koth24

Koth 24

Dy' Meurth 26/8/03: Yma an governans ow mos dhe Ewrop yn unn dhervyn rag rewlys nowydh rag agan pyskadoryon. Y'n eur ma ymons i ow tewlel y'n mor rann vras an morvenegh drefenn bos aga kwota treghys yn feur. Byttegyns herwydh aga lavar, yma moy morvenegh y'n mor es nevra kyns y'n bys. Ha dres henna yma'n Spaynyers ow kachya gans kwota brassa. Dell hevel dhe'n byskadoryon yn Lulynn, mar na wrons i gwaynya an kas ma erbynn Ewrop, y fydh meur a dus ow kelli aga soedh. Henn a via euthek rag Lulynn drefenn bos a-dro dhe seyth kans teylu y'n dre na ow kregi war an negys pyskessa. An kas ma yw skoedhys gans perghenn kokkow 'Stevenson ha mab' keffrys hag esel an senedh Westminster rag Porthia, Andrew George.
Dy' Sul 24/08/03: Tornyas a verwis de hag ev ow hwilas y fleghes y'n mor dhe Wodrevi. An den dhiworth Nottingham o 40 bloedh hag a neuvyas dhiworth an treth kynth esa banerow rudh ow kwevya. Dalghennys veu gans skward-tid. Gwithysi-treth a assayas y dhasvywa gans anella ganow-ha-ganow. Dell hevelis, y fleghes o salow ha gwari yn pollow karrygi.
Dy' Sul 24/0803: Krowder Kernewek Mike O'Connor re dhellos sidi nowydh leun a ilow hengovek dhiworth Kernow. An pyth ye moyha a vri yw bos an tonyow kellys kyns es Mike dhe'ga diskudha. Der y blasenn arghansek nowydh 'Kovath' yma tonyow kevys dhiworth kovath John Giddy ha John Old. Mike O' Connor (hanow bardhek: Crowder) re sonskrifas an ober ma dre dhevnydhya krowd, karjel ha daffar ilow erell. Y prenir an sidi ma dhiworth Kesson. Kesson yw gwiasva may hyllir kavoes ynni ilow Kernewek a bub sort: gwerin; rokk; kan; dons
Dy' Meurth 19/8/03: Wosa kaskyrgh hir yn unn dhervynn glannheans a Lannsekoeg, an obereth a dhallathas hedhyw. An tyller dhe RAF Porthtreth ogas dhe Rysrudh o gweythva arvow kymyk dres Nessa Bresel an Bys. Rag termyn hir an governans a withas kedhlow a-dro dhe'n tyller yn-dan gel, byttegyns yma ow tos ha bos moy igor lemmyn. An projekt ma a wra durya rag lies blydhen hag i ow kemmeres dhe-ves atal dyantell dhiworth shaftow koth. Mes an govynn yw, pandra wrons i gans an tir wosa bos glannhes? Nyns yw ayrva na fella. A vydh gesys a-vel tir rag an bobell may hallo pubonan kerdhes warnedhi? Yma an nowodhow na y'n termyn a-dheu dell grysyn.
Dy' Sadorn 16/8/03: Dell skrif Deborah Bennetts...An niver a brofyansow rag kesstrivyansow an Orsedh hevlena re beu pur dha – an 75ves pennbloedh a-ban veu fundys an Orsedh Kernow - gans lies hwithrans rag lyfrigow dhiworth an wiasva Gorsedh Kernow. Awos henna, yth esa niver brassa a brofyansow dhiworth tramor. Profyansow tus a oes re ynkressyas hevlena hag yth o meur an reward dhe weles profyansow dhiworth skolyow Kernewek – nebes anedha re omdremenys – ha skoedhya an kesstrivyansow heb lett, kyns oll, Skolyow Pennsylva, Richard Lander, Nankersey, Egloskrowan, Krows Trewartha, Sen Mewan ha Gwith gans Brunel owth ombrofya an kynsa tro. Liwyans, Bardhonyeth ha hwedhlow berr yw meurgerys gans profyansow dhe skolyow, mes, yth esa unn skol yn unik Skol Elvennek Kemmynieth Sen Mewan gans 70 profyans rag an klas “Studhyans a Destenn Gernewek yn-dann 11 bloedh” - klas ny wrug skolyow profya rag nebes blydhynnyow - agan kolonn a re gans henna. Hannah Rothero – neb a wrug omwel gans hy mammwynn - a dhendilas kynsa le gans hy skrif “Mammwynn a-dro dhe Vammwynn”. Ynwedh, Christopher Bennett neb a waynyas kynsa le y`n klas ober ilow 11-18 bloedh - arta kynsa le a dal y dhendil. Profyansow an Yeth Kernewek rag yeth plen ha bardhonyeth re beu pur dha, gans an piwas ughella gwaynys gans Bardh, y hanow a vydh derivys dres an solempnyta an Orsedh dhe Gastell Lannstefan dy' Sadorn an 6ves a vis Gwynngala. An tekst leun der Warlinenn
Dy' Yow 6/8/03: An gorthugher ma der bellwolok byw, dewisys veu an dhyskyblon neb a wra studhya kreftweythyow kana ha performya a-ji an 'Fame Academy'. Kernowes veu dewisys yn mysk an trydhek den erell. Hi o Alex Parks. An vowes yw 19 bloedh ha trigys dhe Venydh Hokk ogas dhe Druru. Hi a ganas 'Beautiful' (kan Christina Aguilera) ha degemmeres gormeul bras dhiworth an dhyskadoryon ha'n virysi. Lemmyn, res yw dhedhi ombrevi hag assaya gwaynya an kevambos sonskrifa. An kethsem piwas ma veu gwaynys warlyna gans David Sneddon.
Dy' Sul 3/8/03: Dew vil hag onan o an kynsa gweyth may feu synsys Dehwelans. Pyth o an darvos ma? Chons o rag Kernowyon a-hys an bys dhe dhehweles dhe Gernow. An tyller rag 2001 o Dinas Aberfal. Lies huni a dheuth dhe weles Kernow, bro aga hendasow, byttegyns y'n jydh hedhyw. Dell hevel, Dehwelans 2004 a vydh brassa hwath wosa Amkan Onan dhe ri Ł95 mil peuns an seythun ma dhe'n projekt, ha dewisi soedhek dhe bareusi an darvos. Y fydh synsys 28ves mis Ebryll 2004 bys yn 3a mis Me 2004. Mars eus hwans a leverel bos les dhis mones di, mir orth www.dehwelans.com.
Dy' Sadorn 2/8/03: Colin Ellis (Mab Elmet) a verwis de, 31/7/03, 73 bloedh y oes, wosa kleves kanker. Y fydh solemptyans 'humanist' (na eglosek) orth Chapel Trelawney, Loskva Penmount, Truro dy Gwener 8ves orth 11am. Mar mynn tus leverel neppyth orth an solemptyans, gwra pellgewsel orth Mary 01726 882500. Nyns eus hwans rag bleujennow mes arghans a yll bos ros dhe MacMillan Cancer Care. Colin re skoedhyas lies kowethas Kernewek dres an blydhynyow hag o esel Kowethas an Yeth Kernewek. Ev eth dhe'n Orsedh pub blydhen a-vel gwithyas an Orsedh. Yma agan prederow kuv gans y wreg Mary orth an prys druan ma.
Dy' Yow 31/7/03: An governans re ros kummyas may hyllyn devnydhya an arwoedh gell nowydh a-ji Kernow. Synsys veu kesstriv rag desinya arwoedh nowydh wosa blydhynyow a arwoedhyow fordh peyntys gans nammow du y'n le mayth esa rosenn Sowsnek. Leanne Howarth a dhesinyas baner Sen Pyran sempel (gwel an skeusenn). Lemmyn yma kummyas dh'y usya, byttegyns hwath, res yw dhe berghennoryon kresennow tornysi aga erghi rag aga arwoedhyow i. Ni a'gan beus govenek bos skoedhyans meur a-hys Kernow dhiworth negysyow. Dy' Yow 31/7/03: Yma kaskyrgh owth ynkressya rag kavoes arwoedhyow diwyethek yn Konteth Karadon. I re naghas an tybyans kyns wosa an tanlu dhe leverel bos arwoedhyow gans Sowsnek ha Kernewek warnedha pur gomplek. Mars eus tybyans dhis a-dro dhe'n destenn ma, dannvon e-bost dhe Jerry Masters dhe Garadon.
Dy'Sadorn 26/7/03: Kaskyrgher Bosvenegh rag gwiryow sosiel yn Kernow re lanchyas y hwithrans rag skoedhyans arghansek may hallo kemmeres dhe'n Lys Lagha Konsel Kernow. Yma dhe John Angarrek dew flogh yn skolyow leel. Res veu govenek dhedha ha dhe bub flogh-skol y'n Ducheth. Serrys o na wrug an form ri dhedha chons aswonn aga ertach Kernewek. Lemmyn, yma ev owth usya hemma avel sel rag gwrians laghyl yn-dann an 'Race Relations Act 1976', ha dredho ev a garsa gul challenj dhe savla an bobell Gernewek. Yth esa deg den ha tri ugens orth kuntelles nos Wener y'n Hel Rag Kernow. Mr Angarrek a wovynnas orta dhe worra aga diwla y'ga fokketys yn unn skoedhya an kas laghyl. Res yw dhodho y lanchya kyns kres mis Gwynngala. Bys y'n eur ma, dell lever ev, ev re gavas degyow a vilyow peuns. Byttegyns, res yw dhodho kavoes hanter milvil peuns mar mynno kemmeres an kas a-hys an fordh dhe Europ. Skoedhys yw kaskyrgh an gwerther Bosvenegh ma gans kerens erell, konseloryon, an Ombudsman a Wovernans Leel, Paul Tyler MP hag unn den lagha. Dell grys John Angarrek, mar kyll ev kavoes skoedhyans arghansek lowr, pobell Kernow a ylli dos ha bos aswonnys yn laghyl. Ev a grys bos hemma a-vri dhedha ha dhe'n ertach.
Dy'Sadorn 26/7/03: Yma sportydhyon Gernewek ow tehweles tre an bennseythun ma wosa kesstriva y'n Goel Sportys Dowr Keskeltek. Synsys veu yn Breten Vyghan, ha'n ost a gemmeras kynsa le. Nessa le eth dhe Gembra. Tressa le eth dhe Bortyngal Gogledh, ha peswara le eth dhe Gernow. Yth esa Galythi Iwerdhon, Alban hag Ynys Manow ow kesstriva y'n goel keffrys.
Dy' Yow 24/7/03: Kowethas ayr nowydh veu lanchys hedhyw rag lenwel an tell-nija gesys gans BA wosa ev dhe gildenna dhiworth an hyns dhe Gatwick yn Pow Sows. Y fydh owth usya dew ayrenn Dash-8 orth an dalleth, ha kressya wosa henna. An gonis a dhalleth 26ves mis Hedra, an jydh wosa BA dhe gildenna. Tus negys re leveris bos hemma selwyans bras rag kowethasow a-hys an Ducheth. Perghenn Ayr Soth-West yw Sutton Harbour Holdings, trigys yn Aberplymm.
Dy'Mergher 23/7/03: Yma bagas ow kemmeres Konsel Kernow dhe'n lys lagha yn unn assaya breus an lagha a-dro dhe wiryow Kernewek. Y teuth an gwrians laghyl ma dhiworth niverans a fleghes skol neb a naghas aga gwiryow leverel aga bos Kernowyon. An bagas yw kevarwoedhys gans John Angarrack a Vosvenegh. Ev re spenas termyn gans an Mirgi Governans Leel, tus lagha hag esel an senedh Westminster rag Kernow Kledh yn unn dhrehevel an kas ma. Ymons i war boynt a dhiskwedhes aga thowl dhe'n bys. Y fydh an jydh istorek ma dy' Gwener. Yn-medh John Angarrack, "Y'n le a worthybi orthyn po diharasa ha profya ewnhe an fowt, an konsel re leveris bos a-ji y nerth dhe vreusi erbynn an Gernowyon."
Dy' Sadorn 19/7/03: Dallethvos yw hedhyw an Goel Sportys Dowr KesKeltek. Hevlyna, synsys yw yn Breten Veur dhe Gammas An Orient. Pub blydhen yma ogas hag unn milvil den ow kesstriva y'n hwarvos. An sportys ena a vydh kayaka, mordardha-gwyns, ha revya. Homm yw an nawves blydhen mayth yw synsys an goel ma. Nans yw nebes blydhynyow, yth esa dhe Borthbud. Y fydh tus dhiworth Kernow ena, ow kesstriva erbynn sportydhyon dhiworth Kembra, Breten Veur, Iwerdhon, Manow, hag Alban. Yma powyow erell ena keffrys kepar ha Galythia yn Pow Spayn.
Dy'Lun 14/7/03: Yma yn klavji den dhiworth Bosvenegh, 50 bloedh y oes, wosa bos leskys dre dredan dy'Sul. Yth esa ev ow herdhya y skath-woelya war-tu ha Lynn Roadford yn Dewnans pan dochyas y wern an gwiver tredanek a-wartha. Skattys ova gans charj bras ha benyn goth, 69 bloedh hy oes, a'n tennas dhiworth an skath. Yth esa hi leskys ynwedh. An tredan dhiworth an gwiver a shyndyas maw yonk keffrys. Ymons i yn klavji ha'n Kernow yma yn-dann with glew. Lemmyn y fydh hwithrans a-dro dhe'n droglamm dhe'n lynn.
Dy' Gwener 11/7/03: Skrifer an lyvrow 'Poldark' re verwis. Winston Graham a verwis, 93 bloedh y oes, yn chi medhyk yn Sussex, Pow Sows. Ev a skrifas moy es dew ugens lyver ha lies anedha o hwedhlow a-dro dhe Gernow. Meurgerys o y lyvrow a-dro dhe vywnans Ross Poldark, hag i a wrug bri a'gan pow dhe veur a dus a-hys an bys. 1975, ha'n BBC a fylmyas kevres 'Poldark'. Nebes tus a lavarssa bos y hwedhlow re romansek heb dhiskwedhes natur gwir a vywnans yn Kernow y'n oes na. Byttegyns, an lyvrow yw marthus rag agan negys tornyaseth.