影碟規格 

Specification

區域及公司
All Code全區碼
寰宇
Universe

畫面比例
-1.85:1
-無anamorphic
Single Layer DVD5

單面單層

聲音規格
國際版(日,英,粵語)
Dolby Digital 5.1 
DTS 5.1

國語

Dolby Stereo 2.0

字幕

繁體中文

簡體中文

英文

特別收錄
無

電影年份

2001

如果你未聽過<野狼>呢部戲絕對唔出奇, 因為上畫時得一間戲院上, 仲要係山卡拉咁遠既粉嶺戲院. 依家D C級港產片好興係一間戲院上畫, 話晒戲院上過, 賣埠都貴D. 呢D戲質素通常都唔多好, 演員來來去去都係果幾個濫拍王, 好似黃秋生呀, 黎耀祥呀, 李燦森呀. 我就睇過幾部, 講埋名都唔怕, 等大家唔好租/買/借黎睇, 好似<反骨仔>; <困獸> ; <正將>等, 卡士有時幾好, 但係劇情爛到暈, 絕對屣錢屣時間.

當然凡事都有例外, 呢部<野狼>就拍得四四正正, 雖然劇情照樣簡陋, 反駁位唔少, 但至少製作認真, 又有肉搏格鬥, 黑夜飛車同鬧市鎗戰, 低成本製作有咁既場面都少見. 故事講一個日本殺手一次行動時被襲, 令到佢腦裡面留低左粒彈頭. 粒彈頭唔能夠取出黎, 亦會隨時令佢無命. 為左唔想無啦啦死去, 佢不停追尋死亡既刺激, 就係咁就搭上左李燦森, 尹子維同何華超既打劫三人組. 另一方面飛虎隊神鎗手黃浩然因為一次錯殺同僚而內疚非常, 更被調離SDU派到追緝打劫三人組既專案小組. 就咁殺手同神鎗手就展開一段好似”喋血雙雄”式既亦敵亦友既兵賊關係. 劇情當然東抄抄西抄抄, 但都算節奏快. 遺憾係其實套戲有好多角色都有發展空間, 好似日本殺手同佢個拍擋; 林雪客串既前度警隊神鎗手; 打劫三人組既關係; 甚至日本殺手同黃浩然既內心描寫. 依家就全部角色都流於表面, 要奸就奸, 要死就死, 非常公式. 演員方面飾演日本殺手既澤田謙也(之前同張智霖拍過B計劃)演得唔錯, 身手亦好, 好多搏擊境頭都親身打,個樣有D似大隻既周華健.其他香港演員就當然例牌交行貨, 一方面劇本所限, 一方面當然一分錢一分貨.

P.S. 部戲其實係港日合作片, 好似近年港產片興既雜交片, 成部戲有成四種語言(日文, 英文, 國語同廣東話). 最好笑係連架仔講既英文對白仲正過我地D香港仔(尹子維除外, 因為佢基本係半個鬼仔). 但最勁既係李燦森居然講日文正過英文. 都可算係全片其中一個最有娛樂性既地方.

畫質

隻碟由寰宇發行, 比例係無anamorphic既1.85:1. 雖然部戲得一間戲院上,仲上得一個禮拜, 但係個菲林copy就好差. 花痕黑線白點全部都齊, 仲要有時曝光過龍. 搞到黑位灰色, 同埋有時好soft. Transfer亦都唔係好好, 背景無details, 人物邊位有九牙. 唯一讚既係顏色都算豐富, 打劫三人組D衫件件都五顏六色, 但係都無因為之前既缺點而失真.

音質

本片既音效有原聲DD5.1, DTS同國語2.0揀. 條DD5.1相當唔錯, 居然有定位,聲又夠清, 唔係一般港產片既假5.1. 條DTS相比仲唔夠5.1好, DTS有echo, 反而5.1無. 配樂同對白D聲都分得好清楚. 但係由於低成本關係, 音效就差D. 居然片中出現既咁多種鎗, 左輪; 曲尺; 狙擊鎗; 散彈鎗; Clock17等全部都係同一種爆杖聲: "卜". 真係有無搞錯.

特別收錄

無, 連預告片都無.

總結

套戲可以一看, 以新碟都係$30既價錢, 租同買都無乜分別. 如果想無無聊聊打發下時間都算唔錯既選擇. 唯一可惜部戲其實可以更好, 劇本好D, budget多D, 就絕對唔會淪為一間戲院上一個星期既賣埠片.

畫質:

音效:

特別收錄: zero

抵買度:

(為滿分)

回前頁