Dy' Sul 8/8/04: Peswar den re beu selwys dhiworth aga skath 'Pink Lady' tri hans mildir war barth west a Syllan. Yth esens i owth assaya settya kovath nowydh rag revya a-hys an Keynvor Atlantek, Kanada dhe Gernow. Y'n gwettha prys, hager awel a skwattyas an skath ha'y derri yn diw rann. Gwithysi an mor Aberfal a dhannvonas selwysi dhedha. I re beu kemmerys a'n mor gans gorhel Swedek hag a vydh gorrys dhe Iwerdhon a-vorow. An kethsem hager awel re skattyas Kernow hedhyw gans tommals a law ha gwyns. 
Dy' Gwener 6/8/04: Skwatt-kerri war an A30 war Halfowwydh re worras maw, 5 bloedh y oes, yn klavji Derriford. Pystigys yn town ywa wosa an skwatt penn ha penn. Dew dhen arall a-ji Renault Clio veu kemmerys dhe'n klavji y'n Ambo-ayr Kernow, ha dew dhen dhiworth Discovery eth dhe'n klavji y'n Ambo-ayr Dewnans. Askell-dro Myghtern an Mor dhiworth Kilros veu gelwys keffrys. An fordh veur A30 o deges dres an dohajydh ha'n nos. An daromdag a ystynna hwegh mildir, byttegyns y feu kudynnow kerri mar bell ha Karesk.
Dy' Yow 5/8/04: Darvos truedhek o hedhyw yn Egloskrug ha Carol ha Graham Fisher ynkleudhys y'n dor. Yth esa aga horfow kemmerys dhiworth karrji Perch le may hwre an kopel oberi. Nos Tansys warlyna i a verwis y'ga fennti wosa bos tennys ha gweskys. Lost a gerri a dhibarthas an karrji hanterdydh hedhyw ha mos yn lent war-tu ha'n eglos yn Egloskrug. Dew vroder re beu kemmerys gans an kreslu ha charjys gans ladhva an kopel. Y fydhons i ow tehweles dhe'n lys lagha 13ves a vis Hedra. 
Dy' Yow 5/8/04: Dowr 'Soth West' a wra ynkressya aga charjow dowr dre seytek kansrann mis Ebryll. Mirgi an gowethasow dowr 'Ofwat' re ros dhe SWW kummyas wosa hwithra towlennow ha lyvrow. Res yw dhe'n kowethas kavoes an mona may hallo gwellhe gonisyow herwydh rewlow nowydh Europek. Byttegyns, yma own rag pobell a Gernow drefenn bos an isella pe, mes an dowr yw an moyha ker yn Breten Veur.   
Dy' Gwener 30/7/04: Den medhow a ladhas tas-gwynn gans unn skwatt yn unnik yn Fowwydh mis Genver. An omsettyans hager ma a wrug hwarvos wosa argyans a-dro dhe wedrenn korev terrys. Daemion Cain-Purcell, 23 bloedh y oes, a broffyas ev dhe vos kablus a'n denladh. Patrick Parkes, 65 bloedh y oes, a verwis yn klavji awos pystigow dh'y benn. Hedhyw, Cain-Purcell eth a-dherag lys an gurun Karesk. An breusyas a'n gorras yn pryson rag pymp blydhen. Yth esa skruth y'n porth byghan awos an mernans. Herwydh usadow kosel ha leun a gres yw. A-vri yw dhe havysi ha sterennow an bys entertaynment awos an goel Daphne Du Maurier ha studhyo rekordya a-vri (Sawmills) yn ogas. Wosa an omsettyans euthek ma, konseloryon an dre a vynn orth an kreslu ynkressya nivel a withysi gres ena.   
Dy' Mergher 28/7/04: Den re beu gorrys dhe bryson hedhyw rag dewdhek mis rag denladh a dhen Essa. Alan Mark, 46 bloedh y oes, yw pennrewler Nationwide Heating Services. An kowethas ma veu gelwys gans Princess Yachts a Aberplymm rag fyttya pibennow nowydh ha glanhe argh. Nans ye seytek mis Ben Pinkham dhiworth Essa, veu dannvenys dhe wul an gonis heb bos dyskys ha heb an daffar ewn. An argh a dardhas drefenn nag esa golow salow res dhodho dhe usya y'n argh. Tan veu gorrys dhe ethenn y'n argh awos an torchenn koth. Ben Pinkham veu gorrys dhe glavji le may ferwis.
Dy' Gwener 23/7/04: Pyskadoryon re gavas penn y'ga roesow. An diskudhans euthek ma veu gwrys hag i ow pyskessa ogas dhe Logh. An kreslu a grys y vos a dhiworth sedher ha na wrons igeri hwithrans moldra. An penn veu kemmerys gans an gwithysi gres dhe glavji Derriford yn Pow Sows rag post-mortem.
Dy’ Yow 22/7/04: Dew kans den a vydh kellys dhiworth RAF Sen Mawgan wosa dag an MOD dhe goedha war an ayrva. Dres henna an bagas nija diwettha ena a vydh dasworrys dhe Ynys Mon yn Kembra. An koll ma a vydh euthek rag an ayrva, Tewynn Pleustri, ha kyns oll, drog rag Ayrborth Kernow. An ayrborth a gevrann an hyns-nija gans Sen Mawgan. Nyns yw res dhedha gwitha na tour-kontrollya na tanlu y’n eur ma. Byttegyns, wosa an chanjys ow tos 2006, res vydh dhedha aga rewlya. Hemm yw nowodhow tewl dhe’n ayrborth awos bos kaletter dhedha y’n eur ma gans kostow, ha gweythya an tanlu ha’n tour a vydh re ger. Konsel Kernow a’n jeves own na vydh herwydh erbys teg dhe witha an ayrborth yn igor. Kannasow a dhe Loundres dy’ Lun ha metya gans John Prescott a-dro dhe denkys Ayrborth Kernow. 
Dy' Yow 22/7/04: Benyn re beu kemmerys gans hwithroryon ow helghya an person neb a dhenladhas Peter Solheim. Konsler an blu Aberfal, 56 bloedh y oes, a veu kevys y'n mor gans pyskador. Yth esa pystigow koynt war y gorf. Yn kynsa le yth esa tybyans dhe'n hwithroryon bos kevrenn dhe'n gemmynnieth pagan. Y skath direwl a veu kevys dhe Borth Mylor. An venyn yw 56 bloedh hag a veu sesyes gans an kreslu de.  
Dy' Mergher 14/7/04: Dew dhen re omdhiskwedhas a-dherag lys an justisyow yn Torquay (Dewnans). Charjys ens gans moldra Carol ha Graham Fisher warlyna. An denladh ma a wrug hwarvos Nos Tansys dhe'ga fetrolva ogas dhe Bonsrys. I a verwis wosa bos tennys ha skwattys. Lee Firkins, 29, ha'y vroder Robert, 31, veu gorrys yn-dann with bys y'n 23ves a vis Gortheren. Ena y fydhons i owth omdhiskwedhes a-dherag breusysi dhe Lys Lagha an Gurun Sowsnek yn Karesk. An kreslu re gemmeras nebes tus kyns heb i dhe vos charjys. An kas ma re wrug an pennlinennow a-hys Breten Veur awos euthekter an moldrans.  
Dy' Mergher 14/7/04: Lywyer karr-klavji re dhianksa gans difennans lywya 12 mis ha spal (£1000) yn unnik. Ev a lywyas war du kamm an fordh 24ves a vis Me ogas dhe Bonsrys. Dew dhen veu ledhys y'n droglamm euthek. Kuhudhys a lywya heb war hag attendyans lowr veu Graham Dudman, 60 bloedh y oes. Y garr-klavji a skwattyas penn ha penn erbynn Ford Fiesta. Yth esa ev a-dherag Justisyow Lannstefan hedhyw. 
Dy' Lun 5/7/04: Kowethas an Yeth Kernewek re weresas askorroryon An Simpsons an mis ma. Ymons i ow kul hwedhel mayth usi Lisa Simpson ow poenya a-dro dh'y chi yn unn arma "rydhsys rag Kernow lemmyn". An rann arbennik ma a vydh tavethlys dydh Nadelik. An Kowethas a gynnigas bos tybyans rag Lisa dhe wevya baner Pyran keffrys ha garma "Kernow bys vykken". An galow rag gweres treylya veu dannvenys der an wiasva Warlinenn (www.cornish-language.org). An seythun kyns yth esa govynn rag gweres dhiworth askorroryon an dowlenn bellwolok 'Faking It". Ymons i ow kul fylm gans mowes dhiworth Breannek yn kever donsya. Orth neb unn pols, mamm an vowes a lever neppyth dh'y vyrgh y'gan taves. An wask a dhellos erthyglow a-dro dhe'n Simpsons a-hys Breten Veur. Pol Hodge a gewsis yn y gever der Pirate FM ha BBC Radyo Kernow.
Dy' Mergher 30/6/04: Nans yw diw seythun korf veu kevys y'n mor ogas dhe Ven Eglos gans pyskador. Ev o Peder Solheim, 56 bloedh y oes ha konsler an blu Aberfal. Y skath veu kevys ow nija heb lywydh ogas dhe Vyler y'n seythun yw passyes. Hedhyw, Kreslu Kernow re leveris ev dhe verwel yn-dann nerth a nebonan... ha lemmyn bos an kas ma hwithrans moldra.   
Dy' Meurth 29/6/04: Diharasa a garsen wosa teyr seythun heb travydh skrifys omma. An skila yw an pennskrifer (Matthew Clarke = my ow honan) re vovyas dhiworth Lyskerrys yn Kernow Est ha dehweles dhe Rysrudh. Heb mar, hwi a woer ass yw movya goderrans bras yn bywnans. Lemmyn trigys ov yn chi ogas dhe'm soedhva heb edhomm a dhevnydhya karr pub dydh oll. Gwynn ow bys nag yw res dhymm tretha Dowr Tamer diwweyth pub dydh. Y'n termyn tremenys, an teyr seythun na, meur re hwarveu yn Kernow. Kynsa: Fransisco Arce Montes yw dannvenys dhe bryson rag deg blydhen warn ugens. Byttegyns, a-gynsow ni re glywas ev dhe bysi dhe'n breusyas arta, ha res yw dhe deylu Caroline Dickinson dehweles dhe Vreten Vyghan ha dasvywa an hwarvosow euthek. Nessa: yma bagas selwel owth assaya tenna an kok Bretonek 'Bugaled Breizh' yn-mes an mor ogas dhe'n Lysardh may hallo bos korfow an byskadoryon kemmerys dhe-ves gans aga theyluyow. Keffrys ha henna, an kreslu Bretonek a garsa hwithra rag lerghow moy. Tressa: Maw yowynk a verwis dhe Bortherras wosa mordonn a'n kemmeras. Ev o marnas peswar bloedh. Y vamm a lammas y'n mor hag assaya y selwel. Y'n gwettha prys ev a verwis kyns ev dhe dhehweles dhe'n klavji yn Truru. Peswara: Kernow re welas lies goel a vri kepar ha Goel Mazey ha Dydh Murdoch. Gwynn ow bys lemmyn ri dhywgh an nowodhow da bos Nowodhow Kernow yn fyw arta. Ytho, leverewgh yndella dhe'gas kowetha oll. 
Dy' Gwener 11/6/04: Nans yw hwegh blydhen (1996), bagas a vowysi skol Kernewek eth dhe Vreten Vyghan rag dy'goel. Y'n gwettha prys y korefennas an goel yn truedhek pan ferwis Caroline. Yth esens i ow kodriga yn ostell yowynkneth Plen Fougieres. Byttegyns an vowes dhiworth Kollji an Gemmynieth Lannstefan, 13 bloedh hy oes, veu ledhys. Wosa helgh hir, Fransisco Arce Montes veu kemmerys gans an kreslu ha charjys gans ladhva. Dy' Lun o dalleth an kas laghyl yn lys Bretonek yn Rennes. An breusyas re glywas dhiworth mamm Caroline (Sue Dickinson) ha nebes a'y howetha skol. Onan anedha a leveris hi dhe glywes tros kronkya ha gweles movyans a'y diwwarr. Mes hi a brederi bos hulla-nos dhe Caroline. Koweth arall a leveris hi dhe weles den koynt neb a wrug dhe'n vowysi own. Sue Dickinson a gewsis a-dro dhe'n diwettha prys hi dhe geskewsel gans Caroline der an pellgowser. Dell hevel, nyns o da an ostell gans Caroline, mes da o gensi Breten Vyghan. An lys re glywas dhiworth gwithysi gres an dre ha doctour neb a leveris bos Montes 'deviant'. Dy' Yow y tiberthas an lys Montes yn unn oela. Mes an gwasketh o poes rag teylu Dickinson keffrys. Res o dhe Sue Dickinson mos yn-mes an lys unnweyth wosa klywes kedhlow a-dro dhe'n DNA. Servyas Spaynyek, Fransisco Arce Montes, 54 bloedh y oes, re leveris ev dhe vos kablus rag ravna Caroline, mes ev a lever y vos angablus rag hy ladha. Herwyth y gov, yth esa hi owth anella pan dhiberthas ev hy gweli y'n ostell. An kas laghyl yn Breten Vyghan a bes nessa seythun.
Kovskrifenn 28
Dy' Mergher 18/8/04: Y fydh naw bardh nowydh warn ugens dhe'n Orsedh hevlyna yn Truru. Y'ga mysk yma Bill Bawden awos y wonis lel a-barth Amkan Onan. Broder ha hwoer a vydh gelwys a-ji an kylgh warbarth. Hilary ha Will Coleman a gemmer an onor awos aga gonis dhe ilow a Gernow. Eileen Carter a wra holya y'n lergh hy myrgh ha dos ha bos bardhes. Eileen yw aswonnys rag hy ober gans Projekt Sen Pyran. Naw anedha a vydh gelwys rag seweni y'ga apposyansow y'gan taves nyni. Nebes anedha a dheu dhiworth Kernow, nebes moy a dheu dhiworth Dewnans ha Dorset, ha kepar ha blydhynyow kyns, yma nebes dhiworth Awstrali ha Kanada. Gorsedh Kernow yw synsys yn Truru Dy' Sadorn 4a a vis Gwynngala.  
Dy' Mergher 18/8/04: An Dug re dheuth dhe Gernow hedhyw rag gweles an distruyans yn Kastell Boterel. Karlys a gerdhas a-der-dro dhe'n dre ha metya an bobell ha'n dus re wrug aga selwel. Hag ev ena, y teuth moy glaw bras a-hys an Ducheth. Ev a leveris "meur ras" dhe'n tanlu, kreslu ha RAF. Keffrys ha henna, ev re ros mona bras war-tu ha'n argh selys rag gweres an dre. An kaskyrgh rag arghans ma yw ordenys gans arghannti NatWest.   
Dy' Lun ha dy' Meurth 16-17/8/04: Dy' Lun a dhallathas herwydh usadow yn Kastell Boterel, byttegyns an dohajydh na y teuth glaw bras war an dreveglos. Yn gwir, teyr meusva a goedhas yn diw our, henn yw an myns gwaytys rag an mis. Awos an hager glaw ma, ha'n tireth keffrys, liv tromm meur a resegas dres an dre, tri dhe dheg troeshes y dhownder. Kerri veu tewlys y'n fros, ow skwattya chiow, ha gans an dowr krev, a dhistruas drehevyansow, fordhow, chiow ha pons.  Distowgh y feu towlenn selwya gorrys yn y le may hallo an kreslu, tanlu, ha Konsel Kernow selwel tus dhiworth tohow a'ga chiow. Hwegh askell-dro veu gelwys rag kuntell tus ynysekhes gans an dowr. Kynth o an fros mar hager, marthus yw derivas nag esa kellys bywnans mann. Ny woer an kreslu hwath mars yw pymthek person saw hwath. I a garsa kavoes kedhlow y'ga hever. An kudynn ragdha mar mynnons amontya pub person; yw asswonn pub havyas neb a vysytyas an dre an jydh na ha gasa karr ena. Lemmyn, dalleth a wra an oberans may hallo Kastell Boterel dehweles dhe vywnans pub-dydhyek. Is-pennmenyster Breten Veur, Yowann Prescott eth dhe weles an distruyans hedhyw. Govenek yma dhe dus an ranndir, Porthkrag ynwedh, may fo arghans res gans an governans rag drehevel an dre.
Dy' Meurth 7/9/04: Dew dhen re beu kemmerys gans an kreslu a-vel rann an hwithrans moldra a George Jenkin. An dus, 23 bloedh ha 25 bloedh aga oes, yw yn-dann with yn Pennsans. Korf an den marow, 83 bloedh o y oes, a veu kevys yn y ji. Ledhys veu gans men bras dhiworth y lowarth. Y ji a veu leskys.   
Dy' Sadorn 4/9/04: Meur a dus a grys ow bos bardh drefenn ow bos Kernewegor freth. Marth bras yw gansa pan lavarav nag eus hwans dhymm a vos bardh. Martesen kepar ha'n kryjans bos res dhe bub Kernewegor omjersya gans ilow gwerinek ha gwiska tartan. Ny wiskav tartan ha gwell yw genev McFly, Beatles, ha ilow y'n chartys. Nyns yw res dhe bub Kernewegor ombelgya dhe'n steryotayp. Ha my ow leverel hemma, nyns ov erbynn an Orsedh. Dhe wir, y karsen keslowena gans an verdh nowydh. I re ros meur a-barth Kernow, ha heb mar, res yw dhyn ni oll skoedhya an dus a dhiskwa bos Kernow arbennik ha Keltek.  Byttegyns, gans an kethsem anal, res yw dhymm ynnia dhywgh holya an bys keffrys, hag usya taklow ha hwarvos pub-dydhyek ha'y Gernewekhe. Mar ny wrewgh yndella, Kernewegoryon a vydh gwelys a-vel ynys. An bys a wra agan gweles a-vel tus koynt ha didhanus. Merkya a wrug lavarow ha sav-boynt a lies huni pan hwarveu an hwedhel nowodhow treus-vysyek yn kever Lisa Simpson ha'gan taves ni. Lies Kernewegor a leveris dhymm na wodhons travydh a-dro dhe'n kartoen na. 'Piw yw Lisa Simpson?' o an govynn dhiworth lies huni dhe neb kuntelles yeth an werin. Martesen henn a dhiskwa ken poynt a skians. Yesu a wre leverel hemma a'n eglos Kristyon: byw yn mysk an angryjyon. A yllyn nyni dyski neppyth keffrys? Omjersyewgh dhe'n Orsedh.    
Dy' Sadorn 21/8/04: Dew Gernow re waynyas bathow ourek dhe'n Kamporyethow Olympek yn Pow Grek. Revyer Ed Coode dhiworth Bosvenegh o rann an para neb a gavas our y'n kesstriv 'Peswarow Dilyw'. An trygh veu waynyas gans Kanada yn gorfenn-skeusenn. Ena, Ben Ainslie a woelyas ha kavoes our y'n kesstriv klas 'Finn'. Ben yw trigys yn Hampshire y'n dydhyow ma, kynth yw ev maw Aberfal. Bush bras a Gernowyon eth dhe Athens ha skoedhya agan Olympegyon a Gernow. Heb mar y fydh kevywi meur ragdha pan dhehwelons omma dhe Gernow.
Dy' Sul 12/9/04: Dalleth a wrug a-vel dydh pyskessa ryb an mor rag an teylu. Soweth, y hworfennas gans unn den marow, ken onan kellys, ha diw venyn gorrys y'n klavji. Dell hevel, an den, 68 bloedh y oes, a asas y welenn byskessa dhe goedha yn dowr dhe Borthkothan, hag eth war y lergh. Ena, ken den, 39 bloedh y oes, a assayas y weres. An dhew dhen veu holys gans an dhiw venyn. An galow veu degemmerys gans gwithysi an mor Aberfal dhe hwegh eur gorthugherweyth. Askell-dro ha skath sawya veu dannvenys dhe'n arvor na. Kavoes a wrens korf an den koth, ha'n dhiw venyn eth dhe glavji Trelisk yn Ambo-ayr Kernow. An myttin ma, pesya a wrug an hwilans mor-ha-dor rag an nessa den kellys. Y feu tennys a'n dowr a-dro dhe unnek eur.  
Dy' Mergher 8/9/04: Ombrofyer Tori rag Aberfal ha Kammbronn a waynyas skoedhyans y barti leel an gorthugher ma wosa 66 esel a worras aga hanow dhe vovyans neb a assayas y removya. Y'ga mysk yth esa eth esel tewlys mes an parti gans an Soedhva Veur yn Loundres. I a leveris bos kas dhe lies huni erbynn Ashley Crosskey awos y fordh oberi. Byttegyns, an kuntellyans yn Aberfal an gorthugher ma a dhiskwedhas bos kaskyrgh 'smear' er y bynn. Skoedhoryon Mr Crossley a grysi bos kaskyrgh er y bynn awos y vos gey. Penna an parti, Michael Howard a dhannvonas lyther dhe'n kuntellyans yn unn skoedhya an den dhiworth Pennpoll. Wor'tiwedh, eseli an parti Aberfal ha Kammbronn a ros skoedhyans bras dres eghenn dhodho. Heb mar yth esa own dhedha bos media an vro ow kortos rag hwedhel meur ow leverel bos an Doriyon erbynn tus gey. Lemmyn, y fynn Ashley oberi war-tu ha gwaynya an nessa dewisyans kemmyn ha kemmerys an le dhiworth Lavur.  
Dy' Meurth 7/9/04: Konsel Kernow re gavas niverow nowydh neb a dhiskwa studh yeghes agan dens yn Kernow. KK a wovynnas orth dew vil a dus may hallo gweles downder an kaletter. Ha'n sywyans a brov bos an Ducheth gweth es brassa rann a Vreten Veur. Omma, nyns eus medhyk-dens dhe dressa rann an poblans. Tus konyk yeghes a grys ni dhe wul tanbellen-yeghes rag an termyn a dheu. 
An hwithrans a dhiskwa nag yw 200,000 person yn-dann with a vedhyk-dens (poblans dien yw 590,000). Gweth es henna, nyns yw deg kans-rann a'gan fleghes yn-dann with medhyk-dens na NHS na privedh.
Dy' Sul 10/10/04: An Bennseythun Gernewek 2004 yw gorfennys ha re dhasserghas an hengov arta. Dy' Sadorn 9ves a vis Hedra, moy es hanter kans pennden a dheuth warbarth dhe Bark Havysi Trenkrug, ogas dhe Logh. I a synsas sedhegow may hallo pubhuni dyski po gwellhe aga godhvos Kernewek. Yth esa vysyt dohajydhweyth dhe Eglosneot le mayth esa areth a-dro dhe les an henfenestri liwys y'n eglos leel. Dell grys tus akademek, onan an fenestri a dhiskwa gwel kevrennys dhe'n gwariow myrakyl y'n taves Kernewek. Wosa henna, ni eth a-dreus an fordh dhe'n Gwerthji Te, le mayth en ni strothys penn ha min a-ji an gwerthji. Gwynn agan bys, res o dhyn te Kernewek splann. Yth esa Dr Oliver Padell ena keffrys, hag ev a arethas a-dro dhe les a wreythennow henwyn tyller dhe vernans an taves Kernewek yn Kernow Est. Gorthugherweyth ha ni yn klubji Trenkrug. Ros Keltek a dhallathas an gorthugher gans ilow ha dons. Re an havysi dhe'n parky'n keth termyn a gavas chons a assaya agan gonisogeth. Orth y holya o hwarvos nag o gwelys rag peder blydhen. Graham Sandercock eth war an bynk ha kana nebes a'y ganow. Y'n termyn eus passyes, ev a wre kana a-vel hwarvos kemmyn, byttegyns, nyns o possybyl ragdho dhe dhos rag lies blydhen. Hevlyna, yth esa genen a-hys an bennseythun oll. Diwettha war an rol o band rokk Kernewek KRENA. An band yw ledys gans Matthew Clarke. I a berformyas rokk der Gernewek gans nebes kanow arbennik, y'ga mysk: 'Seythun eth dydh' gans an Beatles, 'Trelawni' herwydh gis Hendrix, ha 'Bro Goth Agan Tasow' herwydh gis Status Quo. Dy' Sul ha'n bagasow ow kul moy challenjys y'n yeth. An bagas avonsys a dhisputyas an dhadhel yn kever atal yn Kernow. Yth esa sedhek keffrys ow mires orth poyntow da ha drog dhe'n Bennseythun ha fatell yllyn hy gwellhe. Goslow yndella! Y fydh Pennseythun Gernewek nessa blydhen. Unnweyth arta, synsys vydh dhe Drenkrug, mes an prys ma dhe Bask. Ytho, rester dha dhy'goel lemmyn, ha goelya an spas ma. Godhvos gras a wren dhe Cathy ha Gary An Gov rag restra an Bennseythun. 
Dy' Sadorn 2/10/04: Hevlyna, gorrys yn pryson veu Fransisco Arce Montes. Kuhudhys veu rag ravna ha moldra mowes-skol Caroline Dickinson nans yw eth blydhen. An vowes dhiworth Kollji Lannstefan o 13 bloedh pan verwis. Lys yn Breten Vyghan a ros dhe'n gwas Spaynek deg blydhen warn ugens yn jayl. Byttegyns, ev a wovynnas rag dasklywans y gas. Teylu Caroline re dhellos lavar: yn medhons; "Edrek yw genen bos edhomm dhe Vontes kavoes dasklywans wosa y gas a vis Metheven. Byttegyns, ni a sav ryb agan lavarow orth an termyn na, hag y fydhyn ni ow mos dhe'n dasklywans, py termyn pynag a vo synsys."  
Dy' Yow 30/9/04: An Gresenn Gaia veu selys nans yw tery blydhen may hallo dyski an bobell a-dro dhe nerth dasusadow. Kynth eus meur a les a-dro dhe skians 'glas', ny dennas an gresenn lowr a dus ha degea a wrug hedhyw. Nans yw unn seythun, perghenn an gresenn a assayas kavoes kummyas rag treylya an drehevyans dhe bark negys, byttegyns naghys ova. Lemmyn, an den dhiworth Surri, Ian McIver re wovynnas rag kummyas gul kresenn negys ena rag kowethasow teknolojieth ughel. Dell glywyn, Konsel Kernow Gledh a'n skoedh y'n eur ma. 
Dy' Sul 26/9/04: An kreslu veu gelwys dhe Vadron de wosa derivas bos den ervys ena. Gwithysi gres ervys a worras kylgh a-der-dro an dreveglos a-var y'n myttin. Pobell an dre veu erghys gortos a-ji awos an danjer. Wortiwedh y feu an den kemmerys gans soedhogyon an kreslu. An den yw 51 bloedh y oes hag yn-dann with yn kresenn an kreslu yn Kammbronn.  
Dy' Meurth 21/9/04: Derivys veu hedhyw bos trogh meur y'n lu oberi dhe RAF Sen Mawgan. Deg soedh ha hwegh ugens a vydh kellys drefenn bos dag an MOD ow koedha war lies asrann ervys. An dus yn-dann wodros yma owth oberi war askelli-dro. An brassa rann anedha a vydh dasworrys dhe Ynys Mon yn Kembra ha Portsmouth yn Dorset. An koll ma yw unn densyk moy dhiworth an bas ma. Tus negys an ranndir a's teves own a-barth an ayrborth. Ayrborth Kernow a gevrann an hyns nija hag a wra devnydh an tour keffrys. Mar ny wra pesya nijennow, ny vydh edhomm a witha an tour. Mars eus edhomm an ayrborth gwitha an tour, y fydh kost brassa. Ytho, pyth yw tenkys y'n termyn a dheu rag Ayr Soth West ha Ryanair. Ymons i ow tri meur a havysi ha tus negys omma orth kost isel. Mars yw an ayborth kellys, a wra henna pesya? Ottomma an govynnow rag konselloryon dhe Gonsel Kernow. I a with negys an ayrborth lemmyn wosa kudynnow a-varra hevlyna. Nyns eus godros a dhegea lemmyn, mes a vydh a-dro dhe'n kornel?  
Dy' Mergher 15/9/04: An myttin ma yth esa selwyans marthus teyr mildir dhiworth arvor Kernow, ogas dhe Drefos. An hwedhel a dhallathas 6ves a vis Gwynngala yn Konteth Kerri, Iwerdhon. Benyn a brenas an skath 'Inis Mil' ha kavoes meni dh'y gemmeres dhe Bow Frynk le mayth o tewlys y dhastrehevel. Soweth, terri a wrug pub pomp y'n skath. 8ves a vis Gwynngala ha res o dhe'n pymp marner y asa dhe veudhi. I a hwythas an skath-sawya, ha kyns mos ynno, gorra tan y'n Inis Mil may hallo bos sin dhe worholyon erell y'n rannvor. Soweth, nyns o gwelys, unn kok a bassyas heb aga aswonn, ha nyns o klywys aga galow 'pan-pan'. Wosa neuvya dilyw rag seyth dydh, i a welas arvor Kernow ha kavoes sinell degi-gowser. Askell-dro Kilros veu dannvenys dhedha ha'ga gorra dhe glavji Kernow Ryal yn Truru. Aga hwedhel yw marthus, hag y hyllir krysi bos a les dhe neb gwrier-fylm y'n termyn a dheu.
Dy' Yow 28/10/04: Diw nos a hager-awel re skwattyas an arvor Kernow. Yth esa liv yn Logh ha Porthbyghan, ha'n mor a dorras fos an mor Pennsans. An skila yw depressyans meur y'n keynvor Atlantek ha loer leun neb a dhre morlanow ughel. Res o dhe'n bobel Logh gorra seghyer-tewas yn-mes aga darasow. An gewer o kudynn bras rag an gonisyow tren awos liv war an hyns ogas dhe Bennsans.   Dy' Meurth 26/10/04: An kowethas selys may fo gwithys lies drehevyans ha tyller kelmys dhe'n istori jynnweythel a Gernow re dhegeas. Herwydh dyllans gwask Konsel Kerrier, yth esa kaletter gans arghans ha fondow. Hwel Myghtern Edward a vydh gorrys yn-dann gowethas nowydh. An tenkys rag tylleryow erell yw moy ansertan. Yma y'ga mysk: Jynnjiow Poll; Golowji an Lysardh; ha Golowji Penndin.
Dy' Gwener 22/10/04: Konsel Kernow ha negysyow re dhellos lyvrik hedhyw may hallo an governans selwel Ayrborth Kernow. Hemma a hwer wosa an MOD dhe ervira dannvon askelli-dro RAF Sen Mawgan dhe Gembra. Hebdha ny via tenkys rag an selva, ha heb an selva, ny via na hyns-nija na tour kontrollya, na tanlu. Hedhyw, ledyer an konsel, John Lobb a brofyas an lyvrik dhe'n wask. Ynno yma lies skila rag dri negys nowydh ena. Dannvenys re beu dhe'n governans hag eseli an senedh Westminster yn Kernow. Mar nag yw sewen an kaskyrgh, koll bras y fydh dhe Gernow ha'y negysyow. 
Dy' Sul 17/10/04: Lowender Pyran yw goel a vri a-hys an bys Keltek lemmyn. Awos y vri ha spit dhe fowt a arghans, an Lowender re beu synsys arta hevlyna yn Porth Pyran. Bagas bras a ilewydhyon ha donsoryon re dheuth dhiworth Manow. Da o goslowes orth an kur ow kana yn Manowek. Keffrys ha henna, yth esa bagas dons splann dhiworth Iwerdhon, Donsoryon Imokilly. I a brofyas displetyansow a dhons hengovek a bup gis. Byttegyns, nyns esa kemmys a vagasow ages kyns, ha res yw dhyn aswonn bos dew kudynn omma. Kynsa: kales yw kavoes an arghans dhiworth konselyow lemmyn. Konsel Karrek a wre ri gront dhe Lowender Pyran, mes treghys veu a-gynsow. Nessa: Awos bos lies rewl laghyl nowydh yn dydhyow ma, res yw dhe'n ordenoryon prederi moy yn kever an niver a dus y'n Ostell Ponsmeur. Y'n termyn eus passyes, y wrug an bar degea nevra, ha possybyl o eva dres an myttin wosa an nos kyns. Lemmyn, an bar a dhege diw eur po hanter wosa diw. Nyns esa stall na Kowethas an Yeth Kernewek na Agan Taves hevlyna. Lies gwikor re leveris dhymm nag yw es gwertha meur lowr a wara ena. Nebonan a dybas bos lowr rag kudha kost y gorev yn unnik! RES PORRES yw dhyn kavoes moy arghans rag gonisogeth Kernewek y'n termyn a dheu mar mynnyn y avisya a-hys Kernow ha'n bys. Yma challenj lemmyn dhyn ni gweles fondys ow tos dhiworth Strateji an Yeth!
Dy' Yow 18/11/04: Lywydh Tori, Michael Howard, a dheuth dhe Gernow hedhyw rag gweles fatell a ober gorhemmynnow ASBO. Yth esa ev dhe Aberfal le mayth esa kudynnow bras y'n hav gans yonkers ow kul meur a drobell. ASBO yw gorehemmyn res gans an kreslu neb a dhifenn nebonan dhiworth rannow a dre po stretow. Yth esa Howard ow lanchya polisi ynwedh a-dro dhe dravelloryon. An Toriyon a garsa gweles moy nerth res dhe gonselyow leel rag may hallons aga dannvon dhe ves. Ha'n lywydh Tori ena, menyster skolyow David Miliband eth dhe Skol Kammbronn rag igeri stevell dhyski an termyn a-dheu. An stevell veu drehevys gans an CPR Success Zone (Ranndir sewen Kammbronn Poll Rysrudh). Ha fleghes ha tevysogyon a yll usya an stevell awos hy bos igor a-hys an seythun oll. Ena, Miliband eth dhe Bennskol Kernow dhe Dremogh. 
Dy' Gwener 12/11/04: Goel Fylm Kernow re dhallathas yn Aberfal le may hyllir gweles fylmow yn Kernewek keffrys ha Sowsnek. Yma y'ga mysk, fylm gwrys gans 'Bravetales' neb re dhaswrug Jowann Chi an Hordh. Ken fylm yn Kernewek yw gwaynyer an Govynn Kernewek warlyna. 'Kernow's Kick-Ass Kung Fu Kweens' yw didhanus hag a wra ges a fylmow artys-kas. An Kernewek yw gwrys a-vel is-hyns dubbyes yn trog. 
Dy' Gwener 12/11/04: Kowethas dasdisplegyans CPR Regeneration re dowlennas drehevel tre nowydh war dyller Compair Holman. An weythva a dhegeas a-gynsow, byttegyns yma towlenn lemmyn spena £90 milvil ha drehevel chiow, gwerthjiow ha soedhvaow. CPR a garsa gul displegyans kemmyskys yn furv dirynnys. Dy' Lun y fydh argemmynnys kaskyrgh keskusulya gans an bobell leel. Yma tybyans ynwedh dhe Dhr Tim Williams (lywyas CPR) ri neb unn drehevyans dhe'n taves Kernewek oll may hallo dos ha bos kresenn an yeth. Dr Williams a'n jeves agan bri nes dh'y golonn awos y vos Kembregor. Res yw dhyn ni gortos ha gweles pandra hwer gans an dowlenn. 
Dy' Gwener 5/11/04: An Governans re gavas skwatt meur erbynn aga thowlennow rag kilblegyans ranndirek hedhyw. An niverans yn Pow Sows a'n Kledh-Est re ros NA bras dhedha. Yth esa govenek dhe John Prescott bos an dowlenn degemmerys hag ena y fia possybyl ragdho gul kilblegyans yn tiryow kepar ha'n 'Soth West'. Byttegyns, res yw dhodho dasweles an polici. Martesen gwell via ragdho goslowes orth an bobell. Mar kwrella henna, y fia chons a glywes an galow dhiworthyn ni a-dro dhe Senedh Kernow! Ass yw Prezza truedhek! Y dir y honan re'n snubyans! 
Dy' Gwener 5/11/04: Kanel 4 a's teves an gwiryow rag An Simpsons lemmyn. An teylu kartoun a lanchyas hedhyw der an ganel gans towlennow arbennik. Onan anedha o 'Richard ha Judy'. Rann an dowlenn o keskows a-dro dhe'n kartoun. Matthew Clarke a omdhiskwedhas ha kewsel a-dro dhe Lisa Simpson. Dell wodhon yn ta, y fydh hi ow skoedhya an taves dydh Nadelik. Matthew a gewsis nebes a-dro dhe Gernewek ha gwevya Baner Pyran y'n studhyo.
Dy' Mergher 1/12/04: Menyster towlenna Keith Hill re leveris hedhyw nag yllir nija Baner Pyran heb kummyas towlenna. Esel Senedh Westminster yn Kernow Gledh, Paul Tyler, re gewsis erbynn an ervirans ma. An governans a lever nag yw Baner Pyran 'soedhek'. Baner an Unyans, Baner Pow Sows, Baner Kembra ha Baner Alban yw degemmerys gans soedhogyon. 
Dy' Sul 28/11/04: Arghepskop Kargant, Dr Rowan Williams re dheuth dhe Benneglos Truru hedhyw rag degemmeres kopi an Testament Nowydh, treylys dhe Gernewek. Ev a bregothas ynwedh a-dro dhe les a'gan gonisogeth Keltek. 
Dy' Gwener 25/11/04: Strateji displegya an taves Kernewek re beu unnverhes, wosa keskusulyans efan gans bagasow Kernewek, kewsoryon, konselyow leel hag eseli an boblek. An Strateji Servadow veu dyllys y’n Gwenton yw passyes wosa niver a guntellesow a-hys Kernow a gavas tybyansow dhiworth eseli an boblek. Y feu synsys an keskusulyans dres gwiasva Konsel Kernow ha dre lyther. Kannasow an bagasow Kernewek, Soedhva an Governans Soth West ha Konsel Kernow a skoedhyas gwershon diwettha an strateji dhe gessedhek a-gynsow, kaderys gans Lywydh Konsel Kernow John Lobb. Kopiow pryntys an strateji der Gernewek ha Sowsnek a vydh dyllys kyns pell.  
Dy' Yow 25/11/04: Mappa nowydh re beu gwrys gans Ewrop gans pub taves nebes kewsys diskwedhys warnodho. Y'n gwettha prys nag usi Kernow diskwedhys, byttegyns agan yeth ni a yll bos kevys yn ken tyller! Herwyth an mappa ma, Kernewek yw kewsys dhe Ynys Vanow! An mappa ma veu pryntys yn fest fethus ha res dhe eseli an senedh Ewropek. An ober splann (?) ma yw gweyth an governans Kataloni. Mar mynnir mires orto dha honan: http://www6.gencat.net/llengcat/publications/mapa/index.htm 
Dy' Yow 25/11/04: Kanores ha lappyores Gwenno Saunders (myrgh an skrifer Tim) a wra dehweles dhe'n para donsya 'Riverdance'. Nans yw nebes blydhynyow yth esa hi ow tonsya gansa ha gans 'Lord of the Dance'. Gwenno yw a vri dhe Gernewegoryon awos hi dhe sonskrifa sidi popp der Gembrek ha Kernewek warbarth, hag awos bos hy thas Tim Saunders. Warlyna yth esa hi ow kana yn Kernow dhe'n Edenva.  
Dy' Sul 21/11/04: Gwerthji gwra-e-dha-honan B&Q dhe Gammbronn re worras arwoedh a-ugh an daras gans lavar grasyans der Gernewek warnodho. Yn-medh an arwoedh: "Muer ras dheugh why a'gas prenassa orth B&Q". Marthus yw gweles moy a Gernewek yn pub le y'n dydhyow ma, heb bern a by furv. Meur ras dhe B&Q dhiworth Kernewegoryon.
Dy' Yow 23/12/04: Esel an Senedh Westminster a-barth Kernow Gledh re dherivas bos Keith Hill dhe gildenna war studh Baner Kernow. Paul Tyler re gavas lyther dhiworto neb a lever na wra an menyster poesa war gonselyow na vynn gweythya an lagha towlenna a-dro dhe vaneryow. An hwedhel a dhallathas pan esa hwans dh'y wreg prena baner Pyran rag ro Nadelik. Wosa chekkya an lagha, res o dhedhi amyttya bos kudynn gans hy ro. Henna a worras Paul war an fordh erbynn an menyster. Yn kynsa, yth avowas dhodho bos edhomm kavoes kummyas rag an baner dhiworth y gonsel ranndirek. Lemmyn, apert yw bos henna kildennys. An nowodhow a dorras yn Kernow gans meur a sorr. Gwerthjiow a dherivas bos marthus moy a dus ow tos dhe brena baneryow yn unn serri.  
Dy' Lun 20/12/04: Hwegh esel Tori yn Aberfal ha Kammbronn re gollas aga le y'n parti. Pymp anedha yw kuhudhys gans rewloryon yn Loundres drefenn i dhe skoedhya gwydheo UKIP, hag onan yw kellys drefenn ev dhe sevel erbynn Ashley Crossley. Ashley a wra sevel rag an parti y'n ranndir dhe'n nessa dewisyans, byttegyns lies esel a dhallathas omladh awos y vos kethreythek. An skeusenn a dhiskwa Ashley Crossley. 
Dy' Yow 9/12/04: Peswar ayrwas an Lu Ryal re verwis wosa aga askell-dro Lynx dhiworth RNAS Yeovilton a goedhas y'n mor. Yth esens i ow hwilas marner kellys y'n mor seytek mildir soth a'n penntir Lysardh. An galow na ahevel bos kamm, byttegyns hag i owth hwilas, fyllel a wrug an Lynx heb chons a davethli galow. An ayrwesyon ledhys y'n droglamm ma nos Vergher o Lt Dave Cole, 34, dhiworth Dorset; Lt Rob Dunn, 29, dhiworth Dorset; Lt Jamie Mitchell, 29, Dhiworth Dundee, ha LAEM Richard Darnell, 31, dhiworth Dewnans. Yma hwithrans MOD ow talleth may hallo diskudha an kudynn. An ayrennow Lynx erell a nij hwath.