since 2002.06.09
-->TWINS效應vs.千機變
今年英皇重頭炮製左兩部暑期港產大片 一套係成龍做既"Highbinders" 另一套就係率先登場既"千機變" 兩片英皇均投資重本攝製 目的只有一個 就係要打正香港本地公司旗號、打正香港本地製作既旗號進軍國際電影市場 兩片中角色均大多起用英皇人 但要清楚一點 英皇呢種用人模式其實係一石三鳥既一著 第一，英皇歌手係現時樂壇最紅的一群，因此藉英皇既cast就已經吸引好多迷哥迷姐蜂擁而至、紛紛排隊買飛入場睇了 第二，用返自己人，時間好就，唔駛點麻煩就檔期、度檔期，唔駛阻住電影既拍攝進度，可以慳返一筆 第三，英皇如果真係成功將兩片打入國際市場，到時，英皇歌手唔單只局限於東南亞市場，而會係全球性市場，更加使英皇(娛樂及多媒體)集團本身和旗下藝員在國際間享有知名度 現在先談英皇2003暑期第一檔大片"千機變" 如果只睇其英文片名"The Twins Effect"，就會以為呢套係講Twins呢隊英皇二人女子組合點樣紅法或者係點解會咁紅既"紀錄片" 其實只睇片名，都唔知個故事係講d乜，係一種吸引力，起碼至少會吸引到Twins既fans就去睇"Twins效應" 個故事其實係講殭屍族中有一本載有預言既創世聖典"Day For Night"，內裡隱藏殭屍能取代人類成為地球主人既預言，一場以殭屍伯爵為首既殺戮、叛變行動即時爆發。嫌棄吸血既殭屍五皇子(陳冠希飾)成為殭屍伯爵所追殺既目標，目的要從佢身上取得殭屍皇族既血塊以能打開"Day For Night"。係殭屍族內訌既同時，一班職業為殭屍獵人(鄭伊健、鍾欣桐、何超儀飾)既人亦展開追殺殭屍既行動以挽救人類世界，可惜卻發生人屍戀，飾演鄭伊健妹的蔡卓妍卻戀上身為殭屍五皇子既陳冠希...... 成套片個idea其實不錯，意念也很新鮮 本片其實可以被介定為三類片種 一係恐怖片(細膽者適用，因為開頭果場火車站人屍戰都幾恐怖)、二係動作片(成套片離不開打，人屍對打、人人對打均經常出現)、三係笑片(成套片笑位都好多下，不過並唔係周星馳式既低趣味笑位) 電腦特技係本片用得好多，可能係科幻片既緣故，但值得讚賞既係，電腦特技很能配合畫面，比以前用電腦特技配真人既片有好大既進步 不過，成套片的確係略嫌悶左少少，成兩個幾鐘都係係度狂打，較不切合香港人既口味，但卻可能適合外國人品味(有濃厚中國功夫味道，再配以西片式既表達方式) 打之中又表現到情呢樣野係可取之處，唔單只係愛情，亦有談及父母子女情、兄妹情、姑嫂情、拍檔情等等，比其他同樣又係齋打既片來得有意思 呢套片有一個特色，你係唔會覺得自己睇緊港產片，儘管當中好多景係香港既街景，而且係大家都會去過既，例如奧海城、南灣、蘭桂坊一帶等，但套片畀人一種好強烈既西片感覺 可以講，如果"千機變"係本港成功架話，就其實只係"Twins效應"而已，換轉如果角色唔再由Twins、陳冠希等呢d香港teen idols來演繹，"千機變"係香港未必會係大熱片種 寄望呢套西片FEEL既港產片真係可以成功打入國際市場，為本港電影爭一口氣! @2003.06.28©channel CY 2002-03. A member of
Energetic Glamour Group.