| Dy' Gwener 23/5/03: Bush bras a deylu ha kowetha a dheuth warbarth hedhyw yn Kernow Soth Est rag ynkleudhyans Privedh Andrew Kelly. Y deylu yw trigys yn Penntorr, mes ev a driga yn Tavistock. Ev o an 34ves souder dhe verwel y'n bresel Irak, ha dell hevel, an yowynkka. Skwattys veu gans pelyk tennys orto hag ev a-ji souderji yn Basra. Yma hwithrans ow pesya rag diskudha gwiryoneth a-dro dh'y vernans. Dy' Gwener 23/5/03: An diwettha rannow an lu neb o dannvenys dhe Irak a wra dehweles tre nessa seythun. Dy' Mergher, y fydh an gorhel askell-dro HMS Ocean ow tehweles dhe Borth Dewnans war Dhowr Tamer. Gensi y fydh diw worhel-skoedhya. HMS Ocean ha HMS Ark Royal a ledyas an lu Breten Veurek y'n Gulf. Ocean a gemmeras soudoryon Kernewek dhe Irak kyns i dhe omladha rag an sita Basra, an pennynys Al Faw, ha'n porth a-vri Umm Qasr. Dy' Meurth 20/5/03: De y teuth derivas dhiworth BA (Ayr Breten Veur) yn unn leverel i dhe gildenna dhiworth fordhow ayr ynter Gatwick (Loundres), Aberplymm, ha Tewynn Pleustri. Yth esa own dhe'n dus vras y'n bys negys bos koll kenwerthek meur wosa BA dhe asa. Hedhyw yth esa meur a geskows ynter bagasow dyvers. An gorthugher ma y teuth nowodhow da. Ayr Kembra a vynn kemmeres an fordhow ayr dhiworth BA wosa mis Hedra. An tollyow-nija dhe Gatwick re beu selwys gans BA rag Ayr Kembra bys y'n prys na. Byttegyns, hemma a dhre dhyn ombrederow arta yn kever studh a'gan system karryans dhe Gernow. Fatell ylli kowethasow oberi hebdho? Dy' Sadorn 17/5/03: Gwariys veu hedhyw hanter-finel a'n Gampyorieth Kontethek (!) Rugbi ynter Kernow ha Lancashire. Kynth esa Kernow ow ledya y'n kynsa rann 8-3, Lancashire a ledyas y'n nessa rann ha gwaynya an fit 13 - 23. Dell hevelis yth esa an breusyas ow preusi erbynn Kernow yn fenowgh pan o res a gartenn velyn erbynn Lancashire. Byttegyns, res yw leverel bos nessa rann an fit gwariys yn teg y'n brassa rann. Dy' Sadorn 17/5/03: Towlenn re beu devisys rag ri derivadow a-dro dhe Dewynnow Pennhal dhe skolyow, tornysi ha tus leel. Unn soedhek a wra gonis gans an huni ma yn unn dyski an istori ha bri naturek. Tyller a-vri Skiantek yw ha le may teuth Sen Pyran yn kynsa pan dheuth dhe Gernow. Hwath yma yn-dann an tewynnow y oratri. Nyns on ni sur y'n eur ma mar pydh an soedhek owth oberi gans an Dowlenn Sen Pyran. An bagas na a garsa angudha an oratri ha'y dhiskwedhes dhe'n bobell. Dy' Yow 15/5/03: An seythun ma, synsys veu 'Lowender Kernewek' yn Ostrali Soth. An hwarvos ma yw restrys pub diw vlydhen war an Pennynys Evrog. Avisys yw a-vel an brassa goel Kernewek y'n bys, ha gwir yw leverel bos milyow a dus ow mos di. Hevlyna, Kur Kernow eth dhe gana dhe'n Lowender, keffrys ha'n Bardh Meur, John Bolitho. Yma istori Kernewek Krev war an pennynys drefenn Kernowyon dhe vos ena nans yw termyn hir dhe waynya kober. Hwath y hwelir jynnjiow Kernewek a-dro dhe'n teyr thre Hernewek. Moonta, Kadina ha Wallaroo yw trevow Kernewek dre vras, hag ynna y kevir gwerthjiow pasti ha henwyn Kernewek yn pub sorn. Dy Sadorn 10/5/03: Yma para rugbi Kernow war an fordh dhe Twickenham yn-hwir wosa fedha konteth Sussex dhe Bons Pollsen hedhyw. An diwettha skor o 57 poynt dhe 10. An fit na o an kwarter finel. Nessa dy' Sadorn y fydh Lancashire ow tos dhe Gernow rag an hanter-finel. Gwari a wrons an fit na dhe Rysrudh. Heb mar y fydh Lu Trelawni ena yn bush krev rag skoedhya agan para. Ny vydh fit hevlyna erbynn Dewnans drefenn i dhe gelli hedhyw erbynn Gloucestershire 32 poynt dhe 25. Dy Yow 8/5/03: Herwydh gnas hengovek a'n dre Hellys, synsys veu hedhyw hwarvosow a'n Jydh Feri. Tus an dre a dhonsyas a-ji hag yn-mes an chiow, a-dro dhe'n stretow, ha dres an jydh. Howlek ha lowen o, byttegyns hwath gans kov an tristys neb a skwattyas Hellys nans yw nebes seythunyow pan verwis seyth den dhiworth RNAS Kilros yn droglamm askell-dro yn Irak. Dy Mergher 7/5/03: Pryns Charlys a dheuth dhe Gernow hedhyw hag igeri an Gresenn Howldrehevel dhe Glavji Trelysk yn Truru. An gresenn nowydh veu prenys gans gweres arghansek a woslowysi Radyo Kernow. Ena, Charlys eth di dhe Lowarthow Treleysek. Ev a gemmeras tro privedh a-dro dhe'n lowarthow yn unn omlowenhe y hobi y honan. Dy' Lun 5/5/03: Warlyna yth esa gormeulans bras rag ASDA drefenn i dhe wul arwoedhyow diwyethek y'n worvarghas. Byttegyns, lemmyn wosa i dhe gavoes lowr a gudhans y'n wask, an awroedhyow re beu kemmerys dhe-ves. Apert yw lemmyn, nyns o hemma marnas 'lamm-PR' rag ASDA. Res yw dhyn perthi kov i dhe gavoes lies erthygel y'n paperow nowodhow a-dro dhe Vreten Veur. I re gemmeras dhe-ves an arwoedh diskwedhys y'n skeusenn ma, ha'n arwoedh 'dynnargh' keffrys yn-mes an worvarghas hy honan. Gwir via leverel an taves dhe waynya meur a gudhans y'n wask ynwedh, mes y koedh dhyn ni govynn orth rewloryon ASDA, prag yth ens mar vas y'ga thybyansow. Nyns esens i ow kul hemma rag skila vydh marnas kenwerth. Ytho, piw a garsa agan usya lemmyn rag kavoes hwedhlow y'n wask? Dy' Sul 4/5/03: Yma Kernow war an fordh dhe Twickenham wosa an fit rygbi de erbynn Berkshire. An konteth Sowsnek a gollas 59 - 0 yn kynsa rann a'n seson nowydh. Nessa dy' Sadorn, y fydh Kernow ow kwari arta erbynn Sussex. Dy' Sul 4/5/03: Pennseythun Gernewek rag dallethoryon ha studhoryon ynter 7ves ha 9ves mis Du. Y fydh synsys yn chi gobrenys yn Porthia. Ken Pennseythun Gernewek rag tus avonsys a vydh synsys dhe Bask 2004. Dy'Sadorn 3/5/03: De y teuth nowodhow tewl dh'y weythysi dhe Gompair Holman yn Kammbronn. Derivys veu dhedha bos tenkys an weythva ansertan. Martesen y fydh an negys ow tegea yn Kernow awos kudynnow war varghasow a'n bys. Gans an nowodhow na, an weythysi (184 anedha) veu dannvenys tre rag an jydh. 2001 o 200ves pennbloedh an kowethas yn Kammbronn, hag yth esa arghans nowydh gorrys ynno gans govenek bos an weythva salow rag termyn hir. Lemmyn yma pub tra ow kregi y'n ayr. An jynnow gwrys gans Compair yw devnydhys yn hwelyow a-hys an bys rag gweythya daffar y'n balyow. Wosa Kroftdi Dheghow dhe dhegea nans yw pymp blydhen, Compair o an brassa negys gesys yn Kernow gans kevrennow dhe'n diwysygneth balya. Dell glywyn, yma esel an senedh Westminster, Candy Atherton ow keskewsel dhe'n kowethas yn unn assaya selwel oberow. Dy' Lun 28/4/03: Hedhyw y teuth moy derivadow a-dro dhe sewen Kernow dhe'n Goel PanKeltek yn Iwerdhon. Kernow a waynyas gans kan "Mar mynn'ta sywya", kenys gans Treys Noeth. Kernow a worras Kembra dhe nessa le. Res yw dhyn perthi kov bos meur a nerth gorrys y'n kesstriv yn Kembra der radyo ha pellwolok S4C. An piwas rag an rannow Kembrek yw £10,000. Ytho, rag Kernow dhe waynya... trygh bras yw. Yth esa piwasow erell rag Kernow hevlyna yn Iwerdhon. Adrian Evans a waynyas kynsa le y'n kesstriv krowda, ha'n Droylloryon Melinji a gavas nessa le y'n kesstriv donsya hengovek. Ytho, y karsen ni dhe Nowodhow Kernow leverel 'gwrys yn-ta' bras dhe oll an dus neb a oberis yn feur hevlyna rag Kernow PanKeltek. Dy' Lun 21/4/03: Warlyna yth esa Treys Noeth ow kana a-barth Kernow dhe'n kesstriv PanKeltek yn Iwerdhon gans an gan 'Tus an kastell', hevlyna ymons i ena arta ragon gans kan nowydh henwys 'Mar mynn'ta sywya.' Bagas byghan dhiworth Kernow res eth dhe'n Goel PanKeltek yn Kilkenni. Y'ga mysk yma nebes eseli an bagas ilow Kernewek hengovek 'Troylloryon Melinji'. Termyn da yw lemmyn leverel bos tybyans da rag ilewydhyon prederi yn kever skrifa kan rag 2004. Mars eus kan a ylli gwaynya nessa blydhen, kestav orth Anne Truscott-Kennedy. Dy' Lun 21/4/03: Awos seythun leun a howlsplann hag own yn kever nija tramor ha gwerrya ow pesya yn Irak, dell grys rewloryon an diwysygneth tornyaseth Kernewek, ni re welas Pask bras. An fordhow ow tos a-ji Kernow ow fest bysi myttin Gwener ha dell grysons, y fydhons bysi arta an dohajydh ma. Res yw dhyn gortos lemmyn rag an niverow tornysi soedhogyl. Dy' Sadorn 19/4/03: An kynsa souder Breten Veurek dhe vos ledhys yn kas yn Irak o Kernow, Sarjent Steven Roberts. Hedhyw yma govynnow mar pe hornwysk ewn ros dhodho ha mars esa ev ow kwiska hornwysk war y dhiwvronn. An souder a wre triga yn Ponsrys veu tennys yn gustel yn Basra. An hwithrans ma a dhre dhyn arta govynnow erell kyns an bresel kepar ha: o agan soudoryon parys lowr? Ni a glywas kyns nag esa lowr a voes dhedha hag a-dro dhe gudynnow gans botassow ha gonnys. Dy Mergher 16/4/03: Arghas pur vras re beu kellys hedhyw neb a weressa dri gwrioryon fylm dhe Gernow. Yth esa unn milvil peuns yn nessa rann an arghas a-barth an Arghas Fylm Kernewek, byttegyns y teuth an nowodhow hedhyw ny via henna ow tos dhyn. Awos hemma, an projekt a ylli degea erbynn penn an vlydhen heb moy arghans. Lywydh an Arghas, Colin Rogers, re leveris bos an nowodhow ma pur drist drefenn bos marthys da rag avisya agan pow. Kynth esa hemma derivys hedhyw, hwath yma'n dowlenn rag drehevel studhyo fylm ha pellwolok nowydh dhe Vreanek ow mos yn-rag yn ta. An kompleks ma yw gelwys 'Aggiewood' gans pobell an ranndir, yn unn waytya bos meur a negys ow tos dhiworth askorroryon a-vri, kepar dell welir yn 'Hollywood'. Keffrys ha henna, hwath yma bagasow pellwolok ow tos omma rag gul towlennow drama. Warlyna, an fylm a'n brassa fylmys yn Kernow o James Bond 'Die another day' (Merwel ken dydh). Dy' Sul 13/4/03: Dornskrifow kellys rag termyn hir re beu daskevys ha re splannas golow nowydh war an govynn: piw a dhiskudhas an planet Neptun: Kernow po Frynk? An planet veu kevys 23ves mis Gwynngala 1846 gans Urbain Jean-Joseph Le Verrier. Byttegyns, Breten Veur a grys bos Neptun diskudhys gans Kernow John Couch Adams. Ev a dhismygas le mayth esa an planet der awgrym 1845. Byttegyns, herwydh istorioryon, an argyans bos an diskudhans gwrys gans an den dhiworth Lannstefan, yw kamm drefenn bos paperow ow tiskwedhes bos an argyans ma gwrys dre wow wosa an diskudhans Frynkek. Heb mar an dhadhel ma a wra besya rag termyn hir. Dy' Yow 10/4/03: Res yw dhe'n bagasow Kernewek dewis peswar den dhe formya bagas rag kemmeres an taves war-rag. An ervirans ma veu gwrys dhe guntelles yn Truru y'n mis yw passys. Res yw bos an bagas a beswar profys erbynn dy' Gwener an Grows. Yma Kowethas an Yeth Kernewek ow prederi a-dro dhe brofya Davydh Hicks a-vel kannas an Kowethas. Hemm yw movyans war-rag a-barth an yeth drefenn bos chons a weles taklow ow hwarvos y'n termyn a dheu. An kuntelles dhe Hel Kernow veu synsys 26ves mis Meurth gans Kslr John Lobb y'n gader. Piw esa ena?: John Bolitho (Gorsedh); Jori Ansell (Buro Europek rag Yethow Nebes Kewsys); Andrew Climo-Thomson (Agan Tavas); Maureen Pierce (Kesva an Taves Kernewek); Jane Ninnis (Kowethas an Yeth Kernewek); Bernard Deacon (Cossel an Tavas Kernuack); Phil Rendle ( Dalva); Tony Steele (Governans an Soth West); John Lobb (kaderyer); Doris Ansari (Dyskans dre Vywnans); Howard Roberts (Ertaj ha Kerghynnieth); Bert Biscoe (Skoedhyans Negys); Geoff Aver (Lywydh Ardhyskans); Geoff Grigg (Kusulyor Yeth); Jenefer Lowe ( Soedhek Artow); John Sawle (Pennsoedhva); Neil Plummer (heb galow) |
| Koth 22 |