koth3

Dy Sul 16/9/01: Konnyk ilow re gavas an a-varra dornskrif ilow Kernewek. Lyver pokket yw, ha lemmyn dastyllys gans Mike O'Connor. Ev a wra areth yn y gever dhe Lowender Pyran nessa mis. Ev a garsa klywes ilewydhyon a-lemmyn owth usya an tonyow ma y'ga sedhegow. Moy yn kever an hwedhel ma.

Dy Sadorn 15/9/01: 13:00: Pennskrifores an pow a-dro, Margaret Beckett a glappyas hedhyw gans tiogyon dhe'n Displetyans Kernow Ryal. Yth esa hi ena yn unn assaya gwellhe aga cher wosa kleves karn ha min. Hi a spenas termyn yn unn gerdhes a-dro dhe'n displetyans ha gweles stallys. An vysyt ma yw hy hynsa gwel a Gernow ha hi penn DEFRA, neb a veu formys a-gynsow.

Dy Gwener 14/9/01: Ha Kernewek dyskys dhe fleghes skol dhe'n Displetyans Kernow Ryal rag an kynsa prys, yma govenek nowydh bos les dhe Gonsel Kernow gul gwydheo rag gweres dyskadoryon. Cadwur James re spenas y dermyn dhe'n displetyans ow tyski lavarow sempel ha'n niverow. Awos bos sewen vras, ev ha soedhek yethow Konsel Kernow, Geoff Griggs, re dhallathas towlenn rag rekordya gwydheo dyski. "Hemm a re gweres dhe dhyskadoryon anarbennik mar mynnons gorra rann an studhyansow dhe'n gonisogeth."

Dy Sul 16/9/01: Yma own bos sygerans erbysyek hag arghansek a'n bys, awos distruyans Kresenn Genwerth an Bys, a ylli dos ha bos fest euthek rag Kernow. Esel an Senedh rag Kernow Kledh, Paul Tyler a leveris bos godros an governans dhe denna 'mes a brojektys spenasow poblek, kepar ha ledenhe an A30 ha gevel-fondya Amkan Onan. Byttegyns, neghys yw an tybyans na gans kannas a-barth Amkan Onan, Jason Clark. Ev a leveris an Governans dhe surhe an arghans rag Kernow, ha ny grys ev bos henna kildennys. Brian Mills, dyskador negys dhe'n Skol Negys Kernow, a leveris dhyn mars eus kaletter, y fydh gans alowansow toll hag oker yskynna. Yn-medh Mills, "an problem ragon yn Kernow yw kost chiow yw pur ughel mars yw kehevelys gans pe. Y fydh meur a dus yn kendon pur uskys."

Dy Mergher 19/09/01: Swerda a wolkommas an media hedhyw dhe Bark NegysTalvann yn unn omgommendya. Yth esens i ow kul bri an projektys skoedhys gansa yn Kernow. Yma'n RDA ow spena Ł17.8 milvil omma, henn yw pympes rann an mona spenys y'n 'Soth West'. Ymons i ow skoedhya projektys dhe'n pris Ł400 milvil hag a ylli po selwel po gwitha 1484 soedh. Mes nebes konnyk negys re welas hemma avel stunt PR wosa gwask dhrog pan wrug an RDA dos erbynn an dus neb a vynnsa dasigeri Krofti Deghow a-varra y'n vlydhen ma.

Dy Meurth 18/9/01: Yma gormeul meur hedhyw rag Kernow kellys yn Kresenn Genwerth an Bys. Rick Rescorla, 62, veu genys yn Heyl hag o is-lywydh sawder dhe Morgan Stanley Dean Witter, war an kansves leur a’n tour deghow. An re neb a dhiankas re leveris fatell esa ev ow kana kanow Kernewek hag ev ow selwel oberwesyon y gowethas, 3,800 anedha. An S.U.A a breder yn y gever avel den bras y golonn rag ledya soudoryon yn batel yn kas Vietnam. Ev a gana Bre Gammbronn hag ev ow kwerrya ena. An Sterenn Arghans veu res dhodho rag y golonnekter.

Dy Meurth 18/9/01: Protestysi a omguntellyas yn Kammbronn hedhyw yn unn sevel erbynn gwerthji reyth tewlys rag Myws Gurni. Yth esens i ena drefenn bos konselloryon owth ervira tenkys an towl hedhyw. Hemma a syw Konsel an Dre Kammbronn neb a skoedhyas an gwerthji. Byttegyns, protestysi a leveris an gwerthji dhe dhri tus a'n sort kamm dhe'n dre.

Dy Yow 20/9/01: Yma National Wind Power (Nerth Gwyns Kenedhlek) owth igeri an brassa bargen tir gwyns hedhyw yn Kernow. An gowethas re dhrehedhis 16 gwynsell dhe Woen Verr, pub ow kul 600 kW a dredan. Henn yw lowr rag ri nerth dhe 7,500 chi Kernewek. An dredanva wyns veu drehedhys orth kost Ł7.5 milvil, gans Ł1.5 milvil spenys gans kowethasow leel. Nans yw teyr blydhen yth esa kaskyrgh bras erbynn an bargen tir gwyns ma.

Dy Yow 20/9/01: Towlennow rag Kresenn Vordardha Fystral re beu wolkommas gans Konsel Rostorrmoel. Y fydh Ł1.8 milvil spenys war an projekt dhe wul Tewynn Pleustri an gwella tyller rag an sport yn Europ. An arghans re dheuth dhiworth Amkan Onan. Lywydh an Konsel, John Weller a leveris bos dalleth a daklow erell dhe wellhe studh an dre. Y fydh Ł20 milvil spenys. Byttegyns, nebes huni yw serrys gans an dowlenn rag Fystral drefenn i dhe grysi bos rann vras an treth privedh.

Dy Lun 24/09/01: Kyns ordenor Unnvereth Kernewek, ha kaskyrghor Krofti, Greg Woods, a vynn dalleth kaskyrgh nowydh dhe wul Kernow 'salowva toll'. Homm a wrussa gul dhe'n Ducheth kepar ha po Manow po Ynysow an Ganel. Byttegyns, senedhor Porthia, Andrew George re leveris bos gwell gwertha Kernow a-vel pennynys glas gans savla moy arbennik y'n bys.

Dy Sadorn 22/9/01: Dew dhen veu gwanys nyhewer yn Pennsans. Yma'n dus, 28 ha 20 bloedh aga oes, yn klavji wosa an omsettyans dhe Glub an Skiber. Unn den, 30 bloedh, yw kemmerys gans an wythysi gres.

Dy Gwener 21/9/01: An kowethasow hyns-horn neb a re gwasoniethow dhe Gernow re dheuth erbynn aga breusysi an moyha sevur hedhyw. Res o dhedha ri akont a'ga ferformans dhe bennrewloryon negys. An kuntellyans ma a dheu warlergh lies mis a wasonieth drog. Tus ughel y'n bys negys Kernow a vynn ynnia rag towlenn gwrians. Yma yn-dann hwithrans y'n eur ma First Great Western.

Dy Lun 24/09/01: Nans yw teyr blydhen, prederys veu bos an diwettha chaptra y'n hwedhel sten Kernewek. Y teuth dh'y benn hwel dhe Grofti Deghow. Blydhen nessa, yth esa assayans dhe dhasigeri an bal. Tru, nyns o sewen mann. Lemmyn, yma Baseresult Ltd ow mos war-rag gans aga thowl dhe waynya sten arta. Hedhyw, solempnyta byghan veu synsys dhe Grofti yn unn verkya bos an bal ow tasigeri. Yth esa bagas a dus a-vri yn hwedhel Krofti hembrenkys yn-dann an dor rag an kynsa prys. Baseresult a vynn dastalleth gwaynya sten yn leun diw vlydhen a-lemma. Byttegyns, kyns es dos an jydh na, yma govenek rag ynkressyans kost sten war varghasow an bys. Y'n eur ma, nyns yw marnas Ł2,500 an ton.

Dy Lun 1/10/01: An kynsa desin veu dyllys hedhyw rag gwiasva nowydh y'n taves Kernewek. 'Warlinenn' a vydh 'byw' kyns es pell ha ri gwasonieth yn tiwyethek. An kynsa folenn re beu desinys, mes dell welir, nyns yw marnas an kynsa gwershon awos bos nebes kammow. Byttegyns, y tiskwa bos an ober ow mos war-rag. Pan vo gorfennys, y fydh dyllys dhe: www.cornish-language.org. Gwel an kynsa folenn omma.

Dy Meurth 2/10/01: Dowr Soth West (sic.) re wovynnas orth an soedhva dhowr 'Ofwat' rag kummyas ynkressya kost a dhowr. SWW a lever bos rent le drefenn tus dhe dreylya dhe vusurellow dowr. An diwysygneth dowr re spenas meur a nerth rag lies blydhen lemmyn yn unn ynnia dhe dus dhe wul hemma awos bos gwel rag an bys. Lemmyn, dell hevel, y fydh prenoryon dowr Kernow ow tylli rag hemma.