Dy Mergher 14/11/01: Yth esa own hedhyw dhe bennow negys ha diwysogneth yn Kernow wosa nowodhow bos hanter kans soedh dhe vos kellys dhe Compair Holman yn Cambron kyns Nadelik. Yma'n gowethas orth aga helli awos sygerans arghadowyow. Compair Holman a re ober dhe 260 den y'n eur ma yn unn wruthyl kompressors (jynnow gwaska ayr). Y'n termyn yw passys, yth esa 4000 den owth oberi y'n weythva. An nowodhow ma a dheu warlergh nowodhow tewl rag soedh a-hys Breten Veur. Dy Mergher 14/11/01: Tri hans den moy es an mis yw passys yw heb ober an mis ma yn Kernow. An niver a dus ow kuntell mona-les (benefit) re gressyas yn ogas dhe seyth mil. Dell grys pennow negys y'n Ducheth, yma'n gwaskedh owth ondhiskwedhes war an diwysogneth tornysi yn trevow kepar hag Aberfal ha Tewynn Pleustri.  Dy Meurth 13/11/01: Fondyer Melinyow Treyago, Mike Robertson, re verwis. Ev a igoras y gynsa gwerthji nans yw 40 blydhen ogas dhe Lyskerrys. Dres an termyn na, ev a ledyas lies kaskyrgh erbynn Ewrop ha metrekheans, ha gul dhe dus sorr dre dhrehevel y werthji heb kummyas konseloryon. Unnweyth, ev a skrifas erbynn tus kethreythek yn y argemmynn y'n 'West Briton'. Yma y vab Bruce ow pesya ober y das.

Kovskrifenn 6

Dy Sul 18/11/01: Nowodhow Kernow yw trist klywes yn kever an mernans Alan Prisk a Rysrudh. Ev a verwis dy Mergher yw passys dre gleves y golonn, 58 bloedh y oes. Ev o esel selyek Unnveredh Kernewek. Ev a dhallathas an bagas gwaskedh ma warlergh an strif dhe selwel Kroftdi Dheghow. Keffrys ha henna, ev a oberi gans Phil Hosken war dowlenn dhe dhrehevel tour Trevedhyk, 1000 troeshes y ughelder war dir Shafta Robinson ogas dhe Groftdi Dheghow. Unn dowlenn arall o dhe wul unnhyns (monorail) ynter Kammbronn ha Rysrudh. An ynkleudhyans a vydh dy Yow dhe ynkleudhva Bennmenydh.   Dy Sadorn 17/11/01: Kuntellyans veu synsys yn Bosvenegh hedhyw rag an kaskyrgh Senedh Kernow. Konsler Bert Biscoe a elwis war an 'South West Constitutional Convention' dhe skoedhya an assayans kavoes senedh rag Kernow. Yth esa ow kewsel ena keffrys, Caroline Jackson MEP ha Jim Wallace, pennmenyster servadow Alban. An sywyans ma a holl seythun pan leveris an parti LibDem yn Kernow i dhe skoedhya an profyans, ha'n parti Lavur dhe sevel er y bynn.

Dy Yow 22/11/01: Yma gwythysi gres yn Rysrudh owth assaya settya dalghenn war dhen a vynnas kemmeres maw dhiworth stevell janjya Kresenn Sport Karn Bre. Ny wrug an maw, deg bloedh y oes, mos gans an den ma. Y dheskrifyans yw: gwynn, 30 bloedh y oes ha 5' 8". Y vlew veu gwrys kepar ha Mohikan.  Dy Meurth 20/11/01: Yma an den blamys gans moldrans mowes-skol Lannstefan, Caroline Dickinson, ow trehedhes yn Pow Frynk hedhyw. Ev re beu dannvenys ena dhiworth an Statys Unys rag mos a-rag an lys lagha yn Paris. Fransisco Arce Montez yw charjys gans ravna ha moldra Caroline nans yw pymp blydhen.

Dy Lun 26/11/01: An governans a vynn pesya dhe'n nessa savla gans an movyans dhe removya an daskorr 50% rag nessa chiow. An movyans ma veu ledys yn Chi Kemmynyon gans esel an senedh Porthia, Andrew George. Mar kalla an movyans seweni, y fia moy kales gwitha nessa chiow yn Breten Veur. Rann vras an annedhow yn Kernow yw perghennys gans tus yn mes a'n Ducheth. Mester George a garsa gweles lies moy chi gesys rag tus leel orth kost a ylli bos peys gans Kernowyon.

Dy Sul 25/11/01: Kansow a dus a ylli kelli aga ober dhe RAF Sen Mawgan herwydh an 'Sunday Times'. Derivys yw bos erghys daswel tenkys an teyr ayrva vrassa RAF. Krysys yw bos an governans ow prederi yn kever byghanhe niver a ayrvaow dre dhegea an re yw an moyha ker. Esel an senedh rag Kernow Kledh, Paul Tyler, a grys bos an derivas ow seni klegh ha nyns yw gwir. Yma own degeans Sen Mawgan a via pur dhrog rag lies negys y'n ranndir neb a dhendil aga gober dre servya an ayrva.

Dy Mergher 28/11/01: An dy Sadorn a dheu, yma onan an gwella goelyow yn Kernow, mar mynnir goslowes orth lies sort a ilow. An tressa Goel Korev Keltek synsys dhe Vragti Sen Ostell a guntell bandow warbarth kepar ha: 'The  Hedgemonkeys' (9 eur dhe 11 eur gorthugherweyth); 'Sex Slaves from Hell' (6 eur dhe 8 eur gorthugherweyth); ha 'Rachel ha Tir Kemmyn' (4:30 - 6 pm). Rachel ha Tir Kemmyn a waynyas an PanKeltek warlyna yn Iwerdhon, ha'n vlydhen ma, i a gavas nessa le. Arghans dhiworth an goel a vydh res dhe'n Children's Hospice Southwest (Hospys Fleghes Sothwest (sic)).   Dy Mergher 28/11/01: Kowethas an Yeth Kernewek re leveris bos an nessa  Pennseythun Gernewek synsys dhe Dreth Bentewynn ynter an 10ves ha'n 14ves a vis Ebryl. Nyns yw pell dhe'n Edenva ha Lowarthow Kellys Helygen (gwel skeusenn) dhiworth an park Karavan. Herwydh usadow, chons splann yw dhe dhos ha bos moy freth y'n taves. Pella derivadow a wra sywya.

Dy Sul 2/12/01: Yma kaskyrgh polytek erbynn dyfyk arghans rag skolyow Kernow. Herwydh niverow dyllys a-gynsow, pub flogh yn nebes rannow Loundres a gemmer moy es £1000 moy es fleghes yn nebes rannow Kernow.An Governans a vynn mires orth an studh koynt ma. Byttegyns, yma own dhe senedhoryon Kernow bos an studh ow tos ha bos gweth awos finwedhow spenasow servadow.  Dy Sul 2/12/01: An kaskyrgh erbynn lywysi a yv ha lywya re beu lanchys an bennseythun ma ha Nadelik ow tos yn nes. Herwydh niverow dyllys a-gynsow, 977 person re beu kachys gans an kreslu hag i dres an nivel laghyl. Henn yw 31 person moy es y'n 12 mis yw passys  Dy Yow 29/11/01: Barricuda re beu kachys y'n mor a-dro dhe Gernow. An kynsa yw yn dowrow Bretenek. Peswar troeshys o ha kevys hwegh mildir dhiworth arvor an Lysardh gans pyskador Kernewek David Kessel, Herwydh usadow, kachys yns y'n mor a-dro dhe Afrika ha Spayn.

Dy Meurth 4/12/01: Yma pennskrifer an wiasva ma, Matthew Clarke, ow tehweles dhe oberi dhe Pirate FM102 leun-dermyn. Ev a dhallathas ena mis Hwevrer 1998 ha gasa mis Ebryl 2000. Wosa henna, ev a oberi avel soedhek PR ha lenna an nowodhow dhe Pirate avel freelance. Rag termyn, ev a bresentyas nowodhow der Gernewek pub dy Sadorn ha Sul yn towlenn henwys 'Gonisogeth Lemmyn'. Matthew Clarke a dhehwel mis Genver. Towl an gorsav yw dh'y dhannvon dhe'n studhyo Aberplymm nepprys y'n gwenton.   Dy Lun 3/12/01: An governyer soedhogel an dhiwysogneth hyns-horn a wra synsi hwithrans yn-kever studh euthek drog an trenow yn Kernow ha Pow Sows Soth West. Rag an kynsa prys, kannasow an kowethasow tren orth agan servya a vydh gelwys dhe worthybi orth govynnow a-dro dhe wasoniethow helergh ha studh an hynsyow aga honan. An kuntellyans a vydh synsys yn Loundres dy Yow nessa. Mis Gwynngala, derivas gans Kesva Trethysi SothWest (South West Passenger Committee) a leveris nammnag yw yn tymmynigow an gwasonieth ha bos 'First Great Western' "euthek drog yn fenowgh".

Dy Yow 6/12/01: Yma kyns-stennor ha lemmyn konsler Kernow, Mark Kaczmarek yn unn elwel rag 'savla rolys' rag penn-dafar Krofti Dheghow. Ev a lever bos own dhodho bos an framweyth istorek ma kellys mar nyns yw gwithys yn ta. Hwath ev a'n jeves govenek bos assayans igeri an bal gans Baseresult Ltd dhe seweni. Byttegyns, an seythun ma, dew lywydh a veu herdhys dhiworth an bord. Lemmyn, Mark Kaczmarek a grys bos termyn govynn rag an savla withys ma.

Dy Gwener 7/12/01: Yma ken lett dhe'n dowlenn dhe sevel krows Keltek 62 troeshys hy hirder dhe Essa a-vel kov dhe'n vilvlydhen. Ny yll an bagas neb usi ow tewlel an grows mos war-rag heb kummyas tewlel. Ny vynn Konsel Karadon ri an kummyas na kyns bos ervirys yn kever ledanheans an fordh A38. Heb an kummyas leun na, ny yll an bagas neb a vynn pesya gans an projekt ma kavoes an arghans dhiworth Konsel Karadon. An mona ma yw ogas dhe £10,000. Yma an bagas yn unn brederi lemmyn yn kever tylleryow erell a allsa bos da rag sevel an grows. Neb unn tybyans yw orth ganow an gowfordh Essa.

Dy Meurth 11/12/01: Hanter kans mil derivas neb a elwel rag senedh Kernow a vydh res dhe 10 Downing Street a-vorow gans lywydhyon an Kuntellyans Korf-Laghyl Kernewek hag eselli Kernewek a'n senedh Loundres. An derivasow veu kuntellys yn le es 18 mis hag a dhiskwa an skoedhyans krev a-ji Kernow rag senedh. An parti LibDem a skoedh a dowl mes Lavur yw er hy fynn.