Dy Yow 4/10/01: An Buro Europek rag Yethow Nebes Kewsys re vetyas hedhyw ha disputya syger an Governans yn kever an Chartour Europek. An yethow Keltek erell yn Rywvaneth Unys yw degemmerys yn-dann an Chartour lemmyn, mes yma menysters owth ervira hwath yn kever Kernewek. An Buro a vynn govynn mars yw an Governans ow prederi yn sad hwath a-dro dhe'n mater. Neb unn mater a vern ynwedh o mars eus movyans war-rag gans towl dhe gavoes soedhek an yeth.  Dy Yow 4/10/01: Cadwur a omdenn avel Pennskrifor: Pennskrifor an Buro yn Kernow, Cadwur James re omdennas hedhyw awos bos re a ober arall dh'y wul. Ev re wrug meur rag gweres an eseli yn unn herdhya an taves war rag.  Dy Mergher 3/10/01: Ny vydh seythun hwarvosow yn-mes tewlys rag diwettha an vlydhen ma gans Kollji Lannstefan awos own rag salowder an dhyskyblon. Gwrys veu an ervirans ha'n Governans ow mires orth rewlys nowydh rag synsi hwarvosow skol yn-mes ouryow an jydh skol. Yma skila brassa dhe Gollji Lannstefan dhe brederi yn kever hemma. Unn flogh dhiworth an kollji ma o Caroline Dickinson. Ravnys ha ledhys veu ha hi gans vysyt-skol dhe Vreten Vyghan mis Gortheren 1996. Yma an Governans ow mires orth niver bras a rewlys nowydh war-lergh prosess keskusulya. Dell grysir, an nessa kamm war-rag a vydh gwrys erbynn Nadelik. Kyns es dos an prys ma, lies skol ha kollji kepar ha Lannstefan a wra omdhifenna.

Kovskrifenn 4

Dy Meurth 9/10/01: An Governans re leveris hedhyw bos Kernow heb kleves Karn ha Min hir lowr rag leverel bos glan. Nyns esa kas an kleves wosa 6ves mis Ebryl. Henn yw moy es 6 mis. An nowodhow ma a dheu pan syns Konsel Konteth Dewnans bord govynnek yn kever Karn ha Min. An bord a vynn godhvos moy a-dro dhe gammow gwrys gans soedhogyon MAFF. Dy Sul 7/10/01: Kesva an Taves Kernewek a vetyas de yn Truro rag kuntellyans hy hessedhek. Eseli a glywas Konsel Kernow dhe brofya hanow Neil Plummer a-vel kannas dhe'n Gesva. Byttegyns, eseli a vynn profya ken hanow dhe'n konsel drefenn na wrons i nevra y weles dhe'ga huntellyansow. Ymons i ow profya henwyn kepar ha po Alistair Quinnell po David Fieldsend. I a lever bos Alistair ha David skoedhoryon fest da an taves. David yw aswonnys ynwedh a-vel skoedhyer da an Buro Europek a Yethow Nebes Kewsys.   Dy Lun 8/10/01: Savla amber yw dhe Gilros ogas dhe Hellys ha'n kas erbynn broweghysi yw dallethys. Wosa an Statys Unys Amerika ha Rywaneth Unys dhe asa tanbellenow dhe goedha war Afghanistan nyhewer, tus dhe'n ayrva ma yw fest parys rag strik er aga fynn. An savla ma yw unn gradh isella es kas dien.  Dy Gwener 5/10/01: Arghas re beu selys yn kov Rick Rescorla neb a weresas milyow a dus dhe salowder yn Kresenn Genwerth an Bys. An den bras y golonn veu kovhes nyhewer yn gonis eglos yn Heyl. Rick yw aswonnys dres an bys lemmyn a-vel Kernow meur hag yma govenek drehevel kov dhodho.

Dy Sadorn 13/10/01: Y fydh kuntellyans kres synsys an gorthugher ma yn Kernow Kledh. Restrys yw gans perghennek ostel yn Dindagel ha synsys yn kyrghyn an kastell. Yma John Mappin ow synsi an hwarvos awos oll an kas y'n bys y'n eur ma. Ev a'n jeves govenek a weles kansow a dus dhiworth Breten Veur oll.  Dy Yow 11/10/01: Tewlys yw rag pymp merther metrek dhe vos a-rag an Lys Wartha yn Loundres kyns es pell. Dew anedha yw kernowyon dhiworth Ryskammel. Yma John Dove ha Julian Harman y'ga mysk hag omladha rag gwiryow laghyl dhe wertha dre dhevnydh a 'empourethek'. Gorhemmynn veu res dhedha kyns dhe dylli kostennow an lys drefenn i dhe wertha brithel ha frutys yn peunsow.

Dy Lun 15/10/01: Yma'n Awtorita Yeghes Kernow ha Syllan ow korra towlennow kesya gans Dewnans a-dherag an bobel. Res yw dhodho kavoes kusul war dowlenn neb a via kamm pella tro ha 'Pow West'. Yma own bos gwasoniethow yeghes gwannhes drefenn na vydh kemmys a wodhvos hag asswonvos y'n kyrghynn. Yma'n tybyansow diskwedhys yn Sen Ostell an seythun ma dhe Ji John Keay.  Dy Sul 14/10/01: Yth esa own hedhyw yn Ryskammel wosa tus an dre a gavas sawer kymyk an myttin ma y'n dowr ha nyns esa kusul dhiworth Dowr 'Soth West' (SWW). Wor'tiwedh, an gowethas a gusulyas bos salow eva an dowr ha bos kudynn pompya. Yth esa own y'n dre awos hwarvos posnans dowr Ryskammel nans yw trethek blydhen.

Dy Mergher 17/10/08: Yma goel an Geltyon, ken-aswonnys a-vel Lowender Pyran ow talleth an gorthugher ma yn Porth Pyran. Y fydh bandow Keltek dhiworth Breten Vyghan, Manow, Iwerdhon, Kembra hag Alba, keffrys ha Kernow. Y'ga mysk y fydh an 'Battlefield Band' dhiworth Alba, meur aswonnys dres 25 blydhen. An goel a denn milyow a dus pub blydhen hag yw hwarvos a vri a-hys an bys Keltek lemmyn. Ny vydh marnas bandow dhiworth powyow erell, mes Kernow a brof 'Dalla' (gwel skeusenn a-dheghow), The Bolingey Troyl Band (herwydh usadow), Naked Feet (neb a waynyas an PanKeltek warlyna), Tan ha Dowr, Moe Keast, Pol Hodge ha Bert Biscoe (berdh), hag Ahanan.    Dy Meurth 16/10/01: Yma oberysi an konsel ow movya lyvrow, restrennow ha daffar yn-ves lyverji Rysrudh dhe dre nowydh an Lyverji Studhyansow Kernewek. An dre nowydh rag oll a hemma yma dhe Plas Alma yn kres Rysrudh, dasdrehevys hag afinys. Y fydh igerys an dy Sadorn ma gans marghas nowydh ha'n Projekt Foyer rag tus yowynk. Kresenn Kernow a vydh kresenn rag pub studhyans yn kever istori, gonisogeth ha yethek agan bro. Byttegyns, kekeffrys ha henna, bywnans flamm nowydh yw rag Rysrudh kres.

Dy Sadorn 20/10/01: Kreslu Dewnans ha Kernow a lever bos hwithrans rag moldrer Lyn Bryant a bes hwath. An wre'ti, 41, a veu pychys ha hi ow kerdhes hy hi dhe Vownderyow Gwartha Ruan. Kynth esa erthyglow der 'Crimewatch', nevra nyns esa denvydh kevys.  Dy Sadorn 20/10/01: Lies tra nowydh yw igerys yn Kernow hedhyw. Y'ga mysk yma Kresenn Kernow yn Rysrudh. Chi nowydh yw rag Lyverva Hwithransow Kernewek. Kekeffrys, Kresenn Sport Porthia yw igerys. Neuvyer Olympek Nick Gillingham a vydh ena. An gresenn veu drehevys gans arghans lottri orth kost £3 milvil.

Dy Sul 21/10/01: Tas yw kemmerys gans gwithysi kres wosa ev dhe synsi y vab yn karavan war an M4 yn ogas dhe Swindon. An drama gwystel ma a dhallathas dhe Sennen yn Pennwydh wosa an kreslu dhe elwel orto yn park karavan yn unn assaya klerhe neb kas gwith. Herwydh an kreslu, dell hevelis ev a'n jeva gonn. Soedhogyon an kreslu a wrug y holya oll an fordh dhe Wiltshire le mayth esa gorfenn kresek hedhyw. 17 mildir an M4 veu degeys hag yth esa kudynnow daromres dres an bennseythun awos an 'stand-off'. An hwedhel a dhallathas gorthugher Nos Wener.

Dy Gwener 26/10/01: Den Bosvenegh a a-dherag justisyow an dre hedhyw a-vel an kynsa yn Breten Veur dhe vos charjys gans dannvon post-howks. An den, 43 bloedh y oes, yw charjys wosa fardell dhe vos kevys yn soedhva sortya Plymstock. An polter ynno veu apposys ha nyns o deantell. Dy Mergher 24/10/01: Den dhiworth Bosvenegh re dheuth ha bos an kynsa yn Breten Veur dhe vos charjys rag dannvon lyther gow po howks. An den, 43 bloedh y oes, yw charjys yn-dann an 'Malicious Communications Act' rag dannvon lyther yn unn fasya y vos anthraks. Fardell hag ynno polter gwynn a veu degemmerys dhe'n soedhva sortya dhe Plymstock. An den a wra mos a-dherag justisyow dy Gwener.  Dy Meurth 24/10/01: Yma Tony Snell ow kul hwithrans geryow nowydh hag a vynn kavoes kusul dhiworth lies den. Tony a skrif pub mis yn An Gannas gans y golovenn "Tros an bys bras" hag ynno a dhevnydh termow nowydh nag yw kevys yn gerlyvrow y'n eur ma. A dhe'n kolm ma dhe redya y skrif.  Dy Meurth 23/10/01: An den esa ow hedhi an M4 wosa dos dhiworth Kernow ha synsi y vab avel neb gwystel yw charjys gans Justisyow Truru. Ev a wra mos a-dhiworta arta nessa dy Meurth.