koth26

Koth 26

Dy' Gwener 27/2/04: An ostell gans 42 chambour, peswar leur, ha kresenn keskusulyansow a vydh drehevys war dir an ostell 'Rocklands' yn Tewynn Pleustri. An desin a'n jeves karr-yskynna may hallo kemmeres gwestyon war-woeles an alsyow dhe voesti ryb Treth Tollkarn. Konselloryon an dre re dewlis towlennow dhe-ves, byttegyns an projekt veu res kummyas gans Rostorrmoel. Dell hevel, an projekt henwys 'Blue Fin' a vydh gorfennys erbynn diwedh 2005.
Dy' Sul 22/2/04: Klavji Ryal Kernow re dhallethas hwithrans wosa mernans Caitlin Coyne wosa bos gennys Dydh Nadelik.
Herwydh kannas an klavji an mernans o avoydadow yn-tien. Wosa keskusulyansow gans tus lagha an teylu Coyne, an klavji yw unnverhes bos res gul hwithrans omsevyek leun. Kerens Caitlin, Karen 33, ha Wayne 38, a Aberfal, re elwis rag hwithrans down wosa an pyth a wrug hwarvos y'n Unyt Aleksandra. An kusulyas re ammytyas bos an dineythyans kammrewlys hag yn-medh bos delatyans re hir kyns assaya Sesarian.
Dy' Meurth 17/2/04: Nans yw seythun, Baseresult a worras y dowlenn igeri Kroftiji Dheghow yn leun a-dherag Konsel Kerrier. A-dhistowgh y teuth negys dhiworth Dastineythyans Kammbronn Poll Rysrudh (KPR) yn unn wodros prena an bal dre nerth. A-vorow, Tim Williams a KPR ha Kevin Williams a Baseresult a vynn disputya an kas. Baseresult a grys bos possybyl ri 200 soedh dhe dus bal, byttegyns KPR a garsa drehevel gweythvaow, gwerthjiow ha chiow war an tir. Kroftiji a dhegeas nans yw hwegh blydhen heb denvydh dhe seweni orth hy dasigeri.
Dy' Mergher 12/2/04: Yma Kim Howells ow tos dhe Gernow rag gweles gwellhans an system hyns-horn ha fordhow yn-dann arghans skoedhya. Y fydh ev ow keskewsel keffrys gans tus vras may hallo dyski pyth a yll bos gwrys y'n termyn a dheu. Rann a'y vysyt a vydh diwrosyans a-hys an hyns Troenn Leven Veur. Y vysyt a dheu unn seythun war-lergh diwedh an hwithrans poblek a-dro dhe ledanhe an A30 dhe Woen Gors, ha gans gweyth ow pesya rag dewblekhe an linenn hyns-horn ogas dhe Druru.
Dy' Meurth 11/2/04: Y fydh diskwedhyans 9ves mis Meurth yn Strasbourg (Pow Frynk) may hallo kowsoryon an yethow-lyha protestya yn kever aga dyghtyans gans an EU. Y'n eur ma, Sowsnek, Frynkek hag Almaynek a rewl Europ yn kylghyow soedhogyl, mes yma 25 pow nowydh ow junnya hevlyna, ha kyns es pell y fydh 20 yeth soedhogyl. Byttegyns, an tavosow lyha yw gesys mes an keskusulyansow. Rag kedhlow ewgh omma.
Dy' Gwener 6/2/04: Teyluyow a seyth askell-drowesyon neb a veu ledhys warlyna yn droglamm yn Irak, a wra klywes diskudhansow a'n hwithrans, kyns bos an kedhlow dyllys dhe dus erell. Henn o an ambos res hedhyw gans Ivor Caplin MP. An ayrennoryon a verwis pan dheuth dew Seaking an eyl erbynn y gila yn droglamm mis Meurth yw passys. Diskudhys veu a-gynsow nag esa daffar noswolok dhedha. Mr Caplin res eth keffrys dhe weles HMS Raleigh dhe Benntorr, ha Nansykoeg. Yth esa hwans dhodho gweles towlennow rag glannhe tyller a weythva arvow-kymyk ogas dhe Borthtreth.
Dy' Sul 1/2/04: KKB Kowethas an Yeth Kernewek a dhros lywyans nowydh rag an kowethas. Jane Ninnis a erviras kildenna drefenn bos ober brassa gans hy theylu lemmyn. Y feu Loveday Jenkin dewisys yn hy le. Loveday yw konseller rag ranndir Kerrier a-barth Mebyon Kernow, demmedhys gans dew flogh, ha myrgh Richard Jenkin neb a verwis a-gynsow. Loveday re ambosas oberi war-rag gans an Kowethas hag yma towlenn dhe synsi Pennseythun Gernewek veur rag pubonan an bennseythun kyns Lowender Pyran. Y fydh chons dhywgh hy metya dhe'n Jydh Lowender an mis ma (28ves, Fordh Ponsmeur).
Dy' Meurth 27/1/04: Wosa misyow a dhout a-dro dhe denkys an ayrborth, Konsel Kernow re votyas dhe dhos ha bos perghenn-unnik. Konsel Rostorrmoel a votyas de rag gasa y omgemmeryans awos bos kendon a Ł750,000. Ny vynn konsel ranndiryek vydh arall ri arghans dhe'n ayrborth, ytho lemmyn res yw the Gonsel Kernow kavoes an fondyans. Yma edhomm dhe GK selya kowethas nowydh rag gwitha an negys pubdydhyek. Res yw keffrys kavoes moy ayrennow ow tira ena. Byttegyns, hag i ow prederi a-dro dhe henna, Ewrop re leveris na vynn tylli kemmys a arghans dhe gowethasow ayrennow kepar ha Ryanair. Ryanair a selwis Ayrborth Kernow gans gonisyow nowydh wosa British Airways dhe asa y fordh ynter Tewynn Pleustri ha Heathrow. Lemmyn yma Ryanair hag Air South West owth usya an fordhow gesys gans BA.
Dy' Meurth 27/1/04: Kowethas Tesennow Kales Furniss re beu gorrys yn-dann venystrans awos kudynnow negys. Y'n eur ma nyns eus ober kellys. Deg den ha seyth ugens a ober y'n weythva yn Rysrudh. Govenek yma a gavoes perghenn nowydh.
Dy' Lun 26/1/04: Kok Bretonek a sedhas nyhewer yn ogas dhe'n arvor Kernewek. Askell-dro dhiworth RNAS Kilros a selwis an pymp den ynno. Yth esa own bos hemma droglamm kepar ha'n seythun yw passys mayth esa kok skwattys gans gorhel, ha'n kriw veu kellys. Byttegyns, dell hevel, an kok a sedhas drefenn bos dowrfols y'n bibenn-yeynheans. Pymp esel an kriw a veu kemmerys dhe Glavji Trelysk.
Dy' Lun 26/1/04: Pymp kannas Kernewek res eth dhe Vanow an seythun ma yn unn hwithra studh Manowek. Vanessa Beaman, Jori Ansell, Andrew Climo-Thompson, Maureen Pierce ha John Sawle a vynn gweles fatell wra yeth an ynys dasserghi may hallens gul an keth yn Kernow. I yw rann an bagas strateji rag Kernewek.
Dy' Yow 22/1/04: Diharas a dheuth dhiworth an Menystri Defens hedhyw yn-unn leverel bos meth warnodho nag esa lowr a wisk-horn rag soudoryon yn Irak. Lavarow Syr Kevin Tebbit a veu gwrys war-lergh kaskyrgh gans teylu souder Kernewek Sgt Steven Roberts. Ev a verwis wosa ri y wisk-horn dhe-ves drefenn nag esa lowr rag tus erell. Syr Tebbit a venegas an diharas yn Kuntelles Akontow Poblek.
Dy' Yow 15/1/04: Dew gorf re beu kemmerys dhiworth mor hager wosa kokk Bretonek dhe veudhi ogas dhe'n arvor Kernow. Diw askell-dro, dew skath-sawyer ha skathow erell a omjunyas yn unn hwilas an 'Bugaled Breizh. An kokk a dreylyas y woeles war tu ha'n ebrenn nawnsek mildir soth a'n Lysardh. Yth esa pymp den ynno ha tri anedha yw kellys hwath. Hwilas an kriw re hedhis lemmyn hag a bes dhiworth an jydh a-vorow. An dhew gorf re beu gorrys dhe Glavji Trelysk yn Truru.
Yma an Kowethas ow restra hwarvos rag dallethoryon keffrys. 12ves - 14ves mis Meurth yn Lostwydhyel. Kestav: Polin Prys
Dy' Yow 15/1/04: Kyns Sgt Steven Roberts dhe verwel yn Irak, ev a sonskrifas y brederow a-dro dhe dhyfyk a dhillas gwisk-horn. Y feu an dillasow res dhodho, byttegyns arghadow veu res rag ri an gwisk-horn dhe dus erell. An souder dhiworth Ponsrys a leveris keffrys bos own dhodho a 'las-war-las' po mernans dre arvow Sowsnek po Amerikanek. Ev o an kynsa souder Breten Veurek dhe verwel y'n kas ha veu kellys yn Basra 24ves mis Meurth 2003. Gwedhowes Steven, Samantha Roberts re ros an snod dhe'n media hag awos henna, yma menyster Geoff Hoon yn-dann wasketh lemmyn. Mester Hoon re wodhevis gwasketh dhe asa y soedh hedhyw awos an taklow leverys gans Sgt Roberts y'n sonskrif. Byttegyns, an menyster y'n governans Westminster re besyas heb aswonn an galow. Yma senedher rag Kernow Kledh, Paul Tyler owth assaya restra kuntellyans gans Mr Hoon ha'n teylu Roberts heb sewen. An gorthugher ma (dy' Yow) ken menyster re ambosas dhe Samantha metya gensi py eur pynag a vynna hi.
Dy' Meurth 12/1/04: Y fydh Dydh Lowender 28ves mis Hwevrer yn Fordh Ponsmeur. An hwarvos ma yn Hel an Dre yw igor dhe bub huni a bub nivel Kernewek, po dallethoryon po freth. Towlenn: 10:30 Kuntel y'n hel. Re a vynno strechya aga diwwarr, y fydh kerdh ragdha. An huni erell a yll klappya y'n hel hag mlowenhe banna koffi. 12:30 Ni a dhe'n gwerthji rag pastiow ha'ga dybri warbarth. 2pm Gwariow 4:30 Areth gans Dr Ken George a-dro dhe eryow nowydh kevys yn Bywnans Ke. Y fydh chons a-wosa rag govynnow ha profyansow geryow nowydh dha honan. 6pm Soper fydh. Dro nebes boes rag pubonan dhe omlowenhe. Losow kegin a vydh res gans an Kowethas. 8pm Kana warbarth. Chons rag kana kanow Kernewek meurgerys. 9pm Keskan Veur gans Pol Hodge, Graham Sandercock ha Krena. Kedhlow pella y hyllir kavoes dhiworth po Matthew Clarke 07870 443535, Jane Ninnis po Pol Hodge 01726 882681. An hwarvos ma yw restrys gans Kowethas an Yeth Kernewek.
Dy' Gwener 9/1/04: Haneth y fydh an diwettha tren post yn Breten Veur ow mos dhe Bennsans. An gonis post re oberis war an hyns ma rag moy es 160 blydhen. An Soedhva Post re'n gorfennas drefenn bos edhomm selwel deg milvil peuns an vlydhen. Lytherow a vydh gorrys yn lorriow lemmyn. Kaskyrghoryon an kyrghynnedh a lever bos gokki gul moy a dharomres war an fordhow.
Dy' Gwener 9/1/04: Dell skrif Tony Snell: Peder gannas Kernewek re arethas y'n Keskusulyans Annetha Rysoghen an seythun ma. Bill Ind, Epkop Truru, hag yw lywydh Diskwedhyans Kernow Ryal, a veu arethor-gwest war an kynsa dydh. John Banham, kaderyer Whitbread plc a ros an Areth Frank Parkinson war an destenn "Esplegya gans an Marghasow". Caroline Drummond, penn-weythreseges LEAF (kevrenna annetha ha'n kyrghynnedh). Hy gour yw tiek le'ti yn Kernow. Hi yw onan a'n lywydhyon a'n keskusulyans. Sally Kendall a ros areth a-dro dhe'n destenn 'devnydhya pythow a'n bargen tir'. Y hyllir dyski moy a-dro dhe'n keskusulyans ma dhe www.ofc.org.uk.
Dy' Meurth 6/1/04: Pymp den re beu kellys dhiworth Bragti Rysrudh wosa an kowethas ma dhe dhos yn-dann venystrans. An negys a'n jeves 26 oberwas, ow potellya, kannya ha braga korev. An kowethas menystrans veu gelwys wosa an bragti dhe wodhevel kudynnow mona. Onan an kowethasow orth y venystra yw Begbies Taylor. An kowethas Karesk ma a garsa gul dhe'n bragti sewenyek arta. Bragti Rysrudh veu selys 1742, onan an kottha yn Breten Veur, ha perghennys gans negys Hong Kong lemmyn. Wosa Kernow dhe solempnya an keskerdh 1497, an bragti a vragas korev henwys 'Rebellyans Kernow'. An diwes ma yw meurgerys a-hys Kernow a-vel diwes sordyek. Govenek a'gan beus bos chons da a selwel an bragti may hallo ri dhyn korev mas rag lies blydhyn hwath.
Dy' Meurth 23/12/03: Nans yw seyth mis, avisys veu bos gweythva Compair Holman ow tegea. 184 soedh a veu kellys an jydh na byttegyns yth esa tus owth assaya dri negys nowydh dhe'n dre. Hedhyw Kowethas Jynnweythya Quaife a dherivas bos nebes ober gwruthyl kystyow maglen kerri y'n weythva. Dhe'n dalleth y fydh marnas 12 ober nowydh gans 20 moy ow tos. Yma an weythva ow pareusi rannow kerri rag henwyn bras y'n bys kerri. Yth esa an kevambos ma kevarwoedhys gans 'CPR Regeneration', neb yw kowethas rag gweres negysyow nowydh yn Kammbronn, Poll ha Rysrudh.
Dy' Mergher 17/12/03: Deg den dalghennys gans Kreslu Kent yn-dann an hwithrans moldra Graham ha Carol Fisher, re beu gesys dhe wari yn-dann mewgh-kreslu. Res yw dhe naw anedha dehweles dhe gresennow kreslu yn Kargent ha Dowr mis Genver. Yth esens dalghennys a-varra y'n seythun ma rag ladrans ha moldrans. Mr ha Mrs Fisher a veu ledhys yn freudhek dhe betrolva Perch ogas dhe Bonsrys yn Kernow Kledh. An omladh ma a hwarveu nos tansys. Korf Graham Fisher veu kevys a-ji aga chi, ha korf Carol (gwel an skeusenn) veu kevys yn-mes. Gweskys ha tennys vens.
Dy' Sul 14/12/03: Kuhudhys yw an Governans Sowsnek a leverel bos tus kemmyn ha lel 'gowegyon'. John Angarrack a grys an rewlyans nowydh dhiworth Ewrop, a-dro dhe dhifresyans a bobell lyha kenedhlek, dhe ri kummyas dhe dus gennys a-ji Kernow omhenwel 'Kernowyon' war formow soedhek. Byttegyns, wosa gortos dhiworth dalleth mis Kevardhu rag gorthyp dhiworth Westminster, Mr Angarrack a lever y vos serrys drefenn na vynn an Governans aswonn gwiryow Kernow ha na vynn gorthybi orth an govynnow.
Dy' Sul 14/12/03: Nessa dy' Sul y fydh synsys gonis eglos Kernewek hengovek. Teyr eur y'n dohajydh yw an prys dhe'n chapel ynter Kelliwyk ha Lyskerrys. Dyskasow a vydh lennys y'gan taves keffrys ha kana karollyow. Wosa an gonis y fydh te grys rag pub huni may hallens kesklappya ha ri bennathow Nadelik an eyl dhe'ga hila.
Dy' Lun 9/12/03: Pow Sows a fethas Awstrali an mis ma yn Hanaf Rugbi an Bys, ha wolkomm arbennik veu gwrys yn Loundres rag an para. Byttegyns, dew anedha yw Kernowyon. Trevor Woodman a driga yn Lyskerrys ha Phil Vickery a driga yn Porthbud. Yma Konsel Kernow ow keskewsel gans an RFU Kernow a-dro dhe wul neppyth arbennik ragdha y'n Ducheth. Travydh yw avisys hwath. Byttegyns, gwithewgh hwi lagas war an folenn ma.
Dy' Sadorn 29/11/03: An daromdagyow dres an vlydhen war an A30 re dhynyas an governans dhe worra poester brassa war dowlow rag ledanhe an fordh. An seythun ma ni a glywas bos hwans a dheblekha an fordh ynter Krows an Gorlann ha Krows Chiwardonn, ha dhiworth tempel ha Karblake Wartha. An ledanheans ma a wrussa gul fordh veur ynter Karesk ha Kammbronn. Yn-medh menyster karryans, David Jamieson: " An gwellheans ma a dhiskwa yn feur bodh an governans gorra arghans y'n 'ranndir'. An fordhow dewblekhes ma a wrussa klerhe daromdagyow, ri dhyn vyajow skaffa, ha gul fordhow moy salow.
Dy' Yow 27/11/03: Yma own bos res degea rannow penneglos Truru awos y vos ow prewi. An kudynn yw an menweyth yn ayrgylgh hoelanek. An drehevyans yw gwrys a ven Karvadh, neb yw pur vedhel ha a yll brewi yn es. Res yw dhe'n penneglos kavoes Ł3.5 rag y ewnhe. Byttegyns, nyns eus lowr a arghans y wul drefenn bos difyk y'n argh. Ny vynn an penneglos charjya an poblek rag dos a-ji ha gweles an drehevyans ytho res yw kavoes ken fordh.
Dy' Mergher 26/11/03: Nepprys nessa blydhen y fydh gwiasva nowydh rag dri nowodhow dhiworth Kernow dhe Gernewegoryon. An wiasva a vydh henwys 'An Burow' ha trigys dhe www.cornish-language-news.org. Perghenn an wiasva yw 'An Burow Europek Rag Yethow Lyha Kewsys'. Nowodhow Kernow a wra pesya mars eus skoedhyans lowr wosa bos 'An Burow' dyllys rag nebes misyow. Pennskrifer 'An Burow' a vydh Matthew Clarke.
Dy' Mergher 26/11/03: An band rokk Kernewek Skwardya re berformyas rag an diwettha prys, byttegyns ymons hwath ow rekordya. Y hyllir goslowes orth an hyns nowyttha dhiworta a-ji an wiasva Warlinenn (eseli yn unnik). Band rokk nowydh ow pesya war lergh Skwardya yw 'Krena'. Ymons ow performya 5es mis Kevardhu y'n diwotti 'Jolly Sailor' yn Logh.
Dy' Mergher 20/11/03: Wosa bos sewen vras an Bennseythun Gernewek Porthia nans yw nebes dydhyow, yth eson ow restra onan moy rag dallethoryon ha studhyoryon gans nebes Kernewek. Govenek a'gan beus a ordena hemma rag 12ves dhe 14ves mis Meurth 2004, hag a vydh dhe Lostwydhyel. An annedhyans a vydh a-ji penntiow omservya kepar dell veu yn Porthia (kyn fydh enkressyans martesen). Mars eus les genowgh po derivadow pella a via dhe-les dhywgh, pellgewsewgh po e-bostyewgh orth Polin marpleg skaffa gyllowgh. Nyns eus kemmys a dokynyow may hyllyn bos sur pub huni dhe dhyski meur. Pella derivadow ha form omrolya a vydh dyllys a-ji An Gannas ha Warlinenn mis Genver. BYTTEGYNS, OMWORREWGH WAR AN ROL-GORTOS LEMMYN!!!
Dy' Mergher 20/11/03: An Governans re broffyas dhe Gernow onan an gwella enkressyansow arghasow yn Breten Veur. Res vydh dhe'n Ducheth 5.9% moy nessa blydhen. Hemm yw marthys moy da a-vel an amont res dhe Dhewnans. An konteth Sowsnek na a gyv 4.2 %. Dell hevel, an arghans ma rag konselyow Kernewek a re dhyn enkressyans pur vunys rag 2004 y'gan toll konsel. Byttegyns, hwath yma krothvolas dhiworth Karadon. An konsel ma re gavas enkressyans an moyha byghan yn Kernow. Yma own dhe rewloroyn an awtorita ma bos res dhedha treghi gweres rag chiow digerra ha projektow rag provia hwel dhe dus leel.
Dy' Sul 16/11/03: Yma towlennow rag drehevel tre nowydh ogas dhe Dewynn Pleustri y'n keth gis a-vel Poundbury yn Dorset. Poundbury veu drehevys war dir an Ducheth kepar dell vydh an dre ogas dhe Dewynn Pleustri. Pennsevik Charlys a garsa y wul rag diskwedhes fatell yllir nowydha trevow neb a veu gesys dhe goll y'n termyn yw passys. Byttegyns, yma tus erell na gar an dowlenn kyn fia an chiow gwrys a rowan Kernewek dre vras. Moy es mil annedh nowydh a via drehevys ha hwel a dhalleth yn 2005. Yma an nowodhow ma y'n seythun pan leveris derivas displegyansow na via chiow nowydh hag estat diwysygneth tybyans da ogas dhe Essa. An dowlenn o rag drehevel an gweythvaow ha soedhvaow war dir henwys 'Bargen Tir Goenwastas'.
Dy' Lun 10/11/03: Yma hwithrans moldra nowydh ow talleth yn Kernow hedhyw wosa bos kevys korf benyn an bennseythun ma. Korf Joan Roddam, 74 bloedh, veu kevys gans hy enep war an dor yn park ogas dhe Dhelyowboll. An diskudhans euthek ma veu gwrys gans an wythysi gres wosa bos an venyn goth derivys a-vel person kellys. Dell hevel, nyns esa strivyans ha hwithrans wosa mernans a dhiskwedhas hy bos tegys. Ny vynn an hwithroryon y'n eur ma heveli an kas ma gans ladhva dhiwblek a Vr ha Mrs Fisher dhe Bonsrys. An re gans kedhlow a-vri a goedh gelwel orth 0800 555 111.
Dy' Lun 10/11/03: Ha'n kreslu ow hwithra ladhva nowydh dhe Dhelyowboll, yma pella kedhlow a'n moldrans euthek y'n seythun yw passys dhe Bonsrys. Mr Fisher veu tennys diwweyth gans gonn a-ji dh'y ji, ha Mrs Fisher veu tennys teyrgweyth yn-mes an chi yn hy heyn. Dell hevel, yth esa hi owth assaya poenya dhe-ves yn unn dhiank. An goer ha gwreg veu gweskys yn feur wosa bos tennys. Dew stokk dhiworth gonnys veu kevys yn ke nebes mildiryow dhe-ves hedhyw. An balyeryow veu kevys y'n chi. Nyns esons an gonnys usys y'n ladhva. Mr Fisher a biwas an re ma. Nyns yw kevys hwath an gonn devnydhys y'n ladhva. An gyst arghans veu kevys igerys gans mona ynni hwath.
Dy' Yow 6/11/03: An myttin ma yth esa galow dhe'n kreslu y'n unn dherivas bos korf benyn varow ogas dhe Betrolva Perch ogas dhe'n Dhiskwedhyansva Kernow Ryal (ogas dhe Bonsrys). A-dhistowgh yth esa kordon tewlys a-dro dhe'n ranndir may hallo an wythysi gres hwilas lerghow. Dohajydh an kethsem dydh yth esa derivas dhiworth an kreslu bos korf gorow kevys a-ji an betrolva. Ena kedhlow pella a dherivas bos an re goer ha gwreg ha ledhys ens gans gonn yn pur ogas dhe'ga fennow. An dus ma veu perghennogyon an betrolva, Graham Fisher (60) ha Carol Fisher (a-dro dhe 50 bloedh dhe 60 bloedh). Yma an betrolva mayth esa an korfow diskudhys war an A39 ogas dhe Winnards Perch war an fordh dhe Bonsrys. Rag termyn hir hedhyw yth esa lies fordh a-dro dhe'n ranndir degeys. Res o dhe'n hwithroryon kavoes lerghow. Herwydh tus an kyrghynn, Mr ha Mrs Fisher o pur gosel heb keskowetha gans meur a dus. Nyns esa fleghes dhedha. A-vorow y fydh kusulyans gans an wask rag derivas moy kedhlow a-dro dhe'n hwedhel. Rag lemmyn, an kreslu a garsa klywes dhiworth pubonan a dremenas an betrolva po nos Mergher po myttin Yow.