Iiech bin a Glubberer

Refrain:
Iiech bin a Glubberer und iiech werrs immer bleim
oogmoold hobbi schwadds und roud mei Fensderscheim
mei Nachbern soong, iiech g´herrerdin a Derrabbie
un an jeeds Minchner Audo brunz mer aweng hie

Manche genger in ihr Errberd, jede Wochn, jedn Dooch,
des  wennsd finfferverddsg Johr gmachd hasd, vill hasd nedd, asser an Schloch
Dernoch gengers in Bennsjohn, gribblgrumm, grangg und kabudd
und iiech gäi Sammsdochnammidooch är bissler zu meim Glubb

Manche hauer si a Greem und a Louschn aaf di Haud,
fingerdigg, damidd der Doud nedd ass jeder Falldn schaud,
manche redduschiern ihr Foddo fier a Eheinschdidudd,
mei Haud is roud, vom Dreeg offd schwadds, weil des sinn die Farm vom Glubb

Manche siggsd im SChweisgallobb, su als deeds ihner bressiern,
suball si moll aweng woss rierd in die Oddoschdraß marschiern,
an Fuchzger zoolsd da logger fier an aanzing koddsn Schubb
Werdsßz haaß in meiner Huusn gäi iiech aweng zum Glubb

Manche beedn si an ab jeedn Sunndooch in der Kerch,
si simmer su simmbaddisch, wäi fier an Frusch di Schderch,
manche boodn im Weihwasser, wass nedd, ob des su goud dudd,
wenn iiech beed, dann beedi hechsdns um drei Bunggde fier mein Glubb

Manche siggsd in Himmerleier fläing, walls häicher nimmer gäid,
alle midd an moddsdrumm Buggl, des is is Sauerschdoffgereed
Mimm Gleddern hobb iiech niggs am Houd, mir langd mei Schmausnbugg,
dou binni bliddsschnell drundn und hobbs nedd weid zum Glubb

Manche kochn aaf chinesisch, wall des is der leddsde Schrei,
iiech wenn koch, dann bloos franzesisch, a Bulljong midd an Ei
und willi mooll woss wergli Gouds, der Gschmagg is absoludd,
vo am Saddienerweggla draßn bei meim Glubb

Manche genger in die Berch und dou fohrns är bissler Schi,
manche schbringer midd am Fallscherm, wenner zoubleibd, dann sinns hie,
manche laffn hunderd Meeder in am aanzing koddsn Schbudd
und iiech laff Sammsdoochnammidooch vo der Schdraßerboo zum Glubb

Manche homm an Oorsch su hadd, dassder denggsd: "Iiech glaab iiech schbinn"
Bloos wennsd draafhausd merggsd suffodd, sie homm an Flachmann hindn drin..
Iiech dringg amoll gern är Schnebbsler, iiech mach amoll gern an Schlugg,
bloos an Vullrausch hobbi selldn, wall er gwinnd nedd offd, mei Glubb

Manche ferchdn si vuurm Doud, manche ferchdn si vuurm Schderm,
manche waddn scho lang draaf, gibbds är bissler woss zum Erm,
iiech hobb ka Angsd, wenn iiech ermoll dou aaf meim Siechbedd lich,
wall iiech wass der Maxl Morlogg und der Schdrehl waddn aaf miech

Iiech bin a Glubberer, des gandse Abschdiegsgwaaf, des is mer worschd,
wall neggsd Johr schdeing mer widder aaf !!
Mir kummer widder und zwoor under Gerandie und an jeeds Minchner Audo brunz mer widder hie...