Sa panahon ni Jose Rizal, matindi ang panawagan ng asimilasyon.
Bunsod ng kanyang pag-aaral sa Europa ay natutunan niya ang mga bago at
radikal na konsepto na maaaring makapagpapabago ng kanyang Bayan. Bagamat
may sinasabing gobyerno ng Espanya sa representasyon ng
gobernador-heneral, isa lang ang tunay na namumuno at kumokontrol, iyon ang
Korporasyong Relihiyoso. Ang kapangyarihang monastiko ang tinitingalang diyos ng
mga "indio" sa pag-angkin ng papel bilang prayle. At ang praylokrasiya
ang nagpahirap sa mahirap ng kalagayan na makikita sa stratipikasyon ng
lipunan. Dahil sa konserbatibong sitwasyon, mapanupil kung tutuusin,
naging atrasado ang lipunan. Ang mga ideyang panlabas lalo ng sa
"Rebolusyong Industriyal at Pranses" ay huli na nang malaman at naintindihan
ng ating kababayan. Binulag tayo ng maling paniniwala ng
panananmpalataya, ngunit hindi ng relihiyong Katoliko kundi ng mga prayle, kung saan
sa bawat pagsermon sa pulpito at pagpataw ng mga ordinansa kabilang and
hindi makatarungang polo y servicios, ay isang gawaing opresyon. Kaya
naman, higit sa pagiging subersibo ang panahong iyon, halimbawa ang
pagsusulat ng napakaraming pampleta at iba pang uri ng panitikan, naging
matindi ang panawagan ng mga Pilipino ang panlipunang pagbabago gayundin
ang pangamba ng nasa puwesto sa kanilang nalalapit ng pagpapatalsik
dahil sa kanilang kapabayaan at maling pamamahala.
Kung ihahambing sa kasalukuyang klimang pulitikal, masasabi na higit
pa ang opresyon at banta sa kay Jose Ma. Sison at sa pamayanang eksilo.
Hindi lamang ang admnistrasyong Arroyo ang may kapangyarihang
magpabalik sa kanya dahil kaaakibat nito ang presyur ng Estados Unidos at
European Union. Ibig sabihin na ang demokrasya noon ay naiiba sa kalayaan
batay sa konteksto kung saan mas limitado ang mga opsyon ng mga
Propagandista subalit ngayon ay mayroon ng lehitimong "political freedom"
subalit nananatiling konsepto lang din ito. And pakikipaglaban at
paglilingkod saa bayan ni Sison ay banta hindi lamang sa Pilipinas ngayon kundi
maging sa buong mundo. Naghahari ang imperyalismo kontra sa oryentasyon
ng mga ideolohiya ni Sison ng komunismo at sosyalismo.
Sa kainitan ng Batas Militar naging kilala si Ginoong Sison na matindi
ang adbokasiya na baguhin ang lipunan. Dumating ang panahon sa kanyang
karir na kalaban niya ang estado kaya't bumagsak siya sa mga kamay nito
at naging political prisoner. Binibigyang pansin lang natin na ang
klimang pulitikal ng dalawang yugto ng mga eksilo ay isang pangyayari ng
matinding "opresyon." Magkaiba nga lang ang porma ng mga nasa puwesto
- ang simbahan at gobyerno - ngunit, iissa ang papel, ang supilin ang
banta ng pagbabago.
Isa pang mahalagang salik ng malawakang kontrol ng dalawang yugto ang
suportang militari. Malaki ang naging alokasyon ng badyet ng military
sa panahon ng kolonyalismo katulad din sa lumolobong badyet ng
sandatahang lakas habang pakonti naman ang sa edukasyon. Implikasyon lamang
ito ng napipintong armadong rebolusyon ng mga taong-bayan. Malamang pa
na ang mga intelligence networks ay siyang pinaggastusan upang madakip,
matortyur at mapatay ang mga taong tunay na makabayan o di kaya ay
ipatapon tulad sa Cuba or eksilong panloob lang halimbawa ang sa Dapitan.
Ipinaglaban nina Rizal kahit paano ang kanilang mithiin kahit na
limitado ang makakaalam nito pagdating sa Pilipinas. Ang bukod tangi lang
marahil sa kanya ay ang determinasyon na ilunsad ang tunay na laban sa
pagbabalik bayan. Dito sila nagkakaiba ni Sison dahil sa mas mapanganib
na sitwasyon na hinaharap ng huli sa panahong tumuntong dito sa
Pilipinas sapagkat hindi lamang siya tinuturing na simpleng kriminal ng
kasalukuyan at mga nakaraang administrasyon kundi ng internasyunal na
komunidad bilang isang "terorista." Hindi natin sinasabi na may kaduwagan si
G. Sison. Naninigurado lang tayo sa kanyang kaayusan at ng kanyang
pamilya.
Ang pagsulong nga naman tungo sa panlipunang pagbabago ay isang
kumplikadong proseso ng pagsasalang-alang sa sariling interes at kapakanan at
ng bayan. Kinakailangan na buo ang kalooban na patuloy ang pakikibaka
kahit kalaban pa ang estado. Importante din na ang pananaw ng
tagapagtaguyod ng anumang ideolohiya ay maging realistik at praktikal sa kung
ano ang mas nakakahigit sa kanyang pagsasakripisyo.