ÉG OG ÆTTFRÆÐIN
Ég hef töluverðan áhuga á ættfræði og hef haft lengi. Mér finnst gaman að afla upplýsinga og vita meira um ættingja mína og forfeður en gengur og gerist. Ég veit ekki hvaðan ég hef þennan áhuga ... sennilega hef ég tekið þetta upp hjá sjálfum mér vegna þess að ég kynntist aldrei öfum mínum og ömmum, nema föðurömmu minni, henni Steinunni. En það varði því miður ekki mjög lengi, hún lést í hárri elli þegar ég var 15 ára.
Til þessa dags hef ég sankað að mér öllum helstu upplýsingum um þá ættingja sem standa mér næst; móðursystkini mín og fjölskyldur þeirra. Faðir minn á engin systkin á lífi, en bræður hans tveir dóu mjög ungir.
Nú er komið að því að mig langar til að setja ættfræðina mína hingað inn á inn á netið og mun það gerast smátt og smátt næstu vikur og mánuði. Og auðvitað mun ég líka halda áfram að safna upplýsingum um jafnt náskylda og fjarskylda ættingja svo hér geti orðið góður grunnur upplýsinga í fyllingu tímans.
Hérna að ofan er nú hægt að velja tengil á síðu Hannesar J. Magnússonar og Sólveigu Einarsdóttur. Frekari ættartölur koma í tímans rás.
Hannes Jón - Febrúar 2002 |
