr dhiworth Tewynn Pleustri.
Dy Gwener 21/2/03: An Buro Europek rag Yethow Lyha Kewsys re gemmeras Nowodhow Kernow yn-dann hy askell. An skila rag henna yw kavoes gront an konsel rag gwellhe gonisyow a'n wiasva. Y fydh gwrys der Sowsnek, Kernewek Kemmyn, Unys ha Diwedhes, ha gans trigva nowydh, ha gwiasva flamm nowydh drehevys. Wosa Nowodhow Kernow dhe vos sevys y'n furv ma yn-dann EBLUL (mar kyllyn kavoes gront), an drigva goth ma a vydh devnydhys rag gwiasva pur haval orth an wiasva par dell yw lemmyn, mes yn Kemmyn hepken. Ny vydh oocities.com/cornishnews yn-dann EBLUL, marnas Nowodhow Kernow. oocities.com/cornishnews a vydh gelwys NK2
Dy Yow 20/2/03:Tus gans sleyneth ydhyn dhe Bark Paradhis yn Heyl a's teves own bos an balores Kernewek yn-dann wodros. Nans yw diw vlydhen, teylu a baloresow a dheuth arta dhe'n alsyow Kernow war Benntir an Lysardh. Byttegyns, nyns eus marnas unn balores benow y'n teylu. Awos hemma, dell lever Park Paradhis, kyns pell, y fydh an teylu ow tibertha Kernow arta rag hwilas paloresow erell. Park Paradhis a garsa gorra nebes a'ga faloresow war an alsyow dhe vrashe an bagas. Mes an RSPB re leveris nag yw henna tybyans da ha re naghas an profyans.
Dy Lun 17/2/03: Hag own a vroweghysi yn Breten Veur ow kressya, yma'n governans Westminster ow pareusi towlennow nowydh rag agan difressya erbynn skwattow browagh. A-vel rann an dowlenn na, yma'n Menystri a Dhifresyans ow prederi a-dro dhe worra jettow-omladha dhe RAF Sen Mawgan yn Kernow. Fyskys viens rag tenna orth jynnow-ebrenn kemmerys gans broweghysi. Keffrys ha henna, Kreslu Kernow ha Dewnans a dhalleth para gorth-broweghysi. Gelwys viens mar pe godros neb le yn po Kernow po Dewnans. Kynth eson pell dhiworth Loundres, dell grys an wythysi gres, yma kemmys a benngostennow y'n Kernow, kepar ha RNAS Kilros ha RAF Sen Mawgan.
Dy Lun 17/2/03: Diw dowlenn displegyans a-vri re beu avisys hedhyw yn Kernow. Wor'tiwedh y fydh Ostell Webbs yn Lyskerrys daswrys gans dew milvil peuns. An drehevyans ma re beu ow pedri rag moy es pymthek blydhen. Ynwedh, an dowlenn rag drehevel kopleks dy'goelyow dhe'n kyns Koliseum Kernewek ogas dhe Sen Ostell a wra mos war-rag.
Dy Sul 16/2/03: Hwegh kyttrin a brotestoryon eth dhiworth Kernow dhe Loundres de rag ri aga breus erbynn towlenn Blair ha Bush gwerrya erbynn Saddam Hussein. Keskerdhow erell veu synsys yn Kernow hy honan. Unn bush a geskerdhas dres Lyskerrys, ken bush a ganas kanow protest ha kres a-dherag Penneglos Truru. Kansow a soudoryon dhiworth Kernow res eth dhe'n Gulf rag pareusi rag kas gans Irak. Awos hemma, dell hevel, yma omglywansow kreffa omma erbynn gwerrya pan vo chons hwath a gres.
Dy Yow 13/2/03: Kedhlow pella veu dyllys hedhyw dhiworth niverans a'n bobel 2001. Hwath nyns eus gorthyb dhe'n govynn: "pygemmys den a grys aga bos Kernowyon", mes yma derivadow pur dhe-les. Herwydh An Soedhva Rag Niverow Kenedhlek, rag an kynsa gweyth, yma moy es hanter milvil den yn Kernow. An brassa kressyans a boblans yma y'n ranndir Rostorrmoel. Martesen y hyllyn leverel bos henna rann 'Effeyth an Edenva'. Keffrys, dell hevel yma an boblans ow tos ha bos kottha hwath. An niverans kyns o 1991.Kembrek a dyv... An niverans ma a wovynnas orth Kembroyon pygemmys a wodhya po kewsel, po redya, po skrifa Kembrek. 28% a dus a-ugh 3 bloedh a verkyas onan po moy an sleynethow na. An niver a allsa kewsel, redya ha skrifa an yeth o 13.6% (1991) mes 16.3% (2001). 14% a leveris aga bos Kembrek.
Dy Yow 13/2/03: Y teuth an nowodhow hedhyw dhiworth Breten Vyghan bos an den synsys rag moldrans a vowes skol Gernewek, Caroline Dickinson, re amyttyas ev dh'y ladha. Spaynyer Fransisco Arce Montez veu synsys yn S.U.A ha dannvenys dhe Vreten Vyghan wosa apposyans D.N.A. Herwydh an bagas laghyl ow korra an kas dres an lysyow Breten Vyghanek, ev a ros dhedha an kedhlow. Byttegyns, Montez a leveris nag esa edhomm dhodho a'y ladha. Yth esa ev owth assaya dh'y hoselhe hag ev orth hy ravna. Dell hevel, ny wra an kas laghyl mos a-dherag lys lagha leun kyns es penn an vlydhen ma. Nyns esa lavar dhiworth tas Caroline hedhyw.
Dy Meurth 11/2/03: Yth esa own na via band Kernewek ow kesstriva yn rann veur an goel hevlyna awos fowt a arghans. Y'n gwella prys, henn re dreylyas. Lemmyn y fydh kesstriv synsys dhe'n Ostel West Meur dhe Dewynn Pleustri 2a mis Meurth dhe 8eur gorthugherweyth. Profyansow rag kanow a goedh bos dannvenys dhe Drev Lawrence dhe BBC Radyo Kernow kyns an 25ves mis Hwevrer. Hwath, y fydh an 'Droylloryon Melinji' ow mos dhe Gilkenni yn unn skoedhya Kernow y'n rannow ilow hengovek ha dons. Ni a glyw keffrys yma chons a weles Paul ha Paula Trevenna ena. Pub tra yw chanjys rag an gwella dell hevel. Meur ras dhe Anne Truscott-Kennedy neb a dhros dhymm an nowodhow da ma.
Dy Lun 10/2/03: 2002 o onan an gwella blydhynyow rag Kernow y'n kesstriv PanKeltek. 'Treys Noeth' eth dhe Iwerdhon gans aga han 'Tus an kastell' ha fetha pub bro arall. Byttegyns, ny vydh band Kernewek ow kesstriva y'n rann an goel na hevlyna awos fowt a arghans. Hwath, y fydh an 'Droylloryon Melinji' ow mos dhe Gilkenni a-barth Kernow y'n rannow ilow hengovek ha dons. Kernow PanKeltek re leveris bos hwans a gavoes arghans dhiworth Pirate FM rag skoedhya an kesstriv. Mes kales yw konvedhes hemma pan na wrug Pirate skoedhya an PanKeltek rag an dhiw vlydhen yw passys. Ni a glyw keffrys na vydh lywydh Kernow PanKeltek, Paul Trevenna, ow mos dhe'n hwarvos.
Dy Yow 6/2/03: Drefenn y vos sewen meur warlyna, an Goel Fylmow Kernow a vydh synsys yn blydhenyek may hyllyn diskwedhes an fylmow gwrys yn Kernow ha gans Kernowyon. An Goel 2002 veu synsys dhe Aberfal, ha dell wayt an ordenoryon, y fydh ow mos ena arta rag 2003. Warlyna, y feu moy es tri ugens fylm gwrys yn Kernow, dres henna, yth esa nebes ow kul meur a dros yn bys fylm. 'Hwerow Hweg' o a-vri awos bos fylm hir yn Kernewek, ha 'Cheap Rate Gravity' o fylm berr sci-fi. Kyns an goel hevlyna (13ves - 15ves mis Kevardhu) res vydh dhe'n ordenoryon kavoes lywydh rann-dermyn. Mar kyll'ta gweres, pellgews 01872 322886. Yma kedhlow pella der: www.cornwallfilmfestival.com
Dy Gwener 31/1/03: Dy Lun y fydh keskusulyans synsys dhe'n Hel Rag Kernow rag avisya an kas rag Senedh Kernow. Restrys yw unn mis kyns gorfenn a gusulyans governansek war an Paper Gwynn. An keskusulyans a wra klywes arethow dhiworth Andrew George, Andrew Climo Thompson ha Bert Biscoe (gwel skeusenn). Matthew Taylor a re areth der wydheo. Ev a dhegemmeras lyther dhiworth Nick Raynsford (menyster rag an ranndiryow) a-gynsow yn unn nagha gorholedh gwiryow Kernow. Byttegyns, Bert Biscoe re leveris nag yw ev ow leverel 'na' marnas nag yw an kas prevys hwath. Dy Lun a vydh chons da rag dasweles oll an poyntow a-barth an senedh. Kusulyans an Governans a dheu dh'y benn 3a mis Meurth.
Dy Mergher 29/1/03: Yth esa kestriv rag desinya krows Geltek rag merkya an entrans dhe Gernow dhe Essa. An piwas o gorra an gwaynyer dhe Garkeel. An gravyer neb a waynyas o Simon Thomas gans an grows diskwedhys y'n skeusenn. Kost an projekt a via �120,000 ha res o kavoes an arghans na kyns dalleth drehevel an gravyans. Y'n gwettha prys, kales o kavoes fentynnyow arghans rag an dowlenn ha kalessa hwath o kavoes kummyas drehevel dhiworth an konsel Karadon drefenn bos hwans dhedha gwitha an tir dewisys rag ledanheans an fordh A38. Hedhyw, y teuth an nowodhow bos an projekt gallas dhe goll. Lemmyn, kyn fia marthus splann gweles arwoedh Keltek a'n par ma orth yett Kernow, ny wren ni hy gweles awos dyfyk awen a soedhogyon, arghantiow ha kowethasow. Gwettha hwath, nyns yw an arwoedh 'Kernow' daskorrys war an A38 wosa an ober dhe dhaswul an Pons Tamer!

Koth 21