koth23

Kovskrifenn 23

Dy' Gwener 11/7/03: Kynth eus meur a galetter yn unn gavoes skoedhyans an BBC rag an gonisogieth Kernewek, dell hevel, yma an Kortyb ow kwevya an baner nowydh Dewnans. Dewisys o an baner wosa kaskyrgh kevarwoedhys gans an BBC. Lemmyn, i a vynn y worra war aga drehevyansow ha gul towlenn bellwolok yn y gever. Nebes tus re leveris bos hemma assayans is-balya gonisogieth Kernow, dre leverel bos Dewnans Keltek keffrys. Nowodhow Kernow a glyw keffrys bos bagas yn Dewnans owth assaya kavoes an konteth Sowsnek degemmerys avel bro Geltek.
Dy' Sadorn 5/7/03: Maw, hwetek bloedh y oes, re omdhiskwedhas a-dherag justisyow Bosvenegh yn-dann jarj moldra babi, naw mis y oes. Ev a veu remandys yn-dann with. Den, diw vloedh warn ugens y oes a omdhiskwedhas keffrys. Charjys yw Michael Craig Phillips, dhiworth Pelynt gans ABH (meschyf gwir an korf) ha pertvertya an fordh laghyl. An babi, Harley Rogers, veu kevys gans y vamm yn y ji yn Park Buller yn Essa. An moldrans a hwarveu mis Kevardhu warlyna.
Dy Gwener 4/7/03: An lyver-termyn 'Bys Kernowyon' a veu dallethys nans yw deg blydhen gans Phil Hosken. Ev a vynna dri dhe Gernow magasin may hallo gul bri agan gonisogieth. Wosa nebes blydhynyow orth an lyw, Phil a dhibarthas ha gasa an lyver-termyn dhe Dhiwysygnethow Penntreth. Lemmyn, yma pennskrifer nowydh, Nigel Pengelly (gwel an skeusenn). Ev a vynn kemmeres an magasin war-rag ha displegya an 'glossi' ma. Bys Kernowyon yw kevrenn a-vri rag kemmyniethow Kernewek a-hys an bys. Pur a-vri yw rag dri nowodhow a hwarvosow kepar ha 'Dehwelans' dhe dus yn tylleryow kepar ha Ostrali, Mordir Nowydh, SUA hag Afrika Soth. Yma govenek dhyn bos sewen fest pennskriforeth Nigel Pengelly.
Dy Gwener 4/7/03: Hedhyw y fydh hwithrans yn hen ankow yn Loundres ow mires orth mernans Marc Gajardo dhiworth Goenyow Karnon ogas dhe Druru. An mordardher, deg bloedh warn ugens y oes, a verwis yn klub nos war an ynys Yndonysyek warlyna gans hwegh Breten-Veur warn ugens erell. Ledhys ens gans tanbellen gesys ena gans browaghysi. An hwithrans hedhyw yn Hammersmith a vir orth ankow a etek den. Heb dhout, y fydh moy govynnow govynnys es govynnow gorthybys, byttegyns, chons yw rag an teyluyow dhe ri aga hwedhlow ha klywes dhiworth an bagasow erell kepar ha kreslu ha'n Soedhva Estrennyek Breten-Veur. Ha hemma ow hwarvos, yma'n kas laghyl erbynn nebes an vrowaghysi ow pesya yn Yndonysya.
Dy' Lun 30/6/03: Wosa John Prescott dhe dhyllo an dowlenn rag votya rag senedhow yn Pow Sows gogledh, yma ev ow tasleverel na vydh senedh rag Kernow. Awos an nagh ma, yma'n kaskyrgh ow krevhe rag Senedh Kernow. Dell glyw Nowodhow Kernow, kyns es hir, y fydh kas laghyl lanchys rag skoedhya agan kas. Martesen y fydh selys war agan gwiryow mabdenek neb yw sel lagha Europek, ha drefenn bos hanter kans mil den ow leverel bos hwans dhedha a votya war an mater. Pypynag a vo, y fydh bresel kales ha hir a-dheragon ni awos bos Lavur ow kortos ryb aga folisi.
Dy' Gwener 20/6/03: Dyllys veu Furv-Dowlenn Karadon hedhyw gans niverow euthek bras ynni rag chiow nowydh. An konsel re gavas spas rag 2250 chi nowydh, parkow negys ha tir gwari. Res o dhedha kavoes an spas ma drefenn bos gwasketh warnedha dhiworth governans Breten Veur. I a vynn orth ranndiryow tewlel bys y'n vlydhen 2016. Brassa rann an chiow tewlys gans Karadon a vydh drehevys dhe Lyskerrys ha Kelliwyk. Hwegh kans anedha a vydh gorrys dhe Drevekka, ha peswar kans dhe Lannvelyon (Bre an Loja). Kaderyores tewlel rag an konsel, Cath Pascoe a leveris bos krodhvolansow ow tos dhiworth tus a'n kyrghynn, ha konsler an dre, Pawl Dunbar a leveris bos res dhe bubhuni sevel erbynn an towlennow. Lemmyn yma chons rag gorthybow dhiworth an bobell, byttegyns res yw dhedha aga dannvon erbynn 1a mis Est 2003.
Dy' Lun 16/6/03: Hedhyw y teuth nowodhow bos teyr ranndir yn Pow Sows gogledh dewisys gans is-pennmenyster John Prescott rag synsi vot war senedhow ranndirek. Byttegyns, hwath ny welyn travydh a-dro dhe senedh Kernow. Awos henna, eseli an senedh Westminster rag Porthia: Andrew George, ha Truru ha Sen Ostell: Matthew Taylor, a dhellos galow rag senedh rag Kernow hy honan. Dy' Yow y fydh bagas a fleghes ow mos dhe 10 Downing Street yn Loundres gans Matthew Taylor yn unn dhervynn vot omma. Res vydh dhe'n gaskyrghoryon treylya polisi an governans Lavur yn tien rag kavoes hemma. John Prescott re ambosas y barti dhe Senedh an 'Soth West'. Heb mar, an mappa politek a wra treylya yn blydhynyow ow tos ha martesen savboynt an governans a ylli treylya keffrys. Unn dra neb a allsa chanjya kyns es hir yw ranndiryow votya Kernow. Y'n eur ma, yma pymp esel an senedh Westminster y'n Ducheth. An Kessedhek Oryon a garsa ri dhyn hwegh esel. Unn esel rag pub konteth Kernewek. Martesen a brassa treylyans a via gwelys yn Kerrier, Truru ha Sen Ostell.
Dy' Yow 12/6/03: Nyhewer, konseloryon-dewlel Rostorrmoel a ros kummyas dhe'n tressa biom dhe'n Edenva, ha tornyasva 'plush' dhe Garynys (Carlyon Bay). An kuntelles hir a glywas dhiworth lies den an kyrghynn neb a grodhvolas erbynn moy kerri ha ombrederow glas erell. Byttegyns, wosa disputya an destenn, an gonseloryon a ros aga hummyas. Lemmyn, ober a yll mos war-rag yn unn dhehevel dhe'n Edenva rag an Biom Tropek Sygh ha drehevyansow nowydh erell. An keth kuntelles a ros kummyas dhe Ampersand Ltd dhe dhistrui an Coliseum Kernow, ha drehevel rannjiow rag tornysi gans poll, gwerthjiow ha kresenn sport. Kost an projekt a vydh Ł100 milvil mes dell grys erbysogyon, y fydh nerthji nowydh rag erbys Kernow ha Sen Ostell. Byttegyns, res yw dhe Ampersand sortya an kudynnow gans oll an kerri ha kaletter gans livow.
Dy' Mergher 11/6/03: Rag an nessa blydhen warbarth, yma'n paloresigow yn unn dhyski nija dhiworth aga neyth war an alsyow Kernewek. An teylu yw trigys war arvor an Lysardh. Teyr falores yowynk yma, ha'n RSPB a lever bos hemma prevyans da bos an dowlenn-witha an ydhyn ma erbynn ladron oyow yw sewenek. Pan veu diskudhys bos an teylu a baloresow ena, tri ugens gwithyas a dhifresas an neyth erbynn drogoberoryon. Lemmyn, ymons i ow kul kerdhow kevarwoedhys dhe'n tyller may hallo an poblek gweles an marthusi ma. Byttegyns, re a-varr yw leverel bos an sort a edhen ma salow rag an termyn a-dheu. Res yw dhe karoryon ydhyn aga gwitha rag lies blydhen hwath.
Dy' Gwener 6/6/03: Kynth esa moy termyn res dhe berghennoryon Kroftdi Dheghow rag dasigeri an bal, dell hevel, yma movyansow dhiworth CPR Regeneration ha Konsel Kerrier neb a garsa prena tir an hwel dhiworth Baseresult. Ni a welas a-varra y'n seythun ma bos an kethsem kowethas gans hwans a dreylya Shafta Robinson dhe gresenn ertaj balya, mes heb mar, ymons i ow prederi a-dro dhe Groftdi hy honan ynwedh. CPR re wovynnas orth Kerrier dhe hwithra perghennoryon a dir a-dro dhe Gammbronn, Poll ha Rysrudh rag may hallons dalleth movyansow laghyl rag prena splattys yn-dann dowlenn prena-konstrynys. Ni a woer bos tybyans y'ga brys a dhrehevel moy gweythvaow ha lies krow-negys bras ena, keffrys ha chiow nowydh. Byttegyns, yma Kroftdi Dheghow yn kres an tir, ha neppyth a wra aga thowlennow stag.
Dy' Gwener 6/6/03: Sedhores-rydh dhiworth Porthleven, Hannah Stacey, re dhehwelas dhiworth kamporieth an bys rag sedha-rydh yn Kobros, gans rekord nowydh Breten-Veurek ha le-nessa, po piwas arghansek, y'n kesstriv rag benynes. An venyn, 26 bloedh hy oes, yw lennores-nowodhow der Pirate FM. Y'n sport sedha-rydh, res yw dhe Hannah sedha yn-dann an dowr, mar dhown may hallo, heb dhevnydhya daffar-anella. (Notenn: Kobros = Cyprus)
Dy' Mergher 4/6/03: Yma kowethas henwys 'CPR Regeneration' ow hwilas tyller gwiw rag drehevel kresenn ertaj rag an diwysygneth balya Kernewek. Dell glywyn, an gwella tyller ganso yw Shafta Robinson yn Poll. An shafta ma o rann a Groftdi Dheghow. Hwath y hwelir ena an jynnji, pennframm, jynn ha drehevyansow an bal. Nyns yw apert y'n eur ma, py par a gresenn a vydh gwrys ena. Orth tu arall an fordh yma Kroftdi hy honan, hwath deges mes yn-dann rewl 'Baseresult' neb a lever dhyn bos hwans dhe dhasigeri an bal. Skant ny yllir kavoes tus a grys bos henna gwir.
Dy' Lun 2/6/03: Yma gwithysi kres ow synsi den yn unn wovynn orto a-dro dhe vernans benyn war an alsyow dhe Dewynn Pleustri de. An venyn, 28 bloedh hy oes a goedhas war-woeles an alsyow ogas dhe Fordh Danek. Kyns hy mernans, yth esa hi trigys yn tylda orth penn an alsyow. An kreslu re settyas dalghenn war unn den 34 bloedh y oes.
Dy' Mergher 28/5/03: Yth esa baneryow Kernewek gweyvys hedhyw yn unn dhynnerghi dhe'n soudoryon war HMS Ocean. An gorhel a dheuth tre dhe Borth Dewnans wosa omladha erbynn Irak. Tus a viras orth an dehwelans dhiworth an dhiw lann Tamer.
Dy' Meurth 27/5/03: Russell Winter ha Tracy Boxall yw diskwedhys y'n skeusennow ma wosa gwaynya an kesstriv Headworx (rag an bord-hir) ha Voodoo Dolls (rag an benynes). An gampyorieth ma veu synsys dhe dreth Fystral dhe Dewynn Pleustri.
Dy' Sadorn 24/5/03: Unn den, 21 bloedh y oes, re verwis an myttin ma yn droglamm war an fordh ynter Bosvenegh ha Tewynn Pleustri. Yth esa an tyller poran dhe Vre Skeus ynter Sen Kolomm ha Sen Kolomm Veur war an A 3059. Karr-klavji a skwattyas erbynn karr-tan nebes wosa teyr eur myttinweyth. Dew dhen yn karr-klavji ha peswar den dhiworth an karr-tan veu kemmerys dhe glavji Trelysk yn Truru gans shyndyansow. An den neb a verwis a driga yn Kernow Kledh. An Gonis Karr-Klavji an 'Pow West' (sic) re dhallathas hwithrans rag kavoes skila rag an droglamm. Hanow an den marow nyns yw dyllys hwath.