Dimars: après una visita de la vila de Vic, tot lo monde anèt al Musèu Episcopal veire de subrebèlas pinturas e esculturas de las epòcas romana e gotica. La prangièira los liceans occitanistas seguèron recebuts dins un licèu de Vic, faguèron la coneissença de lors correspondents; dempuèi dos ans comunican per internet, cadun dins sa lenga. Los calandrons anèron a l'escòla de Calldetenes, al costat de Vic, aquò fa dos ans qu'aquel establiment es en relacion amb la nòstra calandreta. 60 dels 200 escolans que còmpta l'estructura s'acampèron per cantar en l'onor dels pichons cantaleses. Après los musicians nòstres joguèron dels aires auvernhats, lo rencontre s'acabèt per un escambi de presents. Lo ser tot lo grope partiguèt a Ripoll, qualques adultes anèron amb los liceans visitar un centre d'estudis ont se realiza dels prototipes per las entrepresas. D'autres visitèron lo monastèri ont Gerbèrt aviá estudiat. A la velhada los musicians cantaleses animèron un concèrt-bal dins una sala de Vic. Los catalans se poguèron iniciar a la danças auvernhatas.
Dimècres: lo matin se passèt a Montserrat, ont se tròba lo monastèri bastit als sègles XI e XIII, aquò's lo luòc mai visitat de Catalonha. L'òme que nos aculhiguèt seguèt estabosit quand li diguèrem que veniam d'Orlhac, sos enfants van a una escòla que pòrta lo nom de Gerbèrt d'Orlhac. De las explicacions seguèron donadas sus l'estatut de Catalonha, cadun poguèt pausar sas questions.
Dijòus: visita del Camp Nou, lo mai grand estadi d'Euròpa, lo tresen del monde, prenguèt un bon tròçdel matin, n'i a que serián jamai sortits del musèu. Se despartinèt al parc Güell davant los bastiments del Gaudí, puèi davalèron veire l'òbra mèstra d'aquel arquitècte, la Sagrada Família. Enfin lo cèrcle d'adrairament occitano-catalan (CAOC) recebèt los calandrons e los membres de las associacions occitanistas.
Aquel viatge agradèt, lo monde s'entrachèron que en parlar occitan podián comunicar amb los catalans. Aquò's estat una capitada suls plans pedagogic, cultural e toristic.