醉翁亭 -- 9Apr2005 午餐
地址：振华路中联大厦402栋首层（近燕南路交界）
交通：地鐵科學館站，沿燕南路步行5-10分鐘
小豬女、馬仔、傻龍、神經漢、金比
原來安徽菜幾好食喎。
年多前，小豬女同馬仔曾經誤打誤撞光顧一次，但由於對安徽菜一無所知，錯過了第一次愉快的接觸。
趁今日多人，馬仔在事前落足準備，可以多試幾個菜肴，一行五人過關後便直往醉翁亭。
菜單：老母雞湯例牌（$35）、合肥燜野鴨（$49）、小雞貼模（$29）、醉翁醬排（$37）、歙味筍絲（$20）、徽式炒雙冬（$12）、師子迎賓（$24）。埋單連其他雜費共$225，好抵食喎。
雖然點了這麼多菜肴，神經漢仍舊叫了碗白飯，並且迅速將之消滅，嘿！
醉翁亭對各小菜皆有詳盡介紹。
結論：都好味喎，不過d菜肴好大碟，睇怕兩個人都好難幫趁到，惟有等多D人先再來。
老母雞湯：忘記拍照，用醉翁亭的官方照頂替。雖然都煲得幾好飲，可能廣東人習慣了飲湯，這個湯同一向飲開的雞湯分別不大。
傻龍：老母雞湯,個名咁寸,一定要試下,味道好雞湯味,除此之外唔覺有乜特別
合肥燜野鴨：好香！好味！好正！D鴨肉固然沒有一點‘蘇’味，肉質又適中，唔太軟唔太硬。味道好特別，唔知點形容，連D骨都入哂味。根據網頁資料，這可能是從安徽運來的野鴨，加上一種叫“胡玉美”的蚕豆醬佐制而成。太好味喇，一定要再試。
傻龍：雖然隻鴨細細隻冇乜肉,但係好滋味,完全冇鴨羶味,我幾欣賞
小雞貼模：招牌菜。中間D粉絲、豆腐干、雞塊都煮得幾入味，但是今次係小豬女第二次食都唔係好明白點解會係招牌菜。據資料所載，此為皖北民間待客之經典菜肴，可能因為我們對安徽沒有任何認識和感情，所以衹覺得是一般的菜肴吧。
傻龍：粉絲煲加饅頭圍邊,咪道唔見得有乜咁特別
醉翁醬排：真是每間食店都有些類似的燒排或烤排，這間也一樣。味道很好，雖然沒有用類似孜然粉之類的搶味配料，但卻中庸而易入口，都唔識形容，仲之可以再吃。
傻龍：燒得幾好味,一上檯就好快就差唔多沽清,可知有幾好味
歙味筍絲：清雅得來又有荀、冬菇、肉絲的味道混雜當中，幾好。
傻龍：入口有清爽的感覺,唔油唔膩,而且味道唔錯
徽式炒雙冬：雖然都炒得OK，但好似廣東菜，所以食落真是冇乜特別，就當菜一碟啦。
傻龍：我覺得冇乜特別,普通冬菇炒菜味道
師子迎賓：馬仔好喜愛。炸左D粒粒湯丸，所以一入口似鹹點，但好快入面D麻容就流出來，瞬間變成甜品，好好好。
傻龍：外面香口,裡面芝麻湯丸的香甜,好正,但係一碟有好多粒,起碼好似我地咁有五個人先好叫,唔係食唔晒
[回到我家]