koth25

Dy' Gwener 10/10/03: Hedhyw yth esa vysyt dhe Gernow dhiworth gwreg Rick Rescorla. Ev a verwis y'n Drehevyans Estat an Empoureth hag ev owth assaya selwel tus ynno dhe 9/11. An Governans Stenoryon a ros dhe Susan krows gwrys a sten yn unn govhe y golonnekter. Ena hi eth dhe Skol Pennpoll yn Heyl rag gweles lowarth nowydh plansys gans an fleghes yn kov Rick Rescorla. An rohow ma dhedhi veu gwrys wosa an governans dhe skonya ri piwasow dhodho wosa y vernans drefenn y vos Amerykanek. Hwath yma kaskyrgh yn unn assya kavoes enor ragdho dhiworth myghternes Pow Sows. Byttegyns, dell hevel, yma lowr a Gernowyon a vynn gul taklow aga honan yn y govhe.
Dy' Meurth 7/10/03: Pubonan yn Eglosklym veu dannvenys 'mes an dre hedhyw wosa pibenn veur gas a dorras yn garth gwari an skol gynsa. Hwarvos a wrug pan skwattyas jynn-palas an bibenn. Herwyth an tanlu, an studh o pur dhyantell. Unn jydh dien a dremenas kyns bos salow lowr dannvon tus dhe'ga chiow arta. An fleghes dhiworth an skol a gollas dew dhydh oberi.
Dy' Meurth 7/10/03: Wosa termyn hir a wortos rag neppyth dhe hwarvos a-dro dhe'n chartour, keskusulyansow re beu synsys yn ogas ha pub rann a Gernow. Yth esa kuntelles hedhyw yn Karadon le may teuth a-dro dhe dhew ugens den. Yn-mysk an materyow, an dus a dhisputyas arwoedhyow fordh diwyethek, arwoedhyow diwyethek war dhrehevyansow poblek, ha taklow soedhek an governans leel. An poynt veu gwrys bos an yeth a-vri dhe Gernow awos nerth ha les kenwerthek. Hemm o chons gorra tybyansow dhe soedhogyon an konsel may hallons kusulya gans konseloryon yn kever pyth yw res dhedha dhe wul herwyth an chartour. An kedhlow a vydh res dhe guntelles lywya yn kynsa may fo dyllys derivas war an mater. Byttegyns, yma lies tra hwath dhe vos disputys: kepar ha'n arghans Amkan Onan rag gonisogeth. Dell hevel, res o dhe'n konsel ri nebes an mona dhe'n asrann dornyaseth, ha nebes dhe'n taves Kernewek. Soweth, oll an arghans veu gorrys dhe dornyaseth. Heb mar, an poynt an kreffa dhe vos menegys o yn kever adhyskans an taves. Yth esa galow rag arghans rag dyskadoryon an yeth ha rag dyski an dhyskadoryon bys y'n nivel ewn rag dyski y'n skolyow. Rag gorlenwel an mynnas ma, y fia gwell rag Kernewek dhe vos testenn servadow yn skolyow may hallo fleghes dewis mos dhe'n klas y'ga thermyn aga honan.
Dy' Sul 5/10/03: Mowes 19 bloedh hy oes re waynyas an dowlenn bellwolok 'Fame Academy'. An gamporyeth re spenas naw seythun yn unn dhyski dhe 13 studhyer kana, donsya ha skrifa kanow. Dres oll an termyn na, Alex Parks re beu an gwella herwydh pub rann an media. An vowes dhiworth Menydh Hokk ogas dhe Druru re leveris liesgweyth bos hwans dhedhi a dhehweles dhe Gernow ha gweyvya an baner. Yn hwir, dres an finel nyhewer, es o gweles Baner Pyran oll an prys (gweyvys gans Dawn French). Alex a ganas peder kan nyhewer rag gwaynya an kesstrif. 'Baby Can I Hold You Tonight' (Babi, a allav dha synsi haneth) gans Tracey Chapman, 'Beautiful' (teg) gans Christina Aguilera, 'Imagine' (tybewgh) gans John Lennon, ha hy han hyhi hy honan, 'Maybe That's What it Takes' (Martesen henn yw fatell y'n gwra). Yth esa hi ow kana erbynn studhyoryon Carolynne hag Alistair y'n dowlenn gynsa. An poblek a votyas rag kelli Carolynne. Y'n nessa towlenn, an vot o rag po Alex po Alistair. Alex a waynyas yn es herwydh an Academy. Alex Parks re waynyas kevambos sonskrifa (unn milvil peuns y vri) gans Plasennow Polydor, rannji yn Loundres rag unn vlydhen keffrys ha karr-tan-sport. Res yw dhedhi usya an vlydhen rag sevel hy ober avel sterenn gana y'n bys popp. Yma fysk dhe wul sidi kyns diwedh mis Du may hallo kavoes gwerthow y'n seson prenassa Nadelik. Yma kowetha Alex ow kwaytya synsi kevywi rygdhi pan dhehwel dhe Gernow an seythun ma rag nebes dydhyow. An kynsa omdhiskwedhans poblek a vydh myttin dy' Meurth rag hwarvos Pirate FM yn Skorrya. Warlyna, an piwas ma veu gwaynys gans David Sneddon a Alban.
Dy' Sul 28/9/03: Hwithrans a dhalleth a-vorow a-dro dhe vernans dhe HMS Raleigh. Marner yowynk, 19 bloedh, a verwis dhiworth pystigow drog wosa ev dhe goedha yn-mes a fenester. Y feu kargys dhe'n klavji der askell-dro. Medhygyon dhe Dherriford a assayas y selwel, byttegyns y ferwis dy' Yow. Ev a junyas an gampva saw eth dydh kyns an darvos. An den re dheuth dhiworth Alnwick yn Northumberland. Y fydh y gorf nijys tre rag y ynkleudhyans an seythun ma. An bennseythun ma y feu y hanow dyllys gans kreslu an M.O.D wosa i dhe ri an nowodhow tewl dh'y deylu. Guy Benton o y hanow. Yma y gowetha dhe HMS Raleigh yn-dann skruth hag ymons i ow kavoes kusulyans rag hemma.
Dy' Yow 25/9/03: Yma pyskador yn-dann with glew yn Klavji Trelysk wosa bos selwys gans askell-dro. Chris Chesterfield re beu y'n dowr rag hwegh our wosa y gok dhe veudhi. An droglamm a hwarveu dhe'n arvor deghow Kernow ogas dhe Lannvorek. Nyns esa ev ow kwiska pows-salowder hag yma galow lemmyn rag pyskadoryon dhe gavoes daffar a'n par na kyns i dhe vora. Gormeul yma rag para an askell-dro dhiworth Chiverton drefenn i dh'y selwel mar uskis wosa an galow. Yth esens i ow praktisya yn ogas pan welas nebonan Mr Chesterfield. Kowetha an pyskador a lever bos pur feusik na wrug merwel yn mor.
Dy' Meurth 23/9/03: Kuntellyans a enyvales stoffys synsys dhe Davern Jamaica yn kres a Hal Fowydh veu gwerthys hedhyw. Gorrys warbarth veu yn prysyow a Vyghternes Sowsnek Victoria gans Walter Potter. Perghenn an tavern re werthas an kuntellyans rag kavoes lowr a vona dhe wellhe y ostell. Tus a dheuth dhiworth pub sorn an bys dhe'ga frena. An tableau 'Piw a ladhas 'Kokk-Rudhek'" a gavas Ł20 milvil. Herwydh govenek an perghenn, an gwerth a wra sevel moy es Ł250 milvil. Yn-mysk an re dhe'n tavern hedhyw, yth esa skeusenner a-vri Davydh Bailey ha komyk Harry Hill. A-vorow y fydh gwerthys an ors neb o sterenn an dowlenn bellwolok 'Steptoe & Son".
Dy' Sul 21/9/03: Lywyer jynn-tenna re beu gorrys dhe glavji wosa bos skwattys gans tren war dreusva hyns-horn yn Kernow. An droglamm a hwarveu ogas dhe Dewynn Pleustri. Dew dhen arall a dhiankas gans pystigow byghan. An lywyer jynn-tenna a'n jeves pystigow penn. Lemmyn yma galow nowydh rag yettow dhe'n dreusva ma. 'Network Rail' a lever bos projekt gwellhe an dreusva a-dro dhe Ł1 milvil. Paul Tyler ha Matthew Taylor re dhellos derivasow yn unn erghi yettow kyns bos ken dhroglamm. An skeusenn a dhiskwa droglamm ken war an keth treusva.
Dy' Sul 21/9/03: Rag an kynsa prys, kannasow an movyans Kernewek re dheuth warbarth gans Konsel Kernow ha Soedhva an Governans 'Soth West' yn unn gevarwoedhya displegya strateji a'n taves. An nowodhow warlyna bos Kernewek degemmerys yn-dann an Chartour Europek rag Yethow Nebes Kewsys a weresas dri an yeth war-rag dhe nivel nowydh a'y dhisplegyans. An strateji tewlys a wra keheveli an mynnasow ha govenek a'n taves Kernewek, hag a wra towlenn-wrians rag gedya an displegyans. Kusulyans poblek ledan a vydh gwrys yn skon rag dos ha bos rann an ober. Kevres a hwegh kuntelles re beu ordenys keffrys, onan yn pub rann a Gernow. Pubonan gans les yw wolkomm hag a yll keworra y vreus, mars yw po mar nag yw Kernewegor. A-vel rann a ertaj Kernow, tenkys an taves yw a vri dhe bubonan, ha'n kuntellesow a wra dynnerghi pub gwel. An kuntellesow a re chons dhe dus leverel aga breus a-dro dhe'n taves, y vri dhe Gernow ha'ga godhvos yn y gever. A goedhvia moy chons dhe yonkers devnydhya an yeth? Pandra yw govenek ha bodh a Gernewegoryon, ha pandra grys an re na vynn dyski an taves? Gordhiwedh, pandra yw an gwel rag an yeth ha'n tyller y'n termyn a dheu yn Kernow? Kusul skrifys ha breus war an destenn ma yw wolkomm hag a goedh bos dannvenys dhe Gaderyer an Bagas Lywya: Mr Jori Ansell, a-barth Soedhva an Argh-soedhek, Hel an Konteth, Truru. Dydh degea rag kusul skrifys yw 10ves mis Hedra 2003.
An dydhyow:
* 29ves mis Gwynngala 2003, 7:30, Stevell gesedhek onan, Konsel Pennwydh, Pennsans.
* 30ves mis Gwynngala 2003, 7:30, Stevell an konsel, Konsel Karrek, Truru
* 2a mis Hedra 2003, 7:30, Stevell an konsel, Konsel Kernow Kledh, Ryskammel
* 6ves mis Hedra 2003, 7:30, Stevell an Konsel, Konsel Kerrier, Kammbronn
* 7ves mis Hedra 2003, 7:30, Konsel Karadon, Lyskerrys
Dy' Sul 21/9/03: An seythun ma, Kessedhek rag Kehevelyans Aghel a wra breusyans a-vri a-dro dhe kas laghyl ynter John Angarrack ha Konsel Kernow. Ev a vynn previ bos an awtorita ow kammwul erbynn an Gernowyon dre dhifenna leverel aga bos Kernewek. Hemma a dhallathas pan synsas an konsel niverans y'n skolyow. Nyns esa kummyas dhe'n fleghes skrifa 'Kernewek' war an form. Lemmyn yma Mr Angarrack yn unn wovynn orth pubonan dhe skoedhya an kas ma dre skrifa dhe: Pat Galler, Commission for Racial Equality, St Dunstans House, 201-211 Borough High Street, London SE1 1GZ
Dy' Mergher 10/9/03: Unn lywyer re beu ledhys ha shyndys yw hwetek den warn ugens yn droglamm yn Kernow Soth Est. Yth esa skwatt penn ha penn ynter karr ha kocha war an A 387 ynter Logh ha Porthpyra. An kreslu a lever bos an den marow lywyer karr ha dhiworth an kethsem ranndir na. An dus shyndys veu kemmerys dhe glavji Derriford yn Aberplymm. Yth esa pystigow byghan dhedha dhe'n konna ha bejeth. Yth esens i war dro an ranndir dhiworth Dewnans. Yma an kreslu yn unn hwithra an droglamm ma.
Dy' Mergher 10/9/03: Band rokk Kernewek nowydh a wra seni aga hynsa gyg dhe Lowender Pyran hevlyna. Y fydhons yn Bar an Howlsedhes nos Wener 17ves a vis Gwynngala. Krena a gan ilow rokk, popp ha funk kepar dell wre Skwardya. GYG NOWYDH: 25ves mis Hedra dhe'n Gresenn Sterts ogas dhe Lyskerrys.
Dy' Mergher 3/9/03: Hwegh eur myttinweyth ha'n bagas Qinetiq a assayas hwytha an belenn-ayr Qinetiq Onan rag gul kovath an bys rag nija pella a-wartha enep an Norvys es nevra kyns y'n bys. Byttegyns, mel yntra rannow an belenn a skwardyas ha gul fals. Rag henna nyns o possybyl lanchya. Wosa disputya nebes, an bagas a erviras dasassya nessa blydhen. I a vynna lanchya warlyna mes nyns o an gewer da lowr. Hedhyw an gewer o gwell, mes an daffar a dorras. Ytho, res yw dhedha ewna an kudynn hag assaya arta nessa hav.
Dy' Meurth 2/9/03: Govenek yma dhe Colin Prescott hag Andy Elson lanchya aga felenn-ayr veur a-vorow dhiworth an mor ogas dhe Borthia. I a vynn settya kovath rag yskynna moy ughell es nevra kyns yn pelenn-ayr. Tewlys yw dhe vos 25 mildir a-wartha an norvys ha gul nebes assayansow skians. Res yw dhe'n bagas 'Qinetiq' kavoes dydh kler lowr. Nyns esa chons warlyna dh'y assaya. An belenn-ayr a vydh mar vras a-vel an Drehevyans Estat an Empoureth y'n S.U.A.
Dy' Gwener 29/8/03: Nessa dy' Sadorn y fydhyn ni ow tynnerghi Bardh Meur nowydh ha leverel meur ras dhe Yowann Bolitho, an Bardh Meur y'n eur ma. An solempnyta rag chanjya an Bardh Meur a vydh synsys dhe Orsedh Kernow yn Lannstefan 6ves mis Gwynngala dhe dhiw eur. Kurunys a vydh Rod Lyon, 67 bloedh, (Tewennow). Ev re oberis yn feur dres lies degblydhen a-barth an taves Kernewek. My a borth kov anodho ow kul towlenn bellwolok gelwys 'Nosweyth Lowen' nans yw dewdhek blydhen. Lemmyn, ev yw presentyas 'An Nowodhow' der Radyo Kernow. Splann yw kavoes Bardh Meur arta neb a woer kewsel Kernewek yn fest freth. Kannas an Bardh Meur nowydh a vydh Vanessa Beeman (Gwenenen). Hi yw Kernewegores freth keffrys.
Dy' Gwener 29/8/03: An linenn marow rag profyansow dhe'n Goel Fylm Kernow yw dy' Lun. An goel a vydh synsys yn Aberfal mis Du. An ordenoryon a vynn diskwedhes fylmow gwrys yn Kernow. Ny vern dhedha mars yns po hir po berr. Warlyna yth esa tri ugens fylm diskwedhys, y karsens kavoes moy hevlyna. Dell glywyn dhe Nowodhow Kernow, y fydh towlenn nowydh may fydh skoedhys fylmow der an taves Kernewek. Nyns eus kedhlow y'n eur ma, byttegyns, heb mar y fydh derivadow pella derivys dhe'n goel.

Koth 25

Dy' Mergher 15/10/03: Dalleth an 25ves Lowender Pyran o hedhyw gans lanchyans arbennik. Merv Davey, piber an Orsedh a dhellos an wiasva nowydh An-Daras. An wiasva ma yw porthell rag gonisogeth, ilow, rannyeth, Kernewek ha pubtra oll hengovek yn Kernow. Dhe'n solempnyta igeri a'n Lowender, yth esa ilow dhiworth unn band yowynk ha nowydh 'Scoot'. An dhew dhen ma yw Cas ha Jojo Davey. Ymons i ow seni tonnow hengovek ha skrifys a-nowydh yn furv bywek. Kynth yw pennbloedh 25ves men mildir marthus, yma nebes krodhvolyow a-dro dhe'n system hevlyna rag prena tokynyow. Y'n blydhynyow eus passyes, yth esa tokyn rag an lowender oll, mes lemmyn res yw prena tokyn rag pub rann an goel.
Dy' Lun 13/10/03: An band nowydh henwys Krena a wra performya an nos Wener a dheu dhe Lowender Pyran. Krena a son ilow rokk-funk der an taves Kernewek. Y hyllir aga klywes yn Bar an Howlsedhes war dowlenn gans Scoot ha Penntorr. Yn mysk an kanow senys a vydh 'Athelstan' hag 'Enep Fettow El'. An re ma veu skrifys yn kynsa rag an band 'Skwardya'. Mar ny yllowgh gweles Krena dhe LP, y fydhons dhe Sterts rag an Goel Artys Karadon nos Sadorn 25ves mis Hedra.
Dy' Sul 12/10/03: De yth eth peswar ugens bardh dhe Rysrudh rag keskusulyans yn Kresenn Kernow. An kynsa chons o ragdha dhe gesvetya wosa an Orsedh yn-dann Bardh Meur nowydh Rod Lyon. Dydh leun a arethow ha diskwedhyansow o. Dr Garry Tregidga a arethas yn kever 'Plethennow Kernewek'. An dowlenn ma yw rekordya levow a gansow a Gernowyon. Keffrys ha henna, Ted Chapman a dhiskedhas temmygow gwydheo a-dro dhe'n istori Methodek yn Kernow. Dell hevel, yth o an hwarvos ma sewen fest.
Dy' Sul 12/10/03: An Goel Fylm Kernow, gans kesedhek Kernewek an Goel Fylm Keltek, Fylm Kernow, Fenten Media Kernow hag ITV1 'Pow West', a wra synsi 'Govynn Kernewek' orth an goel hevlyna. 'Govynn Kernewek' yw piwas askorrans rag fylm dhe vos gwrys po yn rann po yn tien der an taves. A-ji an piwas yma: Ł2000 · kamera gobrenys rag 5 dydh gans daffar son · Gonis treghi · Devnydh Kovath Fylm an 'Soth West'. Yma an goel ow tegemmeres profyansow rag fylmow berr y'n eur ma – y hyllons bos yn neb gis dell vo hwans. Fylmoryon dewisys a gyv chons dhe worra aga thybyansow dherag panel a dus konyk dhe'n goel 16ves mis Du. An gwaynyer a vydh dewisys orth diwedh an sedhek na.
Dy' Sul 12/10/03: Karoryon korev gwir a vydh lowen klywes bos an goel ma synsys a-ji Bragti Sen Ostell hevlyna 29ves mis Du. Y fydh korev nowydh lanchys ena gelwys 'Lerrups' hag ilow dhiworth lies band leel.

Dy' Mergher 22/10/03: Wosa bos degeys rag pymp blydhen ha hanter, Kroftdi Dheghow a wra dasigeri yn rann nessa dy' Lun. Ny vydh ow kwaynya sten mes tornysi. Y fydh troyow a rann an bal rag Ł5 an person, gans chons dhe weles yn-dann an dor dhe'n rann henwys Kroftstennek (Tincroft). Baseresult a garsa dastalleth gwaynya sten nepprys, byttegyns nyns yns parys hwath!! Yma an bagas SWERDA gans hwans a brena an hwel yn-dann gevambos konstrenys. Ytho res o dhe'n kowethas gul neppyth rag diskwedhes bos neppyth ow hwarvos war dir gans pris ughel. Ny rons i dydh hwath pan vo sten gwaynys arta.
Dy' Yow 16/10/03: Y teuth Iain Duncan Smith ha'y wreg Betsy dhe Logh yn kynsa rag kommendya an bagas Tori 'Soth West' rag an nessa dewisyansow ow tos. Kekeffrys ha henna, yth esa ev o kewsel a-dro dhe bolisiow Tori rag an negys pyskessa. Y barti a garsa dri an mor Bretenek yn-dann agan rewl agan honan arta yn le a vos yn-dann an governans Europek. Ynwedh, ev a leveris bos res dhyn kavoes moy chiow prenadow rag tus yowynk. Byttegyns, ny allas ev vodya govynnow yn kever y rewlyans an parti Tori. Kynth esa lies govynn dhiworth an media yn kever an hwithrans a-dro dhe ober y wreg, y leveris skant travydh a-dro dhe'n mater. Wosa gasa Logh, yth eth dhe'n Edenva, hag ena dhe Dewynn Pleustri.
Dy' Yow 16/10/03: Hedhyw y feu diskwedhys rag an kynsa prys an kynsa arwoedh ell nowydh dhe Hwel Geevor dhe Gernow West. Dewisys veu an desin yn kesstrif wosa rosennow rudh dhe vos lymnys 'mes a-hys Kernow. Gwaynyores an kesstrif o Leanne Howarth (gwel an skeusenn). Hi a dhesinyas baner Pyran sempel. Lemmyn y fydh an arwoedh ma devnydhys a-hys an pow.

Dy' Lun 27/10/03: An dowlenn o rag Konsel Kernow dhe ri eth milvil peuns dhe glavjiow Kernewek yn unn assaya aga gweres. Poes yw negys warnedha awos difyk a unnek milvil peuns warn ugens. Byttegyns, soedhogyon awdyt re leveris bos ro a'n par na erbynn an lagha. Ytho, res yw dhe'n gonisyow yeghes kavoes ken fordh rag degemmeres arghans. Yma soedhogyon an konsel yn unn dhynya menysters an governans rag kavoes gweres.
Dy' Sul 26/10/03: Gwarier Rugbi Kernewek, Phil Vickery, re weresas Pow Sows dos dhe kwarter-finel a hanaf an bys. Yth esa an para Sowsnek ow strivya erbynn Samoa ha kelli dre vras. Byttegyns, an gwarier dhiworth Porthbud a skoryas an 'assaya' neb a worras an para derag. Pow Sows a waynyas 35 - 32. Kynth yw Phil Kernewek, ny wra ev gwari rag para Kernewek y'n eur ma. Herwydh usadow yma ev ow kwari a-barth Gloucester.
Dy' Yow 23/10/03: Den neb yw charjys gans moldrans an vowes-skol Gernewek, Caronline Dickinson, a wra mos a-dherag breusysi Bretonek nessa gwenton. Kedhlow an kas laghyl erbynn Francisco Arce Montes veu dyllys hedhyw. Y fydh ev breusys yn Rennes. Caroline o tredhek bloedh yn 1996 ha hi gans hy skol rag dy'goel yn Breten Vyghan. Ledhys veu an vowes dhiworth Lannstefan ha hi gans hy howetha yn ostell. Montes a veu dannvenys dhe Vreten Vyghan dhiworth an S.U.A nans yw diw vlydhen wosa an kreslu dhe geheveli tammow hy D.N.A.

Dy' Yow 6/11/03: Den neb esa ow synsi esedhva yn y rannji yn Hellys a wrug omladha hedhyw. Yth esa ev ow kodros omladha a-ban dhallathas y esedhva an jydh kyns. Ev o 19 bloedh y oes, ha dell hevel, marner o dhiworth RNAS Kilros. Ev o trigys yn Bre an Eglos ogas dhe dhiw skol. De, res o dhe'n fleghes gasa skol dre gen fordh drefenn bos an den a'y sav yn y fenester yn noedh. An esedhva a dheuth dh'y fenn a-dro dhe brys li hedhyw.
Dy' Yow 30/10/03: Wosa kudynnow a-varra an vlydhen ma, yma an Benneythun Gernewek ow mos war-rag an bennseythun ow tos. Byttegyns, nyns yw par dell veu synsys y'n blydhynyow eus passyes. Hevlyna, ny vydh marnas dallethoryon ena. Yma ambos a neppyth rag tus avonsys 2004. Ytho, pandra hwer hevlyna? Wel, Polin Prys yw an ordenores. Hi a lever bos hwegh person warn ugens ow kodriga yn ostell yn Porthia. Y fydh nosweythyow lowen, prysyow oll warbarth, kerdh a dro dhe Borthia, ha darvosow an yeth dres an jydh.
Dy' Yow 30/10/03: Hedhyw yth esa kamm war-rag gans an projekt rag drehevel tressa biom an Edenva. Gweythysi a dennas aga krow war an dhrehevelva an myttin ma. Lemmyn, res vydh ragdha pareusi an tyller kyns es drehevel. Nebes tus an kyrghynn re grodhvolas erbynn an biom drefenn ev dhe sevel a-wartha amal an poll-pri. Yth esens i ow krodhvolas ynwedh awos own a wolow.
Dy' Mergher 29/10/03: Yma kynnik gans an Unyans Pelldroes Rugbi rag treylya an gamporyeth keskontethek, byttegyns yma breus drog yn y gever yn Kernow. Kessedhek 'tybi' re gommendyas gwruthyl kamporyeth rag eth 'gor-ranndir'. Awos hemma, y fia an gamporyeth keskontethek moy kepar ha kesstriv byghan. Kernow a via rann an ranndir west gans eseli an para kemmerys dhiworth Dewnans ha Gwlas an Hav keffrys. An gamporyeth par dell yw lemmyn a via omdoemmheans rag an 'gor-eth' dhe Twickenham.
Dy' Mergher 29/10/03: Yma 'An Roesweyth Hyns-horn' ow korra an hyns-horn Kernewek war gradh isella. An linenn dhiworth Pons Tamer dhe Bennsans a vydh war nivel lyha rag ewnansow wosa kaletterow mona gans an roesweyth. Yth esa govenek kavoes an hyns dewblekhes ynter Sen Ostell ha Truru, mes nyns yw sertan na fella a pe henna ow mos yn-rag.