koth27

Koth 27

Dy' Gwener 4/6/04: Dr Victoria De RijkeIt dhiworth Pennskol Middlesex yn Pow Sows re dhiskudhas bos rannyeth arbennik dhe heyji Gernewek. Hi eth dhe Dhownderri yn Kernow Soth Est rag hwithra an dyfrans ynter kwakk Kernewek ha kwakk Kokkni dhiworth Loundres. Herwydh Dr Victoria, agan heyji ni yw moy attes gans sonyow hirra.
Dy' Sul 30/5/04: Bagas rokk Kernewek re dhiskwedhas i dhe vos pur 'rokk-ha-roll' an bennseythun ma. Yth esa KRENA ow seni war Gay Porthbyghan yn Logh rag 'Goel an Mor Logh' de. Kynth esa an howl ow splanna, ha bush a dus owth omlowenhe ilow rokk y'n taves Kernewek, nebes tus a wrug krodhvolas awos bos an son mar ughel. Ordenor an goel Dave Holford veu dannvenys dhiworth Logh dhe Borthbyghan yn skath may hallo govynn orth KRENA seni yn moy kosel. Ny yll KRENA seni yn kosel hag ordenys ens dhe berformya, yndellna i a besyas. Wosa Dave Holford (gwiskys a-vel morlader heb an poppynjay dibleuv) dhe wovynn orta, KRENA a ganas diw gan, '1497' hag 'Athelstan'. Orth diwedh an gan na y feu an tredan treghys ha Dave a leveris bos res dhe GRENA gasa. Ev a leveris orta i dhe ughelhe an son, mes gow o henna! Brian Inman a vynn dannvon reken dhe'n kessedhek ordena rag an goel drefenn bos possybyl shyndya system PA dre dreghi an tredan yn tromm. Ass o an treveth na rokk-ha-roll.
Dy' Yow 27/5/04: Bagas a venynes ow mordardha yn-dann sarf-nija war an arvor Kernewek re wrug kovath nowydh. Teyr benyn re worfennas vyaj 70 mildir dhiworth Syllan bys yn Tewynn Pleustri. Seyth benyn a dhallathas, byttegyns nyns esa marnas teyr neb a gowlwrug an challenj dy' Yow. Yma govenek dhedha gorra an kovath y'n Lyver Kovathow Guinnes. An kynsa benyn war an treth o Andreya Wharry dhiworth Porth Mawgan. Nessa, Cindy Mosey dhiworth Mordir Nowydh hag ena Claire Bunton dhiworth Surri yn Pow Sows. An vyaj re gavas moy es Ł10,000 rag an RNLI ha'n Fondyans Silke Gorldt, neb a dhysk mordardha yn-dann sarf-nija dhe fleghes.
Dy' Lun 24/5/04: Christopher Phillips (16 bloedh) veu dannvenys dhe jayl hedhyw rag seyth blydhen rag denladh. Kuhudhys veu rag ladha baban, hwegh mis y oes, dre y loska erbynn oelas kepar ha batt sel-bell. Y vroder Craig (23 bloedh) veu gorrys yn pryson rag 4 blydhen rag pystiga an baban ha pervertya an fordh justys. Christopher a wrug an denladh yn Essa, byttegyns ev a driga yn Pelynt mayth esa pendra trigys yn-dann own anodho ha'y deylu.
Dy' Sadorn 15/5/04: Hwithroryon re dhiskudhas korf dhe Lannhydrek hag i ow hwithra den koll, Steven Britton. An lywyer kocha eth ha bos koll dy' Lun pan ny wrug ev drehedhes orth y dyller oberi. An den dhiworth Sen Stefan ogas dhe Sen Ostell o 43 bloedh y oes. Y garr veu diskudhys dy' Mergher yn moengleudh Tredhorge wosa bos distruys gans tan. Pymp person (diw venyn ha dew woer) re beu kemmerys gans an kreslu a-vel rann an hwithransow. Y fydh korf an den kemmerys dhe glavji Trelisk rag hwithrans-wosa-mernans hag yma bagas a withysi gres yn unn hwithra an tyller mayth esa an korf rag lerghow.
Dy' Meurth 11/5/04: Yma Europ ow prederi a-dro dhe ughelhe nivel a Gernewek - ha mar kwrons i sewena, poester a vydh gorrys war dreyloryon a'n taves teythyek. Kernewek yw aswonnys yn-dann an Chartour Europek rag Tavosow Ranndirek y'n eur ma wosa ervirans nans yw etek mis gans menysters. An governans Spaynek re worras movyansow amendya dhe'n korf-lagha Europek neb a allsa herdhya nivel an taves ughella hwath. Herwydh an profyansow, governansow gwlasek a wrussa henwel yethow devnydhys gans an bobell may hallens kestava soedhvaow a'n UE. Mars yw henwys Kernewek, an poblek a ylli skrifa dhe Brussels der Gernewek, ha degemmeres gorthybow der an henyeth. An governans nowydh Pow Spayn a garsa gwaynya aswonnvos rag tavosow kepar ha Euskadek ha Galythyek. Mar kwrella mos war-rag, governans Westminster a via yn-dann wasketh rag henwel yethow kepar ha Kernewek ha Kembrek. An profyans a wra meur a dhadhel ha nebes tus a grys na wrussa oberi yn-ta drefenn bos res treylya re a daklow. Wosa dalleth mis Me, yma ugens yeth soedhogyl y'n Unyans Europek.
Dy' Sadorn 8/5/04: Kernow a warias erbynn Dewnans hedhyw y'n Kamporyeth 'Rugbi Kontethek. An kwarter-finel veu synsys dhe'n 'Rek' yn Rysrudh. Bush bras a dus a dheuth kynth esa Dydh Flora Hellys an kethsem dydh na. Kernow a gollas 6 - 22. An skor o kompoes bys yn diwettha rann an fit. Ytho wosa hemma na vydh lu bras a owr ha du ow kemmeres an fordh war tu ha Loundres.
Dy' Meurth 4/5/04: Den, 53 bloedh y oes, re verwis an myttin ma yn klavji Derriford wosa bos tennys gans an kreslu y'n ouryow a-var. Gwithysi gres ervys veu gelwys dhe Lewannek ogas dhe Lannstefan dhe naw eur nyhewer. Skila an freudh o argyans y'n chi. 1.25 y'n myttin ha'n den veu tennys. Gweres veu res dhodho dhe'n tyller hag ena kemmerys yn karr-klavji askell-dro dhe Aberplymm le may ferwis. An Kuntelles Krodhvolasow an Kreslu Omsevyek re gemmeras lyw an hwithrans yn-dann y rewl.
Dy' Meurth 4/5/04: Ajenteth an Kyrghynnedh re ros kummyas dhe Wonisyow Kyrghynnedhel Kernow (CES) dhe ystynna poll-skoell United Downs. Teythyogyon a'n ranndir Sen Day re sevis erbynn an dowlenn rag termyn hir. Byttegyns, i re gollas an strivyans.
Dy' Gwener 30/4/04: Keginer a-vri der an bellwolok, Rick Stein, re erviras kildenna dhiworth towlenn dhisplegya yn Tewynn Pleustri. Yth esa govenek dhodho daswul an ostel 'Rocklands' a-wartha Treth Tollkarn. Byttegyns, kost an projekt a ynkressyas dhiworth Ł1.5 milvil bys yn Ł 6.5milvil. Drefenn na wra ev devnydh a skoedhyoryon arghansek kepar ha negysyow erell hag arghanntiow, re ger o an pris rag negys-teylu. Lemmyn, ev a vynn poeshe war y negysyow yn Lannwedhennek. Yma dhodho an Boesti Pysk, ostell, deli, ha lemmyn askloetti. Mes y ervirans re wrug dhe negysyow erell a Dewynn Pleustri pur serrys. Yth esens i hwansek a weles tus gans moy a arghans dhedha. Yma an dre owth assaya lesa hy les dres tus yowynk ha kluboryon, dhe deyluyow ha tus golusek. Rick Stein re leveris bos edrek warnodho wosa kildenna, hag ev re gollas milyow a beunow war an projekt ma.
Dy' Mergher 28/4/04: Onan an bagas neb a dhallathas an Edenva re dhellos y dowlenn hedhyw rag dri projekt meur yn kever an gewer ha'n tir dhe Gernow Gogledh. Jonathan Ball a garsa drehevel kresenn dornysi war boll-skoell yn ogas dhe'n dre. Homm a via yett may hallo bos lies tyller tornyas kelmys warbarth ynter Tewynn Pleustri ha Dewnans Gogledh. An dowlenn Ł25milvil yw pur yowynk y'n eur ma, mes wosa bos gorfennys, Mr Ball a'n jeves govenek bos fenten arghans rag an ranndir. An nessa kamm yw kowlwul studhyans-gweythya gans skoedhyans Konsel Kernow Gogledh ha Soedhva MET yn Karesk. Yma negysyow Porthbud ow tynnerghi an dowlenn dre vras.
Dy' Sadorn 24/4/04: Dydh Trevudhek veu synsys hedhyw yn Kammbronn, byttegyns, nyns esa tro an dre gans an jynnow-eth hevlyna. Ny allas an ordenoryon kavoes surheans rag an hwarvos drefenn an kreslu dhe grysi bos pur dheantel rag an virysi. Ytho hedhyw yth esa an jynnow-eth y'n dre, yn-dann eth, mes heb movya vydh. Kyn nag o mar dha awos an skila na, meur a dus a dheuth drefenn bos an gewer pur howlek.   Pub blydhen, tus an dre ha ranndir Kerrier a dheu warbarth gans kana, donsya, ha stallow a bub sort. An stretys yw leun a dus owth omjersya awos an den meur Trevudhek. Ev o an kynsa y'n bys dhe wul jynn-eth neb a ylli movya yn-dann y nerth y honan.
Dy' Meurth 20/4/04: Teyr hannas Kernewek eth dhe Loundres hedhyw rag keskusulya gans an governans a-dro dhe'n Konvenshon Europek. Rag lies blydhen, kenedhlow kepar ha'n Skotyon yn Ulster hag erell re gavas skoedhyans arghansek rag aga gonisogeth, byttegyns pupprys Kernow o gesys a-denewan. Hedhyw, Kslr Bert Biscoe, Dr Nigel Hicks ha John Angarrack a ros kas Kernow. Herwydh Mr Angarrack, kemmerys yn ta ens gans an venysters. Dell grys ev, yma chons krev lemmyn bos skoedhyans ow tos dhe Gernow kyns re bell rag dyski agan gonisogeth ha taves y'gan skolyow, hag arghans rag an media keffrys. Ny wra pub tra hwarvos yn uskis gans taklow a'n par ma, mes herwydh govenek an gaskyrghoryon, yn blydhen po diw, y fydhyn ni ow kweles an studh ow tos ha bos gwell, hag arghans rag kowethasow kepar ha Kowethas An Yeth ha Kesva an Taves.
Dy' Gwener 16/4/04: Yma an piwas PanKeltek gans Kernow arta wosa gwaynya an kesstriv synsys yn Trali yn Iwerdhon nyhewer. An bagas 'Keltyon Vyw' eth di gans kan 'Treusporthys' skrifys gans Ray Delf ha treylys gans Pol Hodge. An band a gesstrivas erbynn Alban, Kembra, hag Iwerdhon hevlyna ha degemmeres hanaf ha mil peuns. Kernow a waynyas warlyna ynwedh gans kan dhiworth 'Treys Noeth'. NK a garsa leverel dhe Geltyon Vyw yn kolonnek 'gwrys yn ta'.
Dy' Yow 8/4/04: Kowethas bus 'First' re leveris hedhyw i dhe gelli moy es deg lywyer ha hwegh ugens awos dyfyk a vri gans nebes hynsyow y'n Kernow. Keffrys ha henna, yma an kowethas ow tegea an karrji kyttrin Sen Ostell. An RMT re geskewsis gans rewloryon, byttegyns ny hevel bos possybyl selwel an ober. First a wrug koll arghansek milvil peuns ha hanter warlyna. An nowodhow ma a vydh drog rag lies treveglos vyghan a-hys Kernow ynwedh ha kynth esa mona dhiworth an governans rag skoedhya nebes gonisyow. Lemmyn, tus war an oryon a vydh moy ynysekhes es kyns.
Dy' Lun 5/4/04: Pris sten re yskynnas Ł1000 y'n mis yw passys, ha lemmyn yth yw a-dro dhe Ł4800 an tonnas. Awos an nowodhow da ma, perghenn Kroftiji Dheghow a lever bos possybyl balya moen a gnas gweth, hag y fydh bri brassa y'n lyvrow bri-ha-koll. Baseresult a vynn dastalleth balya y'n seythunyow ow tos, mes res yw dhedha dastrehevel an velyn kyns bos possybyl gwaynya sten. Dell grys perghenn an bal, Kevin Williams, hemma a hwer a-ji diw vlydhen. Byttegyns, hwath yma Dastineythyans KPR owth assaya dhe brena tir an bal dre Arghadow Prena Konstrynys. Yth esa pennskrifer NK ow keskewsel gans is-pennlywydh KPR hedhyw, John Dobson, ha dell hevel yma an kowethas ow medhelhe y dyller war an destenn. Ev a leveris bos Baseresult ha KPR ow kesoberi y'n eur ma. Mar pydh termyn da rag balya sten arta yn Kernow, dell hevel yma an prys ma omma lemmyn, po ow tos yn skon. Res yw dhyn skoedhya Baseresult y'n misyow ow tos.
Dy' Lun 5/4/04: Kowethas an Yeth Kernewek a wra synsi Pennseythun Gernewek rag pub gradh, po dallethor po kewser freth, an bennseythun kyns Lowender Pyran. Ytho tus a yll restra dy'goel unn seythun hag omjersya gans an dhew hwarvos. Ytho gorr dy' Gwener 8ves mis Hedra - dy' Lun 11ves mis Hedra y'th lyver-dydhyow ha gortos rag kedhlow pella kyns es pell.
Dy' Gwener 2/4/04: Nans yw dew ugens blydhen, diw hwoer a brenas Ynys Logh rag Ł22mil. Babs hag Evelyn Atkins a dheuth dhiworth Surri yn unn hwilas bywnans kosel ha naturek. I a witha an ynys erbynn displegyans ha gweres ydhyn. Evelyn (Attie) a verwis 1997, byttegyns hy hwoer a besyas erbynn hy mernans an seythun ma. Hi a asas an ynys dhe Drest Bywnans Gwyls Kernow, may hallo an ynys pesya a-vel tyller naturek bys vykken. Pennskrifer NK (Matthew Clarke) a borth kov anedhi pan eth an Bennseythun Gernewek dhe'n ynys 1997. Kyn ferwis hy hwoer marnas mis kyns, hi a ros dhyn wolkomm toemm. Mamm an pennskrifer a borth kov a oberi gans Evelyn nans yw lies blydhen dhe ICI yn Loundres.
Dy' Meurth 30/3/04: Askell-dro Merthyn dhiworth RNAS Kilros ogas dhe Hellys a goedhas 'mes an ayr hedhyw yn droglamm adhyski lywyoryon nowydh. Y'n gwella prys, nyns esa mernans, mes an dhew lyw veu kemmerys dhe glavji gans pystigow byghan. Yma bagas dhiworth RNAS Yeovilton ow hwithra an dinijans. An awel o da ha'n ebrenn o dhigommol pan hwarveu an droglamm nebes kyns teyr eur dohajydhweyth. Yth esa pymp den y'n askell-dro y'n termyn na.
Dy' Sadorn 27/3/04: Wosa gortos termyn hir rag an gewer ha chekkya bos pubonan salow, HMS Scylla veu sedhys y'n mor dohajydh Sadorn. Lemmyn yma hi a'y esedh war leur an mor may hallo sedhoryon neuvya a-dro dhedhi, ha may hallo puskes hag enyvales an mor kavoes trigva nowydh. An gorhel o an diwettha a'y far drehevys yn Porth Dewnans, hag yth esa kesstriv rag kowethasow neb a'n jeva hwans a wul devnydh anedhi. Wortiwedh, An Gwithti Mor Kenedhlek a brofyas dew kans mil peuns rag prena Scylla. An gwithti yn Aberplymm a vynn hy usya a-vel rann a'y ober. Heb mar, Scylla a vydh marthus rag tornyaseth yn Kernow Soth Est, hag yma porthow kepar ha Logh ow towlenna tenna an sedhoryon ha negysyow.
Dy' Sadorn 27/3/04: An dohajydh ma y fydh HMS Scylla sedhys y'n mor, unn mildir dhiworth arvor Kernow Soth East. Y fydh an gorhel an kynsa krib annaturek sedhi yn Europ, ha dell grys soedhogyon tornyaseth, meur a sedhoryon a wra dos rag hwithra a-ji an Scylla wosa bos sedhys. An sedhans y honan a hwer wosa diw owr pan dardh tanbellenigyow yn goeles an gorhel. Hi a vydh war leur an mor teyr mynysenn wosa an tardh. Dell hevel y fydh tus ow tos dhiworth ogas ha pell yn unn waytya gweles an hwarvos ma.
Dy' Lun 22/3/04: Hedhyw o ynkleudyans Richard Ford, neb a verwis y'n seythun yw passyes, 61 bloedh y oes. Genys veu yn Dewnans a gerens Kernewek, ev a dheuth dhe'n Ducheth nans yw hwegh blydhen wosa oberi yn Loundres a-vel programmer jynnow amontya ha bos marner yn morlu marchont. Ev o onan an selyoroyn Unnveredh Kernewek hag a-gynsow o kaskyrgher gans Senedh Kernow. Ev a wre oberi ogas dhe Druru gans y gares Hilda Wasley. Ev a dhros meur a nerth dhe dhasserghyans a lies tu an gonisogeth Kernow, hag o gwelys orth pub treveth mayth esa chons a wevya baner Pyran.
Dy' Yow 18/3/04: Morgan Stanley a wovynnas orth tus a-hys Breten Veur yn kever aga omaswonnvos kenedhlek, ha’n sywyansow yw pur dhe les ragon yn Kernow. Peswar kansrann ha dew ugens a leveris aga bos Kernowyon kyns es po Sowson po Breten Veurek. An niver rag pobell yn Kembra ow leverel aga bos Kembroyon kyns es Breten Veurek yw seyth kansrann ha tri ugens. Byttegyns an niver ow leverel aga bos neppyth arall yn kontethow Sowsnek o marnas diw gansrann warn ugens. Yma Mebyon Kernow ow tynnerghi an niverow ma.
Dy' Meurth 16/3/04: Maw Kernewek, 16 bloedh y oes, re beu kuhudhys yn lys lagha rag denladh babi. An lys yn Karesk a glywas Christopher Phillips a Essa a loskas an baban a-der-dro kepar ha batt. Dell hevel, Christopher a dheuth ha kasa an babi, 9 mis y oes, wosa dos ha triga yn chi gans y vroder ha mamm an baban. Michael Phillips, 23 bloedh y oes, a veu kuhudhys yn lagha rag settya warnodho ha godros dhe dhustunier. An dhew a dhegemmer aga breus diwettha.
Dy' Gwener 12/3/04: Band henwys 'Keltyon Byw' veu dewisys an gorthugher ma yn kesstrif PanKeltek Kernow dhe gana a-barth Kernow nessa mis yn Iwerdhon. Ray Delf, Anne Kennedy Truscott, Cas & Jojo Davey, Alan Pengelly, Chris Humphries ha Jen Dyer a wra performya kan henwys 'Treusporthys' yn Trali, 13ves - 18ves mis Ebryll. An gan veu treylys dhe Gernewek gans Pol Hodge.
Dy' Gwener 5/3/04: Wosa droglamm kerri war an A374 ogas dhe Troes Trerewl, tressa den re verwis. Yth esa Ricky Weller, 18 bloedh, dhiworth Lannales, a-ji Renault Clio neb a skwattyas erbynn Land Rover ogas dhe'n fordh-a-dro. Ev a verwis dhe Glavji Derriford yn Aberplymm nos Yow. Lywyer Sean Rice, 18 bloedh ha dhiworth Pollbathek (gwel an skeusenn), gans Simon Bunt, 18 bloedh ha trigys yn Lannales, a verwis orth an le. Ny borthas an dhew dhen a-ji an Land Rover marnas pystigow byghan. Yma'n kreslu ow hwithra an kas hwath.
Dy' Meurth 2/3/04: Boes Furniss, yn Fordh Egloshal ogas dhe Rysrudh a vydh perghennys gans bagas a negysyow yn Manchester. Arghans a Ł550 mil dhiworth Finance Cornwall re beu devnydhys y'n prenans. Furniss a wra tesennow kales ha lies sort a voes pebys. Degemmeroryon KPMG a leveris an gwerth dhe selwel 150 soedh neb esa yn-dann wodros pan veu gelwys an kowethas menystrans. An kowethas nowydh a vydh henwys Furniss Limited
Dy' Sul 29/2/04: An Jydh Lowender veu synsys 28ves mis Hwevrer 2004 hag yth o sewen kynth esa hager awel. Deg person warn ugens a dheuth dhe'n hwarvos dhe Fordh Ponsmeur, nebes a dheuth dhiworth Kembra ha Gloucestershire kynth esa meur a ergh. Bagas a 15 kerdhor a veu ledys gans Pol Hodge a-dro dhe'n ranndir ha dehweles dhe bastiow ha koffi, res porres o rag bos yagh erbynn an oer. Y feu spenys an dohajydh yn unn wari gwariow, goslowes orth areth Ken George yn kever geryow nowydh yn Bywnans Ke, ha nosweyth lowen a venestrouthi ilowek. Godhon gras dhe Bol Hodge ha Jane Ninnis a'ga gweres yn unn restra an jydh, Chris James a'y ilow krowd, Ken George a'y areth, Just Cornish ha Gwynn ha Du a'ga fiwasow rag an gwari dall, ha dhe bub huni neb a dheuth hag omlowenhe warbarth. Ni a'n gwra arta!!!