咸亨酒店 -- 7May2005 午餐

地址：羅湖區人民南路金光華廣場7樓

交通：地鐵科國貿站

小豬女、馬仔、大豬及牛媽媽

無意中發現深圳有間紹興名店咸亨酒店，即係魯迅於《孔乙己》一文中的場景。現在咸亨酒店已經發展為全國連鎖，江蘇上海浙江一帶有約12間店鋪，而北京和深圳為區外唯一的兩間分店，深圳店已開業了約五個月。再一次證明深圳能吸引各菜系的精英，提供良好品質，實在是香港人的食褔。

更令人意外的是原來金光華廣場正舉辦Promotion，全場食店都有變相的七五折優惠，推廣期至5月尾，一定要趁機會再來。（記得先在6樓貴賓室領X優惠小冊子）

菜單：咸亨醉蝦（$32）、咸亨糟雞（$22）、咸亨醬鴨（$2x）、咸亨小炒王（$22）、咸亨阿婆羹（$18）、野生香椿卷（$5/條），差不多樣樣菜都係咸亨乜、咸亨物，實無問題啦。埋單共$142，打折後實付$107，抵到笑。埋單時仲送左包孔乙己好鍾意食的茴香豆（零售價$10），真係又食又拎呀！

結論：整體來說真係幾好，又多一間浙江菜館可供選擇，唔駛成日都係西湖春天。

咸亨醉蝦：忘記拍攝，冇相睇。好好味，又有酒香味，又有鮮蝦味，正，果D浸蝦的酒好香。據資料所載，紹興黄酒是做醉虾的唯一佳品，【醉倒了的虾甚至全身都充满诗意地在你面前轻轻挪动，那种感觉，就是西厢记里所写着的“玉体横陈、肌如凝脂”】。嘩，文人形容手法真是與別不同，但又幾貼切。之不過D蝦比較細隻，所以一碗有很多很多隻蝦，真係啜都啜到口軟。

兩小碟

咸亨糟雞：間間浙江食店的糟雞都幾好味，D雞都是無乜皮下脂肪，D肉又幾滑，成為小豬女於浙江店必叫的前菜。要再食。

咸亨醬鴨：好好味，D味同D西班牙火腿好相近，佐酒精選。如果閉上眼，真是以為食緊火腿。要再食。

野生香椿卷：好似春卷咁，不過入面全是野菜，即係炸素菜卷，OK啦。

咸亨小炒王：好似有韭菜、豆腐干、肉絲。炒埋一碟，咸咸地，味道幾搶口，OK啦。唔駛再試。

咸亨阿婆羹：見佢又係咸亨字頭，即管一試。材料有豬紅粒、蟹柳粒等，味道一般。唔好再食。

[回到我家]