koth8

Dy Yow 10/01/02: Yma Konsel Karrek yn unn brederi yn kever gwertha tir le mayth usi an poll neuvya Gorholyon ha Kastylli dhe Aberfal, ha drehevel Ostell pymp sterenn ena. An konsel a vynn kavoes arghans nowydh drefenn bos an bojet pur dynn. Argh-lywydh an konsel, John Winskill a leveris nag yw marnas kynnik mes res yw dhedha mires orth tybyansow a'n par ma awos bos gwasketh dhiworth governans kresek rag kemmeres poester dhe-ves a doll an konsel.

Dy Yow 10/01/02: Res vydh dhe'n Awtorita Yeghes Kernow ha Syllan dastylli kendon a Ł7.9milvil kyns dalleth mis Ebryl. Herwydh usadow, kendon a'n par ma a yll bos kemmerys dhe'n nessa blydhen erbysyek. Byttegyns, drefenn bos an awtorita ow kesya gans awtoritys yn Dewnans, res yw tylli an arghans kyns 1a mis Ebryl. Yma esel an senedh Loundres rag Truru ha Sen Ostell, Matthew Taylor ow kovynn orth an governans dhe gemmeres an arghans dhe'n nessa blydhen kepar dell veu an Awtorita Kernow ha Syllan hwath yn fyw.

Dy Sadorn 12/01/02: Rann a Rysrudh re dhegemmeres rann a Ł30 milvil rag gul dhe'n stretow moy salow. Res vydh hanter milvil peuns dhe North Close awos bos kudynnow vandalheans ha kerri lywys re uskis. An mona ma yw grontys a-ji towlenn an governans neb yw henwys 'an Home Zone'. Esel an senedh Loundres rag Kammbronn Aberfal, Candy Atherton, re dhynnerghas an arghans yn unn leverel y tiskwa bri an kudynnow eus omma yn Kernow.
Dy Gwener 11/01/02: Tus konnyk selwel gorholyon a dhallathas an myttin ma yn unn assaya tenna an tanker MV Willy dhiworth karregi dhe Borthmyghtern. Unn eur pris li, morlanow o ha possibyl dhe denna an gorhel. Sewen fest o ha'n Willy veu tennys dhe Aberfal. Ena y fydh hwithrys yn unn ervira mar pia possibyl y ewnhe. Mar ny via, an berghennogyon a wrussa y skoelya. Byttegyns an govynn lemmyn yw: pes peuns veu spenys gans Konsel Kernow y'n oberans selwel? Yma soedhogyon ow mires orth an reken lemmyn.

Dy Lun 14/1/02: Dell hevel dhiworth derivasow hedhyw, Studhyo Fylm Pinewood eth dhe'n Edenva dhe wul rekki rag an nessa fylm James Bond. I a dhallathas fylmya y'n seythun yw passys gans Pierse Brosnan ow kemmeres as penn gwarier... 007 y honan. Martesen y hwelyn kyns es pell Bond yn unn leska y'n biomes. Nyns eus titel hwath ha tus dhe soedhva an Edenva yw pur gosel yn kever Bond yn Kernow. Mes mara'n teffa... y fia nowodhow pur dha rag negys.

Dy Yow 17/1/02: Mowes-skol re verwis hedhyw yn droglamm dhe Skol-gynsa Chiwardreth. Herwydh nowodhow a-var... dell hevel, hi a drebuchyas war gamm. An karr-klavji veu gelwys ha dyskadoryon a assyas hy dasvywa. Byttegyns, hi a verwis ena y'n skol. Eth bloedh o hy oes. Nyns yw hy hanow dyllys hwath drefenn bos res dhe'n kreslu derivas orth oll an teylu ha kowetha y'n kynsa le. Y fydh synsys an post mortem dy Gwener.
Dy Mergher 16/1/02: Mowes, deg bloedh hy oes, a veudhas yn poll neuvya ogas dhe Gammbronn dy Lun. Post Mortem veu synsys hedhyw mes ny wrug diskudha skila mernans. Yth esa Stacy Coleman ow kwari y'n poll dhe Glub Klowans dhe Bras an Bibell gans hy broder. Yth esa hy herens yn klub y'n prys na... mes hi a dheuth ha bos yn kaletterow y'n poll. An skeusenn a dhiskwa an poll neuvya y honan. Yma hwithransow an kreslu ow pesya.
Dy Mergher 16/1/02: Benyn Porthia, kablys rag moldrans hy har, a gerdhas yn rydh yn-mes an Lys Lagha Truru hedhyw. Akwittys yw Alison Parker a voldrans Nigel Tonge. Hi a wrug y ladha dre y bychya gans kollel, byttegyns hi a leveris y vos omdefens.
Dy Lun 14/1/02: Tri den, kachys gans an kreslu hag i yn unn ladra arwoedhyow Ertaj Sowsnek, a wra dehweles dhe lys lagha Trury Dy Gwener. An breusyas a wrontyas dhedha mewgh heb studhow. An lys a vynn mires orth argyansow laghyl. Pan esens i a-dherag an lys hedhyw, yth esa bush bras a skoedhoryon gonisogeth Kernow ena.

Dy Sul 27/1/02: Yma Carlton ow fylmya rag towlenn nowydh nos Meurth y'n Arvow Porthtreth. Pub mis yma yeth an werin ena, ytho tyller da yw rag rekordya. Mar mynnowgh dos, klappya ha diskwedhes bos an taves yn fyw hwath, dewgh. Keffrys ha henna, chons yw rag gweles an kynsa gyg rag deg mis a'n band rokk Kernewek 'Skwardya'.
Dy Gwener 25/1/02: Tus selwel ayr ha mor re spenas an jydh yn unn assaya tenna korf Nihon dhiworth an mor war an arvor kledh a Gernow. De, an den, 31 bloedh y oes a veu kemmerys gans tonn ha perthys y'n mor. Yth esa ev gans bagas a gerdhoryon neb esa ow kerdhes a-hys an troelergh arvorek. I o studhyoryon estrennek dhiworth kollji yn Sussex. Hedhyw, gwelys veu an korf byttegyns re euthek o an awel rag y denna yn-mes an mor. Selweloryon a vynn dasassya y gemmeras yn-mes a'n mor dhiworth an jydh a-vorow. Hag i owth assaya dhe gavoes an korf ma dhiworth an mor, ken korf veu gwelys y'n mor an dohajydh ma dhe Borthleven. Galow veu gwrys dhe wythysi an mor dhe hanter wosa teyr eur. An kreslu re dhenaghas i dhe aswonn piw ywa, mes dell grys nebes tus, pyskador kellys dhe Aberplymm yw. Awos an awel mar hager y'n eur ma, yma Gwythysi an Mor ow leverel bos res dhe bubonan gwitha pell dhe-ves a'n alsyow ha tonnow ha kerdhes war hyhsyow arvorek ewn,
Dy Gwener 18/1/02: Tri den an Senedh Stenek neb a veu kemmerys drefenn i dhe ladra arwoedhyow
Ertaj Sowsnek, a veu charjys ha gesys dhe wari gans breusyas hedhyw. Hugh Rowe, Rodney Nute ha
Dr Nigel Hicks a leveris nag esa gwir gonisogethek dhe Ertaj Sowsnek yn Kernow... ytho i a
gemmeras dhe-ves etek arwoedh. Unnver ens gans an breusyas dhe vos bound over rag Ł500 kettep
penn, gans Ł4,500 tyllys dhe Ertaj Sowsnek. Byttegyns, ymons i ow leverel bos trygh drefenn nag o
possybyl gorra breus poessa warnedha. Ny vynnas an breusyas leverel re drefenn na vynnas ri dhedha
re a vri y'n media.

Dy Sul 27/1/02: An tri stenor neb a ladras arwoedhyow Ertaj Sowsnek drefenn aga bos erbynn an gonisogeth Kernewek a vydh der an dowlenn bellwolok 'Richard ha Judy' a-vorow. An hwedhel res eth a-hys an media awos i dhe vos y'n lys lagha heb travydh marnas spal hag areth dhiworth an breusyas. Hugh Rowe, Ernest Nute ha Dr Nigel Hicks a gavas trygh y'n lagha drefenn na vynna an lys ughelhe bri an lagha stenek. Y hyllir gweles an dowlenn der Kanel Peswar dhe 5 eur dohajydh dy Lun.

Dy Mergher 30/1/02: Kaskyrghoryon a'n Senedh Kernow a elwis orth an Governans yn unn wovynn orta dasprederi yn kever towl rag senedh soth west. I a vynn orth Stephen Byers dhe amyttya na wrug ev degemmeres lyther vydh yn unn skoedhya an senedh soth west, ha dhe berthi kov bos hanter kans mil hanow gorrys war an govenek neb a skoedhyas Senedh Kernow. Yn-medh Andrew George (esel senedh Westminster rag Porthia), "An dyfyk skoedhyans hewel rag senedh soth west a dhiskwedhas nag eus kas rag herdhya Kernow war tu ha degemmeres an towlow rag framweyth 'seyth kontethek'.
Dy Meurth 29/1/02: Lenwys veu an bar dhe'n Arvow Porthtreth a gernewegoryon an gorthugher ma, devedhys alena yn unn waytya bos rann a dowlenn bellwolok gwrys gans Carlton yn kever an taves Kernewek. Derivadores Dulcie Galagher a glappyas dhe'n re kuntellys ena a-dherag an kamera. Kekeffrys ha henna, Skwardya a berformyas rag an kynsa prys yn deg mis. Carlton a rekordyas an band Kernewek ma ow kana kan henwys "Athelstan". Y hyllir goslowes orth tamm an gan ma der an wiasva www.morlader.com. An fylmyans ma a vydh devnydhys yn towlennow tavedhlys dy Sulweyth a-dro 5 eur dohajydhweyth.Ni a'gan beus govenek bos moy derivadow yn kever hemma kyns es pell.